ಟೋಕಿಯೋ: ಪ್ರಿ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲೇ ಗಾಯಗೊಂಡು ಸ್ಪರ್ಧೆಯಿಂದ ಹೊರಬೀಳುವ ಪರಿಸ್ಥಿತಿಯಲ್ಲಿದ್ದ ಪ್ರತಿಭಾನ್ವಿತ ಭಾರತೀಯ ಬಾಕ್ಸರ್‌ ಸತೀಶ್ ಕುಮಾರ್‌, ತಮ್ಮೆಲ್ಲಾ ಸಾಮರ್ಥ್ಯ ಒಗ್ಗೂಡಿಸಿ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಹೋರಾಟ ನಡೆಸಿದರಾದರೂ ಯಶಸ್ಸು ಲಭ್ಯವಾಗಲಿಲ್ಲ. ಭಾನುವಾರ ನಡೆದ ಪುರುಷರ 91 ಕೆ.ಜಿ. ಹೆವಿವೇಟ್‌ ಸ್ಪರ್ಧೆಯಲ್ಲಿ ಕಣಕ್ಕಿಳಿದ ಸತೀಶ್ ಕುಮಾರ್‌ 0-5 ಅಂತರದಲ್ಲಿ ಉಜ್ಬೇಕಿಸ್ತಾನದ ಹಾಲಿ ವಿಶ್ವ ಚಾಂಪಿಯನ್‌ ಬಾಕ್ಸರ್‌ ಎದುರು ಹೀನಾಯವಾಗಿ ಸೋತು ತಮ್ಮ ಒಲಿಂಪಿಕ್ಸ್‌ ಅಭಿಯಾನ ಅಂತ್ಯಗೊಳಿಸಿದರು. ಈ ಪಂದ್ಯದಲ್ಲಿ ಸತೀಶ್‌ಗೆ ಜಯ ಸಿಕ್ಕಿದ್ದರೆ ಕನಿಷ್ಠ ಕಂಚಿನ ಪದಕ ಖಾತ್ರಿಯಾಗುತ್ತಿತ್ತು. ಆದರೆ, ಗಾಯಗೊಂಡ ಸ್ಥಿತಿಯಲ್ಲಿ ವಿಶ್ವ ಚಾಂಪಿಯನ್‌ ಎದುರು ಹೆಚ್ಚೇನೂ ಮಾಡಲು ಸಾಧ್ಯವಾಗಲಿಲ್ಲ. ಆದರೆ, ಇದಕ್ಕೂ ಮುನ್ನ ನಡೆದ ಪ್ರಿ ಕ್ವಾರ್ಟರ್‌ ಕದನದಲ್ಲಿ ಜಮೈಕಾದ ಬಲಿಷ್ಠ ಬಾಕ್ಸರ್‌ ರಿಕಾರ್ಡೊ ಬ್ರೌನ್‌ ಎದುರು ರೋಚಕ ಗೆಲುವು ತಮ್ಮದಾಗಿಸಿಕೊಂಡಿದ್ದರು. ಸೇನೆಯ ಹುದ್ದೆಯಲ್ಲಿರುವ 32 ವರ್ಷದ ಬಾಕ್ಸರ್‌ , ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ತಮ್ಮ ಬಲಿಷ್ಠ ಪಂಚ್‌ಗಳನ್ನು ಎದುರಾಳಿಗೆ ನೀಡುವಲ್ಲಿ ಸತತವಾಗಿ ಎಡವಿದರು. ತಮ್ಮ ಎತ್ತರದ ಲಾಭ ಪಡೆದು ರಕ್ಷಣಾತ್ಮಕ ಆಟದೊಂದಿಗೆ ಆಗಾಗ ಬಲ ಮತ್ತು ಎಡ ಹುಕ್‌ ಹೊಡೆತಗಳನ್ನು ನೇರವಾಗಿ ಸತೀಶ್ ಮುಖಕ್ಕೆ ಇಳಿಸುವಲ್ಲಿ ಸಫಲರಾದ ಜಲೊಲೊವ್ ಅತ್ಯಂತ ಸುಲಭ ಗೆಲುವನ್ನು ತಮ್ಮದಾಗಿಸಿಕೊಂಡರು. ವೃತ್ತಿಬದುಕಿನ ಆರಂಭಿಕ ದಿನಗಳಲ್ಲಿ ಫುಟ್ಬಾಲ್‌ ಆಟಗಾರನಾಗಿದ್ದ ಜಲೊಲೊವ್, ಈ ಬಾರಿಯ ಒಲಿಂಪಿಕ್ಸ್‌ನಲ್ಲಿ ಸ್ವರ್ಣ ಗೆಲ್ಲುವ ಫೇವರಿಟ್‌ ಬಾಕ್ಸರ್‌ ಆಗಿದ್ದಾರೆ. ಅವರು ಮೂರು ಬಾರಿಯ ಏಷ್ಯನ್‌ ಚಾಂಪಿಯನ್‌ ಕೂಡ. ಇನ್ನು ಸತೀಶ್ ಕುಮಾರ್‌ ಸೂಪರ್‌ ಹೆವಿವೇಟ್‌ ವಿಭಾಗದಲ್ಲಿ ಒಲಿಂಪಿಕ್ಸ್‌ಗೆ ಆಯ್ಕೆಯಾದ ಭಾರತದ ಮೊತ್ತ ಮೊದಲ ಬಾಕ್ಸರ್‌ ಎಂಬ ಖ್ಯಾತಿ ಪಡೆದಿದ್ದಾರೆ. ಸತೀಶ್ ಸೋಲಿನೊಂದಿಗೆ ಟೋಕಿಯೋ ಅಂಗಣದಲ್ಲಿ ಭಾರತೀಯ ಪುರುಷ ಬಾಕ್ಸರ್‌ಗಳ ಸವಾಲು ಅಂತ್ಯಗೊಂಡಿದೆ. ಶನಿವಾರ ನಡೆದ 52 ಕೆ.ಜಿ ವಿಭಾಗದ ಬಾಕ್ಸಿಂಗ್‌ನಲ್ಲಿ ಅಮಿತ್‌ ಪಂಘಲ್‌ ವಿಶ್ವದ ನಂ.1 ಬಾಕ್ಸರ್‌ ಎದುರು ಸೋತು ನಿರಾಶೆ ಅನುಭವಿಸಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2TL9a9t
