ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಜನವರಿ 7 ಎಂಬ ದಿನಾಂಕ ಅಚ್ಚಳಿಯದೇ ಶಾಶ್ವತವಾಗಿ ಉಳಿದುಕೊಂಡಿದೆ. ಕಳೆದ ವರ್ಷ ಇದೇ ದಿನದಲ್ಲಿ ನೇತೃತ್ವದ ಭಾರತೀಯ ತಂಡವು ಚಾರಿತ್ರಿಕ ಸಾಧನೆ ಮೆರೆದಿತ್ತು. ಆಸ್ಟ್ರೇಲಿಯಾದಲ್ಲಿ ಟೆಸ್ಟ್ ಸರಣಿ ಗೆದ್ದ ಭಾರತದ ಮೊದಲ ತಂಡವೆಂಬ ಕೀರ್ತಿಗೆ ಭಾಜನವಾಗಿತ್ತು. 2019ರ ವರೆಗೂ ಏಷ್ಯಾದ ಯಾವುದೇ ತಂಡವೂ ಆಸೀಸ್ ನೆಲದಲ್ಲಿ ಟೆಸ್ಟ್ ಸರಣಿ ಗೆದ್ದಿರಲಿಲ್ಲ. ಇದು ಕಾಂಗೂರು ಪಡೆಯ ವಿರುದ್ಧದ ಭಾರತದ ಗೆಲುವು ಎಷ್ಟೊಂದು ಸ್ಮರಣೀಯವೆನಿಸುತ್ತದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಕೋಚ್ ರವಿ ಶಾಸ್ತ್ರಿ ಅಂತೂ ಭಾರತದ ಸರಣಿ ಗೆಲುವನ್ನು ವಿಶ್ವಕಪ್ ಗೆಲುವಿಗೆ ಹೋಲಿಸಿದ್ದರು. ನಾಯಕ ವಿರಾಟ್ ಕೊಹ್ಲಿ ಸಹ ಜೀವಮಾನ ಸಾಧನೆ ಎಂದು ಹೆಮ್ಮೆ ವ್ಯಕ್ತಪಡಿಸಿದ್ದರು. 71 ವರ್ಷಗಳ ಇತಿಹಾಸದಲ್ಲಿ ಆಸ್ಟ್ರೇಲಿಯಾ ನೆಲದಲ್ಲಿ ಭಾರತ 2-1ರ ಅಂತರದಲ್ಲಿ ಬಾರ್ಡರ್-ಗವಾಸ್ಕರ್ ಟ್ರೋಫಿಯನ್ನು ಬಗಲಿಗೇರಿಸಿತ್ತು. ಭಾರತೀಯ ತ್ರಿವಳಿ ವೇಗಿಗಳಾದ ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಶಮಿ ಹಾಗೂ ಇಶಾಂತ್ ಶರ್ಮಾ ಜೊತೆಗೆ ಚೇತೇಶ್ವರ ಪೂಜಾರ ಭಾರತದ ಸರಣಿ ಗೆಲುವಿನಲ್ಲಿ ಮಹತ್ತರ ಕೊಡುಗೆಯನ್ನು ಸಲ್ಲಿಸಿದ್ದರು. ಇವರಿಗೆ ವಿರಾಟ್ ಕೊಹ್ಲಿ, ಅಜಿಂಕ್ಯ ರಹಾನೆ ಹಾಗೂ ಮಯಾಂಕ್ ಅಗರ್ವಾಲ್ ಉತ್ತಮ ಬೆಂಬಲವನ್ನು ನೀಡಿದ್ದರು. ಈ ಪೈಕಿ ಮಯಾಂಕ್ ಡೆಬ್ಯು ಸರಣಿಯು ಇದಾಗಿತ್ತು. ಮೂರು ಶತಕ ಹಾಗೂ ಅರ್ಧಶತಕ ಬಾರಿಸಿರುವ ಪೂಜಾರ 74.42ರ ಸರಾಸರಿಯಲ್ಲಿ 521 ರನ್ ಪೇರಿಸಿದ್ದರು. ರಿಷಬ್ ಪಂತ್ 350 ಹಾಗೂ ನಾಯಕ ಕೊಹ್ಲಿ 282 ರನ್ ಗಳಿಸಿದ್ದರು. ಬೌಲಿಂಗ್ ವಿಭಾಗದಲ್ಲಿ ಜಸ್ಪ್ರೀತ್ ಬುಮ್ರಾ 17ರ ಸರಾಸರಿಯಲ್ಲಿ 21 ವಿಕೆಟ್ ಪಡೆದು ಮಿಂಚಿದ್ದರು. ಇದರಲ್ಲಿ ಐದು ವಿಕೆಟ್ ಸಾಧನೆಯು ಸೇರಿದೆ. ಇವರಿಗೆ ತಕ್ಕ ಸಾಥ್ ನೀಡಿದ ಮೊಹಮ್ಮದ್ ಶಮಿ ಹಾಗೂ ಇಶಾಂತ್ ಶರ್ಮಾ ಅನುಕ್ರಮವಾಗಿ 16 ಹಾಗೂ 11 ವಿಕೆಟ್ಗಳನ್ನು ಕಬಳಿಸಿದರು. ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾರತೀಯ ಬೌಲರ್ಗಳು ಒಟ್ಟು 51 ವಿಕೆಟುಗಳನ್ನು ಪಡೆದಿದ್ದರು. ಅಲ್ಲದೆ ಒಟ್ಟು ಎಂಟು ಇನ್ನಿಂಗ್ಸ್ಗಳ ಪೈಕಿ ಏಳು ಬಾರಿ ಆಸೀಸ್ ತಂಡವನ್ನು ಆಲೌಟ್ ಮಾಡುವಲ್ಲಿ ಯಶ ಕಂಡಿತು. ಬಾಲ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಸಿಕ್ಕಿಬಿದ್ದು ಒಂದು ವರ್ಷದ ನಿಷೇಧಕ್ಕೊಳಗಾಗಿರುವ ಡೇವಿಡ್ ವಾರ್ನರ್ ಹಾಗೂ ಸ್ಟೀವ್ ಸ್ಮಿತ್ ಸೇವೆಯಿಂದ ಆಸೀಸ್ ವಂಚಿತವಾಗಿತ್ತು. ಅಲ್ಲದೆ ಗತಕಾಲದ ಆಸೀಸ್ ತಂಡಗಳಿಗೆ ಹೋಲಿಸಿದರೆ ಆಸೀಸ್ ದುರ್ಬಲವೆನಿಸಿತ್ತು. ಆದರೆ ಭಾರತೀಯ ಪಡೆ ಮಾತ್ರ ಶ್ರೇಷ್ಠ ಫಾರ್ಮ್ನಲ್ಲಿತ್ತು ಎಂಬುದನ್ನು ಅಲ್ಲಗಳೆಯಲು ಸಾಧ್ಯವಿಲ್ಲ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2umadQ5
