ಏಕೀಕೃತ ವಿಶ್ವವಿದ್ಯಾಲಯ ಮತ್ತು ನಿರ್ವಹಣಾ ವ್ಯವಸ್ಥೆ () ಮೂಲಕವೇ ಪದವಿ ಕಾಲೇಜಿಗೆ ಪಡೆಯಬೇಕೆಂದು ಘೋಷಿಸಿದ್ದ ರಾಜ್ಯ ಸರಕಾರ ಕೇವಲ ಎರಡು ದಿನದಲ್ಲಿ ಯೂಟರ್ನ್ ಹೊಡೆದಿದೆ. ಈಗ ಆಫ್ಲೈನ್ನಲ್ಲಿ ಕಾಲೇಜುಗಳ ಪ್ರವೇಶಕ್ಕೆ ಅರ್ಜಿ ಸಲ್ಲಿಸಲು ವಿದ್ಯಾರ್ಥಿಗಳಿಗೆ ತಿಳಿಸಿದ್ದು, ಬಳಿಕ ಕಾಲೇಜುಗಳು ವಿದ್ಯಾರ್ಥಿಗಳ ವಿವರಗಳನ್ನು ಪೋರ್ಟಲ್ನಲ್ಲಿ ಅಪ್ಲೋಡ್ ಮಾಡಬೇಕು ಎಂದು ಹೇಳಿದೆ. ಸೋಮವಾರ ಅಧಿಕೃತವಾಗಿ ಆರಂಭವಾಗಿದ್ದ ಯುಯುಸಿಎಂಎಸ್ ಮೂಲಕ ವಿದ್ಯಾರ್ಥಿಗಳ ದಾಖಲಾತಿ ಪ್ರಕ್ರಿಯೆ ನಡೆಸಬೇಕು ಎಂದು ಉನ್ನತ ಶಿಕ್ಷಣ ಇಲಾಖೆ ಆದೇಶ ಹೊರಡಿಸಿತ್ತು. ದ್ವಿತೀಯ ಪಿಯು ಫಲಿತಾಂಶದ ಬಳಿಕ ಹಲವು ಕಾಲೇಜುಗಳು ಆಫ್ಲೈನ್ನಲ್ಲಿ ಪ್ರವೇಶಾತಿ ಅರ್ಜಿ ಸ್ವೀಕರಿಸಲು ಪ್ರಾರಂಭಿಸಿದ್ದವು. ಅದನ್ನೂ ನಿಲ್ಲಿಸಿ ಯುಯುಸಿಎಂಎಸ್ಗೆ ಕಾಯುವಂತೆ ಸರ್ಕಾರ ಸೂಚಿಸಿತ್ತು. ಯುಯುಸಿಎಂಎಸ್ನಲ್ಲಿ ವಿದ್ಯಾರ್ಥಿಗಳಿಗೆ ಉನ್ನತ ಶಿಕ್ಷಣ ಇಲಾಖೆ ಅನೇಕ ಆಯ್ಕೆಗಳನ್ನು ನೀಡಿತ್ತು. ಕಾಲೇಜುಗಳನ್ನು ಆಯ್ಕೆ ಮಾಡುವ, ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವ ಮತ್ತು PayGov ವ್ಯವಸ್ಥೆಯ ಮೂಲಕ ಶುಲ್ಕ ಪಾವತಿಸುವ ಆಯ್ಕೆಯನ್ನು ವಿದ್ಯಾರ್ಥಿಗಳಿಗೆ ಕಾಲೇಜು ಪ್ರವೇಶ ಪ್ರಕ್ರಿಯೆಯನ್ನು ಸರಳ ಮಾಡಿತ್ತು. ಆದರೆ, ಯುಯುಸಿಎಂಎಸ್ ಆರಂಭವಾದ ಸೋಮವಾರ ಸಂಜೆಯೇ ಮೌಖಿಕವಾಗಿ ಹಲವು ಕಾಲೇಜುಗಳಿಗೆ ಪ್ರವೇಶಾತಿ ಅರ್ಜಿಗಳನ್ನು ಭೌತಿಕವಾಗಿ ಸ್ವೀಕರಿಸಿ, ಮೆರಿಟ್ ಪಟ್ಟಿಯನ್ನು ಸಿದ್ಧಪಡಿಸಲು ಇಲಾಖೆ ಸೂಚಿಸಿದೆ. ಈ ಬಗ್ಗೆ ಕಾಲೇಜು ಶಿಕ್ಷಣ ಇಲಾಖೆ ಆಯುಕ್ತ ಪ್ರದೀಪ್ ಪಿ ಪ್ರತಿಕ್ರಿಯಿಸಿದ್ದು, ಹೊಸ ವ್ಯವಸ್ಥೆಯ ಬಗ್ಗೆ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನದ ಅಗತ್ಯವಿದೆ. ಅವರಿಗೆ ಕೋರ್ಸ್ ಆಯ್ಕೆ ಮಾಡಲು ಮಾತ್ರ ಗೊತ್ತಿದೆ. ಆದರೆ, ಈ ಬಾರಿ ಅವರು ವಿಷಯಗಳನ್ನು ಕೂಡ ಆಯ್ಕೆ ಮಾಡಬೇಕಾಗುತ್ತದೆ. ಅದಕ್ಕಾಗಿ ಈ ಸಲ ಪ್ರವೇಶ ಪ್ರಕ್ರಿಯೆಯನ್ನು ಆಫ್ಲೈನ್ನಲ್ಲಿಯೇ ಮುಂದುವರಿಸಲು ನಿರ್ಧರಿಸಿದ್ದೇವೆ ಎಂದಿದ್ದಾರೆ. ಯುಯುಸಿಎಂಎಸ್ ಅಡಿಯಲ್ಲಿ ಪ್ರವೇಶ ಮಾಡ್ಯೂಲ್ನ ಇತರ ಭಾಗಗಳು ಈ ವರ್ಷವೇ ಆರಂಭವಾಗುತ್ತವೆ. ವಿಶ್ವವಿದ್ಯಾನಿಲಯದ ಅನುಮೋದನೆಗಾಗಿ ಕಾಲೇಜುಗಳು ವೆಬ್ಸೈಟ್ನಲ್ಲಿ ಪ್ರವೇಶ ಪಡೆದ ವಿದ್ಯಾರ್ಥಿಗಳ ಪಟ್ಟಿಯನ್ನು ಸಲ್ಲಿಸಬೇಕು. ವೆಬ್ಸೈಟ್ನಲ್ಲಿ ಲಭ್ಯವಿರುವ ವಿವಿಧ ಕಾಲೇಜು ಆಯ್ಕೆಗಳನ್ನು ವಿದ್ಯಾರ್ಥಿಗಳು ನೋಡಬಹುದು. ಆದರೆ, ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವ ಆಯ್ಕೆಯನ್ನು ಮಾತ್ರ ಈ ವರ್ಷ ಜಾರಿ ಮಾಡಲ್ಲ ಎಂದು ಕಾಲೇಜು ಶಿಕ್ಷಣದ ಆಯುಕ್ತ ಪ್ರದೀಪ್ ಪಿ ಹೇಳಿದ್ದಾರೆ. ಹೊಸ ಮಾದರಿಯ ಪದವಿ ಕೋರ್ಸ್ಗಳಲ್ಲಿ ಎರಡು ಐಚ್ಚಿಕ ಮತ್ತು ಆಯ್ಕೆ ವಿಷಯಗಳನ್ನು ವಿದ್ಯಾರ್ಥಿಗಳು ಆಯ್ಕೆ ಮಾಡಬೇಕಾಗಿದೆ. 2021-22ರ ಶೈಕ್ಷಣಿಕ ವರ್ಷದಿಂದಲೇ ಈ ಮಾದರಿ ಕೋರ್ಸ್ ರಾಜ್ಯದಲ್ಲಿ ಜಾರಿಯಾಗಲಿದೆ. ಕಾಲೇಜು ಶಿಕ್ಷಣ ಇಲಾಖೆಯ ಆಫ್ಲೈನ್ ಪ್ರವೇಶದ ನಡೆ ಖಾಸಗಿ ಕಾಲೇಜುಗಳಿಗೆ ಬಿಗ್ ರಿಲೀಫ್ ನೀಡಿದೆ. ಹಲವು ಕಾಲೇಜುಗಳು ಯುಯುಸಿಎಂಎಸ್ ಘೋಷಣೆಯ ಮುಂಚೆಯೇ ಪ್ರವೇಶ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದ್ದವು. ಆಫ್ಲೈನ್ ಪ್ರವೇಶ ಪ್ರಕ್ರಿಯೆಯಿಂದ ಆ ಕಾಲೇಜುಗಳು ಬಳಿಕ ವಿದ್ಯಾರ್ಥಿಗಳ ದಾಖಲಾತಿಯನ್ನು ಅಪ್ಲೋಡ್ ಮಾಡಬಹುದಾಗಿದೆ. ಓಪನ್ ಆಗದ ಯುಯುಸಿಎಂಎಸ್ ವೆಬ್ಸೈಟ್..!ಯುಯುಸಿಎಂಎಸ್ ವೆಬ್ಸೈಟ್ ಮಂಗಳವಾರ ಓಪನ್ ಆಗದೇ ವಿದ್ಯಾರ್ಥಿಗಳು ಸಮಸ್ಯೆ ಅನುಭವಿಸಿದ್ದರು. ಎರಡು ಗಂಟೆಗಳ ಕಾಲ ವೆಬ್ಸೈಟ್ನಲ್ಲಿ ತಾಂತ್ರಿಕ ಸಮಸ್ಯೆ ಕಾಣಿಸಿಕೊಂಡಿತ್ತು. ಅದನ್ನು ಈಗ ಸರಿಪಡಿಸಲಾಗಿದೆ. ವೆಬ್ಸೈಟ್ನಲ್ಲಿ ಕಾಣಿಸಿಕೊಂಡ ತಾಂತ್ರಿಕ ದೋಷಕ್ಕೂ ಆಫ್ಲೈನ್ ಪ್ರವೇಶ ಪ್ರಕ್ರಿಯೆ ಮುಂದುವರಿಕೆಗೂ ಯಾವುದೇ ಸಂಬಂಧವಿಲ್ಲ ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.
from India & World News in Kannada | VK Polls https://ift.tt/3Ddq9mV
