ಹೊಸದಿಲ್ಲಿ: ಅಗತ್ಯ ಅನುಮತಿ ಪಡೆಯದೇ 1.60 ಲಕ್ಷಕ್ಕಿಂತ ಹೆಚ್ಚಿನ ವೈದ್ಯಕೀಯ ಸೇವಾ ಸಂಸ್ಥೆಗಳು ದೇಶಾದ್ಯಂತ ನಿರ್ಭಿಡೆಯಿಂದ ಕಾರ್ಯನಿರ್ವಹಿಸುತ್ತಿವೆ ಎನ್ನುವ ಕಳವಳಕಾರಿ ಸಂಗತಿ ಬೆಳಕಿಗೆ ಬಂದಿದೆ. ರಾಷ್ಟ್ರೀಯ ಹಸಿರು ನ್ಯಾಯ ಮಂಡಳಿಗೆ ಮಂಗಳವಾರ ಕೇಂದ್ರ ಮಾಲಿನ್ಯ ನಿಯಂತ್ರಣಾ ಮಂಡಲಿ () ಸಲ್ಲಿಸಿದ ವರದಿಯಿಂದ ಇದು ಬೆಳಕಿಗೆ ಬಂದಿದೆ. ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಗಳು ಸಲ್ಲಿಸಿದ ವಾರ್ಷಿಕ ವರದಿ ಪ್ರಕಾರ ದೇಶದಲ್ಲಿಇರುವ ಒಟ್ಟು 2,70,416 ಆರೋಗ್ಯ ಸೇವಾ ಘಟಕಗಳ (ಎಚ್ಸಿಎಫ್) ಪೈಕಿ ಇದುವರೆಗೆ 1,10,356 ಘಟಕಗಳು ಮಾತ್ರ ಜೈವಿಕ ವೈದ್ಯಕೀಯ ತ್ಯಾಜ್ಯ ನಿರ್ವಹಣೆ ನಿಯಮಗಳ ಅಡಿಯಲ್ಲಿ ಅನುಮತಿ ಪಡೆದಿವೆ. ಇವುಗಳ ಅನುಮತಿ ಅವಧಿ ಕೂಡ 2019ಕ್ಕೆ ಮುಗಿದಿದೆ. 1,11,122 ಘಟಕಗಳು ಅನುಮತಿ ನವೀಕರಣಕ್ಕೆ ಅರ್ಜಿ ಸಲ್ಲಿಸಿವೆ. ಉಳಿದವುಗಳು ಅನಧಿಕೃತವಾಗಿ ಕಾರ್ಯನಿರ್ವಹಿಸುತ್ತಿವೆ ಎಂದು ಮಾಲಿನ್ಯ ನಿಯಂತ್ರಣ ಮಂಡಳಿ ಹಸಿರು ನ್ಯಾಯ ಮಂಡಳಿಗೆ ತಿಳಿಸಿದೆ. ''50 ಸಾವಿರ ಘಟಕಗಳು ಮಾನ್ಯತೆ ಕೋರಿ ಅರ್ಜಿ ಕೂಡ ಸಲ್ಲಿಸಿಲ್ಲ. ಅಕ್ರಮವಾಗಿಯೇ ಅವೆಲ್ಲವೂ ಕಾರ್ಯನಿರ್ವಹಿಸುತ್ತಿವೆ. ಇದರಿಂದ ಪರಿಸರದ ಮೇಲೆ ಮಾರಕ ಪರಿಣಾಮ ಉಂಟಾಗುತ್ತಿದೆ. ಕರ್ನಾಟಕ ಸೇರಿ ದೇಶದ 19 ರಾಜ್ಯಗಳು ಎಚ್ಸಿಎಫ್ಗಳ ಕಾರ್ಯನಿರ್ವಹಣೆ ಕುರಿತಾದ ವಾರ್ಷಿಕ ವರದಿಯನ್ನೇ ಸಲ್ಲಿಸಿಲ್ಲ'' ಎಂದು ಸಿಪಿಸಿಬಿ ವರದಿಯಲ್ಲಿ ತಿಳಿಸಿದೆ. ''ಪರಿಸರ ಒತ್ತಡಕ್ಕೆ ಸಿಲುಕಿರುವಾಗ ಇಂತಹ ಉದಾಸೀನ ಸಲ್ಲದು,'' ಎಂದು ಎಚ್ಚರಿಕೆ ನೀಡಿದ ಅಧ್ಯಕ್ಷ ನ್ಯಾ. ಆದರ್ಶಕುಮಾರ್ ಗೋಯಲ್ ನೇತೃತ್ವದ ಪೀಠ, ಎಚ್ಪಿಎಫ್ಗಳ ಸಕ್ರಮಕ್ಕೆ ತ್ವರಿತ ಕ್ರಮ ಕೈಗೊಂಡು ಡಿಸೆಂಬರ್ 31ರ ಒಳಗೆ ಕೇಂದ್ರ ಮಂಡಳಿಗೆ ಪರಿಷ್ಕೃತ ವರದಿ ಸಲ್ಲಿಸುವಂತೆ ರಾಜ್ಯ ಮಾಲಿನ್ಯ ನಿಯಂತ್ರಣಾ ಮಂಡಳಿಗಳಿಗೆ ನಿರ್ದೇಶನ ನೀಡಿತು.
from India & World News in Kannada | VK Polls https://ift.tt/32IZgHp
