ಬೆಂಗಳೂರು: ಬ್ರಿಟನ್‌ ವೈರಸ್‌ನ ಸೋಂಕು ರಾಜ್ಯ ರಾಜಧಾನಿಯಲ್ಲಿ ದಿನದಿಂದ ದಿನಕ್ಕೆ ಹಬ್ಬುತ್ತಿರುವುದು ಸ್ಪಷ್ಟವಾಗುತ್ತಿದೆ. ಬ್ರಿಟನ್ನಿಂದ ಬಂದಿದ್ದ ಮಗಳಿಂದ ಇದೀಗ ಆಕೆಯ ತಾಯಿಗೆ ಹೊಸ ಕೊರೊನಾ ಪ್ರಭೇದದ ಸೋಂಕು ತಗುಲಿರುವುದು ಪರೀಕ್ಷೆ ನಡೆಸಿದ ವರದಿಯಲ್ಲಿ ಪತ್ತೆಯಾಗಿದೆ. ಬ್ರಿಟನ್ನ ರೂಪಾಂತರ ಕೊರೊನಾ ಸೋಂಕು ತಗುಲಿರುವುದು ದೃಢವಾಗಿದೆ. ಡಿ.19ರಂದು 40 ವರ್ಷದ ಮಹಿಳೆ ಬ್ರಿಟನ್ನಿಂದ ತಂದೆಯ ಅನಾರೋಗ್ಯದ ಹಿನ್ನೆಲೆ ಬೆಂಗಳೂರಿಗೆ ಬಂದಿದ್ದರು. ನಗರದ ರಾಜಾಜಿನಗರದಲ್ಲಿರುವ ತನ್ನ ಪೋಷಕರೊಂದಿಗೆ ನೆಲೆಸಿದ್ದರು. ಬ್ರಿಟನ್‌ ರೂಪಾಂತರಿ ಕೊರೊನಾದ ಸದ್ದು ಜಾಸ್ತಿಯಾಗುತ್ತಿದ್ದಂತೆ ಮಹಿಳೆಯ ಪರೀಕ್ಷೆ ನಡೆಸಲಾಗಿತ್ತು. ಈ ವೇಳೆ ಮಹಿಳೆಗೆ ಹೊಸ ಪ್ರಭೇದದ ಸೋಂಕು ಇರುವುದು ದೃಢಪಟ್ಟಿತ್ತು. ನಂತರ ತಾಯಿಗೆ ಅನಾರೋಗ್ಯ ಕಾಣಿಸಿಕೊಂಡ ಹಿನ್ನೆಲೆ ಅವರ ಡಿಎನ್‌ಎ ಪರೀಕ್ಷೆ ನಡೆಸಿದ್ದು, ಅವರಿಗೆ ಬ್ರಿಟನ್‌ ವೈರಸ್‌ ಸೋಂಕು ತಗುಲಿರುವುದು ತಿಳಿದುಬಂದಿದೆ. ಈ ಹಿನ್ನೆಲೆ ಬಿಬಿಎಂಪಿ ಇವರು ನೆಲೆಸಿರುವ ಫ್ಲ್ಯಾಟ್‌ ಹಾಗೂ ಸುತ್ತಮುತ್ತ ಸ್ಯಾನಿಟೈಸ್‌ ಸಿಂಪಡನೆ ಮಾಡಿದೆ. ಇನ್ನು ರಾಜಾಜಿನಗರದ 70 ವರ್ಷದ ಮಹಿಳೆಗೆ ಸೋಂಕು ತಗಲುವ ಮೂಲಕ ಬೆಂಗಳೂರಿನಲ್ಲಿ ಒಟ್ಟು ಬ್ರಿಟನ್‌ ವೈರಸ್‌ ಸೋಂಕಿತರ ಸಂಖ್ಯೆ 6ಕ್ಕೆ ಏರಿಕೆಯಾಗಿದೆ. ಈ ಪೈಕಿ ಐದು ಮಂದಿ ಬ್ರಿಟನ್ನಿಂದ ಬಂದವರಾಗಿದ್ದು, ಒಬ್ಬರ ಪ್ರಾಥಮಿಕ ಸಂಪರ್ಕದಲ್ಲಿದ್ದವರಾಗಿದ್ದಾರೆ. ರಾಜಾಜಿನಗರದ ಮಹಿಳೆಯ ಕುಟುಂಬದ ಇನ್ನು ಇಬ್ಬರ ಪರೀಕ್ಷೆ ನಡೆಸಲಾಗಿದ್ದು ವರದಿಗಾಗಿ ಕಾಯುತ್ತಿದ್ದಾರೆ.
from India & World News in Kannada | VK Polls https://ift.tt/3ndxl9u
