ಅಡಿಲೇಡ್: ಆಸ್ಟ್ರೇಲಿಯಾದ ಟಿ20 ಟೂರ್ನಿಯಲ್ಲಿ ಆಸೀಸ್ನ ಆರ್ಸಿಬಿ ತಂಡ ಎಂದೇ ಕರೆಸಿಕೊಂಡಿರುವ ತಂಡ ಸತತ 9 ಪಂದ್ಯಗಳನ್ನು ಸೋತು ವೈಫಲ್ಯದ ಕಡಲಲ್ಲಿ ಮುಳುಗಿದರೂ, ತಂಡದ ಫೀಲ್ಡರ್ ಅದ್ಭುತ ಕ್ಯಾಚ್ ಒಂದನ್ನು ಪಡೆದು ಭಾರಿ ಸುದ್ದಿಯಾಗಿದ್ದಾರೆ. ಭಾನುವಾರ ಅಡಿಲೇಡ್ ಓವಲ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಆಲ್ರೌಂಡ್ ಪ್ರದರ್ಶನ ನೀಡಿದ ಆತಿಥೇಯ ಸ್ಟ್ರೈಕರ್ಸ್ ತಂಡ, ಮೊದಲು ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಳ್ಳುವ ಮೂಲಕ 20 ಓವರ್ಗಳಲ್ಲಿ 6 ವಿಕೆಟ್ಗೆ 173 ರನ್ಗಳ ಸವಾಲಿನ ಮೊತ್ತ ದಾಖಲಿಸಿತು. ಬಳಿಕ ಗುರಿ ಬೆನ್ನತ್ತಿದ ಕಳೆದ ಬಾರಿಯ ಚಾಂಪಿಯನ್ಸ್ ರೆನೆಗೇಡ್ಸ್ ತಂಡವನ್ನು 110 ರನ್ಗಳಿಗೆ ಆಲ್ಔಟ್ ಮಾಡಿ 63 ರನ್ಗಳ ಭರ್ಜರಿ ಜಯ ತನ್ನದಾಗಿಸಿಕೊಂಡಿತು. ಇದರೊಂದಿಗೆ ರೆನೆಗೇಡ್ಸ್ ತಂಡ ಪ್ರಸಕ್ತ ಸಾಲಿನಲ್ಲಿ ಆಡಿದ 9 ಪಂದ್ಯಗಳನ್ನೂ ಸೋತು ಸುಣ್ಣವಾದರೆ, ಗೆಲುವಿನೊಂದಿಗೆ ಅಡಿಲೇಡ್ ತಂಡ ಅಂಣಕಪಟ್ಟಿಯಲ್ಲಿ 3ನೇ ಸ್ಥಾನಕ್ಕೇರಿದೆ. ಆರ್ಸಿಬಿ ತಂಡದ ಹೊಸ ಆಟಗಾರ ಆರೊನ್ ಪಿಂಚ್ ನಾಯಕತ್ವದ ರೆನೆಗೇಡ್ಸ್ ಅಂಕಪಟ್ಟಿಯ ಪಾತಾಳದಲ್ಲೇ ಉಳಿದಿದೆ. ಆದರೆ, ಇದಕ್ಕೂ ಮುನ್ನ ಮೆಲ್ಬೋರ್ನ್ ರೆನೇಗೇಡ್ಸ್ ತಂಡದ ಫೀಲ್ಡರ್ ಟಾಮ್ ಕೂಪರ್ ಅದ್ಭುತ ಕ್ಯಾಚ್ ಪಡೆದು ಪ್ರೇಕ್ಷಕರನ್ನು ಹುಬ್ಬೇರಿಸುವಂತೆ ಮಾಡಿದರು. ಡೀಪ್ ಮಿಡ್ವಿಕೆಟ್ ವಿಭಾಗದಲ್ಲಿ ಫೀಲ್ಡ್ ಮಾಡುತ್ತಿದ್ದ ಕೂಪರ್, ಬೌಲರ್ ಜಾಕ್ ವೈಲ್ಡರ್ಮತ್ ಬೌಲಿಂಗ್ನಲ್ಲಿ ಅಡಿಲೇಡ್ ಸ್ಟ್ರೈಕರ್ಸ್ನ ಬ್ಯಾಟ್ಸ್ಮನ್ ಫಿಲ್ ಸಾಲ್ಟ್ (18) ಸಿಕ್ಸರ್ ಬಾರಿಸಲು ನಡೆಸಿದ ಪ್ರಯತ್ನವನ್ನು ವಿಫಲಗೊಳಿಸಿದರು. ಅಷ್ಟೇ ಅಲ್ಲದೆ ಇನ್ನೇನು ಸಿಕ್ಸ್ ಆಗಬೇಕಿದ್ದ ಚೆಂಡನ್ನು ಅದ್ಭುತ ರೀತಿಯಲ್ಲಿ ಹಿಡಿದು ಪ್ರೇಕ್ಷಕರನ್ನು ಮಂತ್ರ ಮುಗ್ಧರನ್ನಾಗಿಸಿದರು. ಅಡಿಲೇಡ್ಸ್ ಪರ ರಶೀದ್ ಖಾನ್ ಹಾಫ್ ಸೆಂಚುರಿ!ಈ ಮಧ್ಯೆ ಅಡಿಲೇಡ್ ಸ್ಟ್ರೈಕರ್ಸ್ ತಂಡದ ರಶೀದ್ ಖಾನ್ ಹಾಫ್ ಸೆಂಚುರಿ ಬಾರಿಸಿದ್ದಾರೆ. ಆದರೆ, ಈ ಬಾರಿ ಬ್ಯಾಟ್ ಮೂಲಕವಲ್ಲ ಬಾಲ್ನಲ್ಲಿ. ಬಿಬಿಎಲ್ನಲ್ಲಿ ತಮ್ಮ ಕ್ಯಾಮಲ್ ಬ್ಯಾಟ್ ಮೂಲಕ ಸ್ಫೋಟಕ ಬ್ಯಾಟಿಂಗ್ ಮಾಡಿ ಅಬ್ಬರಿಸುತ್ತಿರುವ ರಶೀದ್ ಖಾನ್, ರೆನೆಗೇಡ್ಸ್ ವಿರುದ್ಧದ ಪಂದ್ಯದಲ್ಲಿ ಲೆಗ್ ಸ್ಪಿನ್ ಬಲೆ ಹೆಣೆದು 4 ಓವರ್ಗಳಲ್ಲಿ 19 ರನ್ ಬಿಟ್ಟುಕೊಟ್ಟು 2 ವಿಕೆಟ್ ಸಂಪಾದಿಸಿದರು. ಈ ಮೂಲಕ ಅಡಿಲೇಡ್ ತಂಡದ ಪರ ಬಿಬಿಎಲ್ನಲ್ಲಿ ಒಟ್ಟು 50 ವಿಕೆಟ್ಗಳನ್ನು ಪಡೆದ ಸಾಧನೆ ಮೆರೆದಿದ್ದಾರೆ. ಸಂಕ್ಷಿಪ್ತ ಸ್ಕೋರ್ ಅಡಿಲೇಡ್ ಸ್ಟ್ರೈಕರ್ಸ್: 20 ಓವರ್ಗಳಲ್ಲಿ 6 ವಿಕೆಟ್ಗೆ 173 (ವೆಲ್ಸ್ 58, ಶಾರ್ಟ್ 41 ವೆದರಾಲ್ಡ್ 27; ಕ್ಯಾಮರಾನ್ ಬಾಯ್ಸ್ 22ಕ್ಕೆ 1, ಸಮಿತ್ ಪಟೇಲ್ 26ಕ್ಕೆ 1). ಮೆಲ್ಬೋರ್ನ್ ರೆನೆಗೇಡ್ಸ್: 17.4 ಓವರ್ಗಳಲ್ಲಿ 110ಕ್ಕೆ ಆಲ್ಔಟ್ (ವೆಬ್ಸ್ಟರ್ 49; ಹೆಡ್ 26ಕ್ಕೆ 2, ಸಿಡ್ಲ್ 14ಕ್ಕೆ 3, ರಶೀದ್ 19ಕ್ಕೆ 2). ಟಾಮ್ ಕೂಪರ್ ಪಡೆದ ಅದ್ಭುತ ಕ್ಯಾಚ್ನ ವಿಡಿಯೋ ಈ ಟ್ವೀಟ್ನಲ್ಲಿ ವೀಕ್ಷಿಸಬಹುದಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2RaFoWh
