ಬೆಂಗಳೂರು: ಮನೆ ಸ್ವಚ್ಛವಾಗಿದ್ದರೆ ಮನಸ್ಸಿಗೆ ಸಂತೋಷವಾಗುತ್ತದೆ. ಮನೆ ನೂರೆಂಟು ವಸ್ತುಗಳ ಗೋದಾಮಿನಂತಿದ್ದರೆ, ಗಲೀಜಾಗಿದ್ದರೆ ಬೇಸರವೆನಿಸುವುದು ಸಹಜ. ಕೋವಿಡ್-19 ಸಾಂಕ್ರಾಮಿಕ ರೋಗದ ಆರಂಭಿಕ ದಿನಗಳಲ್ಲಿ ಜನತೆ ಮುಗಿಬಿದ್ದು ಖರೀದಿಸಿದ ವಸ್ತುಗಳಲ್ಲಿ ಹ್ಯಾಂಡ್ ಸ್ಯಾನಿಟೈಸರ್, ಫೇಸ್ ಮಾಸ್ಕ್ ಮತ್ತು ಇತರ ನೈರ್ಮಲ್ಯ ರಕ್ಷಣೆಯ ವಸ್ತುಗಳೇ ಪ್ರಮುಖ. ಕೋವಿಡ್ ಬಿಕ್ಕಟ್ಟಿನ ಪರಿಣಾಮ ಎಲ್ಲೆಲ್ಲೂ ಆರೋಗ್ಯ, ನೈರ್ಮಲ್ಯ, ವೈಯಕ್ತಿಕ ಹಾಗೂ ಸಮುದಾಯದ ಸ್ವಚ್ಛತೆಯ ಬಗ್ಗೆ ಕಾಳಜಿ ಹಿಂದೆಂಗಿಂತಲೂ ಹೆಚ್ಚಾಗಿರುವುದು ವಾಸ್ತವ. ಹರಡುವುದನ್ನು ತಡೆಯುವ ನಿಟ್ಟಿನಲ್ಲಿಇದು ಸಾಮಾಜಿಕ ಪ್ರಜ್ಞೆಯ ಭಾಗವೂ, ಹೊಣೆಗಾರಿಕೆಯೂ ಹೌದು. ಮಾತ್ರವಲ್ಲದೆ ಸಾರ್ವಜನಿಕ ಜನ ಜೀವನಕ್ಕಿಂತ ಮನೆಯನ್ನೇ ಕೇಂದ್ರೀಕೃತವಾದ ಜೀವನ ಶೈಲಿ ಪ್ರಸ್ತುತ ಅನಿವಾರ್ಯವಾಗಿರುವುದರಿಂದ, ದಿನದ ಬಹುತೇಕ ಅವಧಿಯನ್ನು ಮನೆಯಲ್ಲೇ ಕಳೆಯಬೇಕಿರುವುದರಿಂದ, ಇದರ ನೇರ ಪರಿಣಾಮವೆಂಬಂತೆ, ನೈರ್ಮಲ್ಯಕ್ಕೆ ಸಂಬಂಧಿಸಿದ ಎಲ್ಲ ವಿಧದ ಉತ್ಪನ್ನಗಳ ಉತ್ಪಾದನೆ, ಬೇಡಿಕೆ ಮತ್ತು ಮಾರಾಟ ಅತ್ಯಂತ ಚುರುಕಾಗಿದೆ. ವೈಯಕ್ತಿಕ ಆರೋಗ್ಯ ಕಾಳಜಿ ಅಥವಾ ಪರ್ಸನಲ್ ಕೇರ್, ಮನೆ ಮತ್ತು ಸಾರ್ವಜನಿಕ ಸ್ಥಳಗಳಲ್ಲಿ ನೈರ್ಮಲ್ಯಕ್ಕೆ ಸಂಬಂಧಿಸಿ ಬಳಸುವ ನೂರಾರು ಉತ್ಪನ್ನಗಳ ಮಾರಾಟ ದಾಖಲೆಯ ಮಟ್ಟದಲ್ಲಿ ವೃದ್ಧಿಸಿದೆ. ಜನರ ಜೀವನದ ಗುಣಮಟ್ಟ ವೃದ್ಧಿಸಿರುವುದು, ಆದಾಯ ಹೆಚ್ಚುತ್ತಿರುವುದು, ಮಾಧ್ಯಮಗಳಲ್ಲಿಆರೋಗ್ಯ ಕಳಕಳಿ ಕುರಿತ ಲೇಖನಗಳು, ಟಿಫ್ಸ್ಗಳು, ಸಂದರ್ಶನಗಳು, ಅಭಿಯಾನಗಳೂ ಕೂಡ ಪ್ರಭಾವ ಬೀರಿವೆ. ಸಾಮಾಜಿಕ ಜಾಲತಾಣಗಳೂ ಈ ವಿಷಯದಲ್ಲಿ ಹಿಂದೆ ಬಿದ್ದಿಲ್ಲ. ಅಲ್ಲೂ ಜನ ಜಾಗೃತಿಯ ಸಂದೇಶಗಳು, ವಿಡಿಯೊಗಳು ಜನಪ್ರಿಯವಾಗಿವೆ. ಒಟ್ಟಾರೆ ಆರೋಗ್ಯದ ಬಗ್ಗೆ ಸಾರ್ವಜನಿಕ ಜಾಗೃತಿ ವ್ಯಾಪಕವಾಗಿರುವುದನ್ನು ಗಮನಿಸಬಹುದು.ಸರಕಾರಿ ಮಾರ್ಗದರ್ಶಿಗಳ ಸಕಾರಾತ್ಮಕ ಪ್ರಭಾವಕೋವಿಡ್-19 ಸೋಂಕು ಜಾಗತಿಕ ಮಟ್ಟದಲ್ಲಿ ವ್ಯಾಪಕವಾಗುತ್ತಿರುವ ಒಂದು ಸಾಂಕ್ರಾಮಿಕ ರೋಗ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಪ್ರಕಟಿಸಿದ ಬೆನ್ನಲ್ಲೇ ಜಗತ್ತಿನಾದ್ಯಂತ ಎಲ್ಲ ಸರಕಾರಗಳೂ, ಸ್ಥಳೀಯ ಆಡಳಿತ ಸಂಸ್ಥೆಗಳೂ, ಕೋವಿಡ್ ತಡೆಗಟ್ಟಲು ಜನತೆ ಅನುಸರಿಸಬೇಕಿರುವ ಸ್ವಚ್ಛತೆಯ ಉಪಕ್ರಮಗಳ ಬಗ್ಗೆ ಜಾಗೃತಿ ಮೂಡಿಸಿವೆ. ಮಾರ್ಗದರ್ಶಿಗಳನ್ನು ಪ್ರಚಾರ ಮಾಡಿವೆ. ಸ್ಯಾನಿಟೈಸರ್, ಸೋಪು, ಡಿಟರ್ಜೆಂಟ್, ಗ್ಲೌಸ್, ಮಾಸ್ಕ್ ಇತ್ಯಾದಿಗಳ ಬಳಕೆಗೆ ಪ್ರೇರೇಪಿಸಿವೆ. ಇದರ ಪರಿಣಾಮವಾಗಿ ನೈರ್ಮಲ್ಯ ಸಾಧನಗಳಿಗೆ ಎಲ್ಲಿಲ್ಲದ ಬೇಡಿಕೆ ಸೃಷ್ಟಿಯಾಗಿದೆ. ಮನೆಯ ನೈರ್ಮಲ್ಯಕ್ಕೆ ಕೀಟಾಣು ನಾಶಕ ಬಳಕೆಭಾರತದಲ್ಲಿ ಕಳೆದ ಕೆಲವು ವರ್ಷಗಳಿಂದೀಚೆಗೆ ಮನೆಯ ಶುಚಿತ್ವ ಕಾಪಾಡಲು, ಕೀಟಾಣು ಮುಕ್ತಗೊಳಿಸಲು ಬಳಸುವ ನಾನಾ ಕೀಟಾಣುನಾಶಕಗಳು ವ್ಯಾಪಕವಾಗಿದೆ. ಇದು 2018ರಲ್ಲೇ ಸುಮಾರು 8,600 ಕೋಟಿ ರೂ.ಗಳ ವಹಿವಾಟು ಇರುವ ಉದ್ದಿಮೆಯಾಗಿದೆ. ಕೋವಿಡ್ ನಂತರವಂತೂ ವ್ಯಾಪಾರದ ಭರಾಟೆ ಮತ್ತಷ್ಟು ವ್ಯಾಪಕವಾಗಿದೆ. ಮನೆಯಲ್ಲಿ ಬಳಸುವ ಕೀಟ ನಾಶಕಗಳಿಗೆ ಅಪಾಯಕಾರಿ ರಾಸಾಯನಿಕಗಳ ಬದಲು, ನೈಸರ್ಗಿಕ ವಸ್ತುಗಳನ್ನು ಬಳಸುವ ಪರಿಸರಸ್ನೇಹಿ ಹಾಗೂ ಆರೋಗ್ಯ ಕಾಳಜಿ ಈಗ ವ್ಯಕ್ತವಾಗುತ್ತಿದೆ. 250 ಗ್ರಾಮ್ ಸಣ್ಣ ಪ್ರಮಾಣದಲ್ಲೂ ಕೀಟನಾಶಕಗಳು ಲಭಿಸುತ್ತವೆ. ಮನೆಯ ಒಳಗೆ, ಹೊರಗೆ ಗಾರ್ಡನ್ ಏರಿಯಾ ಇತ್ಯಾದಿ ಸ್ಥಳಗಳಲ್ಲಿ ಕೀಟಾಣು ಮುಕ್ತಗೊಳಿಸುವುದು ಆರೋಗ್ಯ ಕಾಪಾಡುವ ದೃಷ್ಟಿಯಿಂದ ಮಹತ್ವದ್ದು. ಜಾಗತೀಕರಣ, ಖರೀದಿ ಸಾಮರ್ಥ್ಯದ ಹೆಚ್ಚಳದ ಪರಿಣಾಮ ಜನ ಮನೆ ಬಳಕೆಯ ಕೀಟ ನಾಶಕಗಳ ಬಳಕೆಗೆ ಹೆಚ್ಚು ಖರ್ಚು ಮಾಡಲು ಹಿಂದೇಟು ಹಾಕುವುದಿಲ್ಲ. ರಿಟೇಲ್ ಮಾರುಕಟ್ಟೆ ನೆಟ್ವರ್ಕ್ ಕೂಡ ವಿಸ್ತರಿಸಿರುವುದು ಮತ್ತೊಂದು ಕಾರಣ ಎನ್ನುತ್ತಾರೆ ತಜ್ಞರು.ಬಟ್ಟೆಗಳ ನೈರ್ಮಲ್ಯ ಸಾಧನಗಳ ಮಾರುಕಟ್ಟೆ 2,211 ಕೋಟಿ ರೂ.ದೇಶದಲ್ಲಿ ಬಟ್ಟೆಗಳ ಶುಚಿತ್ವಕ್ಕೆ ಜನ ಆದ್ಯತೆ ನೀಡುತ್ತಿದ್ದಾರೆ. ಶುಭ್ರವಾಗಿ ಒಪ್ಪ ಓರಣ ಮಾಡಿದ ಧಿರಿಸುಗಳನ್ನು ಧರಿಸಿಯೇ ಜನ ಮನೆಯಿಂದ ಹೊರಗೆ ಕಾಲಿಡುತ್ತಾರೆ. ಮಾತ್ರವಲ್ಲದೆ, ಮನೆಯಲ್ಲಿಇರುವಾಗಲೂ ಶುಭ್ರವಾದ ಬಟ್ಟೆ ಬರೆಗಳನ್ನು ತೊಡಬೇಕು. ಇದರಿಂದ ದೈಹಿಕ ಮತ್ತು ಮಾನಸಿಕ ಆರೋಗ್ಯ ಕೂಡ ಚೆನ್ನಾಗಿರುತ್ತದೆ ಎಂಬ ಕಾಳಜಿ ಜನತೆಯಲ್ಲಿ ಹೆಚ್ಚುತ್ತಿದೆ. ಹೀಗಾಗಿ 2025ರ ವೇಳೆಗೆ ಬಟ್ಟೆಗಳ ಶುಚಿತ್ವಕ್ಕೆ ಬಳಸುವ ಸಾಧನಗಳ ಮಾರುಕಟ್ಟೆ ಮೌಲ್ಯ 2,211 ಕೋಟಿ ರೂ.ಗೆ ಏರಿಕೆಯಾಗಲಿದೆ ಎಂದು ರಿಸರ್ಚ್ ಆ್ಯಂಡ್ ಮಾರ್ಕೆಟ್ಸ್ ಡಾಟ್ಕಾಮ್ನ ವರದಿ ತಿಳಿಸಿದೆ.
from India & World News in Kannada | VK Polls https://ift.tt/3eWtKbG
