ಬೆಂಗಳೂರು: ಕರ್ನಾಟಕದ ಸ್ಟಾರ್ ಆಲ್ರೌಂಡರ್ ಭಾರತ ತಂಡದ ಪರ ಟೆಸ್ಟ್ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ ದಿನಗಳನ್ನು ಸ್ಮರಿಸಿದ್ದಾರೆ. 2014ರ ಇಂಗ್ಲೆಂಡ್ ಪ್ರವಾಸದಲ್ಲಿ ನಾಟಿಂಗ್ಹ್ಯಾಮ್ನ ಟ್ರೆಂಟ್ಬ್ರಿಡ್ಜ್ನಲ್ಲಿ ನಡೆದ ಆತಿಥೇಯರ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಪರ ಕಣಕ್ಕಿಳಿದಿದ್ದ ಸ್ಟುವರ್ಟ್, ಅಮೋಘ 78 ರನ್ಗಳನ್ನು ಗಳಿಸಿದ್ದರು. ಪಂದ್ಯದ ಮೊದಲ ಇನಿಂಗ್ಸ್ನಲ್ಲಿ ಕೇವಲ 1 ರನ್ ಗಳಿಸಿ ಔಟ್ ಆಗಿದ್ದ ಬಿನ್ನಿ, ಎರಡನೇ ಇನಿಂಗ್ಸ್ನಲ್ಲಿ ಬ್ಯಾಟ್ ಮಾಡಲು ಮುಂದಾದ ಸಂದರ್ಭದಲ್ಲಿ ಅವರ ಮೇಲೆ ಇನ್ನಿಲ್ಲದ ಒತ್ತಡವಿತ್ತು. ಏಕೆಂದರೆ ಆ ದಿನ ಭೋಜನ ವಿರಾಮದ ಹೊತ್ತಿಗೆ ಟೀಮ್ ಇಂಡಿಯಾ 184 ರನ್ಗಳಿಸುವ ಹೊತ್ತಿಗೆ 6 ವಿಕೆಟ್ಗಳನ್ನು ಕಳೆದುಕೊಂಡಿತ್ತು. ಪಂದ್ಯ ಉಳಿಸಲು ದಿನವಿಡೀ ಬ್ಯಾಟ್ ಮಾಡುವ ಒತ್ತಡ ಬಿನ್ನಿ ಮೇಲಿತ್ತು. ಅಂತೆಯೇ ಕ್ರೀಸ್ಗೆ ಬಂದು ಅದ್ಭುತ ಏಕಾಗ್ರತೆ ಮೆರೆದ ಬಿನ್ನಿ, 8ನೇ ವಿಕೆಟ್ಗೆ ಭುವನೇಶ್ವರ್ ಕುಮಾರ್ ಜೊತೆಗೂಡಿ 91 ರನ್ಗಳ ಅಮೋಘ ಜೊತೆಯಾಟ ನಡೆಸಿದರು. ಪರಿಣಾಮ 9 ವಿಕೆಟ್ಗೆ 391 ರನ್ಗಳಿಸಿದ ಭಾರತ ತಂಡ ಇನಿಂಗ್ಸ್ ಡಿಕ್ಲೇರ್ ಮಾಡಿಕೊಳ್ಳಲು ಸಾಧ್ಯವಾಗಿತ್ತು. "ಅದು ನನ್ನ ಜೀವನದ ಅತ್ಯಂತ ವಿಶೇಷ ದಿನ. #281 ನನ್ನ ಟೆಸ್ಟ್ ಕ್ಯಾಪ್ ಎಂಎಸ್ ಧೋನಿಯಿಂದ ಪಡೆದಿದ್ದೆ. ಅಂದಹಾಗೆ ಆ ಟೆಸ್ಟ್ ಪಂದ್ಯದಲ್ಲಿ ನಾವು ಅಂದುಕೊಂಡತೆ ಯಾವುದೂ ನಡೆಯಲಿಲ್ಲ. ಮೊದಲ ಇನಿಂಗ್ಸ್ನಲ್ಲಿ ನಾನು ಕೇವಲ 1 ರನ್ ಮಾತ್ರ ಗಳಿಸಿದ್ದೆ. ಎರಡನೇ ಇನಿಂಗ್ಸ್ನಲ್ಲಿ ಬ್ಯಾಟ್ ಮಾಡುವ ಮೊದಲು ನನಗೆ ರಾತ್ರಿ ನಿದ್ರೆ ಕೂಡ ಬಂದಿರಲಿಲ್ಲ," ಎಂದು ಸ್ಟೋರ್ಟ್ಸ್ಕೀಡಾಗೆ ನೀಡಿರುವ ವಿಶೇಷ ಸಂದರ್ಶನದ ವೇಳೆ ಬಿನ್ನಿ ಹೇಳಿಕೊಂಡಿದ್ದಾರೆ. "ಅಂದು ಮಾಹಿ ಭಾಯ್ ಹೇಳಿದ ಮಾತುಗಳು ಈಗಲೂ ನೆನಪಿದೆ. 'ನೋಡು ಪಂದ್ಯ ಉಳಿಸಿಕೊಳ್ಳಬೇಕಾದರೆ ನಾವಿನ್ನೂ 4-5 ಗಂಟೆಗಳ ಕಾಲ ಬ್ಯಾಟ್ ಮಾಡುವ ಅಗತ್ಯವಿದೆ.' ಎಂದರು. ಅವರು ನನಗೆ ಆ ಮಾತಿಗಳನ್ನು ಹೇಳಿದರು ಎಂದು ನಂಬಲು ಕೂಡ ಸಾಧ್ಯವಾಗದೆ ಅವರನ್ನೇ ನೋಡುತ್ತಾ ದಂಗಾಗಿ ನಿಂತಿದ್ದೆ. ಏಕೆಂದರೆ ನನಗೆ ನಾನು ಏನು ಮಾಡುತ್ತಿದ್ದೇನೆಂಬುದೇ ಗೊತ್ತಿರಲಿಲ್ಲ. ಬಹಳ ಆತಂಕದಲ್ಲಿದ್ದೆ. ಅದು ನನ್ನ ಮೊದಲ ಟೆಸ್ಟ್, ಪ್ರಥಮ ಇನಿಂಗ್ಸ್ನಲ್ಲಿ ರನ್ ಕೂಡ ಗಳಿಸಿರಲಿಲ್ಲ. ಆದರೂ ಧೋನಿ ನನ್ನ ಮೇಲಿಟ್ಟಿದ್ದ ವಿಶ್ವಾಸವನ್ನು ನಂಬಲು ಸಾಧ್ಯವಾಗಲಿಲ್ಲ," ಎಂದು ಬಿನ್ನಿ ತಮ್ಮ ನೆನೆಪಿನಾಳ ಕೆದಕಿದ್ದಾರೆ. ಎರಡನೇ ಇನಿಂಗ್ಸ್ನಲ್ಲಿ ಭಾರತ ತಂಡ ಮುರಳಿ ವಿಜಯ್ ಮತ್ತು ಚೇತೇಶ್ವರ್ ಪೂಜಾರ ಅವರ ಅರ್ಧಶತಕಗಳ ನೆರವಿನಿಂದ 1 ವಿಕೆಟ್ಗೆ 140 ರನ್ ಗಳಿಸಿ ಸುಸ್ಥಿತಿಯಲ್ಲಿತ್ತು. ಆದರೆ, 186 ರನ್ಗಳಿಸುವ ಹೊತ್ತಿಗೆ ತಂಡ ಒಟ್ಟು 6 ವಿಕೆಟ್ ಕಳೆದುಕೊಂಡಿತ್ತು. ಕೇವಲ 46 ರನ್ಗಳ ಅಂತರದಲ್ಲಿ 5 ಬ್ಯಾಟ್ಸ್ಮನ್ಗಳು ಪೆವಿಲಿಯನ್ ಸೇರಿದ್ದರು. ನಂತರ ಬಿನ್ನಿ ಮತ್ತು ರವೀಂದ್ರ ಜಡೇಯಾ 7ನೇ ವಿಕೆಟ್ಗೆ 65 ರನ್ಗಳ ಜೊತೆಯಾಟ ನಡೆಸುವ ಮೂಲಕ ಹೋರಾಟ ಹಿಡಿದಿಟ್ಟರು. "ಕ್ರೀಸ್ಗೆ ಬಂದ ಕೂಡಲೇ ನಾನು ಸಾಮಾನ್ಯವಾಗಿ ಲೆಗ್ ಸ್ಟಂಪ್ ಗಾರ್ಡ್ ತೆಗೆದುಕೊಳ್ಳುತ್ತೇನೆ. ಆದರೆ ಅಂದು ಅಂಪೈರ್ ಬಳಿ ಮಧ್ಯದ ಸ್ಟಂಪ್ನ ಗಾರ್ಡ್ ಕೇಳಿ ಪಡೆದಿದ್ದೆ. ಆಗ ನನಗೇ ಅರಿವಾಯ್ತು, ಈ ರೀತಿ ನಾನು ಎಂದೂ ಮಾಡಿಲ್ಲ ಎಂಬುದು. ಏಕೆಂದರೆ ಅಷ್ಟು ಆತಂಕ ನನ್ನಲ್ಲಿ ಮನೆ ಮಾಡಿತ್ತು. ಏನಾಗುತ್ತಿದೆ ಎಂಬುದರ ಅರಿವೂ ಇರಲಿಲ್ಲ. ಮೊದಲ 10 ರನ್ ಗಳಿಸುವಾಗ ನನ್ನ ತಲೆ ಗೊಂದಲದ ಗೂಡಾಗಿತ್ತು. ನನ್ನ ಮನಸ್ಸಿನಲ್ಲಿ ಸ್ಪಷ್ಟತೆಯೇ ಇರಲಿಲ್ಲ," ಎಂದು ತಮ್ಮ ಚೊಚ್ಚಲ ಟೆಸ್ಟ್ ಪಂದ್ಯದ ಅನುಭವವನ್ನು ಹಂಚಿಕೊಂಡಿದ್ದಾರೆ. "ನಂತರ ನಿಧಾನವಾಗಿ ಇನಿಂಗ್ಸ್ ಕಟ್ಟುತ್ತಿದ್ದಂತೆ ಆತ್ಮವಿಶ್ವಾಸ ಚಿಗುರಿತು. 2 ಗಂಟೆಗಳ ಕಾಲ ಬ್ಯಾಟ್ ಮಾಡಿ 35 ರನ್ಗಳನ್ನು ಗಳಿಸಿದ್ದೆ. ಅದರ ಹಿಂದೆ 8-9 ವರ್ಷಗಳ ದೇಶಿ ಕ್ರಿಕೆಟ್ ಆಡಿದ ಅನುಭವ ಅಡಗಿತ್ತು. ಆಗ ಪಂದ್ಯ ಉಳಿಸುವಿದೋ ಅಥವಾ ಗೆಲ್ಲುವ ಅವಕಾಶ ಸೃಷ್ಟಿಸುವುದೋ ಗೊತ್ತಿಲ್ಲ. ಅಂದು ಅನುಭವ ನನ್ನೊಳಗಿನ ಉತ್ತಮ ಆಟವನ್ನು ಹೊರತಂದಿತ್ತು. ಆ ದಿನ ಟೆಸ್ಟ್ ಶತಕ ಬಾರಿಸಿದ್ದರೆ ಬಹಳ ಸಂತಸವಾಗುತ್ತಿತ್ತು. ಆದರೆ, ಆ 78 ರನ್ಗಳನ್ನು ನನ್ನ ಜೀವನದುದ್ದಕ್ಕೂ ಸ್ಮರಿಸುತ್ತೇನೆ," ಎಂದು ಹೇಳಿದ್ದಾರೆ. ಆ ಸರಣಿಯಲ್ಲಿ ಬಿನ್ನಿಯಿಂದ ಮೂಡಿಬಂದ ಬಹುದೊಡ್ಡ ಪ್ರದರ್ಶನ ಅದೊಂದೇ ಆಗಿತ್ತು. ಏಕೆಂದರೆ ಲಾರ್ಡ್ಸ್ ಟೆಸ್ಟ್ನಲ್ಲಿ ಅವರು 9 ರನ್ ಮತ್ತು ಶೂನ್ಯಕ್ಕೆ ಔಟ್ ಆಗಿದ್ದರು. ನಂತರ ಓವಲ್ ಟೆಸ್ಟ್ನಲ್ಲಿ ಮರಳಿ ಅವಕಾಶ ಪಡೆದು 5 ಮತ್ತು ಅಜೇಯ 25 ರನ್ಗಳಿಸಿದರು. ಸರಣಿಯಲ್ಲಿ ಇಂಗ್ಲೆಂಡ್ ಆರಂಭಿಕ ಹಿನ್ನಡೆ ಬದಿಗೊತ್ತಿ 3-1 ಅಂತರದಲ್ಲಿ ಜಯ ದಾಖಲಿಸಿತ್ತು. ಭಾರತ ಟೆಸ್ಟ್ ತಂಡದಿಂದ ಬಿನ್ನಿ ನಂತರ ತಮ್ಮ ಸ್ಥಾನವನ್ನೂ ಕಳೆದುಕೊಂಡರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3g2miNs
