ಬ್ರುಸೆಲ್ಸ್: ಮಾನವನ ಪೂರ್ವಜ ಎನ್ನುವುದು ವಿಜ್ಞಾನದ ನಂಬಿಕೆ. ಹಾಗೆಂದು ಚಿಂಪಾಂಜಿ ಜತೆಗೆ ಸಂಬಂಧ ಬೆಳೆಸಲು ಸಾಧ್ಯವೇ? ''ಹೌದು, ಬೆಳೆಸಲು ಸಾಧ್ಯ. ನಾನು ಆ ಮೃಗಾಲಯದಲ್ಲಿರುವ ಮುದ್ದು ಚಿಂಪಾಂಜಿಯನ್ನು ಪ್ರೀತಿಸುತ್ತಿದ್ದೇನೆ. ಅದು ಕೂಡ ನನ್ನನ್ನು ಪ್ರೀತಿಸುತ್ತಿದೆ. ನಮ್ಮದು ನಿಷ್ಕಲ್ಮಷ ಪ್ರೀತಿ,'' ಎಂದು ಬೆಲ್ಜಿಯಂನ ಯುವತಿಯೊಬ್ಬಳು ಹೇಳಿದ್ದು, ಅಚ್ಚರಿ ಮೂಡಿಸಿದೆ. ಬೆಲ್ಜಿಯಂನ ಆಂಟ್ವಪ್ರ್ ಮೃಗಾಲಯದಲ್ಲಿ ಅಂತದ್ದೊಂದು ಮಾನವ-ಚಿಂಪಾಂಜಿ ನಡುವಿನ ಪ್ರೇಮ ಕಥೆ ನಡೆದಿದೆ. ನಿತ್ಯವೂ ಮೃಗಾಲಯಕ್ಕೆ ಬಂದು 38 ವರ್ಷದ 'ಚೀತ' ಹೆಸರಿನ ಗಂಡು ಚಿಂಪಾಂಜಿ ಜತೆ ಪ್ರೇಮ ಸಲ್ಲಾಪ ನಡೆಸುತ್ತಿದ್ದ ಸುಂದರಿಯ ಹೆಸರು ಆಡಿ ಟಿಮ್ಮರ್ಮನ್ಸ್. ಈಕೆ ನಿತ್ಯವೂ ನಿರ್ದಿಷ್ಟ ಸಮಯ ಗುರುತಿಸಿ ಮೃಗಾಲಯದ ಒಳ ಬಂದು ಚೀತ ಜಿಂಪಾಂಜಿಯೊಂದಿಗೆ ಸಲ್ಲಾಪ ನಡೆಸುತ್ತಿದ್ದಳು. ಗಾಜಿನ ಪರಿಧಿ ಆಚೆಗೆ ಆ ಆದಿ ಮಾನವ, ಈಚೆಗೆ ಈ ಸುಂದರಿ. ಕೈ ಸನ್ನೆ, ಕಣ್ಣ ಭಾಷೆ, ಯಾರೂ ನೋಡದಿದ್ದಾಗ ಪರಸ್ಪರ ಚುಂಬನ.. ಹೀಗೆ ಅತಿರೇಕಕ್ಕೆ ಹೋದ ಇವರ ನಡುವಿನ ಪ್ರೇಮ ಸಲ್ಲಾಪ ಸಿಬ್ಬಂದಿಯ ನೆಮ್ಮದಿಗೆಡಿಸಿ ಕೊನೆಗೆ ಸುಂದರಿಯ ಪ್ರವೇಶಕ್ಕೆ ಕತ್ತರಿ ಬಿದ್ದಿದೆ. ಮೃಗಾಲಯ ಪ್ರವೇಶಕ್ಕೆ ನಿಷೇಧ ಹೇರಿರುವ ಬಗ್ಗೆ ಆಡಿ ಬೇಸರ ಮಾಡಿಕೊಂಡಿರುವುದಾಗಿ ವರದಿಯಾಗಿದೆ. ''ನಾನು ಪ್ರಾಣಿಗಳನ್ನು ಇಷ್ಟಪಡುತ್ತೇನೆ. ಅವನನ್ನು ಪ್ರೀತಿಸುತ್ತೇನೆ. ಅವನೂ ನನ್ನನ್ನು ಪ್ರೀತಿಸುತ್ತಾನೆ. ನಿಷ್ಕಲ್ಮಷ ಪ್ರೀತಿ, ಬೇರೇನೂ ಇಲ್ಲ. ಇಷ್ಟಕ್ಕೆ ಅವನಿಂದ ನನ್ನನ್ನು ಯಾಕೆ ಬೇರ್ಪಡಿಸಬೇಕು,'' ಎಂದು ಯುವತಿ ಅಳಲು ತೋಡಿಕೊಂಡಿದ್ದಾಳೆ. ಯುವತಿಯ ಈ ಪ್ರಶ್ನೆಗೆ ಮೃಗಾಲಯ ಸಿಬ್ಬಂದಿ ತಕ್ಕ ಉತ್ತರ ಕೂಡ ನೀಡಿದ್ದಾಗಿದೆ. ''ಚೀತ ಹೀಗೆ ಯುವತಿಯ ಜತೆ ಸಲ್ಲಾಪ ಬೆಳೆಸಿದರೆ, ಅದು ಗೀಳಾಗಿ ಪರಿವರ್ತನೆಯಾಗುತ್ತದೆ. ಮುಂದೆ ಉಳಿದ ಚಿಂಪಾಂಜಿಗಳು ಇದನ್ನು ನಿರ್ಲಕ್ಷ್ಯ ಮಾಡುತ್ತವೆ. ಕೊನೆಗೆ ಅವು ಅದನ್ನು ತಮ್ಮ ಗುಂಪಿನ ಸದಸ್ಯನೇ ಅಲ್ಲ ಎಂದು ಪ್ರತ್ಯೇಕಿಸುವ ಅಪಾಯವೂ ಇದೆ. ಇದರಿಂದ ಅದರ ಜೀವನ ಶೈಲಿಯೇ ಏರುಪೇರಾಗಿ ಜೀವಕ್ಕೆ ಕುತ್ತು ಬರಬಹುದು,'' ಎಂದು ವಿವರಿಸಿದ್ದಾರೆ. ಇದನ್ನು ಕೇಳಿ ಸುಂದರಿ ಈಗ ಸುಮ್ಮನಾಗಿದ್ದಾಳೆ ಎಂದು ತಿಳಿದು ಬಂದಿದೆ.
from India & World News in Kannada | VK Polls https://ift.tt/3D9FxR7
