ಆದರ್ಶ ಕೋಡಿ ದೊಡ್ಡಬಳ್ಳಾಪುರಗ್ರಾಮೀಣ ಭಾಗದ ನಿರುದ್ಯೋಗಿ ಯುವ ಜನತೆಗೆ ಸ್ವಯಂ ಉದ್ಯೋಗಕ್ಕೆ ಅನುಕೂಲವಾಗುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ ಆರ್ಯ (ಅಟ್ರ್ಯಾಕ್ಟ್ ರೂರಲ್‌ ಯೂತ್‌ ಅಗ್ರಿಕಲ್ಚರ್‌) ಕಾರ‍್ಯಕ್ರಮಕ್ಕೆ ಚಾಲನೆ ನೀಡಿದೆ. ಬೆಂಗಳೂರು ಗ್ರಾ. ಜಿಲ್ಲೆ ದೊಡ್ಡಬಳ್ಳಾಪುರದ ಹಾಡೋನಹಳ್ಳಿ ಕೆವಿಕೆಯಲ್ಲಿ ಆರ್ಯ ಯೋಜನೆಯಡಿ ಗ್ರಾಮಾಂತರ ಭಾಗದ ಯುವಕರಿಗೆ ಜೇನು ಸಾಕಾಣಿಕೆ, ಎರೆಹುಳು ಗೊಬ್ಬರ ತಯಾರಿಕೆ, ತೆಂಗಿನ ಮರ ಹತ್ತುವ ಕುರಿತು ತರಬೇತಿ ನೀಡಿ, ಅದಕ್ಕೆ ಅವಶ್ಯಕ ಸಲಕರಣೆಗಳನ್ನು ನೀಡಿ ಸ್ವಯಂ ಉದ್ಯೋಗಕ್ಕೆ 18ರಿಂದ 35 ದೊಳಗಿನ ಸೆಳೆಯುವ ಪ್ರಯತ್ನಕ್ಕೆ ಮುಂದಾಗಿದೆ. ಮರಹತ್ತುವ ತರಬೇತಿ ಬೆಂಗಳೂರು, ಕೋಲಾರ, ತುಮಕೂರು, ಗ್ರಾಮಾಂತರ ಜಿಲ್ಲೆಯ ದೊಡ್ಡಬಳ್ಳಾಪುರ, ನೆಲಮಂಗಲ ತಾಲೂಕಿನಲ್ಲಿ ಉತ್ತಮ ತೆಂಗು ಬೆಳೆಯಿದೆ. ಪ್ರತಿ ತೆಂಗಿನ ಮರವೇರಲು ಕಾರ್ಮಿಕರಿಗೆ ಸಾಕಷ್ಟು ಹಣ ನೀಡಬೇಕಾಗುತ್ತದೆ. ಆದರೆ ಮರ ಏರಲು ಸರಿಯಾದ ಸಮಯಕ್ಕೆ ಜನರು ಸಿಗುವುದು ಕಷ್ಟವಾಗಿದೆ. ಇದ್ದಕ್ಕಾಗಿ ಕೆವಿಕೆಯಲ್ಲಿ ಮರವೇರುವ ಯಂತ್ರಗಳ ಸಹಾಯದಿಂದ ಮರಹತ್ತುವ ತರಬೇತಿಯನ್ನು ಯುವಕರಿಗೆ ನೀಡಿ ತರಬೇತಿಗೆ ಬರುವ ಯುವಕರಿಗೆ ಮರ ಹತ್ತುವ ಯಂತ್ರ, ಪ್ರಥಮ ಚಿಕಿತ್ಸೆ ಪೆಟ್ಟಿಗೆ ನೀಡಿ ಯುವಕರಿಗೆ ಮರ ಹತ್ತುವ ಸ್ವಯಂ ಉದ್ಯೋಗಕ್ಕೆ ಅವಕಾಶ ಕಲ್ಪಿಸಲು ಯೋಜನೆ ಸಹಾಯಕವಾಗಲಿದೆ. ಜೇನುಸಾಕಣಿಕೆಗೆ ಬೇಡಿಕೆ ಗ್ರಾಮಾಂತರ ಭಾಗದ ಉಪ ಕಸುಬಾಗಿ ಆದಾಯ ಮೂಲವಾಗಿರುವ ಜೇನುಸಾಕಾಣಿಕೆಯ ಕುರಿತು ಯುವಕರಿಗೆ ಆರ್ಯ ಕಾರ್ಯಕ್ರಮದಡಿ ತರಬೇತಿ ನೀಡಲಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಜೇನುಸಾಕಣಿಕೆಗೆ ಯುವಕರು ಹೆಚ್ಚಿನ ಒಲವು ತೋರುತ್ತಿದ್ದಾರೆ. ತರಬೇತಿಯಲ್ಲಿ ಜೇನು ಸಾಕಾಣಿಕೆಯ ವಿಧಾನ, ಜೇನು ಉತ್ಪಾದನೆ, ಜೇನು ಗೂಡಿನ ಸ್ವಚ್ಛತೆ, ನಿರ್ವಹಣೆ ಬಗ್ಗೆ ಕಲಿಸಲಾಗುತ್ತದೆ. ತರಬೇತಿಯಲ್ಲಿ ಭಾಗವಹಿಸುವವರಿಗೆ 15ರಿಂದ 20 ಸಾವಿರ ಬೆಲೆ ಬಾಳುವ ರಾಣಿ ಜೇನಿನ ಸಮೇತ ಜೇನು ಪೆಟ್ಟಿಗೆ, ಕೂಂಬ್‌ ಶೀಟ್‌, ಹನಿಶುದ್ದೀಕರಣ ಸಾಧನ, ಮುಖದ ಪಟ್ಟಿಯನ್ನು ಉಚಿತವಾಗಿ ನೀಡಲಾಗುತ್ತದೆ. ಎರೆಹುಳು ಗೊಬ್ಬರ ತಯಾರಿಕೆಗೂ ತರಬೇತಿ ಹಾಗೂ ತೋಟಗಾರಿಕೆ ಕ್ಷೇತ್ರದಲ್ಲಿಎರೆಹುಳು ಗೊಬ್ಬರಕ್ಕೆ ಬೇಡಿಕೆಯಿದೆ. ಆರ್ಯ ಕಾರ್ಯಕ್ರಮದಡಿ ಎರೆಹುಳು ಗೊಬ್ಬರ ತಯಾರಿಕೆಯ ವಿಧಾನ, ಅದರ ಬಳಕೆಯ ಮಹತ್ವವನ್ನು ತಿಳಿಸಿಕೊಡಲಾಗುತ್ತದೆ. ತರಬೇತಿಯ ನಂತರ ಎರೆಹುಳು ತೊಟ್ಟಿ, ನೀರಿನ ಕ್ಯಾನ್‌, 1 ಕೆಜಿ ಎರೆಹುಳು, ಜರಡಿಯಂತಹ ಸಲಕರಣೆ ನೀಡಲಾಗುತ್ತದೆ. ಈ ತರಬೇತಿಯಲ್ಲಿ 40 ಮಂದಿ ಭಾಗವಹಿಸಲು ಅವಕಾಶವಿರುತ್ತದೆ. ಪ್ರತಿ ಕೆಜಿ ಎರೆಹುಳು ಗೊಬ್ಬರಕ್ಕೆ ಮಾರುಕಟ್ಟೆಯಲ್ಲಿ 12ರಿಂದ 13 ರೂ. ಬೆಲೆಯಿದ್ದು ಕೆವಿಕೆಯಿಂದ ಮಾರುಕಟ್ಟೆ ಸೌಲಭ್ಯ ಬಗ್ಗೆ ಮಾಹಿತಿ ಕೂಡಾ ಸಿಗಲಿದೆ.
from India & World News in Kannada | VK Polls https://ift.tt/3yo1Tf6
