ಎಚ್.ಪಿ. ಪುಣ್ಯವತಿ, ಬೆಂಗಳೂರು: ತಾಲಿಬಾನಿಗಳ ಅಟ್ಟಹಾಸದಿಂದ ತತ್ತರಿಸಿರುವ ಆಫ್ಘಾನಿಸ್ತಾನದ ಬಿಕ್ಕಟ್ಟಿನ ಪರಿಣಾಮ ರಾಜ್ಯದ ಡ್ರೈಫ್ರೂಟ್ಸ್ ಉದ್ಯಮದ ಮೇಲೂ ಬಿದ್ದಿದೆ. ಆಫ್ಘಾನಿಸ್ತಾನದಿಂದ ಬರುತ್ತಿದ್ದ ನಾನಾ ಡ್ರೈಫ್ರೂಟ್ಸ್ಗಳ ಸರಬರಾಜು ಸಂಪೂರ್ಣ ಸ್ಥಗಿತಗೊಂಡಿದೆ. ಈ ಹಿಂದೆ ದೇಶಕ್ಕೆ ಹಡಗಿನ ಮೂಲಕ ಬಂದಿದ್ದ ಡ್ರೈಫ್ರೂಟ್ಗಳನ್ನೂ ಮಧ್ಯವರ್ತಿಗಳು ದಾಸ್ತಾನು ಮಾಡಿಟ್ಟುಕೊಂಡಿದ್ದಾರೆ. ಹೀಗಾಗಿ ಡ್ರೈಫ್ರೂಟ್ಸ್ಗಳಿಗೆ ಬೇಡಿಕೆ ಮತ್ತು ಬೆಲೆಯಲ್ಲಿಏರಿಕೆಯಾಗಿದೆ ಎನ್ನಲಾಗಿದೆ. ಆಫ್ಘಾನಿಸ್ತಾನದಿಂದ ರಾಜಧಾನಿ ಬೆಂಗಳೂರು ಸೇರಿದಂತೆ ರಾಜ್ಯದ ನಾನಾ ಭಾಗಗಳಿಗೆ ಕೇಸರಿ, ಅಂಜೂರ, ಪೈನಾಬೀಜ(ಪೈನ್ ನಟ್ಸ್), ಮಾಮ್ರಾ ಬಾದಾಮ್, ಆಲೀವ್ ಆಯಿಲ್, ಕಾಬೂಲ್ ಕಪ್ಪು ದ್ರಾಕ್ಷಿ ಮತ್ತು ಎಲ್ಲಾ ಬಗೆಯ ಸ್ಪೈಸಸ್(ಮಸಾಲೆ ಪದಾರ್ಥಗಳು) ಬರುತ್ತವೆ. ಇದೀಗ ಅವೆಲ್ಲವೂ ಸ್ಥಗಿತಗೊಂಡಿವೆ. ಹೀಗಾಗಿ ಸಂಗ್ರಹ ಇರುವಷ್ಟು ಮಾರಾಟ ಮಾಡಲಾಗುತ್ತಿದೆ. ಇದರಿಂದಾಗಿ ಕೆಲವು ಡ್ರೈಫ್ರೂಟ್ಸ್ನ ಬೆಲೆ ದುಪ್ಪಟ್ಟಾದರೆ, ಮತ್ತೆ ಕೆಲವು ಶೇ.70ರಷ್ಟು ಏರಿಕೆಯಾಗಿವೆ ಎನ್ನುತ್ತಾರೆ ಕಂಟೋನ್ಮೆಂಟ್ ಡ್ರೈಫ್ರೂಟ್ಸ್ ಮರ್ಚೆಂಟ್ಸ್ ಅಸೋಸಿಯೇಷನ್ ಅಧ್ಯಕ್ಷರೂ, ರಸೆಲ್ ಮಾರ್ಕೆಟ್ ಡೆಲಿಷಿಯಸ್ ಡ್ರೈಫ್ರೂಟ್ಸ್ ಮಾರಾಟ ಮಳಿಗೆಯ ಮಾಲೀಕರೂ ಆದ ಮೊಹಮದ್ ಇದ್ರೀಸ್ ಚೌಧರಿ. ಗೋವಾ, ಮಂಗಳೂರು ಭಾಗಗಳಿಂದ ಗೋಡಂಬಿ, ಮಹಾರಾಷ್ಟ್ರದಿಂದ ದ್ರಾಕ್ಷಿ, ಇರಾನ್ನಿಂದ ಪಿಸ್ತಾ, ಕ್ಯಾಲಿಫೋರ್ನಿಯಾದಿಂದ ಬಾದಾಮಿ, ಕಾಶ್ಮೀರದಿಂದ ವಾಲ್ನಟ್ ಇತ್ಯಾದಿಗಳು ಬರುತ್ತವೆ. ಆದರೆ ಆಫ್ಘಾನಿಸ್ತಾನದಿಂದ ಬರುವ ಡ್ರೈಫ್ರೂಟ್ಸ್ನಲ್ಲಿ ಅತಿ ಹೆಚ್ಚು ಪೌಷ್ಟಿಕಾಂಶಗಳನ್ನು ಒಳಗೊಂಡಿದ್ದು, ಇವುಗಳಿಗೆ ಬೇಡಿಕೆ ಹೆಚ್ಚು. ಆಫ್ಘಾನಿಸ್ತಾನದ ಒಣಹಣ್ಣುಗಳು ದುಬಾರಿಯಾದರೂ ಅವುಗಳಲ್ಲಿ ಆರೋಗ್ಯಕ್ಕೆ ಪೂರಕವಾದ ಗುಣಗಳನ್ನು ಹೊಂದಿದೆ. ರಕ್ತ ಶುದ್ಧಿ, ದೇಹವನ್ನು ತಂಪಾಗಿಡುವುದು, ಕ್ಯಾನ್ಸರ್ ನಿಯಂತ್ರಣ, ಮುಪ್ಪು ತಡೆಯುವುದು, ಸಕ್ಕರೆ ಕಾಯಿಲೆ-ಬಿಪಿ ನಿಯಂತ್ರಣ ಹೀಗೆ ನಾನಾ ರೀತಿಯಲ್ಲಿ ಉಪಯುಕ್ತವಾಗಿವೆ ಎಂಬ ಕಾರಣಕ್ಕಾಗಿ ಇವುಗಳಿಗೆ ಹೆಚ್ಚು ಬೇಡಿಕೆಯಿದೆ. ಡ್ರೈಫ್ರೂಟ್ಸ್ಗಳ ಸೇವನೆಯಿಂದ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ. ಹೀಗಾಗಿ ಕೋವಿಡ್ ಹಿನ್ನೆಲೆಯಲ್ಲಿ ಕಳೆದ ಒಂದು ವರ್ಷದಿಂದ ಎಲ್ಲಾ ಬಗೆಯ ಡ್ರೈಫ್ರೂಟ್ಸ್ಗಳಿಗೆ ಹೆಚ್ಚಿನ ಬೇಡಿಕೆ ಸೃಷ್ಟಿಯಾಗಿತ್ತು. ಇದೇ ವೇಳೆ ಡ್ರೈಫ್ರೂಟ್ಸ್ನ ಕೊರತೆ ಉಂಟಾಗಿದೆ. ದೀಪಾವಳಿಗೂ ಹೊಡೆತಡ್ರೈಫ್ರೂಟ್ಸ್ ಅತಿ ಹೆಚ್ಚು ಬಳಕೆಯಾಗುವುದೆಂದರೆ ದೀಪಾವಳಿ ಹಬ್ಬಕ್ಕೆ(ನಂತರ ರಂಜಾನ್). ಹಬ್ಬ ಒಂದು ತಿಂಗಳಿರುವಾಗಲೇ ಸಾಕಷ್ಟು ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳಲಾಗುತ್ತಿತ್ತು. ಆದರೆ ಈ ಬಾರಿ ತಾಲಿಬಾನಿಗಳಿಂದಾಗಿ ದೀಪಾವಳಿ ಹಬ್ಬಕ್ಕೆ ಬೇಕಾದ ಡ್ರೈಫ್ರೂಟ್ಸ್ ಅನ್ನು ದಾಸ್ತಾನು ಮಾಡುವುದು ಸಾಧ್ಯವಿಲ್ಲ. ಹೀಗಾಗಿ ಈ ಬಾರಿ ದೀಪಾವಳಿಗೂ ಡ್ರೈಫ್ರೂಟ್ಸ್ಗಳ ಕೊರತೆ ಉಂಟಾಗಲಿದೆ. ಬೆಂಗಳೂರಿಗೆ ಮಾಸಿಕ 200 ಟನ್ಆಫ್ಘಾನಿಸ್ತಾನದಿಂದ ಬೆಂಗಳೂರು ಒಂದಕ್ಕೇ ತಿಂಗಳಿಗೆ 200 ಟನ್ ಡ್ರೈಫ್ರೂಟ್ಸ್ ಆಗಮಿಸುತ್ತದೆ. ರಾಜ್ಯದ ಶೇ.60ರಷ್ಟು ಬಳಕೆ ಬೆಂಗಳೂರಿನಲ್ಲೇ ಆಗುತ್ತದೆ ಎನ್ನುತ್ತಿದೆ. ಸದ್ಯ ಆಫ್ಘಾನಿಸ್ತಾನದ ಹೊರತಾಗಿ ಬರುವ ಸ್ಥಳೀಯ ಹಾಗೂ ವಿದೇಶಿ ಡ್ರೈಫ್ರೂಟ್ಸ್ನ ಬೆಲೆಯೂ ಹೆಚ್ಚಾಗುವ ಸಾಧ್ಯತೆಯಿದೆ ಎನ್ನುತ್ತಿದೆ ಕಂಟೋನ್ಮೆಂಟ್ ಡ್ರೈಫ್ರೂಟ್ಸ್ ಮರ್ಚೆಂಟ್ಸ್ ಅಸೋಸಿಯೇಷನ್. ರಸೆಲ್ ಮಾರ್ಕೆಟ್ನಲ್ಲಿ ಜಗತ್ತಿನೆಲ್ಲೆಡೆಯ ಡ್ರೈಫ್ರೂಟ್ಸ್ವಿಶ್ವದ ಯಾವ್ಯಾವ ಭಾಗದಲ್ಲಿ ಡೇಟ್ಸ್ ಮತ್ತು ಡ್ರೈಫ್ರೂಟ್ಸ್ ಇದೆಯೋ ಆ ಎಲ್ಲಾ ಭಾಗಗಳಿಂದಲೂ ಆಮದು ಮಾಡಿಕೊಳ್ಳುತ್ತೇವೆ. 1927ರಿಂದಲೂ ನಿರಂತರವಾಗಿ ಈ ಕಾರ್ಯದಲ್ಲಿ ತೊಡಗಿದ್ದೇವೆ. ವರ್ಷದ 365 ದಿನವೂ ಮಾರಾಟ ಇರುತ್ತದೆ. ಆದರೆ ರಂಜಾನ್ ಸಂದರ್ಭದಲ್ಲಿ ಹೆಚ್ಚು ಬಗೆಯ ಡೇಟ್ಸ್/ಡ್ರೈಫ್ರೂಟ್ಸ್ ಅನ್ನು ತರಿಸಿ ಗ್ರಾಹಕರಿಗೆ ಪೂರೈಸುತ್ತೇವೆ. ಇಲ್ಲಿ ಗಣ್ಯಾತಿಗಣ್ಯರು ಹೆಚ್ಚು ಖರೀದಿಸುತ್ತಾರೆ ಎನ್ನುತ್ತಾರೆ ರಸೆಲ್ ಮಾರ್ಕೆಟ್ನ ಡೆಲಿಷಿಯಸ್ ಮಳಿಗೆಯ ಮಾಲೀಕರಾದ ಮೊಹಮದ್ ಇದ್ರೀಸ್ ಚೌಧರಿ. ಮಾಮ್ರಾ ಬಾದಾಮ್ನಲ್ಲಿಎಣ್ಣೆ ಅಂಶ ಹೆಚ್ಚಿರುತ್ತದೆ. ಹೀಗಾಗಿ ಇದನ್ನು ಚರ್ಮದ ಕಾಂತಿಗಾಗಿ ಬಳಸಲಾಗುತ್ತದೆ. ಕ್ಯಾಲಿಫೋರ್ನಿಯಾದ ಸಾಮಾನ್ಯ ಬಾದಾಮಿ 560 ರೂ. ಇದ್ದದ್ದು, ಇದೀಗ ಅದು ಕೂಡ ಒಂದು ಸಾವಿರ ರೂ. ಗೆ ಏರಿಕೆಯಾಗಿದೆ.
| ಯಾವುದಕ್ಕೆ ಎಷ್ಟು ಬೆಲೆ (ಕೆ.ಜಿ ಗಳಲ್ಲಿ) | ಹಳೆಯ ದರ (₹) | ಪ್ರಸ್ತುತ ದರ (₹) |
| ಕೇಸರಿ | 2.50-3 ಲಕ್ಷ | 5 ಲಕ್ಷ |
| ಜಂಬೊ ಅಂಜೂರ | 1,200 | 2,400 |
| ಪೈನ್ ನಟ್ಸ್ | 4,000-5,000 | 8,000 |
| ಏಪ್ರಿಕಾಟ್ | 500 | 850 |
| ಕಾಬೂಲ್ ಕಪ್ಪು ದ್ರಾಕ್ಷಿ | 400 | 800 |
| ಮಾಮ್ರಾ ಬಾದಾಮ್ | 2,200 | 3,900 |
from India & World News in Kannada | VK Polls https://ift.tt/3y2GiHP
