ಢಾಕಾ: ವೆಸ್ಟ್ ಇಂಡೀಸ್ ತಂಡದ ಬ್ಯಾಟಿಂಗ್ ದಂತಕತೆ ಜಮೈಕಾದ ಎಡಗೈ ಬ್ಯಾಟ್ಸ್ಮನ್ ಕ್ರಿಸ್ ಗೇಲ್, ಸದ್ಯ ವಿಶ್ವದ ಅತ್ಯಂತ ಸುಕ್ಷಿತ ಸ್ಥಳಗಳಲ್ಲಿ ಒಂದು ಎಂಬ ಅಚ್ಚರಿಯ ಹೇಳಿಕೆಯೊಂದನ್ನು ನೀಡಿದ್ದಾರೆ. ಸ್ವಘೋಷಿತ ಯೂನಿವರ್ಸ್ ಬಾಸ್ 40 ವರ್ಷದ ಕ್ರಿಸ್ ಗೇಲ್, ಟಿ20 ಕ್ರಿಕೆಟ್ ಟೂರ್ನಿಯಲ್ಲಿ ಆಡಲು ಸದ್ಯ ಬಾಂಗ್ಲಾದೇಶದಲ್ಲಿದ್ದಾರೆ. ಈ ಸಂದರ್ಭದಲ್ಲಿ ಪಾಕಿಸ್ತಾನ ಸುರಕ್ಷಿತ ಸ್ಥಳವೇ ಎಂದು ಕೇಳಲಾದ ಪ್ರಶ್ನೆಗೆ ಅವರು ಉತ್ತರಿಸಿದ್ದಾರೆ. "ಸದ್ಯಕ್ಕೆ ವಿಶ್ವದ ಅತ್ಯಂತ ಸುರಕ್ಷಿತ ಸ್ಥಳಗಳಲ್ಲಿ ಪಾಕಿಸ್ತಾನವೂ ಒಂದು. ಅಲ್ಲಿ ಒಬ್ಬ ಪ್ರೆಸಿಡೆಂಟ್ಗೆ ನೀಡಲಾಗುವಷ್ಟು ಭದ್ರತೆ ಒದಗಿಸುತ್ತಾರಂತೆ. ಅಂದಮೇಲೆ ಸುರಕ್ಷಿತವಾಗಿ ಇರುತ್ತೇವೆ. ಬಾಂಗ್ಲಾದೇಶದಲ್ಲೂ ಅಷ್ಟೇ ಸುರಕ್ಷಿತವಾಗಿದ್ದೇವೆ ಅಲ್ಲವೇ?," ಎಂದು ಗೇಲ್ ಹೇಳಿದ್ದಾರೆ. ಬಿಪಿಎಲ್ ಟೂರ್ನಿಯಲ್ಲಿ ಚೊಟ್ಟೊಗ್ರಾಮ್ ಚಾಲೆಂಜರ್ಸ್ ತಂಡದ ಪರ ಆಡಲಿರುವ ಗೇಲ್, ಶುಕ್ರವಾರ ಮಾಧ್ಯಮದ ಎದುರು ಈ ಹೇಳಿಕೆ ನೀಡಿದರು. ಕಳೆದ ಹತ್ತು ವರ್ಷಗಳಲ್ಲಿ ಇದೇ ಮೊದಲ ಬಾರಿ ಪಾಕಿಸ್ತಾನದಲ್ಲಿ ಪಂದ್ಯ ನಡೆಯಿತು. ಶ್ರೀಲಂಕಾ ತಂಡ ಕಳೆದ ವರ್ಷ ಡಿಸೆಂಬರ್ನಲ್ಲಿ ಪಾಕಿಸ್ತಾನ ಪ್ರವಾಸ ಕೈಗೊಂಡು 2 ಪಂದ್ಯಗಳ ಟೆಸ್ಟ್ ಸರಣಿಯನ್ನಾಡಿತ್ತು. ಈ ಸಂದರ್ಭದಲ್ಲಿ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ () ಮುಖ್ಯಸ್ಥ ಎಹ್ಸಾನ್ ಮಣಿ ಪಾಕಿಸ್ತಾನ ಕ್ರಿಕೆಟ್ ಆಡಲು ಸುರಕ್ಷಿತವಾಗಿದೆ ಎಂದು ಹೇಳಿದ್ದರು. "ಪಾಕಿಸ್ತಾನ ಅತ್ಯಂತ ಸುರಕ್ಷಿತ ಸ್ಥಳ ಎಂಬುದನ್ನು ನಾವು ಸಾಬೀತು ಪಡಿಸಿದ್ದೇವೆ. ಹೀಗಿರುವಾಗ ನಮ್ಮ ರಾಷ್ಟ್ರಕ್ಕೆ ಬರದೇ ಹೋಗುವ ತಂಡಗಳು ಮಾತ್ರವೇ ಇಲ್ಲಿ ರಕ್ಷಣೆ ಯಾಕಿಲ್ಲ ಎಂಬುದನ್ನು ಸಾಬೀತು ಪಡಿಸಬೇಕು. ಈಗಿನ ಪರಿಸ್ಥಿತಿಗಳನ್ನು ಕಂಡರೆ ಪಾಕಿಸ್ತಾನಕ್ಕಿಂತಲೂ ಭಾರತದಲ್ಲಿ ಭದ್ರತೆಯ ಕೊರತೆ ಇದೆ," ಎಂದು ಹೇಳಿದ್ದರು. "ಶ್ರೀಲಂಕಾ ತಂಡದ ಯಶಸ್ವಿ ಪಾಕಿಸ್ತಾನ ಪ್ರವಾಸದ ಬಳಿಕ ಇಲ್ಲಿನ ಭದ್ರತಾವ್ಯವಸ್ಥೆಯ ಬಗ್ಗೆ ಅನುಮಾನಿಸಲೇ ಬಾರದು. ಪಾಕಿಸ್ತಾನದಲ್ಲಿ ಟೆಸ್ಟ್ ಕ್ರಿಕೆಟ್ ಮರಳಿ ಶುರುವಾಗಿದೆ. ಪಾಕಿಸ್ತಾನದ ಸುರಕ್ಷತೆ ಬಗ್ಗೆ ವಿಶ್ವವ್ಯಾಪಿ ಸಂದೇಶ ಸಾರಲು ಮಾಧ್ಯಮಗಳು ಮಹತ್ವದ ಪಾತ್ರ ವಹಿಸಿವೆ," ಎಂದಿದ್ದರು. ಪಾಕಿಸ್ತಾನ ತಂಡ ಇದೀಗ ಬಾಂಗ್ಲಾದೇಶವನ್ನು 3 ಟಿ20-ಐ ಮತ್ತು 2 ಟೆಸ್ಟ್ಗಳ ಸರಣಿಗಳನ್ನಾಡಲು ಪಾಕ್ ಪ್ರವಾಸ ಕೈಗೊಳ್ಳುವಂತೆ ಆಹ್ವಾನಿಸಿದೆ. ಆದರೆ, ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ ಈವರೆಗೆ ತನ್ನ ಅಂತಿಮ ನಿರ್ಧಾರ ಪ್ರಕಟಿಸಿಲ್ಲ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/36GZCxE
