- ಶಶಿಧರ ಮೇಟಿ, ಬಳ್ಳಾರಿ ರಾಜ್ಯದ ಬಡವರ ಪಾಲಿಗೆ ಆಶಾಕಿರಣವಾಗಿರುವ ಅನ್ನ ಭಾಗ್ಯಕ್ಕೆ ಜನರೇ ಕನ್ನ ಹಾಕುತ್ತಿದ್ದಾರೆ. ನ್ಯಾಯಬೆಲೆ ಅಂಗಡಿಗಳು, ದಲ್ಲಾಳಿಗಳ ಕೂಟ ಇದನ್ನು ಪೋಷಿಸುತ್ತಿದ್ದು, ಉಚಿತವಾಗಿ ನೀಡುವ ಅಕ್ಕಿ ಮಾರುಕಟ್ಟೆಯಲ್ಲಿ ದೊಡ್ಡ ಮೊತ್ತಕ್ಕೆ ಬಿಕರಿಯಾಗುತ್ತಿದೆ. ಇದರಿಂದ ರಾಜ್ಯದ ಬೊಕ್ಕಸಕ್ಕೆ ಕೋಟ್ಯಂತರ ರೂ. ನಷ್ಟವಾಗುತ್ತಿದ್ದು, ಅಂಗಡಿ ಮಾಲೀಕರು, ಮಧ್ಯವರ್ತಿಗಳು ದುಡ್ಡು ಮಾಡಿಕೊಳ್ಳುತ್ತಿದ್ದಾರೆ. ಮುಖ್ಯವಾಗಿ, ಉತ್ತರ ಕರ್ನಾಟಕದ ಗಡಿ ಜಿಲ್ಲೆಗಳಿಂದ ಆಂಧ್ರ, ಮಹಾರಾಷ್ಟ್ರ ಮತ್ತು ಗುಜರಾತ್ಗೆ ದೊಡ್ಡ ಪ್ರಮಾಣದಲ್ಲಿ ಅಕ್ಕಿ ಸಾಗಿಸಲಾಗುತ್ತಿದ್ದು, ಇದೊಂದು ಅಂತಾರಾಜ್ಯ ದಂಧೆಯಾಗಿ ಪರಿಣಮಿಸಿದೆ. ಬಳ್ಳಾರಿ ಜಿಲ್ಲೆಯ ಗಡಿ ಗ್ರಾಮದಲ್ಲಿ ವಿಜಯ ಕರ್ನಾಟಕ ನಡೆಸಿದ ಕಾರ್ಯಾಚರಣೆಯಲ್ಲಿ ಆಂಧ್ರಕ್ಕೆ ಅಕ್ಕಿ ರವಾನೆಯಾಗುತ್ತಿರುವುದು ನೇರವಾಗಿ ಬಯಲಾಯಿತು. ಆಂಧ್ರದ ಮಂಡಕ್ಕಿ ಭಟ್ಟಿ ಮತ್ತು ಹೋಟೆಲ್ಗಳಿಗೆ ರಾಜ್ಯದ ಅಕ್ಕಿ ರವಾನೆಯಾಗುತ್ತಿದ್ದು, ಇದಕ್ಕಾಗಿಯೇ ಮಧ್ಯವರ್ತಿಗಳು ಇದ್ದಾರೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಸೂಲಿಬೆಲೆಯಲ್ಲಿ ವಾಹನಗಳಲ್ಲಿ ಬಂದು ಅಕ್ಕಿ ಖರೀದಿಸುವ ದಂಧೆಯ ರಾಜಾರೋಷವೂ ದಾಖಲಾಗಿದೆ. ಕಾರ್ಯಾಚರಣೆ ಹೇಗೆ?ತಿಂಗಳಲ್ಲಿ ಪಡಿತರ ಅಕ್ಕಿ ವಿತರಣೆ ಮುಗಿಯುತ್ತಿದ್ದಂತೆಯೇ ಮಧ್ಯವರ್ತಿಗಳು ನೇರವಾಗಿ ವಾಹನಗಳ ಮೂಲಕ ಗ್ರಾಮಗಳಿಗೆ ಬರುತ್ತಿದ್ದು, ಬಹಿರಂಗವಾಗಿಯೇ ಅಕ್ಕಿ ಖರೀದಿಸುತ್ತಾರೆ. 10ರಿಂದ 15 ರೂ.ಗಳಿಗೆ ಖರೀದಿಸುವ ಅಕ್ಕಿಯನ್ನು ಅನ್ಯ ರಾಜ್ಯಗಳಿಗೆ ಕಳುಹಿಸಿ ಅಲ್ಲಿ25-30 ರೂ.ಗೆ ಮಾರುತ್ತಾರೆ. ಇನ್ನು ಕೆಲವರು ಇವುಗಳನ್ನು ಸ್ಥಳೀಯ ಮಿಲ್ಗಳಿಗೆ ಮಾರಾಟ ಮಾಡುತ್ತಾರೆ. ಮಿಲ್ಗಳು ಅವುಗಳಿಗೆ ಪಾಲಿಷ್ ಮಾಡಿ 35ರಿಂದ 40 ರೂ.ವರೆಗೂ ಮಾರಲಾಗುತ್ತದೆ. ಇದೆಲ್ಲವೂ ಬಹಿರಂಗವಾಗಿ ನಡೆಯುತ್ತಿದ್ದರೂ ಜನರೂ ಸುಮ್ಮನಿದ್ದಾರೆ. ಅಧಿಕಾರಿಗಳು ಒಂದೆರಡು ದಾಳಿ ನಡೆಸಿ ಕೈ ತೊಳೆದುಕೊಳ್ಳುತ್ತಿದ್ದಾರೆ. ಪಾಲಿಷ್ ಮಾಡಿ ಮಾರಾಟಅನ್ನ ಭಾಗ್ಯದ ಅಕ್ಕಿಯನ್ನು 10 ರೂ.ಗೆ ಖರೀದಿಸಿ, ಪಾಲಿಷ್ ಮಾಡಿ ಮಾರುವ, ತಮ್ಮದೇ ಬ್ರ್ಯಾಂಡ್ನಲ್ಲಿ ಮಾರುಕಟ್ಟೆಗೆ ಬಿಡುವ ದಂಧೆಕೋರರೂ ಇದ್ದಾರೆ. ಇದರಿಂದ ಸರಕಾರಕ್ಕೆ ಮಾತ್ರವಲ್ಲ, ದುಬಾರಿ ಬೆಲೆ ಕೊಟ್ಟು ಅಕ್ಕಿ ಖರೀದಿಸುವ ಸಾಮಾನ್ಯ ಜನರೂ ಮೋಸಕ್ಕೆ ಒಳಗಾಗುವಂತಾಗಿದೆ. ಕೆಲವು ಕಡೆ ಸೋನಾ ಮಸೂರಿಯಂಥ ದುಬಾರಿ ಅಕ್ಕಿಗೂ ಮಿಶ್ರ ಮಾಡುವ ಕೃತ್ಯ ನಡೆಯುತ್ತಿದೆ. ಬಯೋಮೆಟ್ರಿಕ್ ಬಂದರೂ ನಿಲ್ಲದ ದಂಧೆ ಪಡಿತರ ಖರೀದಿಗೆ ಕುಟುಂಬದ ಸದಸ್ಯರೊಬ್ಬರ ಬೆರಳಚ್ಚು ಕಡ್ಡಾಯ ಎಂಬ ನಿಯಮ ಜಾರಿಯಾಗಿದ್ದರೂ ದಂಧೆ ನಿಂತಿಲ್ಲ. ಜನರೇ ಖರೀದಿಸಿ ಅಂಗಡಿಗಳಿಗೆ ಮಾರಾಟ ಮಾಡುತ್ತಿದ್ದಾರೆ. ಜತೆಗೆ ಕೆಲವು ಕಡೆ ಬೆರಳಚ್ಚು ಪಡೆದು ನ್ಯಾಯಬೆಲೆ ಅಂಗಡಿಗಳೇ ದಂಧೆ ನಡೆಸುತ್ತಿವೆ.
from India & World News in Kannada | VK Polls https://ift.tt/37Y9OSz
