ವಾದಿ ಅಲ್ ದವಾಸಿರ್ (ಸೌದಿ ಅರೇಬಿಯಾ): ವಿಶ್ವದ ಅತ್ಯಂತ ಅಪಾಯಕಾರಿ ಕ್ರೀಡೆಯಲ್ಲಿ ಒಂದಾಗಿರುವ ಡಕಾರ್ ರ್ಯಾಲಿಯಲ್ಲಿ ಭಾರತದ ತಂಡವನ್ನು ಪ್ರತಿನಿಧಿಸುತ್ತಿದ್ದ ಪೋರ್ಚುಗಲ್ನ ರೇಸರ್ ಅಪಘಾತದಲ್ಲಿ ನಿಧನರಾಗಿದ್ದಾರೆ ಎಂದು ರ್ಯಾಲಿ ಸಂಘಟಕರು ತಿಳಿಸಿದ್ದಾರೆ. ಇದೇ ಮೊದಲ ಬಾರಿ ಹೀರೊ ತಂಡವನ್ನು ಪ್ರತಿನಿಧಿಸಿದ 40 ವರ್ಷದ ಅನುಭವಿ ರೈಡರ್ ಪೌಲೊ ಗೊನ್ಸಾಲ್ವೆಸ್, ವಿಶ್ವದ ಅತ್ಯಂತ ಕಠಿಣ ರೇಸ್ನಲ್ಲಿ ಈ ಹಿಂದೆ ರನ್ನರ್ಅಪ್ ಸ್ಥಾನ ಪಡೆದ ಸಾಧನೆ ಮಾಡಿದ್ದು ಈ ಬಾರಿಯೂ ಅಗ್ರ 10ರ ಒಳಗೆ ಗುರಿಯತ್ತ ಮುನ್ನುಗ್ಗುತ್ತಿದ್ದರು. 2006ರಲ್ಲಿ ಪದಾರ್ಪಣೆ ಮಾಡಿ ತಮ್ಮ ವೃತ್ತಿ ಬದುಕಿನ 13ನೇ ರೇಸ್ನಲ್ಲಿ ಸ್ಪರ್ಧಿಸುತ್ತಿದ್ದ ಗೊನ್ಸಾಲ್ವೆಸ್, ಭಾನುವಾರ ರಿಯಾದ್ ಮತ್ತು ವಾದಿ ಅಲ್ ದವಾಸಿರ್ ನಡುವಣ ಮಾರ್ಗದಲ್ಲಿ 276 ಕಿ.ಮೀ ದೂರದಲ್ಲಿ ನಡೆದ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡು ಕೊನೆಯುಸಿರೆಳೆದಿದ್ದಾರೆ ಎಂದು ವರದಿಯಾಗಿದೆ. "ಭಾನುವಾರ ಬೆಳಗ್ಗೆ 10:08ರ ಸುಮಾರಿಗೆ ಅಪಘಾತ ಸಂಭವಿಸಿರುವುದರ ಕುರಿತಾಗಿ ಸಂಘಟಕರಿಗೆ ಸಂದೇಶ ಲಭ್ಯವಾಗಿದೆ. ಕೂಡಲೇ ವೈದ್ಯಕೀಯ ಸವಲತ್ತುಗಳನ್ನು ಹೊಂದಿರುವ ಹೆಲಿಕಾಪ್ಟರ್ ಕಳುಹಿಸಲಾಗಿದ್ದು, ಘಟನಾ ಸ್ಥಳಕ್ಕೆ ಬೆಳಗ್ಗೆ 10:16ರ ಸುಮಾರಿಗೆ ಹೆಲಿಕಾಪ್ಟರ್ ತಲುಪಿದೆ. ಆದರೆ, ಆ ಹೊತ್ತಿಗಾಗಲೇ ಹೃದಯ ಸ್ಥಂಬನವಾಗಿ ಗೊನ್ಸಾಲ್ವೆಸ್ ಮೃತಪಟ್ಟಿದ್ದರು," ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. "ಹೆಲಿಕಾಪ್ಟರ್ ಮೂಲಕ ಅವರನ್ನು ಹತ್ತಿರದ ಲೈಲಾ ಹಾಸ್ಪಿಟಲ್ಗೆ ಕರೆದೊಯ್ಯಲಾಗಿದೆಯಾದರೂ ಪ್ರಯೋಜನವಾಗಿಲ್ಲ. ವೈದ್ಯಾಧಿಕಾರಿಗಳು ಗೊನ್ಸಾಲ್ವೆಸ್ ಈಗಾಗಲೇ ಮೃತಪಟ್ಟಿದ್ದಾರೆ ಎಂದು ಘೋಷಿಸಿದ್ದರು. ಮೃತ ರೇಸರ್ನ ಕುಟುಂಬ ಮತ್ತು ಬಂಧು ಮಿತ್ರರಿಗೆ ಡಕಾರ್ ವತಿಯಿಂದ ಸಂತಾಪ ಸೂಚಿಸಲಾಗಿದೆ," ಎಂದು ಹೇಳಿಕೆಯಲ್ಲಿ ವಿವರಿಸಲಾಗಿದೆ. ಡಕಾರ್ ರ್ಯಾಲಿ ರೇಸ್ನಲ್ಲಿ ಈವರೆಗೆ 13 ಬಾರಿ ಸ್ಪರ್ಧಿಸಿರುವ ಗೊನ್ಸಾಲ್ವೆಸ್, ನಾಲ್ಕು ಬಾರಿ ಅಗ್ರ 10ರೊಳಗೆ ಗುರಿಮುಟ್ಟಿದ ಸಾಧನೆ ಮಾಡಿದ್ದಾರೆ. 2015ರಲ್ಲಿ ಅವರ ಸರ್ವಶ್ರೇಷ್ಠ ಪ್ರದರ್ಶನ ಹೊರಬಂದಿದ್ದು, ಮಾಕ್ ಕೋಮಾದಲ್ಲಿ ನಡೆದ ರ್ಯಾಲಿಯಲ್ಲಿ ರನ್ನರ್ಅಪ್ ಸ್ಥಾನ ಪಡೆದಿದ್ದರು. ಸ್ಪರ್ಧೆಯಲ್ಲಿ ಬೆಂಗಳೂರಿನ ರೇಸರ್ ಹೀರೊ ಮೋಟಾರ್ಸ್ಸ್ಪೋರ್ಟ್ಸ್ ರ್ಯಾಲಿ ತಂಡದಲ್ಲಿ ಬೆಂಗಳೂರಿನ ರೈಡರ್ ಕೂಡ ಇದ್ದು, ಬಹು ಬಾರಿ ಡಕಾರ್ ರ್ಯಾಲಿಯಲ್ಲಿ ಗುರಿ ಮುಟ್ಟಿದ ಏಕಮಾತ್ರ ಭಾರತೀಯ ರೈಡರ್ ಎನಿಸಿದ್ದಾರೆ. ಕಳೆದ ವರ್ಷ ಮತ್ತೊಬ್ಬ ಕನ್ನಡಿಗ ಉಡುಪಿ ಮೂಲದವರಾದ ಅರವಿಂದ್ ಕೆಪಿ ಟಿವಿಎಸ್ ಶೆರ್ಕೊ ರ್ಯಾಲಿ ತಂಡವನ್ನು ಪ್ರತಿನಿಧಿಸಿ ಡಕಾರ್ ರ್ಯಾಲಿ ಪೂರೈಸಿದ 2ನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಈ ಬಾರಿಯೂ ಸಂತೋಷ್ ರೇಸ್ನಲ್ಲಿ ಪಾಲ್ಗೊಂಡಿದ್ದು, ಅರವಿಂದ್ ಗಾಯದ ಸಮಸ್ಯೆ ಕಾರಣ ಹೊರಗುಳಿದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2uzbEL9
