ಹೊಸದಿಲ್ಲಿ: ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಸಾಂಪ್ರದಾಯಿಕ ಎದುರಾಳಿ ವಿರುದ್ಧದ 7 ಶತಕಗಳನ್ನು ಸೇರಿದಂತೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಒಟ್ಟು 100 ಶತಕಗಳನ್ನು ಬಾರಿಸಿದ್ದಾರೆ. ಆದರೆ, ಈ ಯಾವ ಶತಕಗಳು ಕೂಡ 2003ರ ಏಕದಿನ ಕ್ರಿಕೆಟ್ ವಿಶ್ವಕಪ್ ಟೂರ್ನಿಯಲ್ಲಿ ಪಾಕಿಸ್ತಾನ ವಿರುದ್ಧ ಆಡಿದ ಇನಿಂಗ್ಸ್ಗೆ ಸರಿಸಾಟಿಯಲ್ಲ ಎಂದು ಪಾಕ್ನ ಮಾಜಿ ನಾಯಕ ಇಂಝಮಾಮ್ ಉಲ್ ಹಕ್ ಹೇಳಿದ್ದಾರೆ. ಟೀಮ್ ಇಂಡಿಯಾದ ಅನುಭವಿ ಆಫ್ ಸ್ಪಿನ್ನರ್ ಆರ್ ಅಶ್ವಿನ್ ಜೊತೆಗಿನ 'ಡಿಆರ್ಎಸ್ ವಿತ್ ಆಶ್' ಯೂಟ್ಯೂಬ್ ಸಂದರ್ಶನ ಕಾರ್ಯಕ್ರಮದಲ್ಲಿ ಮಾತನಾಡಿದ ಪಾಕಿಸ್ತಾನ ಕ್ರಿಕೆಟ್ನ ದಂತಕತೆ ಇಂಝಮಾಮ್ ಉಲ್ ಹಕ್, 2003ರ ಒಡಿಐ ವಿಶ್ವಕಪ್ ಟೂರ್ನಿಯ ನೆನಪಿನಾಳವನ್ನು ಕೆದಕಿದ್ದಾರೆ. "ನಾನು ಈ ಬಗ್ಗೆ ಸಚಿನ್ ಪಾಜಿ ಬಳಿಯೂ ಪ್ರಶ್ನೆ ಮಾಡಿದ್ದೇನೆ. ಈಗ ಇದೇ ಪ್ರಶ್ನೆಯನ್ನು ನಿಮಗೂ ಕೇಳುತ್ತೇನೆ. 2003ರ ಒಡಿಐ ವಿಶ್ವಕಪ್ ಟೂರ್ನಿಯಲ್ಲಿನ ಇಂಡೊ-ಪಾಕ್ ಪಂದ್ಯದಲ್ಲಿ ಪಾಕಿಸ್ತಾನ ದೊಡ್ಡ ಮೊತ್ತವನ್ನು ಪೇರಿಸಿತ್ತು. ಸಯೀದ್ ಅನ್ವರ್ ಶತಕ ದಾಖಲಿಸಿದರೂ, ಸೆಹ್ವಾಗ್ ಮತ್ತು ಸಚಿನ್ ಅವರ ಅದ್ಭುತ ಆಟದಿಂದ ಭಾರತ ಆ ಪಂದ್ಯ ಗೆದ್ದಿತ್ತು. ಆದರೆ, ಪಂದ್ಯದ ಮೊದಲ ಇನಿಂಗ್ಸ್ ಅಂತ್ಯಕ್ಕೆ ಅಷ್ಟು ದೊಡ್ಡ ಮೊತ್ತಗಳಿಸಿದ್ದಾಗ ಇದು ಗೆಲುವಿಗೆ ಸಾಕು ಎಂದು ನಿಮಗನ್ನಿಸಿತ್ತೇ?," ಎಂದು ಅಶ್ವಿನ್ ಪಾಕ್ ತಂಡದ ಮಾಜಿ ನಾಯಕನನ್ನು ತಮ್ಮ ಕಾರ್ಯಕ್ರಮದಲ್ಲಿ ಪ್ರಶ್ನೆ ಮಾಡಿದ್ದರು. ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿ, ಸಯೀದ್ ಅನ್ವರ್ 126 ಎಸೆತಗಳಲ್ಲಿ 101 ರನ್ ಗಳಿಸಿ ತಂಡಕ್ಕೆ 273 ರನ್ಗಳ ದೊಡ್ಡ ಮೊತ್ತ ತಂದುಕೊಟ್ಟಾಗೆ ಗೆಲ್ಲುವ ವಿಶ್ವಾಸ ಹೆಚ್ಚಿತ್ತು ಎಂದು ಇಂಝಿ ಈ ಹೇಳಿಕೊಂಡಿದ್ದಾರೆ. "ನಮ್ಮ ತಂಡದ ಬೌಲಿಂಗ್ ವಿಭಾಗದಲ್ಲಿ ವಸೀಮ್ ಅಕ್ರಮ್, ವಕಾರ್ ಯೂನಿಸ್ ಮತ್ತು ಶೊಯೇಬ್ ಅಖ್ತರ್ ಅವರಂತ ಶ್ರೇಷ್ಠರಿದ್ದರು. ಜೊತೆಗೆ ಅಲ್ಲಿನ ಪರಿಸ್ಥಿರಿ ವೇಗಿಗಳಿಗೆ ಹೆಚ್ಚು ನೆರವಾಗುವಂತ್ತಿತ್ತು. ದಕ್ಷಿಣ ಆಫ್ರಿಕಾದ ಸೆಂಚೂರಿಯನ್ನಲ್ಲಿ ನಡೆದ ಪಂದ್ಯವದು. ಹೀಗಾಗಿ ಪಂದ್ಯ ಗೆಲ್ಲಲು ಬೇಕಿದ್ದ ಭರ್ಜರಿ ಮೊತ್ತಕಲೆಹಾಕಿದ್ದೇವೆ ಎಂದು ನಾವಂದುಕೊಂಡಿದ್ದೆವು," ಎಂದು ಇಂಝಿ ಹೇಳಿದ್ದಾರೆ. ಆದರೆ, ಮಾಸ್ಟರ್ ಕ್ಲಾಸ್ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಸಚಿನ್ ಕೇವಲ 75 ಎಸೆತಗಳಲ್ಲಿ 98 ರನ್ ಸಿಡಿಸಿ ಪಾಕಿಸ್ತಾನದ ಮುಷ್ಠಿಯಲ್ಲಿದ್ದ ಗೆಲುವನ್ನು ಕಸಿದು ಟೀಮ್ ಇಂಡಿಯಾಗೆ ಒಪ್ಪಿಸಿದರು. ಈ ಬಗ್ಗೆ ಮುಕ್ತ ಕಂಠದಿಂದ ಶ್ಲಾಘಿಸಿರುವ ತಮ್ಮ ಜನ್ಮದಲ್ಲೇ ಸಚಿನ್ ಅವರ ಅಂಥದ್ದೊಂದು ಭರ್ಜರಿ ಆಟ ನಾನು ಕಂಡಿಲ್ಲ ಎಂದಿದ್ದಾರೆ. "ಸಚಿನ್ ಅವರ ಆಟವನ್ನು ನಾನು ಬಹಳಾ ಕಂಡಿದ್ದೇನೆ. ಆದರೆ, ಆ ಪಂದ್ಯದಲ್ಲಿ ಸಚಿನ್ ಬ್ಯಾಟ್ ಮಾಡಿದ ರೀತಿ ನನ್ನ ಜನ್ಮದಲ್ಲೇ ನಾನೆಂದೂ ಕಂಡಿಲ್ಲ. ವೇಗಿಗಳಿಗೆ ನೆರವಾಗುತ್ತಿದ್ದ ಸ್ಥಿತಿಗತಿಗಳಲ್ಲಿ ನಮ್ಮ ಫಾಸ್ಟ್ ಬೌಲರ್ಗಳ ಎದುರು ಸಚಿನ್ ಬ್ಯಾಟ್ ಬೀಸಿದ್ದು ನಿಜಕ್ಕೂ ಅದ್ಭುತವಾಗಿತ್ತು. ಅವರು 98 ರನ್ ಗಳಿಸಿ ಶೊಯೇಬ್ ಅಖ್ತರ್ ವಿಕೆಟ್ ಒಪ್ಪಿಸಿದರು ಅನ್ನಿಸುತ್ತದೆ," ಎಂದು ಇಂಝಿ ತಮ್ಮ ನೆನಪಿನಾಳ ಕೆದಕಿದ್ದಾರೆ. ಗುರಿ ಬೆನ್ನತ್ತಿದ್ದ ಟೀಮ್ ಇಂಡಿಯಾಗೆ 5.3 ಓವರ್ಗಳಲ್ಲಿ ಮೊದಲ ವಿಕೆಟ್ಗೆ ಓಪನರ್ಗಳಾದ ವೀರೇಂದ್ರ ಸೆಹ್ವಾಗ್ ಮತ್ತು ಸಚಿನ್ ತೆಂಡೂಲ್ಕರ್ 50 ರನ್ಗಳನ್ನು ಜೋಡಿಸಿ ಸ್ಫೋಟಕ ಆರಂಭ ನೀಡಿದ್ದರು. ವಕಾರ್ ಯೂನಿಸ್ ಬೌಲಿಂಗ್ನಲ್ಲಿ ಸೆಹ್ವಾಗ್ ಔಟಾದರೂ ಕೂಡ, ಪಾಕ್ ಬೌಲರ್ಗಳನ್ನು ಬೆಂಡೆತ್ತುವುದನ್ನು ಮುಂದುವರಿಸಿದ ಸಚಿನ್ 12 ಫೋರ್ ಮತ್ತು 1 ಸಿಕ್ಸರ್ ಒಳಗೊಂಡಂತೆ ಶತಕದತ್ತ ಕಾಲಿಟ್ಟಿದ್ದರು. ಆದರೆ ಶೊಯೇಬ್ ಅಖ್ತರ್ ಎಸೆದ ಬೌನ್ಸರ್ನಲ್ಲಿ ವಿಕೆಟ್ ಕೈಚೆಲ್ಲಿ ಶತಕವಂಚಿತರಾದರು. ನಂತರ ರಾಹುಲ್ ದ್ರಾವಿಡ್ (76 ಎಸೆತಗಳಲ್ಲಿ ಅಜೇಯ 44) ಮತ್ತು ಯುವರಾಜ್ ಸಿಂಗ್ (53 ಎಸೆತಗಳಲ್ಲಿ ಅಜೇಯ 50) ಮುರಿಯದ 99 ರನ್ಗಳ ಜೊತೆಯಾಟವಾಡಿ ತಂಡಕ್ಕೆ 6 ವಿಕೆಟ್ಗಳ ಭರ್ಜರಿ ಜಯ ತಂದುಕೊಟ್ಟರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3nPaWQa
