ಬೆಂಗಳೂರು: ಶಿವಮೊಗ್ಗದ ಜಿಲೆಟಿನ್‌ ಸ್ಫೋಟವೂ ಸೇರಿದಂತೆ ರಾಜ್ಯದಲ್ಲಿ ನಡೆಯುತ್ತಿರುವ ಅಕ್ರಮ ಗಣಿಗಾರಿಕೆಯನ್ನು ನಿಯಂತ್ರಿಸಲು ಕೂಡಲೇ ಕ್ರಮ ಕೈಗೊಳ್ಳುವಂತೆ ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಮತ್ತು ಜಿಲ್ಲಾಧಿಕಾರಿಗಳಿಗೆ ಲೋಕಾಯುಕ್ತ ನ್ಯಾಯಮೂರ್ತಿ ಪಿ. ವಿಶ್ವನಾಥಶೆಟ್ಟಿ ಸೂಚನೆ ನೀಡಿದ್ದಾರೆ. '' ವಿರುದ್ಧ ಕ್ರಿಮಿನಲ್‌ ಕೇಸ್‌ ದಾಖಲಿಸಬೇಕು. ರಾಯಲ್ಟಿ ವಸೂಲಿ ಮಾಡಬೇಕು. ದಂಡ ವಿಧಿಸಬೇಕು ಎಂದು ಸೂಚಿಸಲಾಗಿದೆ. ಅಕ್ರಮ ಗಣಿಗಾರಿಕೆಯಿಂದ ರಾಜ್ಯಕ್ಕೆ ಆರ್ಥಿಕ ನಷ್ಟದ ಜತೆಗೆ ಪರಿಸರ ಅಸಮತೋಲನ, ಭೂಮಿಯ ಮೇಲ್ಮೈ ನಾಶವಾಗುತ್ತದೆ. ನಾಗರಿಕರು ಮತ್ತು ಇತರ ಜೀವಿಗಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ,'' ಎಂದು ಲೋಕಾಯುಕ್ತರು ಕಳವಳ ವ್ಯಕ್ತಪಡಿಸಿದ್ದಾರೆ. ಶಿವಮೊಗ್ಗದಲ್ಲಿ ಅಕ್ರಮ ಗಣಿಗಾರಿಕೆ! ಶಿವಮೊಗ್ಗ ಜಿಲ್ಲೆ ಹೊಸಹಳ್ಳಿ ತಾಲೂಕು ಮಸಗಳ್ಳಿಯಲ್ಲಿ ನಡೆಯುತ್ತಿದ್ದ ಅಕ್ರಮ ಕಲ್ಲುಗಣಿಗಾರಿಕೆಗೆ ಸಂಬಂಧಿಸಿದಂತೆ ದೂರು ದಾಖಲಿಸಿಕೊಂಡಿದ್ದ ಲೋಕಾಯುಕ್ತರು, ಶಿವಮೊಗ್ಗ ಲೋಕಾಯುಕ್ತ ಎಸ್ಪಿ ಮೂಲಕ ತನಿಖೆ ನಡೆಸಿದ್ದರು. ವರದಿಯಲ್ಲಿ ಅರಣ್ಯ ಮತ್ತು ಗಣಿ ಮತ್ತು ಭೂವಿಜ್ಞಾನ ಇಲಾಖೆಯವರು ಅಕ್ರಮ ಗಣಿಗಾರಿಕೆ ತಡೆಯಲು ವಿಫಲರಾಗಿದ್ದಾರೆ ಎಂದು 2020ರ ಫೆ.26ರಂದು ಸಲ್ಲಿಸಲಾದ ವರದಿಯಲ್ಲಿ ತಿಳಿಸಲಾಗಿತ್ತು. ಅಕ್ರಮ ಗಣಿಗಾರಿಕೆ ತಡೆಯಲು ಕೈಗೊಂಡಿರುವ ಕ್ರಮಗಳ ಕುರಿತು ವಿವಿಧ ಇಲಾಖೆಗಳಿಂದ ವರದಿ ಕೇಳಲಾಗಿತ್ತು. 2019ರ ನವೆಂಬರ್‌ನಿಂದ 2020ರ ಅಕ್ಟೋಬರ್‌ ನಡುವೆ ಗಣಿ ಮತ್ತು ಭೂವಿಜ್ಞಾನ ಇಲಾಖೆಯಿಂದ 36 ಕೇಸ್‌, ಅರಣ್ಯ ಇಲಾಖೆಯಿಂದ 37 ಕೇಸ್‌ ಮತ್ತು ಪೊಲೀಸ್‌ ಇಲಾಖೆಯಿಂದ 45 ಕೇಸ್‌ ದಾಖಲಿಸಲಾಗಿದೆ. ಅಕ್ರಮ ಗಣಿಗಾರಿಕೆ, ಪರವಾನಗಿ ಮುಗಿದರೂ ಗಣಿಗಾರಿಕೆ ಮುಂದುವರಿಕೆ, ನವೀಕರಣ ಮಾಡದೆ ಸರಕಾರಕ್ಕೆ ವಂಚನೆ, ಅರಣ್ಯ ಜಮೀನಿನಲ್ಲಿ ಗಣಿಗಾರಿಕೆ ನಡೆಸುತ್ತಿರುವ ಕುರಿತು ಈಗಾಗಲೇ ಲೋಕಾಯುಕ್ತ ಪೊಲೀಸರು ನಡೆಸಿರುವ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಶಿವಮೊಗ್ಗದಲ್ಲಿ 2014-15ನೇ ಸಾಲಿನಿಂದ 2020-2021ರವರೆಗೆ ಅನಧಿಕೃತ ಕಲ್ಲುಗಣಿಗಾರಿಕೆ ಮತ್ತು ಸಾಗಣೆ ಪತ್ತೆ ಹಚ್ಚಿ 2.60 ಕೋಟಿ ರೂ. ದಂಢ ವಿಧಿಸಿ ಸಂಗ್ರಹಿಸಲಾಗಿದೆ ಎಂದು ಗಣಿ ಮತ್ತು ಭೂವಿಜ್ಞಾನ ಇಲಾಖೆ ತಿಳಿಸಿದೆ. ಲೋಕಾಯುಕ್ತರ ಸೂಚನೆಗಳು ಶಿವಮೊಗ್ಗ ಜಿಲ್ಲೆಯಲ್ಲಿ ನಡೆಯುತ್ತಿರುವ ಅಕ್ರಮ ಗಣಿಗಾರಿಕೆ ಕುರಿತು ತನಿಖೆ ನಡೆಸಿ ವರದಿ ಸಲ್ಲಿಸಲು ಆರು ವಾರಗಳ ಗಡುವನ್ನು ಜಿಲ್ಲಾಧಿಕಾರಿಗಳಿಗೆ ಲೋಕಾಯುಕ್ತರು ನೀಡಿದ್ದಾರೆ. - ಗಣಿಗಳ ಕುರಿತು ಜಿಲ್ಲಾ ಟಾಸ್ಕ್‌ ಫೋರ್ಸ್‌ ಸಮಿತಿ ಅಧ್ಯಕ್ಷ ತನಿಖೆ ನಡೆಸಬೇಕು - ಲೈಸನ್ಸ್‌, ಪರ್ಮಿಟ್‌ ಇಲ್ಲದೆ ಮತ್ತು ಪರ್ಮಿಟ್‌ ಮತ್ತು ಲೈಸನ್ಸ್‌ ಪಡೆದಿರುವ ಪ್ರದೇಶ ಮೀರಿ ಶಿವಮೊಗ್ಗದಲ್ಲಿ ನಡೆದ ಕಲ್ಲುಗಣಿಕೆ ವಿವರ ಸಲ್ಲಿಸಬೇಕು - ಲೈಸನ್ಸ್‌ದಾರರು ಬಾಕಿ ಉಳಿಸಿಕೊಂಡಿರುವ ರಾಯಲ್ಟಿ ಮೊತ್ತಎಷ್ಟು? - ದಂಡ ವಿಧಿಸಿದ್ದರೆ ಪಾವತಿಸದೆ ಬಾಕಿ ಉಳಿಸಿಕೊಂಡಿರುವುದು ಎಷ್ಟು ? - ಅಕ್ರಮ ಕಲ್ಲುಕ್ರಷರ್‌ಗಳು ಮತ್ತು ಅವುಗಳ ವಿರುದ್ಧ ಕೈಗೊಂಡಿರುವ ವರದಿ ಸಲ್ಲಿಸಬೇಕು. - ಜಿಲ್ಲೆಯಲ್ಲಿ ಅಕ್ರಮ ಗಣಿಗಾರಿಕೆ, ಕ್ವಾರಿ ನಿಯಂತ್ರಿಸಲು ವಿಫಲರಾದ ಅಧಿಕಾರಿಗಳ ವಿವರ. - ಲಘು ಖನಿಜಗಳು, ಗ್ರಾನೈಟ್‌ ಮತ್ತು ಮರಳು ಗಣಿಗಾರಿಕೆ ಮತ್ತು ಸಾಗಣೆ ತಡೆಯಲ್ಲಿ ವಿಫಲವಾಗಿರುವುದೇಕೆ? 2021ರ ಜ.21ರಂದು ಹುಣಸೋಡು ಗ್ರಾಮದಲ್ಲಿ ನಡೆದ ಜಿಲೆಟಿನ್‌ ಸ್ಫೋಟದಿಂದ ಮೃತರಾಗಿರುವ ಕಾರ್ಮಿಕರ ಕುಟುಂಬದವರು/ಅವಲಂಬಿತರಿಗೆ ಪರಿಹಾರ ನೀಡಲು ಕ್ರಮ ವಹಿಸಬೇಕು.- ನ್ಯಾಯಮೂರ್ತಿ ಪಿ. ವಿಶ್ವನಾಥಶೆಟ್ಟಿ
from India & World News in Kannada | VK Polls https://ift.tt/36mcGKO
