ಜಗದೀಶ್‌ ಜೋಡುಬೀಟಿ ಗೋಣಿಕೊಪ್ಪ: ಹಾತೂರು ಗ್ರಾಪಂ ಕುಂದ ಹಳ್ಳಿಗಟ್ಟು ಗ್ರಾಮದ ಬಸವೇಶ್ವರ ನಗರದ 71 ಬುಡಕಟ್ಟು ಕುಟುಂಬಗಳು ಸೂರಿಗಾಗಿ ಕಾಯುತ್ತಾ ಬಸವಳಿದಿವೆ. ನಾಲ್ಕು ವರ್ಷದಿಂದ ಕಾದು ಕುಳಿತರೂ ಸ್ವಂತ ಮನೆ ಹೊಂದಲು ಸಾಧ್ಯವಾಗಿಲ್ಲ. ಗ್ರಾಮ ಪಂಚಾಯಿತಿಯ ಸೀತಾ ಕಾಲನಿಯಲ್ಲಿ ವಾಸವಾಗಿದ್ದ 116 ಬುಡಕಟ್ಟು ಕುಟುಂಬವನ್ನು ಕುಂದಾ ಗ್ರಾಮಕ್ಕೆ ಸ್ಥಳಾಂತರ ಮಾಡಲಾಯಿತು. ನಂತರ ಅವರಿಗೆ ಸ್ಥಳೀಯ ಶಾಸಕರು ವಸತಿ ನಿರ್ಮಾಣದ ವ್ಯವಸ್ಥೆಗೆ ಹಕ್ಕು ಪತ್ರ ವಿತರಿಸುವ ಕ್ರಮ ಕೈಗೊಂಡರು. ಜತೆಗೆ ವಸತಿ ನಿರ್ಮಾಣಕ್ಕೆ ಭೂಮಿ ಪೂಜೆ ನೆರವೇರಿಸಿದರು. ಆದರೂ ಇಲ್ಲಿನ ನಿವಾಸಿಗಳಿಗೆ ಸ್ವಂತ ಮನೆ ಹೊಂದುವ ಯೋಗ ಕೂಡಿ ಬರಲೇ ಇಲ್ಲ. ಬಹಳಷ್ಟು ಕುಟುಂಬಗಳಲ್ಲಿ ದಾಖಲೆಗಳ ದೋಷ ಕಂಡು ಬಂದ ಕಾರಣ ಹಕ್ಕು ಪತ್ರವು ಸಮರ್ಪಕವಾಗಿ ವಿತರಣೆಯಾಗಿಲ್ಲ. ಹೀಗಾಗಿ ಸ್ವಂತ ನಿವೇಶನ ಹೊಂದುವ ಕನಸು ನನಸಾಗುತ್ತಿಲ್ಲ ಎನ್ನಲಾಗುತ್ತಿದೆ. ಆದರೆ ಅಧಿಕಾರಿಗಳ ನಿರ್ಲಕ್ಷ್ಯವೂ ಈ ಸ್ಥಿತಿಗೆ ಕಾರಣ ಎಂಬ ಆರೋಪವಿದೆ. ಜಿಲ್ಲಾಧಿಕಾರಿಗಳೇ ಖುದ್ದು ಭೇಟಿ ನೀಡಿ ಸಮಸ್ಯೆ ಮನಗಂಡರೂ ವ್ಯವಸ್ಥೆ ಸುಧಾರಣೆ ಗೊಂಡಿಲ್ಲ ಎಂದ ಮೇಲೆ ನಮ್ಮ ಬಗ್ಗೆ ಕನಿಕರ ಹೊಂದಿರುವ ಮನಸ್ಸುಗಳಾದರೂ ಯಾವುದು ಎಂದು ಇಲ್ಲಿನ ಜನ ಮರುಗುತ್ತಿದ್ದಾರೆ. ದಾಖಲೆ ಇಲ್ಲದೆ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಸ್ಥಳಾಂತರ ಮಾಡಿದ ಇವರಿಗೆ ಇದೀಗ ಮನೆ ಕಟ್ಟುವ ಸಂದರ್ಭ ಸಂಪೂರ್ಣ ದಾಖಲಾತಿ ಬೇಕು ಎಂದು ಹೇಳುತ್ತಿದ್ದಾರೆ. ಇವರಿಗೆ ನೀಡಿದ ಹಕ್ಕುಪತ್ರ, ಆಧಾರ್‌ ಕಾರ್ಡ್‌, ಮತ ಗುರುತಿನ ಚೀಟಿ, ಪಡಿತರ ಚೀಟಿಯಲ್ಲಿ ಕಂಡು ಬಂದ ಅಕ್ಷರ ದೋಷ ಇವರನ್ನು ಕಾಡುತ್ತಿದೆ. ಹಲವು ಬಾರಿ ಅಕ್ಷರಗಳ ತಪ್ಪು ಸರಿಪಡಿಸಲು ಅರ್ಜಿ ನೀಡಿದರೂ ತಪ್ಪುಗಳು ಮರುಕಳಿಸುತ್ತಿವೆ. ಬೇಕೆಂದೇ ಈ ರೀತಿ ಮಾಡುತ್ತಿದ್ದಾರೆ ಎಂಬುವುದು ಇಲ್ಲಿನ ನಿವಾಸಿಗಳ ಆರೋಪ. ನಮ್ಮ ಬಗ್ಗೆ ಕಾಳಜಿ ತೋರಿ 4 ತಿಂಗಳಿನಲ್ಲಿ 6ಕ್ಕೂ ಹೆಚ್ಚು ಚಿಕ್ಕಮಕ್ಕಳು ಅಕಾಲಿಕ ಮರಣಕ್ಕೆ ತುತ್ತಾಗಿದ್ದಾರೆ. ಚಳಿ, ಮಳೆಗೆ ರಕ್ಷಣೆ ಇಲ್ಲದೇ ಹೀಗಾಗುತ್ತಿದೆ. ಸೂಕ್ತ ಮನೆಯಿದ್ದರೆ ಮಕ್ಕಳ ಆರೈಕೆಗೆ ಸಾಧ್ಯವಾಗುತ್ತಿತ್ತು. ಇದಲ್ಲದೇ ಹೆಣ್ಣು ಮಕ್ಕಳೂ ಸಂಕಷ್ಟ ಅನುಭವಿಸುತ್ತಾರೆ. ಆಗಾಗ ಅನಾರೋಗ್ಯದಿಂದ ಬಳಲುತ್ತಿದ್ದಾರೆ. ಆದರೂ ನಮ್ಮ ಬಗ್ಗೆ ಕಾಳಜಿ ತೋರುತ್ತಿಲ್ಲ ಎಂಬುದು ಇಲ್ಲಿನ ವಿದ್ಯಾರ್ಥಿನಿಯೊಬ್ಬರ ಅಳಲು. ಮಳೆಗಾಲದಲ್ಲಿ ಸಮಸ್ಯೆ ಪ್ಲಾಸ್ಟಿಕ್‌ ಹೊದಿಕೆಗಳಲ್ಲಿ ಜೋಪಡಿ ನಿರ್ಮಿಸಿಕೊಂಡಿರುವ ಇವರಿಗೆ ಮಳೆಗಾಲ ಸಂಕಟವಾಗಿ ಕಾಡುತ್ತಿದೆ. ಜೋಪಡಿಗಳೊಳಗೆ ನೀರು ನುಗ್ಗಿ ಮಲಗಲೂ ಸಾಧ್ಯವಾಗದ ಸ್ಥಿತಿ ಇದೆ. ಹಾಡಿಗೆ ಬರುವ ಹಾದಿಯಲ್ಲಿ ಸೇತುವೆಯೊಂದನ್ನು ಕಟ್ಟಲಾಗಿದೆ. ಅದರ ಮೇಲ್ಭಾಗದಲ್ಲೇ ನೀರು ನಿಂತು ಹರಿಯುವುದರಿಂದ ಹೊರಗಿನ ಸಂಪರ್ಕವೇ ಕಡಿತಗೊಳ್ಳುತ್ತದೆ. ಕಾಟಾಚಾರಕ್ಕೆ ಈ ಸೇತುವೆಯನ್ನು ನಿರ್ಮಾಣ ಮಾಡಲಾಗಿದೆ ಎಂಬುದು ಸ್ಥಳೀಯರ ಆರೋಪ.
from India & World News in Kannada | VK Polls https://ift.tt/2X073wr
