ವಿಜಯಪುರ/ : ಅವಳಿ ಜಿಲ್ಲೆಗಳ ಹಾಲು ಉತ್ಪಾದಕರು ಸಂಕಷ್ಟದಲ್ಲಿರುವುದರಿಂದ ಅವರಿಗೆ ನೆರವಾಗಿ ಹೈನುಗಾರಿಕೆ ಪ್ರೋತ್ಸಾಹಿಸಲು ಫೆ.1ರಿಂದ ಜಾರಿಗೆ ಬರುವಂತೆ ಎಮ್ಮೆ ಹಾಲಿಗೆ ಹಾಗೂ ಹಸುವಿನ ಹಾಲಿಗೆ ಪ್ರತಿ ಲೀಟರ್‌ಗೆ 2.ರೂ. ದರ ಹೆಚ್ಚಿಸಲು , ಬಾಗಲಕೋಟೆ ಜಿಲ್ಲಾ ಸಹಕಾರ ಹಾಲು ಒಕ್ಕೂಟ ನಿರ್ಧರಿಸಿದೆ. ವಿಜಯಪುರದ ಮುಖ್ಯ ಕಚೇರಿಯಲ್ಲಿ ನಡೆದ ಹಾಲು ಒಕ್ಕೂಟದ 19ನೇ ಆಡಳಿತ ಮಂಡಳಿ ಸಭೆಯಲ್ಲಿಈ ತೀರ್ಮಾನ ಕೈಗೊಳ್ಳಲಾಗಿದೆ. ಇದು ಫೆ.1ರಿಂದ ಜಾರಿಗೆ ಬರಲಿದೆ ಎಂದು ಎಂದು ಒಕ್ಕೂಟದ ಅಧ್ಯಕ್ಷ ಸಂಭಾಜಿ ಮಿಸಾಳೆ ತಿಳಿಸಿದ್ದಾರೆ. ಶೇ.6.0ರಷ್ಟು ಫ್ಯಾಟ್‌ ಮತ್ತು ಶೇ.9.0 ರಷ್ಟು ಎಸ್‌ಎನ್‌ಎಫ್‌ ಉಳ್ಳ ಎಮ್ಮೆ ಹಾಲಿನ ಖರೀದಿ ದರವನ್ನು ಕನಿಷ್ಠ ದರ 37ಕ್ಕೆ ನಿಗದಿಪಡಿಸಲಾಗಿದೆ. ಶೇ.3.5 ಪ್ಯಾಟ್‌ ಮತ್ತು ಶೇ.8.5 ಎಸ್‌ಎನ್‌ಎಫ್‌ ಉಳ್ಳ ಆಕಳ ಹಾಲಿಗೆ ಕನಿಷ್ಟ 24 ರೂ. ದರ ನಿಗದಿಪಡಿಸಲಾಗಿದೆ ಎಂದವರು ತಿಳಿಸಿದ್ದಾರೆ. ಬೇಸಿಗೆ ಆರಂಭವಾಗುತ್ತಿದ್ದು, ಜಾನುವಾರುಗಳ ಆರೋಗ್ಯ ರಕ್ಷಣೆ, ಹಾಗೂ ಹಸಿರು ಮೇವಿನ ಕೊರತೆ ನೀಗಿಸಲು ಉತ್ಪಾದಕರ ಸಂಕಷ್ಟವನ್ನು ಅರಿತು ಶೇಖರಣೆ ದರ ಹೆಚ್ಚಳ ಮಾಡಲು ಉದ್ದೇಶಿಸಲಾಗಿದೆ ಎಂದವರು ತಿಳಿಸಿದ್ದಾರೆ. ಒಕ್ಕೂಟದ ನಿರ್ದೇಶಕರಾದ ಶ್ರೀಶೈಲಗೌಡ ಪಾಟೀಲ, ಎಸ್‌.ಜೆ.ಹಂಡಿ, ಜಿ.ಎಸ್‌. ಚಲವಾದಿ, ಎಸ್‌.ಎ.ಕಡಪಟ್ಟಿ, ಐ.ಎಸ್‌.ಕರಿಗೌಡ್ರ, ಎಂ.ಆರ್‌.ಹನಗಂಡಿ, ಎಸ್‌.ಎಲ್‌.ತಳೇವಾಡ, ಜಿ.ಎಂ.ಆದಬಸಪ್ಪಗೋಳ, ಎ.ಕೆ.ಹಳ್ಳೂರ ಮತ್ತು ಸರಕಾರದ ನಾಮ ನಿರ್ದೇಶಿತ ಸದಸ್ಯ ಕೆ.ಎಲ್‌.ಬೀಲ್‌ಕೇರಿ, ವ್ಯವಸ್ಥಾಪಕ ನಿರ್ದೇಶಕ ಡಾ.ಸಂಜೀವ ದಿಕ್ಷೀತ್‌ ಒಕ್ಕೂಟದ ಸಭೆಯಲ್ಲಿಪಾಲ್ಗೊಂಡಿದ್ದರು.
from India & World News in Kannada | VK Polls https://ift.tt/3t8rnL2
