ನ್ಯೂಯಾರ್ಕ್: ಕಾಬೂಲ್ ವಿಮಾನ ನಿಲ್ದಾಣಕ್ಕೆ ಪರಾರಿಯಾಗಲು ಪ್ರಯತ್ನಿಸುತ್ತಿದ್ದ ಕಚೇರಿ ಅಫ್ಘನ್ ಸದಸ್ಯನನ್ನು ಭಾನುವಾರ ಅಡ್ಡಗಟ್ಟಿದ್ದ ಉಗ್ರರು, ಅವರನ್ನು ಥಳಿಸಿದ್ದರು ಎಂದು ವರದಿಯಾಗಿದೆ. ವಿಶ್ವಸಂಸ್ಥೆಯ ಅಫ್ಘನ್ ಸಿಬ್ಬಂದಿ ಪ್ರಯಾಣಿಸುತ್ತಿದ್ದ ವಾಹನವನ್ನು ತಡೆದಿದ್ದ ಅವರು, ಅದರ ಒಳಗೆ ಪರಿಶೀಲನೆ ನಡೆಸಿದ್ದರು. ವಿಶ್ವಸಂಸ್ಥೆಯ ಗುರುತಿನ ಚೀಟಿ ನೋಡಿದ ಬಳಿಕ ಥಳಿಸಿದ್ದಾರೆ. ಸೋಮವಾರ ಕೆಲಸದಲ್ಲಿ ನಿರತನಾಗಿದ್ದ ವಿಶ್ವಸಂಸ್ಥೆಯ ಮತ್ತೊಬ್ಬ ಸಿಬ್ಬಂದಿಯ ಮನೆಗೆ ಮೂವರು ಅಪರಿಚಿತ ವ್ಯಕ್ತಿಗಳು ನುಗ್ಗಿದ್ದರು. ಅಲ್ಲಿದ್ದ ಸಿಬ್ಬಂದಿ ಮಗನ ಬಳಿ ತಂದೆ ಎಲ್ಲಿದ್ದಾರೆ ಎಂದು ವಿಚಾರಿಸಿದ್ದರು. 'ಸುಳ್ಳು ಹೇಳಬೇಡ, ಆತ ಎಲ್ಲಿದ್ದಾನೆ, ಆತ ಏನು ಮಾಡುತ್ತಿದ್ದಾನೆ ಎನ್ನುವುದು ನಮಗೆ ಗೊತ್ತು' ಎಂದು ಬೆದರಿಸಿದ್ದರು ಎಂದು ವರದಿಯಾಗಿದೆ. ಆಗಸ್ಟ್ 10ರಂದು ಅಧಿಕಾರವನ್ನು ಕಸಿದುಕೊಂಡ ಕೆಲವೇ ಸಮಯಗಳಲ್ಲಿ ತಾಲಿಬಾನ್ ಉಗ್ರರು ವಿಶ್ವಸಂಸ್ಥೆಯ ಕಚೇರಿಗಳಿಗೆ ನುಗ್ಗಿ ಲೂಟಿ ಮಾಡುತ್ತಿರುವುದಲ್ಲದೆ, ಅದರ ಸಿಬ್ಬಂದಿಯನ್ನು ದೈಹಿಕವಾಗಿ ಹಿಂಸಿಸುತ್ತಿದ್ದಾರೆ ಎಂದು ವಿಶ್ವಸಂಸ್ಥೆಯ ಭದ್ರತಾ ದಾಖಲೆಗಳನ್ನು ಉಲ್ಲೇಖಿಸಿ ರಾಯಿಟರ್ಸ್ ವರದಿ ಮಾಡಿದೆ. 'ಕಾಬೂಲ್ನ ಉಸ್ತುವಾರಿ ವಹಿಸಿಕೊಂಡಿರುವ ಅಧಿಕಾರಿಗಳು ವಿಶ್ವಸಂಸ್ಥೆ ಸಿಬ್ಬಂದಿ ಹಾಗೂ ಕಚೇರಿಯ ಸುರಕ್ಷತೆ ಮತ್ತು ಭದ್ರತೆಗೆ ಹೊಣೆಗಾರರಾಗಿದ್ದಾರೆ. ಈ ಸಂಬಂಧ ಅವರೊಂದಿಗೆ ಸಂಪರ್ಕದಲ್ಲಿದ್ದೇವೆ' ಎಂದು ವಿಶ್ವಸಂಸ್ಥೆ ವಕ್ತಾರ ಸ್ಟೀಫನ್ ಡುಜಾರಿಕ್ ತಿಳಿಸಿದ್ದಾರೆ. ವಿಶ್ವಸಂಸ್ಥೆಯು ಅಫ್ಘಾನಿಸ್ತಾನದಲ್ಲಿರುವ ತನ್ನ ಸುಮಾರು 300 ವಿದೇಶಿ ಸಿಬ್ಬಂದಿಯ ಪೈಕಿ ಕೆಲವರನ್ನು ಕಜಕಿಸ್ತಾನಕ್ಕೆ ಸ್ಥಳಾಂತರಿಸಿದೆ. ಇನ್ನೂ 3,000 ಅಫ್ಘನ್ ಸಿಬ್ಬಂದಿ ದೇಶದಲ್ಲಿದ್ದಾರೆ. ಇತರೆ ದೇಶಗಳೊಂದಿಗೆ ಸಂಪರ್ಕದಲ್ಲಿದ್ದು, ಈ ಸಿಬ್ಬಂದಿಗೆ ವೀಸಾ ಅಥವಾ ತಾತ್ಕಾಲಿಕ ಆಶ್ರಯದ ವ್ಯವಸ್ಥೆ ಕಲ್ಪಿಸುವಂತೆ ಮನವಿ ಮಾಡುತ್ತಿರುವುದಾಗಿ ಅದು ತಿಳಿಸಿದೆ.
from India & World News in Kannada | VK Polls https://ift.tt/3kuI5AZ
