ಮೆಲ್ಬೋರ್ನ್‌: ಪಂಜಾಬಿ ವಲಸೆ ರೈತನ ಪುತ್ರ ತನ್ವೀರ್ ಸಂಗಾ (19) ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದಲ್ಲಿ ಸ್ಥಾನ ಪಡೆದ ಭಾರತೀಯ ಮೂಲದ ಎರಡನೇ ಆಟಗಾರರಾಗಿದ್ದಾರೆ. ಫೆಬ್ರುವರಿಯಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ನಡೆಯಲಿರುವ ಟಿ20 ಸರಣಿಗೆ 18 ಸದಸ್ಯರ ಆಸ್ಟ್ರೇಲಿಯಾ ತಂಡದಲ್ಲಿ 19ರ ಪ್ರಾಯದ ಲೆಗ್‌ ಸ್ಪಿನ್ನರ್‌ ಚೊಚ್ಚಲ ಅವಕಾಶ ಪಡೆದುಕೊಂಡಿದ್ದಾರೆ. "ನನಗೆ ಕರೆ ಬರುತ್ತಿದ್ದಂತೆ ಚಂದ್ರನ ಮೇಲೆ ತೇಲಾಡಿದಂತಹ ಅನುಭವ ಉಂಟಾಯಿತು. ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿದ್ದೇನೆ ಎಂಬ ಸುದ್ದಿ ನಂಬಲು ನನಗೆ ಸ್ವಲ್ಪ ಸಮಯ ಬೇಕಾಯಿತು. ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಆಸ್ಟ್ರೇಲಿಯಾ ಪ್ರತಿನಿಧಿಸುತ್ತೇನೆಂದು ಅಂದುಕೊಂಡಿರಲಿಲ್ಲ," ಎಂದು ಟೈಮ್ಸ್ ಆಫ್‌ ಇಂಡಿಯಾಗೆ ತಿಳಿಸಿದ್ದಾರೆ. ಈ ಹಿಂದೆ ಭಾರತ ಮೂಲದ ಕ್ರಿಕೆಟಿಗರಾದ ಜೇಸನ್ ಸಂಗಾ, ಅರ್ಜುನ್ ನಾಯರ್‌, ಪರಮ್‌ ಉಪ್ಪಾಲ್‌ ಆಸ್ಟ್ರೇಲಿಯಾದಲ್ಲಿ ದೇಶಿ ಕ್ರಿಕೆಟ್ ಹಾಗೂ 19 ವಯೋಮಿತಿ ಹಂತದವರೆಗೂ ಆಡಿದ್ದರು. ಆದರೆ, ಕಳೆದ ಆರು ವರ್ಷದ ಹಿಂದೆ ಪಂಜಾಬ್‌ ಮೂಲದ ಗುರೀಂದರ್‌ ಸಂಧು ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ್ದರು. ಇದೀಗ ತನ್ವೀರ್ ಸಂಗಾ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಲಿರುವ ಎರಡನೇ ಭಾರತೀಯ ಮೂಲದ ಆಟಗಾರ. ತನ್ವೀರ್ ಸಂಗಾ ತಂದೆ ಜೋಗ ಸಿಂಗ ಸಂಗಾ ಅವರು ಮೂಲತಃ ಕೃಷಿಕರಾಗಿದ್ದು, ವಿದ್ಯಾರ್ಥಿ ವೀಸಾದ ಮೇಲೆ 1997ರಲ್ಲಿಯೇ ಜಲಾಂಧರ್‌ನಿಂದ ಸಿಡ್ನಿಗೆ ಸ್ಥಳಾಂತರ ಆಗಿದ್ದರು. ಆರಂಭದಲ್ಲಿ ಕೃಷಿ ಚಟುವಟಿಕೆಯಲ್ಲಿ ತೊಡಗಿದ್ದ ಅವರು, ಇದೀಗ ಟ್ಯಾಕ್ಸಿ ಡ್ರೈವರ್‌ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ತಾಯಿ ಉಪ್ನೀತ್‌ ಅಕೌಟೆಂಟ್‌ ಆಗಿದ್ದಾರೆ. "ತನ್ವೀರ್ ಸಂಗಾ ಮೂಲತಃ ಕ್ರೀಡಾಪಟುವಾಗಿದ್ದು, ವಾಲಿಬಾಲ್‌, ರಗ್ಬಿ ಹಾಗೂ ಕಬಡ್ಡಿ ಆಡಿಕೊಂಡು ಬೆಳೆದಿದ್ದಾನೆ. 10ನೇ ವಯಸ್ಸಿನಲ್ಲಿ ಕ್ರಿಕೆಟ್ ಮೇಲೆ ಆಸಕ್ತಿ ತೋರಿಸಿದ್ದ ನನ್ನ ಮಗ, 12ನೇ ವಯಸ್ಸಿನಲ್ಲಿ ಸ್ಥಳೀಯ ತಂಡವೊಂದಕ್ಕೆ ಆಡಲು ಶುರು ಮಾಡಿದ್ದ," ಎಂದು ತಂದೆ ಜೋಗ ಸಿಂಗ್‌ ಸಂಗಾ ತಿಳಿಸಿದ್ದಾರೆ. "ಆಸ್ಟ್ರೇಲಿಯಾ ತಂಡದ ಮಾಜಿ ಆಟಗಾರರಾದ ಸ್ಟೀ ವಾ ಹಾಗೂ ಮಾರ್ಕ್‌ ವಾ ಓದಿದ್ದ ಈಸ್ಟ್‌ ಹಿಲ್ಸ್‌ ಬಾಯ್ಸ್‌ ಸ್ಕೂಲ್‌ನಲ್ಲಿಯೇ ನಾನು ವಿದ್ಯಾಭ್ಯಾಸ ಮಾಡಿದ್ದೆ. ಕ್ರಿಕೆಟಿಗರಲ್ಲದೆ, ಒಲಿಂಪಿಕ್ಸ್‌ ಚಿನ್ನದ ಪದಕ ವಿಜೇತ ಈಜುಪಟು ಐಯಾನ್‌ ಥೋರ್ಪೆ ಕೂಡ ಇದೇ ಶಾಲೆಯ ವಿದ್ಯಾರ್ಥಿ. ಕ್ರೀಡಾಪಟುಗಳ ಹಿನ್ನೆಲೆಯುಳ್ಳ ಶಾಲೆಯಾಗಿದ್ದರಿಂದ ಉತ್ತಮ ಕ್ರಿಕೆಟ್ ಕ್ಲಬ್‌ಗೆ ಆಡುವ ಅವಕಾಶ ನನಗೆ ಸಿಕ್ಕಿತು," ಎಂದು ತನ್ವೀರ್ ಸಂಗಾ ತಿಳಿಸಿದ್ದಾರೆ. 2018ರಲ್ಲಿ ಆಸ್ಟ್ರೇಲಿಯನ್‌-ಪಾಕಿಸ್ತಾನಿ ಲೆಗ್‌ ಸ್ಪಿನ್ನರ್‌ ಫವಾದ್‌ ಅಲಾಮ್‌ ಅವರನ್ನು ಮೆಲ್ಬೋರ್ನ್‌ನಲ್ಲಿ ನಡೆದಿದ್ದ ಪಾಕಿಸ್ತಾನ ವಿರುದ್ಧದ 16ರ ವಯೋಮಿತಿ ಪಂದ್ಯದಲ್ಲಿ ಭೇಟಿಯಾಗಿದ್ದೆ. ಅಂದಿನಿಂದ ಇಲ್ಲಿಯವರೆಗೂ ಅವರು ನನಗೆ ಮೆಂಟರ್‌ ಆಗಿದ್ದಾರೆ," ಎಂದು ಹೇಳಿದರು. ಹೀಗಿದೆ: ಆರೊನ್ ಫಿಂಚ್ (ನಾಯಕ), ಆಷ್ಟನ್ ಅಗರ್, ಜೇಸನ್ ಬೆಹ್ರೆನ್‌ಡಾರ್ಫ್, ಮಿಚೆಲ್ ಮಾರ್ಷ್, ಗ್ಲೆನ್ ಮ್ಯಾಕ್ಸ್‌ವೆಲ್, ಬೆನ್‌ ಮೆಕ್‌ಡೆರ್ಮೊಟ್, ರೈಲೀ ಮೆರೆಡಿತ್, ಜಾಶ್ ಫಿಲಿಪೆ, ಕೇನ್ ರಿಚರ್ಡ್ಸನ್, ಡೇನಿಯೆಲ್ ಸ್ಯಾಮ್ಸ್‌, ತನ್ವೀರ್ ಸಂಗಾ, ಡಾರ್ಸಿ ಶಾರ್ಟ್, ಮಾರ್ಕಸ್‌ ಸ್ಟೋಯ್ನಿಸ್, ಆಷ್ಟನ್ ಟರ್ನರ್, ಆಂಡ್ರ್ಯೂ ಟೈ, ಮ್ಯಾಥ್ಯೂ ವೇಡ್, ಆಡಮ್ ಝಾಂಪ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2YCIKG1
