ಜಿನೇವಾ: ತಳಿ ಪತ್ತೆಯಾದ ಬಳಿಕ ಸುಮಾರು ಐದು ಲಕ್ಷ ಮರಣ ಪ್ರಕರಣಗಳು ದಾಖಲಾಗಿವೆ. ಇದು ದುರಂತವನ್ನೂ ಮೀರಿದ್ದು ಎಂದು () ಮಂಗಳವಾರ ಹೇಳಿದೆ. ಓಮಿಕ್ರಾನ್ ರೂಪಾಂತರಿ ವೈರಸ್ ಕಳವಳಕಾರಿ ತಳಿ ಎಂದು ನವೆಂಬರ್ನಲ್ಲಿ ಘೋಷಣೆ ಮಾಡಿದ ಸಂದರ್ಭದಿಂದ ಜಗತ್ತಿನಾದ್ಯಂತ 130 ಮಿಲಿಯನ್ ಪ್ರಕರಣಗಳು ವರದಿಯಾಗಿದ್ದರೆ, 5 ಲಕ್ಷ ಸೋಂಕಿತರು ಮೃತಪಟ್ಟಿದ್ದಾರೆ ಎಂದು ಡಬ್ಲ್ಯೂಎಚ್ಒ () ಘಟನಾ ವ್ಯವಸ್ಥಾಪಕ ಅಬ್ದಿ ಮಹಮ್ಮದ್ ತಿಳಿಸಿದ್ದಾರೆ. ಓಮಿಕ್ರಾನ್ ಬಹಳ ವೇಗವಾಗಿ ಹರಡುವ ಸಾಮರ್ಥ್ಯದ ಕಾರಣದಿಂದ ಜಗತ್ತಿನ ಅತ್ಯಂತ ಪ್ರಬಲ ಕೋವಿಡ್ ತಳಿ ಎನಿಸಿದ್ದ ಡೆಲ್ಟಾ ರೂಪಾಂತರಿಯನ್ನು ಹಿಂದಿಕ್ಕಿ ಪ್ರಸರಣವಾಗಿದೆ. ಇದರಿಂದ ಉಂಟಾಗುವ ಕಾಯಿಲೆ ತೀವ್ರ ಸ್ವರೂಪದ್ದು ಅಲ್ಲವಾದರೂ ಪರಿಣಾಮ ಬೀರಿರುವುದು ಸತ್ಯ ಎಂದು ಹೇಳಿದ್ದಾರೆ. "ಪರಿಣಾಮಕಾರಿ ಲಸಿಕೆಯ ಯುಗದಲ್ಲಿ, ಅರ್ಧ ಮಿಲಿಯನ್ನಷ್ಟು (ಐದು ಲಕ್ಷ) ಜನರು ಸಾಯುತ್ತಿದ್ದಾರೆ ಎಂದರೆ, ಇದರಲ್ಲಿ ನಿಜಕ್ಕೂ ಏನೋ ಇದೆ ಎಂದರ್ಥ" ಎಂದು ಸಾಮಾಜಿಕ ಮಾಧ್ಯಮ ವಾಹಿನಿಗಳ ಜತೆಗಿನ ನೇರ ಸಂವಾದದ ವೇಳೆ ಮಹಮ್ಮದ್ ಕಳವಳ ವ್ಯಕ್ತಪಡಿಸಿದ್ದಾರೆ. "ಓಮಿಕ್ರಾನ್ ಸೌಮ್ಯ ಸ್ವರೂಪದ್ದು ಎಂದು ಎಲ್ಲರೂ ಹೇಳುತ್ತಿದ್ದಾರೆ. ಆದರೆ, ಓಮಿಕ್ರಾನ್ ಪತ್ತೆಯಾದ ಬಳಿಕ ಈವರೆಗೂ ಐದು ಲಕ್ಷ ಜನರು ಕೋವಿಡ್ ಸೋಂಕಿನಿಂದ ಮೃತಪಟ್ಟಿದ್ದಾರೆ ಎಂಬ ಅಂಶವನ್ನು ಮರೆಯುತ್ತಿದ್ದಾರೆ" ಎಂದು ತಿಳಿಸಿದ್ದಾರೆ. ಓಮಿಕ್ರಾನ್ ಪ್ರಕರಣಗಳ ಬೃಹತ್ ಸಂಖ್ಯೆಯು ದಿಗ್ಭ್ರಮೆ ಉಂಟುಮಾಡುತ್ತದೆ. ನಮಗೆ ತಿಳಿದಿರುವ ಸಂಖ್ಯೆಗಿಂತಲೂ ಓಮಿಕ್ರಾನ್ನ ವಾಸ್ತವ ಪ್ರಕರಣಗಳು ಹಾಗೂ ಸಾವಿನ ಸಂಖ್ಯೆ ಖಂಡಿತಾ ಅಧಿಕವಾಗಿ ಇರುತ್ತದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಕೋವಿಡ್ 19ರ ತಾಂತ್ರಿಕ ವಿಭಾಗದ ಮುಖ್ಯಸ್ಥೆ ಮರಿಯಾ ವಾನ್ ಕೆರ್ಖೋವ್ ಹೇಳಿದ್ದಾರೆ. "ಈ ಹಿಂದಿನ ಕೋವಿಡ್ ಏರಿಕೆಗಳು ಏನೂ ಅಲ್ಲ ಎಂಬಂತೆ ಓಮಿಕ್ರಾನ್ ಮಾಡಿದೆ. ನಾವು ಇನ್ನೂ ಸಾಂಕ್ರಾಮಿಕದ ಮಧ್ಯಭಾಗದಲ್ಲಿ ಇದ್ದೇವೆ. ನಾವು ಅದರ ಅಂತ್ಯದತ್ತ ಸಾಗುತ್ತೇವೆ ಎಂಬ ವಿಶ್ವಾಸ ಇದೆ. ಅನೇಕ ದೇಶಗಳು ಓಮಿಕ್ರಾನ್ ತಳಿಯಲ್ಲಿ ತಮ್ಮ ಉತ್ತುಂಗ ಸ್ಥಿತಿಯನ್ನು ಇನ್ನೂ ದಾಟಿಲ್ಲ" ಎಂದು ಅಭಿಪ್ರಾಯಪಟ್ಟಿದ್ದಾರೆ. ಕೆಲವು ವಾರಗಳಿಂದ ಸತತವಾಗಿ ಸಾವಿನ ಸಂಖ್ಯೆಯಲ್ಲಿ ಏರಿಕೆ ಆಗುತ್ತಿರುವುದು ತೀವ್ರ ಕಳವಳಕಾರಿ ಸಂಗತಿ. ಈ ವೈರಸ್ ಈಗಲೂ ಅಪಾಯಕಾರಿಯಾಗಿ ಮುಂದುವರಿದಿದೆ ಎಂದು ಎಚ್ಚರಿಕೆ ನೀಡಿದ್ದಾರೆ. ಓಮಿಕ್ರಾನ್ ತಳಿಯ ನಾಲ್ಕು ಉಪ ವಿಭಾಗಗಳ ಬಗ್ಗೆ ವಿಶ್ವ ಆರೋಗ್ಯ ಸಂಸ್ಥೆ ನಿಗಾ ವಹಿಸಿದೆ. BA.1 ಉಪ ತಳಿ ಪ್ರಬಲವಾಗಿದ್ದರೆ, BA.2 ಹೆಚ್ಚು ಪ್ರಸರಣ ಶಕ್ತಿ ಹೊಂದಿದೆ ಮತ್ತು ಓಮಿಕ್ರಾನ್ ಪ್ರಕರಣಗಳ ಪಾಲು ಹೆಚ್ಚಳವಾಗುವುದರಲ್ಲಿ ಪ್ರಮುಖ ಪಾತ್ರ ವಹಿಸುವ ನಿರೀಕ್ಷೆ ಇದೆ. BA.1 ಉಪ ತಳಿಗಿಂತ BA.2 ಹೆಚ್ಚು ಗಂಭೀರ ಕೋವಿಡ್ ಕಾಯಿಲೆಗೆ ಕಾರಣವಾಗುತ್ತದೆ ಎನ್ನುವುದಕ್ಕೆ ಇದುವರೆಗೂ ಯಾವುದೇ ಸುಳಿವು ಸಿಕ್ಕಿಲ್ಲ. ಇದು ಖಚಿತ ಪುರಾವೆಯನ್ನು ಸಂಗ್ರಹಿಸಲು ಇನ್ನೂ ಆರಂಭಿಕ ದಿನಗಳಾಗಿವೆ ಎಂದು ಕೆರ್ಖೋವ್ ಹೇಳಿದ್ದಾರೆ. BA.1 ಮತ್ತು BA.2 ತಳಿಗಳು ಎರಡೂ ವ್ಯಕ್ತಿಯೊಬ್ಬರಿಗೆ ಏಕಕಾಲದಲ್ಲಿ ತಗುಲುವುದು ಸಾಧ್ಯವೇ ಎನ್ನುವುದು ಇದುವರೆಗೂ ಖಚಿತವಾಗಿಲ್ಲ ಎಂದು ಮಹಮ್ಮದ್ ತಿಳಿಸಿದ್ದಾರೆ. 2019ರ ಡಿಸೆಂಬರ್ನಲ್ಲಿ ಚೀನಾದಲ್ಲಿ ಕೋವಿಡ್ 19 ಕಾಣಿಸಿಕೊಂಡ ಬಳಿಕ ಸುಮಾರು 5.75 ಮಿಲಿಯನ್ ಮಂದಿಯನ್ನು ಬಲಿ ತೆಗೆದುಕೊಂಡಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ಜಾಗತಿಕವಾಗಿ ಸುಮಾರು 10.25 ಬಿಲಿಯನ್ ಡೋಸ್ ಲಸಿಕೆಗಳನ್ನು ನೀಡಲಾಗಿದೆ.
from India & World News in Kannada | VK Polls https://ift.tt/xCTe1JY
