ಇಟಾಹ್: ಕಳೆದ 35 ವರ್ಷಗಳಿಂದ ಉತ್ತರಪ್ರದೇಶದ ಇಟಾಹ್ ಜಿಲ್ಲೆಯಲ್ಲಿ ವಾಸವಿರುವ ಪಾಕಿಸ್ತಾನಿ ಮಹಿಳೆಯೋರ್ವಳು, ಇದೀಗ ಗ್ರಾಮ ಪಂಚಾಯಿತಿ ಮುಖ್ಯಸ್ಥೆಯಾಗಿದ್ದಾಳೆ. ಈಕೆಯ ಪೂರ್ವಾಪರ ಅರಿತ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೆತ್ತಿಕೊಂಡಿದ್ದಾರೆ. ಹೌದು, ಉತ್ತರಪ್ರದೇಶದ ಇಟಾಹ್ ಜಿಲ್ಲೆಯ ಗುವಾಡೌ ಗ್ರಾಮ ಪಂಚಾಯಿತಿ ಮುಖ್ಯಸ್ಥೆಯಾಗಿರುವ 65 ವರ್ಷದ , ಪಾಕಿಸ್ತಾನಿ ಮೂಲದವಳಾಗಿದ್ದು, 35 ವರ್ಷಗಳ ಹಿಂದೆ ಈಕೆ ಪಾಕಿಸ್ತಾನದ ಕರಾಚಿಯಿಂದ ಭಾರತದ ಉತ್ತರಪ್ರದೇಶದಲ್ಲಿರುವ ತನ್ನ ಸಂಬಂಧಿಕರ ಮನೆಗೆ ಬಂದಿದ್ದಳು ಎನ್ನಲಾಗಿದೆ. ಆದರೆ ತನ್ನ ವೀಸಾ ಅವಧಿ ಮುಗಿದಿದ್ದರೂ ಮರಳಿ ಪಾಕಿಸ್ತಾನಕ್ಕೆ ತೆರಳದ ಬಾನೋ ಬೇಗಂ, ಅಖ್ತರ್ ಅಲಿ ಎಂಬ ಸ್ಥಳೀಯ ವ್ಯಕ್ತಿಯೊಂದಿಗೆ ವಿವಾಹವಾಗಿ ಇಲ್ಲಿಯೇ ನೆಲೆಸಿದ್ದಾಳೆ. ಭಾರತದ ಪೌರತ್ವಕ್ಕಾಗಿ ಬಾನೋ ಬೇಗಂ ಅರ್ಜಿ ಕೂಡ ಸಲ್ಲಿಸಿದ್ದಳು. ಈ ಮಧ್ಯೆ 2015 ರಲ್ಲಿ ಆಕೆ ಗುವಾಡೌ ಗ್ರಾಮದ ಪಂಚಾಯಿತಿ ಚುನಾವಣೆಯಲ್ಲಿ ಸ್ಪರ್ಧಿಸಿ ಜಯಗಳಿಸಿದ್ದಳು. ಇತ್ತೀಚಿಗೆ ಈ ಪಂಚಾಯಿತಿ ಪ್ರಧಾನ್ ಆಗಿದ್ದ ಶೆಹನಾಝ್ ಬೇಗಂ ನಿಧನ ಹೊಂದಿದ್ದರಿಂದ, ಗ್ರಾಮ ಸಮಿತಿಯ ಶಿಫಾರಸಿನಂತೆ ಬಾನೋ ಬೇಗಂಳನ್ನು ಹಂಗಾಮಿ ಪ್ರಧಾನ್ ಆಗಿ ನೇಮಕ ಮಾಡಲಾಗಿತ್ತು. ಆದರೆ ಗುವಾಡೌ ಗ್ರಾಮದ ಖುವೈದನ್ ಖಾನ್ ಎಂಬುವವರು ಬಾನೋ ಬೇಗಂ ಪಾಕ್ ಸಂಜಾತೆ ಎಂದು ದೂರು ದಾಖಲಿಸಿದ ಮೇಲಷ್ಟೇ ಆಕೆಯ ಪೂರ್ವಾಪರ ಬಹಿರಂಗವಾಗಿದೆ. ಸದ್ಯ ಖುವೈದನ್ ಖಾನ್ ನೀಡಿರುವ ದೂರನ್ನು ಸ್ವೀಕರಿಸಿರುವ ಪೊಲೀಸರು, ಭಾರತದ ಪೌರತ್ವವನ್ನೂ ಪಡೆಯದೇ ಬಾನೋ ಬೇಗಂ ಅದ್ಹೇಗೆ ಆಧಾರ್ ಕಾರ್ಡ್ ಹಾಗೂ ಮತದಾರ ಗುರುತಿನ ಚೀಟಿ ಪಡೆದಳು ಎಂಬುದರ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಒಟ್ಟಿನಲ್ಲಿ ಪಾಕ್ ಮೂಲದ ಮಹಿಳೆಯೊಬ್ಬಳು ಕಳೆದ 35 ವರ್ಷಗಳಿಂದ ಭಾರತದಲ್ಲಿ ನೆಲೆಸಿರುವುದಲ್ಲದೇ, ಉತ್ತರ ಪ್ರದೇಶದ ಗ್ರಾಮವೊಂದರ ಪಂಆಯಿತಿ ಮುಖ್ಯಸ್ಥೆಯಾಗಿಯೂ ಆಯ್ಕೆಯಾಗಿರುವ ಸಂಗತಿ ಅಚ್ಚರಿ ಹುಟ್ಟಿಸಿದೆ.
from India & World News in Kannada | VK Polls https://ift.tt/350rFsY
