ಹೊಸದಿಲ್ಲಿ: ದಿಲ್ಲಿಯ ಹೃದಯ ಭಾಗದಲ್ಲಿರುವ ಇಸ್ರೇಲ್‌ ರಾಯಭಾರ ಕಚೇರಿ ಬಳಿ ಶುಕ್ರವಾರ ಕಡಿಮೆ ತೀವ್ರತೆಯ ಐಇಡಿ ಸ್ಫೋಟ ಸಂಭವಿಸಿದ್ದು, ಕೆಲಕಾಲ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು. ಸ್ಫೋಟದಲ್ಲಿ ಯಾವುದೇ ಸಾವು-ನೋವು ಸಂಭವಿಸಿಲ್ಲವಾದರೂ, ಬಳಿಯಲ್ಲಿದ್ದ ಕಾರುಗಳು ಜಖಂಗೊಂಡಿವೆ. ಸಂಜೆ 5.11ರ ಸುಮಾರಿಗೆ ಇಲ್ಲಿನ ಅಬ್ದುಲ್‌ ಕಲಾಂ ರಸ್ತೆಯಲ್ಲಿರುವ ಕಚೇರಿಯ ಹೊರಗೆ ಈ ಸ್ಫೋಟ ಸಂಭವಿಧಿಸಿದೆ. ಘಟನಾ ಸ್ಥಳದಿಂದ 1.4 ಕಿ.ಮೀ. ದೂರದಲ್ಲಿರುವ ವಿಜಯ್‌ ಚೌಕ್‌ನಲ್ಲಿ'ಬೀಟಿಂಗ್‌ ರಿಟ್ರೀಟ್‌' ಕಾರ್ಯಕ್ರಮ ನಡೆಯುತ್ತಿತ್ತು. ಪ್ರಧಾನಿ, ರಾಷ್ಟ್ರಪತಿಗಳು ಸೇರಿದಂತೆ ಹಲವು ಗಣ್ಯರು ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ರಸ್ತೆ ವಿಭಜಕದ ಮೇಲೆ, ಹೂಕುಂಡದಲ್ಲಿ ಸ್ಫೋಟಕ ಪದಾರ್ಥ ಪತ್ತೆಯಾಗಿದ್ದು, ಚಲಿಸುವ ವಾಹನದಿಂದ ಅದನ್ನು ಎಸೆದಿರಬಹುದೆಂದು ಶಂಕಿಸಲಾಗಿದೆ. ಪತ್ರ ಇಟ್ಟು ಹೋದ ಉಗ್ರರು!ಇನ್ನು ಈ ಘಟನೆಯನ್ನು ಇಸ್ರೇಲ್‌ ಖಂಡಿಸಿದ್ದು ಇದೊಂದು ಉಗ್ರ ಕೃತ್ಯ ಎಂದು ಆಕ್ರೋಶ ವ್ಯಕ್ತಪಡಿಸಿದೆ. ಅಲ್ಲದೆ ಇದರ ಹಿಂದೆ ಇರಾನ್‌ ಕೈವಾಡವಿದೆ ಎಂದು ಆರೋಪಿಸಿದೆ. ಇನ್ನು ಇದಕ್ಕೆ ಪೂರಕವಾಗಿ ಸ್ಪೋಟದ ಸ್ಥಳದಿಂದ ಪೊಲೀಸರಿಗೆ ಪತ್ರವೊಂದು ಸಿಕ್ಕಿದ್ದು, ಇದರಲ್ಲಿ ಇದೊಂದು ಟ್ರೇಲರ್‌ ಅಷ್ಟೇ ಎಂದು ಬರೆದಿದ್ದು ವಾರ್ನಿಂಗ್‌ ರೀತಿಯ ಪತ್ರ ಎಂದು ದಿಲ್ಲಿ ಪೊಲೀಸರ ಮೂಲಗಳು ತಿಳಿಸಿವೆ. ಅಲ್ಲದೆ ಇನ್ನು ಇತ್ತೀಚೆಗೆ ಸಾವನಪ್ಪಿದ ಇರಾನ್‌ನ ಖಾಸಿಂ ಸುಲೇಮಾನಿ ಹೆಸರು ಬರೆಯಲಾಗಿದೆ ಎನ್ನಲಾಗಿದೆ. ತನಿಖೆ ಇಸ್ರೇಲ್‌ ಬೆನ್ನಿಗೆ? ಸ್ಪೋಟಕ್ಕೆ ಸಂಬಂಧಪಟ್ಟಂತೆ ತನಿಖೆಗೆ ಎಲ್ಲ ರೀತಿಯ ಸಹಕಾರ ನೀಡುವುದಾಗಿ ಇಸ್ರೇಲ್‌ ತಿಳಿಸಿದೆ. ಹೀಗಾಗಿ ಇಸ್ರೇಲ್‌ನ ಗೂಢಾಚಾರಿ ಸಂಸ್ಥೆ ಮೋಸ್ಸದ್‌ ಹೆಗಲಿಗೆ ತನಿಖೆ ಏರಲಿದ್ಯಾ ಎನ್ನುವ ಚರ್ಚೆ ಆರಂಭವಾಗಿದೆ. ಶುಕ್ರವಾರ ಈ ಬಗ್ಗೆ ಬಿರುಸಿನ ಚರ್ಚೆ ಟ್ವಿಟ್ಟರ್‌ನಲ್ಲಿ ನಡೆದಿದೆ. ಒಂದು ವೇಳೆ ಮೋಸ್ಸದ್‌ ತನಿಖೆ ನಡೆಸಿದರೆ ಅಪರಾಧಿಗಳಿ ಚಳಿ ಜ್ವರ ಬಿಡಸಲಿದ್ದಾರೆ ಎನ್ನುವ ಚರ್ಚೆಗಳು ನಡೆದವು.
from India & World News in Kannada | VK Polls https://ift.tt/3a9oalC
