ಹೊಸದಿಲ್ಲಿ: ಲಂಡನ್‌ನ ಆಕ್ಸ್‌ಫರ್ಡ್‌ ವಿಶ್ವವಿದ್ಯಾಲಯ ಮತ್ತು ಸ್ವೀಡನ್‌ ಮೂಲದ ಆಸ್ಟ್ರಾಜೆನೆಕಾ ಔಷಧ ತಯಾರಿಕೆ ಕಂಪನಿ ಅಭಿವೃದ್ಧಿಪಡಿಸಿರುವ ಕೊರೊನಾ ನಿರೋಧಕ ಲಸಿಕೆ 'ಕೋವಿಶೀಲ್ಡ್‌'ನ ತುರ್ತು ಬಳಕೆಗೆ ಅನುಮತಿ ನೀಡಲು ತಜ್ಞರ ತಂಡ ಸರಕಾರಕ್ಕೆ ಶಿಫಾರಸು ಮಾಡಿದ ಬೆನ್ನಲ್ಲಿಯೇ ದೇಶದ ಪ್ರತಿಯೊಬ್ಬರಿಗೂ ಉಚಿತವಾಗಿ ಕೊರೊನಾ ನಿರೋಧಕ ಲಸಿಕೆ ಲಭ್ಯವಾಗುವುದಿಲ್ಲ ಎಂಬ ಮಾಹಿತಿ ಹೊರಬಿದ್ದಿದೆ. ಸುದ್ದಿವಾಹಿನಿಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿರಾಷ್ಟ್ರೀಯ ಕೋವಿಡ್‌-19 ನಿರೋಧಕ ಕಾರ್ಯಪಡೆ ಮುಖ್ಯಸ್ಥ ಹಾಗೂ ನೀತಿ ಆಯೋಗದ ಸದಸ್ಯ ಡಾ. ವಿನೋದ್‌ ಪೌಲ್‌ ಅವರು, ''ಸುಮಾರು 30 ಕೋಟಿ ಜನರಿಗೆ ಕೊರೊನಾ ನಿರೋಧಕ ಲಸಿಕೆಯನ್ನು ಉಚಿತವಾಗಿ ನೀಡಲು ತಗಲುವ ವೆಚ್ಚವನ್ನು ಕೇಂದ್ರ ಸರಕಾರ ಭರಿಸಲಿದೆ. ಅದು ಕೂಡ ಆರೋಗ್ಯ ಸೇವಾ ಸಿಬ್ಬಂದಿ, ಹಿರಿಯ ನಾಗರಿಕರು ಸೇರಿದಂತೆ ಅಗತ್ಯ ಇರುವವರಿಗೆ ಆದ್ಯತೆಯ ಆಧಾರದಲ್ಲಿ ಲಸಿಕೆ ನೀಡಲಾಗುವುದು. ಇವರೆಲ್ಲರಿಗೂ ಮೊದಲ ಹಂತದಲ್ಲಿಯೇ ಲಸಿಕೆ ಸಿಗುವಂತೆ ಗಮನಹರಿಸಲಾಗುವುದು. ಮುಂದಿನ 6ರಿಂದ 8 ತಿಂಗಳುಗಳಲ್ಲಿ ಮೊದಲ ಹಂತದ ಲಸಿಕೆ ನೀಡುವ ಕಾರ್ಯ ಪೂರ್ಣಗೊಳ್ಳಲಿದೆ ,'' ಎಂದಿದ್ದಾರೆ. ''ಈಗಾಗಲೇ ಲಸಿಕೆ ಹಂಚಿಕೆ ವ್ಯವಸ್ಥೆಯನ್ನು ಪೂರ್ತಿ ದೇಶದಲ್ಲಿ ವಿಸ್ತರಿಸಲಾಗಿದ್ದು, ಸಾರಿಗೆ ವ್ಯವಸ್ಥೆ ಇಲ್ಲದ, ಮೂಲಭೂತ ಸೌಕರ್ಯಗಳ ಕೊರತೆ ಇರುವ ಸ್ಥಳಗಳಿಗೂ ತಪ್ಪದೇ ಲಸಿಕೆ ಪೂರೈಸುವ ಕಡೆಗೆ ವಿಶೇಷ ಗಮನಹರಿಸಲಾಗಿದೆ. ಲಸಿಕೆ ವಿತರಣೆ ಆರಂಭವಾದ ಕೂಡಲೇ ದೇಶದ 31 ಕಡೆಗಳಲ್ಲಿ ಲಸಿಕೆ ಸಂಗ್ರಹಾಗಾರ ಮತ್ತು ಹಂಚಿಕೆಯ ಮುಖ್ಯ ಕೇಂದ್ರಗಳು ಕಾರ್ಯಾರಂಭ ಮಾಡಲಿವೆ. ಒಟ್ಟು 29 ಸಾವಿರ ಕಡೆಗಳಲ್ಲಿ ಜನರಿಗೆ ಲಸಿಕೆ ನೀಡಲು 'ವ್ಯಾಕ್ಸಿನೇಶನ್‌ ಪಾಯಿಂಟ್‌' ಗಳನ್ನು ರಚಿಸಲಾಗುತ್ತಿದೆ,'' ಎಂದು ಪೌಲ್‌ ತಿಳಿಸಿದ್ದಾರೆ. ''ಪ್ರಾಥಮಿಕ ಹಂತದಲ್ಲಿ ಲಸಿಕೆ ನೀಡಿದೆ ನಂತರ ದೊಡ್ಡ ಮಟ್ಟದಲ್ಲಿ ದೇಶಾದ್ಯಂತ ಏಕಕಾಲಕ್ಕೆ ಲಸಿಕೆ ಲಭ್ಯವಾಗುವಂತೆ ಕ್ರಮ ಜರುಗಿಸುವ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಯಾಕೆಂದರೆ ಕೊರೊನಾ ಸಾಂಕ್ರಾಮಿಕದಿಂದ ಪರಿಣಾಮಕಾರಿ ಮುಕ್ತಿಗೆ ದೇಶದಲ್ಲಿ ಸಮುದಾಯಗಳಲ್ಲಿ ರೋಗನಿರೋಧಕತೆ ವೃದ್ಧಿಯಾಗುವುದು ಅಗತ್ಯವಾಗಿದೆ,'' ಎಂದು ಪೌಲ್‌ ಅಭಿಪ್ರಾಯಪಟ್ಟಿದ್ದಾರೆ. ಫೈಜರ್‌ಗೆ ಡಬ್ಲುಎಚ್‌ಒ ಸಮ್ಮತಿ: ವಿಶ್ವಾದ್ಯಂತ ತುರ್ತು ಪರಿಸ್ಥಿತಿಗಳಲ್ಲಿಬಳಸಲು ಫೈಜರ್‌- ಬಯೋಎನ್‌ಟೆಕ್‌ ಲಸಿಕೆಗೆ ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ) ಸಮ್ಮತಿ ಸೂಚಿಸಿದೆ. ಕೊರೊನಾದಿಂದ ಹೆಚ್ಚಿನ ಪ್ರಾಣಗಳು ಅಪಾಯಕ್ಕೆ ಸಿಲುಕದಂತೆ ತಡೆಯಲು ಈ ಕ್ರಮಕ್ಕೆ ಮುಂದಾಗಿದ್ದೇವೆ ಎಂದು ಡಬ್ಲ್ಯೂಎಚ್‌ಒ ಅಧಿಕಾರಿ ಮರಿಯಾಂಜೆಲಾ ಸಿಮಾವೊ ತಿಳಿಸಿದ್ದಾರೆ. ಈಗಾಗಲೇ ಬ್ರಿಟನ್‌, ಅಮೆರಿಕ, ಕೆನಡಾ ಮತ್ತು ಕೆಲವು ಐರೋಪ್ಯ ರಾಷ್ಟ್ರಗಳಲ್ಲಿ ಫೈಜರ್‌ ಔಷಧ ತಯಾರಿಕೆ ಕಂಪನಿ ಅಭಿವೃದ್ಧಿಪಡಿಸಿರುವ ಕೊರೊನಾ ನಿರೋಧಕ ಲಸಿಕೆಯ ತುರ್ತು ಬಳಕೆಗೆ ಸರಕಾರಗಳು ಅನುಮತಿ ನೀಡಿವೆ.
from India & World News in Kannada | VK Polls https://ift.tt/351pPb8
