ಕಾಬೂಲ್: ನಿಯಂತ್ರಣದ ಅಫ್ಘಾನಿಸ್ತಾನದಿಂದ ಪರಾರಿಯಾಗಲು ವಿಮಾನವನ್ನೇರಿ ಕೆಳಗೆ ಬಿದ್ದು ಸತ್ತಿದ್ದ ಪ್ರಜೆಗಳಲ್ಲಿ ಅಲ್ಲಿನ ರಾಷ್ಟ್ರೀಯ ಯುವ ತಂಡದ ಫುಟ್ಬಾಲ್ ಆಟಗಾರ ಕೂಡ ಸೇರಿದ್ದಾನೆ ಎಂದು ಕ್ರೀಡಾ ಸಂಸ್ಥೆಯೊಂದು ತಿಳಿಸಿದೆ. ಅಫ್ಘಾನಿಸ್ತಾನ ದೈಹಿಕ ಶಿಕ್ಷಣ ಮತ್ತು ಕ್ರೀಡೆಗಳ ಪ್ರಧಾನ ನಿರ್ದೇಶನಾಲಯವು ವಿಮಾಣ ನಿಲ್ದಾಣದಲ್ಲಿ ಸೇರಿದ್ದ ಗುಂಪಿನಲ್ಲಿದ್ದ ಝಕಿ ಅನ್ವಾರಿ ಮೃತಪಟ್ಟಿರುವುದನ್ನು ಖಚಿತಪಡಿಸಿದೆ. 'ಸಾವಿರಾರು ಅಫ್ಘನ್ ಯುವಕರಂತೆ ಅನ್ವಾರಿ ಕೂಡ, ದೇಶವನ್ನು ತೊರೆಯಲು ಬಯಸಿದ್ದ. ಆದರೆ ಅಮೆರಿಕ ವಿಮಾನದಿಂದ ಕೆಳಕ್ಕೆ ಬಿದ್ದು ಸಾವಿಗೀಡಾಗಿದ್ದಾನೆ' ಎಂದು ಸರ್ಕಾರದ ಸಂಸ್ಥೆ ಫೇಸ್ಬುಕ್ನಲ್ಲಿ ಮಾಹಿತಿ ನೀಡಿದೆ. ತಾರಸಿಯ ಮೇಲೆ ಬಿದ್ದಿದ್ದವು ಹೆಣಗಳು!ಕಾಬೂಲ್ನಿಂದ ಕತಾರ್ಗೆ ಹೊರಟ ಅಮೆರಿಕದ ವಿಮಾನದ ರೆಕ್ಕೆ, ಚಕ್ರಗಳ ಮೇಲೆ ಕುಳಿತ ಅನೇಕರು ಮೇಲೆ ಹೋದ ಬಳಿಕ ನಿಯಂತ್ರಣ ತಪ್ಪಿ ಕೆಳಕ್ಕೆ ಬಿದ್ದು ಮೃತಪಟ್ಟಿದ್ದರು. ಅದರಲ್ಲಿ ಎರಡು ಶವಗಳು ಮನೆಯೊಂದರ ತಾರಸಿ ಮೇಲೆ ಪತ್ತೆಯಾಗಿವೆ. 'ಟ್ರಕ್ ಟೈರ್ ಸ್ಫೋಟವಾದಂತೆ ಜೋರಾಗಿ ಶಬ್ಧ ಕೇಳಿಸಿತು. ಕೂಡಲೇ ಮನೆಯ ತಾರಸಿ ಹತ್ತಿ ನೋಡಿದರೆ ನಜ್ಜುಗುಜ್ಜಾಗಿ ಭಯಾನಕ ಸ್ಥಿತಿಯಲ್ಲಿದ್ದ ಎರಡು ದೇಹಗಳು ಕಂಡುಬಂದವು' ಎಂದು ಮನೆ ಮಾಲೀಕ ತಿಳಿಸಿದ್ದಾನೆ. ಈ ಶವಗಳನ್ನು ಕಂಡು ಹೆದರಿದ ಆತನ ಪತ್ನಿ ಪ್ರಜ್ಞಾಹೀನಳಾಗಿದ್ದಳು. ವಿಮಾನದಿಂದ ಇಬ್ಬರು ಬೀಳುವುದನ್ನು ಟಿವಿಯಲ್ಲಿ ಕಂಡಿದ್ದಾಗಿ ನೆರೆಮನೆಯವರು ಆತನಿಗೆ ತಿಳಿಸಿದ ಬಳಿಕ ಈ ಶವಗಳು ಬಂದಿದ್ದು ಎಲ್ಲಿಂದ ಎನ್ನುವುದು ಅವರಿಗೆ ಅರಿವಾಗಿತ್ತು. ದೇಹಗಳು ಬಿದ್ದ ರಭಸಕ್ಕೆ ತಾರಸಿಯ ಕೆಲವು ಭಾಗಕ್ಕೆ ಹಾನಿಯಾಗಿದೆ. ಎರಡೂ ದೇಹಗಳ ಹೊಟ್ಟೆ ಹಾಗೂ ತಲೆಗಳು ಸೀಳಿ ಹೋಗಿದ್ದವು. ಕೊನೆಗೆ ಈ ದೇಹಗಳನ್ನು ಬಟ್ಟೆಯಿಂದ ಮುಚ್ಚಿ ಮಸೀದಿಗೆ ಸಾಗಿಸಲಾಯಿತು. ಒಬ್ಬ ವ್ಯಕ್ತಿಯ ಜೇಬಿನಲ್ಲಿದ್ದ ಜನನ ಪ್ರಮಾಣ ಪತ್ರವು, ಆತ ವೃತ್ತಿಯಿಂದ ವೈದ್ಯನಾಗಿರುವ ಸಫೀಯುಲ್ಲಾ ಹೊತಕ್ ಎಂದು ಬಹಿರಂಗಪಡಿಸಿದೆ. ಇನ್ನೊಬ್ಬನನ್ನು ಫಿದಾ ಮೊಹಮ್ಮದ್ ಎಂದು ಗುರುತಿಸಲಾಗಿದೆ. ಇಬ್ಬರೂ 30ಕ್ಕಿಂತ ಕಡಿಮೆ ವಯಸ್ಸಿನವರು.
from India & World News in Kannada | VK Polls https://ift.tt/3mj8gNi
