ಹೊಸದಿಲ್ಲಿ: ಕ್ರಿಕೆಟ್ ಪ್ರಿಯರಿಗೊಂದು ಗುಡ್ ನ್ಯೂಸ್. ಬಹುನಿರೀಕ್ಷಿತ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯು ಸೆಪ್ಟೆಂಬರ್ 19ರಿಂದ ನವೆಂಬರ್ 8ರವರೆಗೆ ನಡೆಯಲಿದೆ ಎಂದು ಐಪಿಎಲ್ ಮುಖ್ಯಸ್ಥ ಬ್ರಿಜೇಶ್ ಪಟೇಲ್ ಬುಧವಾರ ತಿಳಿಸಿದ್ದಾರೆ. ಅಷ್ಟೇ ಅಲ್ಲದೆ ಈ ಬಾರಿ ಯುಎಇ ಐಪಿಎಲ್ನ ಎಲ್ಲಾ ಪಂದ್ಯಗಳಿಗೆ ಆತಿಥ್ಯ ವಹಿಸುವುದು ಕೂಡ ಖಾತ್ರಿಯಾಗಿದೆ.ಅಂದಹಾಗೆ ಐಪಿಎಲ್ 2020 ಟೂರ್ನಿಯು ಇದೇ ವರ್ಷ ಮಾರ್ಚ್ 29ಕ್ಕೆ ಆರಂಭಗೊಂಡು ಮೇ 24ಕ್ಕೆ ಅಂತ್ಯಗೊಳ್ಳಬೇಕಿತ್ತು. ಆದರೆ, ಕೊರೊನಾ ವೈರಸ್ ಮಹಾಮಾರಿ ಸೋಂಕಿನ ಕಾರಣ ಜಗತ್ತಿನ ಐಶಾರಾಮಿ ಟಿ20 ಕ್ರಿಕೆಟ್ ಲೀಗ್ ಟೂರ್ನಿಯನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಅನಿರ್ದಿಷ್ಟ ಅವಧಿಗೆ ಮುಂದೂಡಿತ್ತು. ಇದೀಗ ಅಕ್ಟೋಬರ್-ನವೆಂಬರ್ ಅವಧಿಯಲ್ಲಿ ನಡೆಯಬೇಕಿದ್ದ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿಯನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) 2022ಕ್ಕೆ ಮುಂದೂಡಿದ ಬೆನ್ನಲ್ಲೇ ಆ ಅವಧಿಯಲ್ಲಿ ಐಪಿಎಲ್ ಆಯೋಜಿಸಲು ಬಿಸಿಸಿಐಗೆ ಅನುಕೂಲವಾಗಿದೆ. ಈ ನಿಟ್ಟಿನಲ್ಲಿ ಸಪ್ಟೆಂಬರ್-ನವೆಂಬರ್ ಅವಧಿಯನ್ನು ಆಯ್ಕೆ ಮಾಡಿಕೊಂಡಿದೆ. ನವೆಂಬರ್ನಲ್ಲೇ ಭಾರತ ತಂಡ ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳಬೇಕಿರುವ ಕಾರಣ ನ.8ರಂದು ಫೈನಲ್ ಪಂದ್ಯ ನಿಗದಿ ಪಡಿಸಲಾಗಿದೆ.ಐಪಿಎಲ್ 2020 ಟೂರ್ನಿಯಲ್ಲಿ ಫ್ಲೇ-ಆಫ್ಸ್ ತಲುಪಬಲ್ಲ ನಾಲ್ಕು ಬಲಿಷ್ಠ ತಂಡಗಳಿವು!ಇನ್ನು ಯುಎಇ ಎರಡನೇ ಬಾರಿ ಐಪಿಎಲ್ ಆತಿಥ್ಯಕ್ಕೆ ಸಜ್ಜಾಗುತ್ತಿದೆ. 2014ರಲ್ಲಿ ಭಾರತದಲ್ಲಿ ಸಾರ್ವತ್ರಿಕ ಚುನಾವಣೆ ಹಿನ್ನೆಲೆಯಲ್ಲಿ ಮೊದಲ ಹಂತದ ಐಪಿಎಲ್ ಟೂರ್ನಿಯನ್ನು ಯುಎಇನಲ್ಲಿ ಆಯೋಜಿಸಲಾಗಿತ್ತು. ಅಂದು ಟೂರ್ನಿಯ ಅರ್ಧದಷ್ಟು ಲೀಗ್ ಪಂದ್ಯಗಳನ್ನು ಯುಎಇ ಪ್ರೇಕ್ಷಕರು ಕಣ್ತುಂಬಿಕೊಂಡಿದ್ದರು. ಈ ಬಾರಿ ಪ್ಲೇ-ಆಫ್ಸ್ ಸಹಿತ ಸಂಪೂರ್ಣ 60 ಪಂದ್ಯಗಳು ಕೂಡ ಯುಎಇನಲ್ಲಿ ನಡೆಯಲಿದ್ದು, ಸ್ಪಿನ್ನರ್ಗಳಿಗೆ ನೆರವಾಗುವ ಪಿಚ್ಗಳು ಮತ್ತು ಬಿಸಿಯ ಹವಾಗುಣದಲ್ಲಿ ಯಾವ ಬ್ಯಾಟ್ಸ್ಮನ್ಗಳು ಯಶಸ್ಸು ಗಳಿಸುತ್ತಾರೆ ಎಂಬ ಸಹಜ ಕುತೂಹಲ ಕಾಡುತ್ತದೆ. ಈ ನಿಟ್ಟಿನಲ್ಲಿ ಯುಎಇ ಸವಾಲು ಮೆಟ್ಟಿನಿಂತು ರನ್ ಹೊಳೆ ಹರಿಸಬಲ್ಲ ಟಾಪ್ 5 ಬ್ಯಾಟ್ಸ್ಮನ್ಗಳ ವಿವರ ಇಲ್ಲಿ ನೀಡಲಾಗಿದೆ.ಕ್ರೀಡಾಂಗಣ ಹಾಗೂ ಪಿಚ್ ಯಾವುದೇ ಆಗಿರಲಿ ಈ ಬ್ಯಾಟ್ಸ್ಮನ್ಗೆ ರನ್ ಗಳಿಸುವುದೊಂದೇ ಗೊತ್ತಿರುವುದು. ಚೆನ್ನೈ ಸೂಪರ್ ಕಿಂಗ್ಸ್ನ ಸುರೇಶ್ ರೈನಾ ಐಪಿಎಲ್ನಲ್ಲಿ 5268 ರನ್ಗಳನ್ನು ಗಳಿಸಿ ಸಾರ್ವಕಾಲಿಕ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರ ಪೈಕಿ 2ನೇ ಸ್ಥಾನದಲ್ಲಿದ್ದಾರೆ. ಅಂದಹಾಗೆ ಮೊದಲ ಸ್ಥಾನದಲ್ಲಿ ಯಾರಿದ್ದಾರೆ ಅಂತ್ತೀರಾ? ರೈನಾಗಿಂತಲೂ 16 ಕಡಿಮೆ ಪಂದ್ಯಗಳನ್ನು ಆಡಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ 5412 ರನ್ಗಳೊಂದಿಗೆ ನಂ.1 ಸ್ಥಾನದಲ್ಲಿ ವಿರಾಜಮಾನರಾಗಿದ್ದಾರೆ.
ಕಳೆದ ಆವೃತ್ತಿಯಲ್ಲಿ 464 ರನ್ಗಳನ್ನು ಗಳಿಸಿದ್ದ ಕೊಹ್ಲಿ, ಈ ಬಾರಿ ಲೀಗ್ ಲೀಡರ್ ಆಗುವತ್ತ ಎದುರು ನೋಡುತ್ತಿರುವುದಂತೂ ಖಂಡಿತ. ಐಪಿಎಲ್ನಲ್ಲಿ ಒಟ್ಟು 5 ಶತಕಗಳನ್ನು ಬಾರಿಸಿರುವ ವಿರಾಟ್, 2016ರ ಒಂದೇ ಆವೃತ್ತಿಯಲ್ಲಿ 4 ಶತಕ ಸಿಡಿಸಿದ್ದರು. ಅದೇ ಆವೃತ್ತಿಯಲ್ಲಿ ದಾಖಲೆಯ 973 ರನ್ಗಳನ್ನು ಬಾರಿಸಿ ತಂಡವನ್ನು ಫೈನಲ್ಗೆ ಮುನ್ನಡೆಸಿದ್ದರು. ಆದರೆ, ಫೈನಲ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಆರ್ಸಿಬಿ ಸೋತು ನಿರಾಸೆ ಅನುಭವಿಸಿದ್ದರು.
ಈ ವರ್ಷ ಐಪಿಎಲ್ ನಡೆಯುವುದು ಶಶಾಂಕ್ ಮನೋಹರ್ಗೆ ಕಿಂಚಿತ್ತೂ ಇಷ್ಟವಿರಲಿಲ್ಲ!
ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ತಂಡದ ನೂತನ ನಾಯಕನಾಗಿರುವ ಯುವ ವಿಕೆಟ್ಕೀಪರ್ ಬ್ಯಾಟ್ಸ್ಮನ್ ಕ್ವಿಂಟನ್ ಡಿ'ಕಾಕ್, ಈ ಹಿಂದೆ ಸನ್ರೈಸರ್ಸ್ ಹೈದರಾಬಾದ್, ಡೆಲ್ಲಿ ಡೇರ್ಡೆವಿಲ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ತಂಡಗಳ ಪರ ಆಡಿದ ಅನುಭವ ಹೊಂದಿದ್ದಾರೆ. ಆದರೆ ಯಾವುದೇ ತಂಡದ ಪರ ಪೂರ್ಣ ಅವಧಿಯಲ್ಲಿ ಬ್ಯಾಟ್ ಬೀಸಿರಲಿಲ್ಲ.
ಕಳೆದ ಬಾರಿ ಮುಂಬೈ ಇಂಡಿಯನ್ಸ್ ಡಿ'ಕಾಕ್ ಅವರನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿತ್ತು. ಅಂತೆಯೇ ಭರ್ಜರಿಯಾಗಿ ಬ್ಯಾಟ್ ಬೀಸಿದ್ದ ಕ್ವಿಂಟನ್ ಒಟ್ಟು 529 ರನ್ ಬಾರಿಸಿ ತಂಡ ನಾಲ್ಕನೇ ಬಾರಿ ಟ್ರೋಫಿ ಗೆಲ್ಲುವಲ್ಲಿ ಮುಖ್ಯ ಪಾತ್ರ ವಹಿಸಿದ್ದರು. ಐಪಿಎಲ್ನಲ್ಲಿ ಈಗಾಗಲೇ ಒಂದು ಶತಕ ಕೂಡ ಬಾರಿಸಿದ ಅನುಭವ ಹೊಂದಿರುವ ಕ್ವಿಂಟನ್, ಈ ಬಾರಿ ಇನಿಂಗ್ಸ್ ಆರಂಭಿಸುವ ಅವಕಾಶ ಪಡೆದುಕೊಂಡರೆ ಮತ್ತೊಮ್ಮೆ ಇಂಡಿಯನ್ಸ್ ಪರ ರನ್ ಹೊಳೆ ಹರಿಸುವುದು ನಿಶ್ಚಿತ.
ಈ ಸಲ ಕಪ್ ಆರ್ಸಿಬಿಗೆ ಸಿಗೋ ಸಾಧ್ಯತೆ ಇದೆ ಎಂದ ಆಕಾಶ್ ಚೋಪ್ರಾ!
ಏಕಾಂಗಿಯಾಗಿ ಪಂದ್ಯ ಗೆದ್ದುಕೊಡಬಲ್ಲ ತಾಕತ್ತಿನ ಆಟಗಾರ ಆಸ್ಟ್ರೇಲಿಯಾದ ಆಲ್ರೌಂಡರ್ ಗ್ಲೆನ್ ಮ್ಯಾಕ್ಸ್ವೆಲ್. 2019ರ ಡಿಸೆಂಬರ್ನಲ್ಲಿ ನಡೆದ ಆಟಗಾರರ ಹರಾಜಿನಲ್ಲಿ ಬರೋಬ್ಬರಿ 10.75 ಕೋಟಿ ರೂ. ನೀಡಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಗ್ಲೆನ್ ಮ್ಯಾಕ್ಸ್ವೆಲ್ ಅವರನ್ನು ಮರಳಿ ತನ್ನ ತೆಕ್ಕೆಗೆ ತೆಗೆದುಕೊಂಡಿದೆ. ಈ ಮೊದಲು 2014-17ರವರೆಗೆ ಪಂಜಾಬ್ ತಂಡದಲ್ಲಿ ಆಡಿದ್ದ ಮ್ಯಾಕ್ಸ್ವೆಲ್, ಬಳಿಕ ಡೆಲ್ಲಿ ಡೇರ್ಡೆವಿಲ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ತಂಡದಲ್ಲಿ ಕಾಣಿಸಿಕೊಂಡಿದ್ದರು.
ಇನ್ನು 2013ರಲ್ಲಿ ಐಪಿಎಲ್ ಗೆದ್ದ ಮುಂಬೈ ಇಂಡಿಯನ್ಸ್ ತಂಡದ ಸದಸ್ಯನಾಗಿದ್ದರು ಕೂಡ ಆ ಟೂರ್ನಿಯಲ್ಲಿ ಅವರಿಗೆ ಆಡುವ ಅವಕಾಶ ಲಭ್ಯವಾಗಿರಲಿಲ್ಲ. ಸ್ಫೋಟಕ ಬ್ಯಾಟಿಂಗ್ಗೆ ಹೆಸರುವಾಸಿಯಾದ ಮ್ಯಾಕ್ಸ್ವೆಲ್, 2014ರಲ್ಲಿ ಯುಎಇನಲ್ಲಿ ನಡೆದ ಐಪಿಎಲ್ನಲ್ಲಿ ಅಮೋಘ ಆಟವಾಡಿ ಪಂಜಾಬ್ ತಂಡವನ್ನು ಫೈನಲ್ಗೆ ಮುನ್ನಡೆಯುವಂತೆ ಮಾಡಿದ್ದರು. ಆ ಆವೃತ್ತಿಯಲ್ಲಿ 16 ಪಂದ್ಯಗಳಲ್ಲಿ 187.75ರ ಸ್ಟ್ರೈಕ್ರೇಟ್ನಲ್ಲಿ 552 ರನ್ಗಳನ್ನು ಬಾರಿಸಿದ್ದರು. ಹೀಗಾಗಿ ಈ ಬಾರಿಯೂ ಮ್ಯಾಕ್ಸ್ವೆಲ್ ಅವರಿಂದ ಅಂಥದ್ದೇ ಪ್ರದರ್ಶನ ನಿರೀಕ್ಷಿಸಲಾಗಿದೆ.
ಐಪಿಎಲ್ ಟೂರ್ನಿ ವಿಶ್ವಕಪ್ಗೆ ಸರಿಸಮ ಎಂದ ಆಸೀಸ್ನ ಸ್ಟಾರ್ ಆಲ್ರೌಂಡರ್!
ಆಸ್ಟ್ರೇಲಿಯಾ ತಂಡದ ರನ್ ಮಷೀನ್ ಡೇವಿಡ್ ವಾರ್ನರ್ ಕೂಡ ಈ ಬಾರಿ ಆರೆಂಜ್ ಕ್ಯಾಪ್ ಪಡೆಯಬಲ್ಲ ಬ್ಯಾಟ್ಸ್ಮನ್ ಆಗಿದ್ದಾರೆ. ತಮ್ಮ ವೃತ್ತಿ ಬದುಕಿನ ಶ್ರೇಷ್ಠ ಲಯದಲ್ಲಿರುವ ಸನ್ರೈಸರ್ಸ್ ಹೈದರಾಬಾದ್ ತಂಡದ ಸ್ಟಾರ್ ಆಟಗಾರ ಹಾಗೂ ನಾಯಕ, ಐಪಿಎಲ್ನಲ್ಲಿ 43.17ರ ಸರಾಸರಿ ಮತ್ತು 142.39ರ ಅದ್ಭುತ ಸ್ಟ್ರೈಕ್ರೇಟ್ ಹೊಂದಿದ್ದಾರೆ. ಒಟ್ಟಾರೆ 126 ಪಂದ್ಯಗಳಲ್ಲಿ ಬ್ಯಾಟ್ ಬೀಸಿರುವ ಎಡಗೈ ಬ್ಯಾಟ್ಸ್ಮನ್ ಒಟ್ಟು 4706 ರನ್ಗಳನ್ನು ಚಚ್ಚಿದ್ದಾರೆ. 2014ರಲ್ಲಿ ಸನ್ರೈಸರ್ಸ್ ತಂಡ ಸೇರಿದ ವಾರ್ನರ್, ಅಂದಿನಿಂದ ಪ್ರತಿ ಆವೃತ್ತಿಯಲ್ಲೂ 500+ ರನ್ ಗಳಿಸಿದ್ದಾರೆ. 2018ರ ಆವೃತ್ತಿಯಲ್ಲಿ ನಿಷೇಧ ಕಾರಣ ಹೊರಗುಳಿದಿದ್ದರು.
ಇನ್ನು ತಮ್ಮ ನಾಯಕತ್ವದಲ್ಲಿ ಹೈದರಾಬಾದ್ಗೆ 2016ರಲ್ಲಿ ಚಾಂಪಿಯನ್ಸ್ ಪಟ್ಟ ಕೂಡ ಕೊಡಿಸಿರುವ ವಾರ್ನರ್ ಈ ಬಾರಿ ಯುಎಇನಲ್ಲೂ ಅಬ್ಬರಿಸುವ ಲೆಕ್ಕಾಚಾರದಲ್ಲಿದ್ದಾರೆ. ಐಪಿಎಲ್ನಲ್ಲಿ ಅತಿ ಹೆಚ್ಚು ಅರ್ಧಶತಕಗಳನ್ನು ಬಾರಿಸಿದ ದಾಖಲೆ ಹೊಂದಿರುವ ವಾರ್ನರ್ ಒಟ್ಟು 4 ಶತಕಗಳನ್ನೂ ಸಿಡಿಸಿದ್ದಾರೆ. ಜೊತೆಗೆ 2015, 2017 ಮತ್ತು 2019ರ ಆವೃತ್ತಿಗಳಲ್ಲಿ ಟೂರ್ನಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಬ್ಯಾಟ್ಸ್ಮನ್ ಆರೆಂಜ್ ಕ್ಯಾಪ್ ಗೌರವ ಕೂಡ ಪಡೆದಿದ್ದಾರೆ.
ಈ ಬಾರಿ ಮುಂಬೈ ಇಂಡಿಯನ್ಸ್ಗೆ ಕೈ ಕೊಡಲಿದ್ದಾರಾ ಕಿವೀಸ್ ವೇಗಿ?
ಕರ್ನಾಟಕದ ತಾರೆ ಕೆಎಲ್ ರಾಹುಲ್ ಈ ಬಾರಿ ಮೊತ್ತ ಮೊದಲ ಬಾರಿ ಐಪಿಎಲ್ ತಂಡವೊಂದನ್ನು ಮುನ್ನಡೆಸುವ ತವಕದಲ್ಲಿದ್ದಾರೆ. ಕೋಚ್ ಅನಿಲ್ ಕುಂಬ್ಳೆ ಮಾರ್ಗದರ್ಶನ ಪಡೆದಿರುವ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ನೂತನ ನಾಯಕನಾಗಿರುವ ಕೆಎಲ್ ರಾಹುಲ್, ಇದರ ಸಂಪೂರ್ಣ ಲಾಭ ಪಡೆದು ತಮ್ಮದೇ ಆದ ಛಾಪು ಮೂಡಿಸುವ ತವಕದಲ್ಲಿದ್ದಾರೆ. ಇನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲೂ ಕಳೆದ ಒಂದು ವರ್ಷದಲ್ಲಿ ತಮ್ಮ ಶ್ರೇಷ್ಠ ಲಯ ಕಂಡುಕೊಂಡಿರುವ ರಾಹುಲ್ ಈ ಬಾರಿಯ ಐಪಿಎಲ್ನಲ್ಲೂ ಅಂಥದ್ದೇ ಗರ್ಜನೆ ಮೊಳಗಿಸಲು ಎದುರು ನೋಡುತ್ತಿದ್ದಾರೆ.
ಇನ್ನು ಐಪಿಎಲ್ನಲ್ಲಿ ಅತಿ ವೇಗದ ಅರ್ಧಶತಕ ಬಾರಿಸಿದ ದಾಖಲೆ ರಾಹುಲ್ ಹೆಸರಲ್ಲಿದೆ. ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 14 ಎಸೆತಗಳಲ್ಲಿ ರಾಹುಲ್ ಹಾಫ್ ಸೆಂಚುರಿ ಬಾರಿಸಿದ್ದರು. 2016ರಲ್ಲಿ ಆರ್ಸಿಬಿ ಪರ ಆಡುವಾಗ ರಾಹುಲ್ ಬೆಳಕಿಗೆ ಬಂದ ರಾಹುಲ್, ಬಳಿಕ 2018ರಲ್ಲಿ ಪಂಜಾಬ್ ತಂಡದ ಪಾಲಾಗಿ ಪ್ರೀತೀ ಝಿಂಟಾ ಮಾಲೀಕತ್ವದ ಫ್ರಾಂಚೈಸಿ ಪರ ಎರಡು ಆವೃತ್ತಿಗಳಲ್ಲಿ 1252 ರನ್ಗಳನ್ನು ಚಚ್ಚಿದ್ದಾರೆ. ಈ ಬಾರಿಯೂ ಅಂಥದ್ದೇ ಪವರ್ ಫುಲ್ ಪ್ರದರ್ಶನವನ್ನು ರಾಹುಲ್ ಅವರಿಂದ ನಿರೀಕ್ಷಿಸಬಹುದಾಗಿದೆ.
ಫಿಕ್ಸ್ ಆಯ್ತು ಐಪಿಎಲ್ ದಿನಾಂಕ : ಸೆ.19 ರಿಂದ ಆರಂಭ, ನ.8ಕ್ಕೆ ಫೈನಲ್..!
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2WQRWWF
