ವಾಷಿಂಗ್ಟನ್: ರಾಜಧಾನಿ ಕಾಬೂಲ್ನಿಂದ ಬಂದ ತನ್ನ ಒಂದು ಸಿ-17 ವಿಮಾನದ ಚಕ್ರದ ಮೇಲ್ಭಾಗದ ನಡುವಿನಲ್ಲಿ ವ್ಯಕ್ತಿಯೊಬ್ಬನ ದೇಹದ ಛಿದ್ರಗೊಂಡ ಭಾಗಗಳು ಪತ್ತೆಯಾಗಿವೆ ಎಂದು ವಾಯುಪಡೆ ತಿಳಿಸಿದೆ. ಉಗ್ರರು ಕಾಬೂಲ್ ಅನ್ನು ಸುತ್ತುವರಿದ ಬೆನ್ನಲ್ಲೇ ಸಾವಿರಾರು ಅಫ್ಘನ್ನರು ಜೀವ ಉಳಿಸಿಕೊಳ್ಳಲು ದೇಶದಿಂದ ಪರಾರಿಯಾಗಲು ಪ್ರಯತ್ನಿಸಿದ್ದರು. ತನ್ನ ಪ್ರಜೆಗಳನ್ನು ಕರೆದುಕೊಂಡು ಬರಲು ಅಮೆರಿಕ ವಾಯುಪಡೆ ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ಇಳಿಯುತ್ತಿದ್ದಂತೆಯೇ ನೂರಾರು ಅಫ್ಘನ್ ಪ್ರಜೆಗಳು ವಿಮಾನವನ್ನು ಸುತ್ತುವರಿದಿದ್ದರು. ಕಂಡ ಕಂಡ ಜಾಗದಿಂದ ಮೇಲೇರಿ ವಿಮಾನದೊಳಗೆ ತೂರಿಕೊಳ್ಳಲು ಪ್ರಯತ್ನಿಸಿದ್ದರು. ಕೆಲವರು ವಿಮಾನದ ಚಕ್ರಗಳು, ರೆಕ್ಕೆಗಳ ಅಡಿ ಕುಳಿತುಕೊಂಡಿದ್ದರು. ವಿಮಾನ ಮೇಲೆ ಹೋದಂತೆ ನೀವು ಸತ್ತು ಹೋಗುತ್ತೀರಿ ಎಂದು ವಿಮಾನ ಸಿಬ್ಬಂದಿ ಎಚ್ಚರಿಸಿದ್ದರೂ ಅದಕ್ಕೆ ಕಿವಿಗೊಟ್ಟಿರಲಿಲ್ಲ. ವಿಮಾನ ಟೇಕಾಫ್ ಆದ ಸೆಕೆಂಡುಗಳಲ್ಲಿಯೇ ಕೆಲವರು ವಿಮಾನದಿಂದ ಬೀಳುವ ದೃಶ್ಯಗಳು ವಿಡಿಯೋದಲ್ಲಿ ಸೆರೆಯಾಗಿದ್ದವು. ಈ ವಿಮಾನವು ಕತಾರ್ ವಿಮಾನ ನಿಲ್ದಾಣದಲ್ಲಿ ಇಳಿದಿತ್ತು. ಆಗ ಪರಿಶೀಲನೆ ವೇಳೆ ಮಾನವ ದೇಹದ ಅಂಗಗಳು ಚಕ್ರದ ಮೇಲ್ಭಾಗದ ಜಾಗದಲ್ಲಿ ಪತ್ತೆಯಾಗಿವೆ. ಘಟನೆ ಬಗ್ಗೆ ಅಮೆರಿಕ ವಾಯುಪಡೆ ತನಿಖೆ ನಡೆಸುತ್ತಿದೆ. ವಿಮಾನದಲ್ಲಿರುವ ದೇಹದ ಭಾಗಗಳನ್ನು ಹುಡುಕಿ ಹೊರತೆಗೆಯಲಾಗುತ್ತಿದೆ. ಅದು ಮರು ಹಾರಾಟಕ್ಕೆ ಯೋಗ್ಯವಾಗಿದೆಯೇ ಎಂಬುದನ್ನು ಪರಿಶೀಲಿಸಲಾಗುತ್ತಿದೆ. ಆತಂಕಗೊಂಡಿದ್ದ ಜನರು ವಿಮಾನದ ಮೂಲೆ ಮೂಲೆಯಲ್ಲಿಯೂ ಹತ್ತಿ ಕುಳಿತಿದ್ದರು. ಅಲ್ಲಿನ ಪರಿಸ್ಥಿತಿ ಬಿಗಡಾಯಿಸುತ್ತಿರುವುದನ್ನು ಕಂಡು ಎಷ್ಟು ಸಾಧ್ಯವೋ ಅಷ್ಟು ಬೇಗ ಅಲ್ಲಿಂದ ನಿರ್ಗಮಿಸುವುದು ಸೂಕ್ತ ತೀರ್ಮಾನಿಸಿದ್ದೆವು ಎಂದು ಅಮೆರಿಕ ವಾಯುಪಡೆ ತಿಳಿಸಿದೆ. ದೇಶದಿಂದ ಪರಾರಿಯಾಗಲು ಅಲ್ಲಿಗೆ ಬರುವ ವಿಮಾನಗಳನ್ನು ಏರಲು ಸಾವಿರಾರು ಜನರು ಪ್ರಯತ್ನಿಸುತ್ತಿದ್ದಾರೆ. ಕಳೆದ ಮೂರು ದಿನಗಳಲ್ಲಿ ವಿಮಾನ ನಿಲ್ದಾಣದಲ್ಲಿ ಇಂತಹ ಪ್ರಯತ್ನದಲ್ಲಿ ಕನಿಷ್ಠ ಹತ್ತು ಮಂದಿ ಮೃತಪಟ್ಟಿದ್ದಾರೆ.
from India & World News in Kannada | VK Polls https://ift.tt/3maa7UL
