ಕಾಬೂಲ್: ರಾಜಧಾನಿ ಕಾಬೂಲ್ನಲ್ಲಿರುವ ಹಮೀದ್ ಕರ್ಜೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಸಮೀಪ ಭಾನುವಾರ ಏಳು ಮಂದಿ ಅಫ್ಘನ್ ನಾಗರಿಕರು ಮೃತಪಟ್ಟಿದ್ದಾರೆ ಎಂದು ಬ್ರಿಟಿಷ್ ರಕ್ಷಣಾ ಸಚಿವಾಲಯ ತಿಳಿಸಿದ್ದಾರೆ. ಅಫ್ಘಾನಿಸ್ತಾನದಿಂದ ವಿದೇಶಿಗರು ಸೇರಿದಂತೆ ಸಾವಿರಾರು ಮಂದಿ ಹೊರಬರಲು ಪ್ರಯತ್ನಿಸುತ್ತಿದ್ದಾರೆ. ವಿಮಾನ ನಿಲ್ದಾಣದ ಒಳಭಾಗವನ್ನು ಅಮೆರಿಕ ಹಾಗೂ ಪಡೆಗಳು ನಿಯಂತ್ರಿಸುತ್ತಿದ್ದರೂ, ಅದರ ಹೊರಗಿನ ಸಂಪೂರ್ಣ ಪ್ರದೇಶಗಳು ಉಗ್ರರ ಹಿಡಿತದಲ್ಲಿವೆ. 'ಕಾಬೂಲ್ನ ಜನಜಂಗುಳಿಯಲ್ಲಿ ಮೃತಪಟ್ಟ ಏಳು ಅಫ್ಘನ್ ನಾಗರಿಕರ ಕುಟುಂಬದವರಿಗೆ ನಮ್ಮ ಪ್ರಾಮಾಣಿಕ ಸಂತಾಪಗಳನ್ನು ಸಲ್ಲಿಸುತ್ತೇವೆ' ಎಂದು ಬ್ರಿಟಿಷ್ ರಕ್ಷಣಾ ಸಚಿವಾಲಯದ ವಕ್ತಾರರು ಹೇಳಿಕೆ ನೀಡಿದ್ದಾರೆ. 'ಅಲ್ಲಿನ ಪರಿಸ್ಥಿತಿ ಬಹಳ ಸವಾಲಿದ್ದಾಗಿದೆ. ಸನ್ನಿವೇಶವು ಸಾಧ್ಯವಾದಷ್ಟು ಸುರಕ್ಷಿತ ಹಾಗೂ ಭದ್ರವಾಗಿರುವಂತೆ ನಿರ್ವಹಿಸಲು ಎಲ್ಲವನ್ನೂ ಪ್ರಯತ್ನಿಸುತ್ತಿದ್ದೇವೆ. ಅಫ್ಘಾನಿಸ್ತಾನವನ್ನು ತೊರೆಯಲು ಸಾವಿರಾರು ಮಂದಿ ನಾಗರಿಕರು ಪ್ರಯತ್ನಿಸುತ್ತಿದ್ದಾರೆ. ಯಾವ ದೇಶಕ್ಕೂ ಪ್ರತಿಯೊಬ್ಬರನ್ನೂ ಅಲ್ಲಿಂದ ಹೊರಗೆ ಕರೆತರಲು ಸಾಧ್ಯವಾಗಿಲ್ಲ' ಎಂದು ತಿಳಿಸಿದ್ದಾರೆ. ಈ ಏಳು ಮಂದಿದ್ದು ಸತ್ತಿದ್ದು ಹೇಗೆ ಎನ್ನುವುದು ಸ್ಪಷ್ಟವಾಗಿಲ್ಲ. ವಿಮಾನ ನಿಲ್ದಾಣದ ಒಳಗೆ ಮತ್ತು ಹೊರಗೆ ಉಂಟಾಗಿರುವ ಜನಜಂಗುಳಿ, ಗಲಭೆಗಳ ನಡುವೆ ಕಾಲ್ತುಳಿತದಿಂದ ಜನರು ಮೃತಪಟ್ಟಿದ್ದಾರೆ ಎನ್ನಲಾಗುತ್ತಿದೆ. ಹೊರಗೆ ತಾಲಿಬಾನ್ ಕ್ರೌರ್ಯ ಮುಂದುವರಿದಿದ್ದು, ವಿಮಾನ ನಿಲ್ದಾಣದೊಳಗೆ ಜನರು ಪ್ರವೇಶಿಸದಂತೆ ಅಡ್ಡಗಟ್ಟುತ್ತಿದ್ದಾರೆ.
from India & World News in Kannada | VK Polls https://ift.tt/380K4XK
