ವಿ. ರವಿಕಿರಣ್‌, ರಾಮನಗರ ರಾಮನಗರ: ಕೊರೊನಾ ತುರ್ತುಪರಿಸ್ಥಿತಿ ಇದ್ದರೂ ಕೃಷಿ ಚಟುವಟಿಕೆಗಳಿಗೆ ಯಾವುದೇ ಭಂಗವಿಲ್ಲ. ಬೇಸಾಯ ಮಾಡಲು ರೈತರಿಗೆ ಬೇಕಾದ ಎಲ್ಲಾ ಸೌಲಭ್ಯಗಳನ್ನೂ ಒದಗಿಸಲಾಗುತ್ತದೆ. ಕೃಷಿಗೆ ಬೇಕಾದ ಎಲ್ಲ ರೀತಿಯ ಪರಿಕರಗಳ ದಾಸ್ತಾನು ಸಾಕಷ್ಟು ಇರುವಂತೆ ನೋಡಿಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ, ಗ್ರೌಂಡ್‌ ರಿಯಾಲಿಟಿ ಬೇರೆಯೇ ಇದೆ. ಲಾಕ್ಡೌನ್ ಅನ್ನೇ ಬಂಡವಾಳ ಮಾಡಿಕೊಂಡಿರುವ ಕೆಲವು ವ್ಯಾಪಾರಿಗಳು ಹಾಗೂ ದಲ್ಲಾಳಿಗಳು ಕೃತಕ ಅಭಾವ ಸೃಷ್ಟಿಸಿ ರೈತರನ್ನು ದೋಚಲು ನಿಂತಿದ್ದಾರೆ. ಕೃಷಿಗೆ ಬೇಕಾದ ಪರಿಕರಗಳ ಹಾಗೂ ಯಂತ್ರಗಳನ್ನು ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲಾಗುತ್ತಿದೆ. ಈ ಬಗ್ಗೆ ರೈತರಿಂದ ವ್ಯಾಪಕ ದೂರುಗಳು ಕೇಳಿ ಬರುತ್ತಿವೆ. ಮಳೆ ಬಂದರೂ, ಕೈಕಟ್ಟಿದ ಅನುಭವ ಜಿಲ್ಲೆಯಲ್ಲಿ ಕಳೆದ 15 ದಿನಗಳಿಂದ ಉತ್ತಮ ಮಳೆಯಾಗುತ್ತಿದೆ. ಇದರಿಂದ ರೈತರಿಗೆ ಸಾಕಷ್ಟು ಕೃಷಿಪೂರ್ವ ಕೆಲಸಗಳಿವೆ. ಕೃಷಿಗೆ ಸಾಕಷ್ಟು ತಯಾರಿಗಳನ್ನೂ ಮಾಡಿಕೊಳ್ಳುತ್ತಿದ್ದಾರೆ. ಇದಕ್ಕಾಗಿ ಪರಿಕರಗಳ ಖರೀದಿಗೆ ಮಾರುಕಟ್ಟೆಗೆ ಬರುತ್ತಿರುವ ರೈತರಿಗೆ ಆಘಾತ ಎದುರಾಗುತ್ತಿದೆ. ಅಗತ್ಯ ವಸ್ತುಗಳ ಪೂರೈಕೆ ಇಲ್ಲ, ಸೀಮಿತ ದಾಸ್ತಾನು ಇದೆ ಎಂದು ಸುಳ್ಳು ಕತೆ ಕಟ್ಟುವ ವ್ಯಾಪಾರಿಗಳು ಮತ್ತು ದಲ್ಲಾಳಿಗಳು, ದುಪ್ಪಟ್ಟು ಬೆಲೆಗಳಿಗೆ ಇವುಗಳನ್ನು ಖರೀದಿಸುವಂತೆ ರೈತರ ಮೇಲೆ ಒತ್ತಡ ಹೇರುತ್ತಿದ್ದಾರೆ. ಹೀಗಾಗಿ ರೈತರಿಗೆ ಮಳೆ ಬಂದರೂ ಕೃಷಿ ಮಾಡಲಾಗದೇ ಕೈಕಟ್ಟಿ ಹಾಕಿದ ಅನುಭವವಾಗುತ್ತಿದೆ. ಯಾವೆಲ್ಲಾ ಪರಿಕರಗಳು ಬಿತ್ತನೆ ಬೀಜ, ರಸಗೊಬ್ಬರ, ಕೀಟನಾಶಕ, ಜೈವಿಕ ಗೊಬ್ಬರ, ಜೈವಿಕ ಪೀಡೆನಾಶಕ, ಸಾವಯವ ಗೊಬ್ಬರ ಸೇರಿದಂತೆ ಕೃಷಿ ಅಗತ್ಯ ವಸ್ತುಗಳನ್ನು ನಿಗದಿತ ದರಕ್ಕಿಂತ ಹೆಚ್ಚಿನ ಬೆಲೆಗೆ ರೈತರಿಗೆ ಮಾರಾಟ ಮಾಡುತ್ತಿರುವ ಆರೋಪ ಕೇಳಿ ಬರುತ್ತಿವೆ. ಇದನ್ನು ಕೃಷಿ ಇಲಾಖೆ ಅಧಿಕಾರಿಗಳೇ ಒಪ್ಪಿಕೊಂಡಿದ್ದಾರೆ. ಶಿಸ್ತು ಕ್ರಮದ ಎಚ್ಚರಿಕೆ ಕೃಷಿ ಸಲಕರಣೆಗಳನ್ನು ದುಪ್ಪಟ್ಟು ಬೆಲೆಗೆ ಮಾರುವವರ ವಿರುದ್ಧ ಕಠಿಣ ಕ್ರಮ ಕೈಗೊಂಡು, ಅವರ ಮಾರಾಟದ ಪರವಾನಗಿ ರದ್ದುಪಡಿಸುವುದಾಗಿ ಜಿಲ್ಲೆಯ ಜಂಟಿ ಕೃಷಿ ನಿರ್ದೇಶಕ ರವಿ ಎಚ್ಚರಿಸಿದ್ದಾರೆ. ಕೃಷಿ ಸಲಕರಣೆ ಪೂರೈಸುವ ವ್ಯಾಪಾರಿಗಳು, ಸಾವಯವ ಗೊಬ್ಬರು, ರಸಗೊಬ್ಬರ, ಬಿತ್ತನೆ ಬೀಜ, ಕೀಟ ನಾಶಕಗಳ ಸಾಕಷ್ಟು ದಾಸ್ತಾನು ಮಾಡಿಕೊಳ್ಳುವುದು ಕಡ್ಡಾಯ. ಜತೆಗೆ ಕೊರೊನಾ ಹರಡದಂತೆ ಸುರಕ್ಷತೆ ಕ್ರಮಗಳನ್ನೂ ಕಟ್ಟುನಿಟ್ಟಾಗಿ ಪಾಲಿಸಬೇಕು. ಅಂಗಡಿಗೆ ಬರುವ ರೈತರು ಮುಖಕ್ಕೆ ಮಾಸ್ಕ್‌ ಧರಿಸಿರುವುದನ್ನು ಖಚಿತಪಡಿಸಿಕೊಳ್ಳಬೇಕು. ಕೈಗೆ ಸ್ಯಾನಿಟೈಸರ್‌ ಹಾಕಲೇಬೇಕು. ವ್ಯವಹಾರದ ವೇಳೆ ಸಾಮಾಜಿಕ ಅಂತರ ಪಾಲನೆಯಾಗುವುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ತಿಳಿಸಿದ್ದಾರೆ. ದಾಸ್ತಾನು, ದರಪಟ್ಟಿ ಪ್ರಕಟಿಸಿ ಜಿಲ್ಲೆಯ ಎಲ್ಲ ಕೃಷಿ ಸಲಕರಣೆ ಮಾರಾಟದ ಮಳಿಗೆಗಳಲ್ಲಿಅಂಗಡಿಯಲ್ಲಿರುವ ದಾಸ್ತಾನು ಹಾಗೂ ಅವುಗಳ ಚಿಲ್ಲರೆ ಮಾರಾಟದ ದರದ ಪಟ್ಟಿಯನ್ನು ಕಡ್ಡಾಯವಾಗಿ ಪ್ರಕಟಿಸಬೇಕು. ಇದು ಅಂಗಡಿಯಲ್ಲಿಎಲ್ಲರಿಗೂ ಕಾಣುವಂತೆ ದೊಡ್ಡದಾಗಿರಬೇಕು. ದರಪಟ್ಟಿಯಲ್ಲಿ ನಮೂದಿಸಿರುವ ಬೆಲೆಯಲ್ಲೇ ಕೃಷಿ ಪರಿಕರಗಳನ್ನು ಮಾರಾಟ ಮಾಡಬೇಕು. ಇದಕ್ಕೆ ತಪ್ಪಿದರೆ ತಕ್ಕ ಶಾಸ್ತಿ ಖಚಿತ ಎಂದು ಅವರು ಎಚ್ಚರಿಸಿದ್ದಾರೆ. 7100 ಹೆಕ್ಟೇರ್‌ ಗುರಿ 2020-21ರ ಪೂರ್ವ ಮುಂಗಾರು ಹಂಗಾಮಿಗೆ ಕೃಷಿ ಇಲಾಖೆ 7100 ಹೆಕ್ಟೇರ್‌ ಗುರಿಯನ್ನು ನಿಗದಿಗೊಳಿಸಿದೆ. ಎಳ್ಳು 3500 ಹೆಕ್ಟೇರ್‌, ತೊಗರಿ 1610 ಹೆಕ್ಟೇರ್‌ , 1100 ಹೆಕ್ಟೇರ್‌ ಅಲಸಂದೆ, ಅವರೇ 900 ಹೆಕ್ಟೇರ್‌ ಪ್ರದೇಶದಲ್ಲಿ ಬಿತ್ತನೆ ಮಾಡುವ ಗುರಿ ಹೊಂದಲಾಗಿದೆ. ಇವು ಜಿಲ್ಲೆಯ ಪೂರ್ವ ಮುಂಗಾರಿನ ಪ್ರಮುಖ ಬೆಳೆಯಾಗಿವೆ. ಜಾಗೃತ ಕೋಶಕಳಪೆ ಕೃಷಿ ಪರಿಕರಗಳ ಮಾರಾಟ ಮತ್ತು ನೊಂದಾಣಿಯಾಗದ ಜೈವಿಕ ಗೊಬ್ಬರ ಹಾಗೂ ಜೈವಿಕ ಕೀಟ ನಾಶಕ ಮಾರಾಟ ಮಾಡುವುದು ಕಾನೂನಿಗೆ ವಿರುದ್ಧವಾಗಿದೆ. ಇದರ ಜತೆಗೆ, ನಿಗದಿತ ಬೆಲೆಗಿಂತ ಹೆಚ್ಚು ದರಕ್ಕೆ ಮಾರಾಟ ಮಾಡುವುದು ಮತ್ತು ಕೃತಕ ಅಭಾವ ಸೃಷ್ಟಿಸುವುದು ಕಂಡು ಬಂದಲ್ಲಿ ಸ್ಥಳೀಯ ಸಹಾಯಕ ಕೃಷಿ ನಿರ್ದೇಶಕರಿಗೆ ದೂರು ಸಲ್ಲಿಸಬಹುದು. ಇದರೊಟ್ಟಿಗೆ ಜಿಲ್ಲಾಮಟ್ಟದಲ್ಲಿ ಜಾಗೃತ ಕೋಶ ಕಾರ್ಯ ನಿರ್ವಹಿಸುತ್ತಿದ್ದು, ಇಂತಹ ಅಕ್ರಮಗಳಿಗೆ ಕಡಿವಾಣ ಹಾಕುವ ಕೆಲಸ ಮಾಡುತ್ತಿದೆ. ರೈತರು ಸಹ ಪದಾರ್ಥಗಳನ್ನು ಹೆಚ್ಚಿನ ಬೆಲೆಗೆ ಮಾರಾಟ ಮಾಡುವುದು ಕಂಡು ಬಂದರೇ, 8277929745 ನಂಬರ್‌ಗೆ ಕರೆ ಮಾಡಬಹುದು ಎಂಬುದಾಗಿ ಕೃಷಿ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಮಳಿಗೆ ಬಂದ್‌ ಕೊರೊನಾ ಲಾಕ್ಡೌನ್ ಹಿನ್ನಲೆಯಲ್ಲಿ ಕೃಷಿ ಚಟುವಟಿಕೆಗಳಿಗೆ ಯಾವುದೇ ತೊಡಕು ಆಗದಿರಲಿ ಎಂದು ಜಿಲ್ಲಾಕೃಷಿ ಇಲಾಖೆ ಮಳಿಗೆಗಳಿಗೆ 118 ಪಾಸುಗಳನ್ನು ವಿತರಣೆ ಮಾಡಿದೆ. ಆದರೆ, ಪಾಸು ಪಡೆದ ಮಳಿಗೆಗಳು ಮಳಿಗೆ ತೆರೆಯದೇ ಬಹುತೇಕ ಸ್ವಯಂ ಘೋಷಿತ ಬಂದ್‌ ಮಾಡಿವೆ. ಇದರಿಂದಾಗಿ ಜಿಲ್ಲೆಯಲ್ಲಿ ಉತ್ತಮ ಮಳೆಯಾಗುತ್ತಿದ್ದರು, ಕೃಷಿ ಚಟುವಟಿಕೆಗಳಿಗೆ ಅಗತ್ಯ ಪದಾರ್ಥಗಳು ಲಭ್ಯವಾಗದೇ, ರೈತರು ತಲೆಯ ಮೇಲೆ ಕೈ ಹಿಡಿದು ಕುಳಿತುಕೊಳ್ಳಬೇಕಾದ ಪರಿಸ್ಥಿತಿಯಲ್ಲಿದ್ದಾರೆ. ಎಂಪಿಆರ್‌ಪಿಗಿಂತ ಹೆಚ್ಚಿನ ಬೆಲೆ ಮಾರಾಟ ಮಾಡಲಾಗುತ್ತಿದೆ. ಕೆಲವೊಂದು ಬೀಜಗಳು ಲಭ್ಯವಾಗುತ್ತಿಲ್ಲ. ರೈತರು ಕೇಳುವ ಪದಾರ್ಥಗಳು ಡೀಲರ್‌ಗಳ ಬಳಿ ಲಭ್ಯವಾಗುತ್ತಿಲ್ಲ. ಸೊಪ್ಪು ಸೇರಿದಂತೆ ಇತರೆ ಪದಾರ್ಥಗಳ ಬೀಜಗಳಿಗೆ ದುಪ್ಪಟ್ಟು ಹಣ ಕೇಳಲಾಗುತ್ತಿದೆ. ಇನ್ನು ರಾಸಾಯನಿಕ ಮತ್ತು ಕೀಟ ನಾಶಕವನ್ನು ಕೇಳಲು ಸಾಧ್ಯವಾಗುತ್ತಿಲ್ಲ. -ಎಂ.ಡಿ.ಶಿವಕುಮಾರ್‌, ರೈತ ಸಂಘ ಮುಖಂಡ, ರಾಮನಗರ ಹೆಚ್ಚಿನ ದರಕ್ಕೆ ಕೃಷಿ ಪರಿಕರಗಳನ್ನು ಮಾರಾಟ ಮಾಡುತ್ತಿರುವುದು ಗಮನಕ್ಕೆ ಬಂದಿದೆ. ಮುಂಜಾಗ್ರತ ಕ್ರಮವಾಗಿ, ಪ್ರಕಟಣೆಯನ್ನು ಹೊರಡಿಸಲಾಗಿದೆ. ಇಂತಹ ಘಟನೆಗಳು ಕಂಡು ಬಂದರೇ, ರೈತರು ಸಹಾಯಕ ಕೃಷಿ ನಿರ್ದೇಶಕರಿಗೆ ದೂರು ಸಲ್ಲಿಸಬಹುದು ಅಥವಾ ಜಾಗೃತಕೋಶ ಅಧಿಕಾರಿ ನಂಬರ್‌ಗೆ ಕರೆ ಮಾಡಬಹುದು. -ರವಿ, ಜಂಟಿ ನಿರ್ದೇಶಕ, ಕೃಷಿ ಇಲಾಖೆ, ರಾಮನಗರ
from India & World News in Kannada | VK Polls https://ift.tt/2Whlg7M
