ಹಕ್ಕು: ರಾಷ್ಟ್ರೀಯ ಭದ್ರತಾ ಮಂಡಳಿ (ಎನ್ಎಸ್ಸಿ), ಪ್ರಧಾನ ಮಂತ್ರಿಗಳ ಕಚೇರಿ (ಪಿಎಂಒ) ಹೊರಡಿಸಿರುವ ಪತ್ರಿಕಾ ಪ್ರಕಟಣೆಯೊಂದು ವಾಟ್ಸ್ಆ್ಯಪ್ನಲ್ಲಿ ಹರಿದಾಡುತ್ತಿದ್ದು, ಭಾರತೀಯರು ಇದನ್ನು ವ್ಯಾಪಕವಾಗಿ ಹಂಚಿಕೊಳ್ಳುತ್ತಿದ್ದಾರೆ. ಇದು ಪಿಎಂಒ ಭಾರತದಿಂದ ಬಂದಿದೆ ಎಂದು ಭಾವಿಸಿ ಹಲವರು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡುತ್ತಿದ್ದಾರೆ. ಕೊರೊನಾ ವೈರಸ್ ಸಾಂಕ್ರಾಮಿಕ ರೋಗದ ದೃಷ್ಟಿಯಿಂದ 2020ರ ಮಾರ್ಚ್ 18 ರಿಂದ 31 ರವರೆಗೆ ಸರಕಾರವು ಹಲವು ನಿರ್ಬಂಧಗಳನ್ನು ಘೋಷಿಸಿದೆ ಎಂದು ಮಾರ್ಚ್ 18, 2020 ರ ಪತ್ರಿಕಾ ಪ್ರಕಟಣೆಯಲ್ಲಿ ಉಲ್ಲೇಖಿಸಲಾಗಿದೆ. ಆದೇಶದ ಪರಿಣಾಮಕಾರಿತ್ವವನ್ನು ಖಚಿತಪಡಿಸಿಕೊಳ್ಳಲು, ಮೂಲಭೂತ ಅಗತ್ಯ ವಸ್ತುಗಳ ಪೂರೈಕೆಗಳ ಹೊರತುಪಡಿಸಿ ಎಲ್ಲಾ ಸಮಯದಲ್ಲೂ ಮನೆಯಲ್ಲೇ ಇರಬೇಕೆಂದು ಸಾರ್ವಜನಿಕರಿಗೆ ಸೂಚಿಸಲಾಗಿದೆ. ಇದಲ್ಲದೆ, ದಯವಿಟ್ಟು ಕೋವಿಡ್ 19 ಸೋಂಕಿಗೆ ಒಳಗಾಗದಂತೆ ಪ್ರತ್ಯೇಕವಾಗಿ ಇರುವುದನ್ನು ಅಭ್ಯಾಸ ಮಾಡಿ ಎಂದು ಪತ್ರಿಕಾ ಪ್ರಕಟಣೆಯಲ್ಲಿ ಉಲ್ಲೇಖಿಸಲಾಗಿದೆ. ಟೈಮ್ಸ್ ಫ್ಯಾಕ್ಟ್ ಚೆಕ್ ಮತ್ತು ಅದರ ತಂಡದ ಸದಸ್ಯರಿಗೆ ದೊರೆತಿರುವ ವಾಟ್ಸ್ಆ್ಯಪ್ ಸಂದೇಶಗಳ ಕೆಲವು ಸ್ಕ್ರೀನ್ ಶಾಟ್ ಇಲ್ಲಿವೆ: ಬಹುತೇಕ ಫಾರ್ವಡ್ ಮಾಡಿದವರು ಇದನ್ನು ಭಾರತದ ಪ್ರಧಾನಿ ಕಚೇರಿ ಕಳಿಸಿದೆ ಎಂದೇ ಹೇಳಿಕೊಳ್ಳುತ್ತಿದ್ದಾರೆ. ಅಲ್ಲದೆ, ಪಿಎಂಒ ಭಾರತದಿಂದ ಬಂದಿದೆ ಎಂದೇ ಹಲವರು ಭಾವಿಸಿದ್ದಾರೆ. ಸತ್ಯ ಈ ಪತ್ರಿಕಾ ಪ್ರಕಟಣೆ ಹೊರಡಿಸಿರುವುದು ಎನ್ಎಸ್ಸಿ ಹಾಗೂ ಪಿಎಂಒ ಮಲೇಷ್ಯಾ. ಇದಕ್ಕೂ ಪಿಎಂಒ ಭಾರತಕ್ಕೂ ಯಾವುದೇ ಸಂಬಂಧವಿಲ್ಲ. ಪರಿಶೀಲನೆ ಮತ್ತು ವಿಧಾನ ಈ ಪತ್ರಿಕಾ ಟಿಪ್ಪಣಿಯನ್ನು ಕೂಲಂಕಷವಾಗಿ ನೋಡಿದಾಗ, ಅದರಲ್ಲಿ ಉಲ್ಲೇಖಿಸಲಾದ ಕೊನೆಯ ಅಂಶವು ಸಿಂಗಾಪುರ / ಥೈಲ್ಯಾಂಡ್ / ಬ್ರೂನಿ / ಇಂಡೋನೇಷ್ಯಾದಲ್ಲಿ ಕೆಲಸ ಮಾಡುವ ಮಲೇಷಿಯನ್ನರಿಗೆ ಅವಕಾಶವಿಲ್ಲ ಎಂದು ಹೇಳಿದೆ. ಜತೆಗೆ, ಪತ್ರಿಕಾ ಪ್ರಕಟಣೆಯಲ್ಲಿ (03-8888 2010) ನೀಡಲಾದ ಸಹಾಯವಾಣಿ ಸಂಖ್ಯೆ ಮಲೇಷ್ಯಾದ್ದು. ಭಾರತದ ಸಹಾಯವಾಣಿ ಸಂಖ್ಯೆ ಬೇರೆಯೇ ಆಗಿದೆ. ಇನ್ನು, ಈ ಸೂಚನೆಗಳನ್ನು ಬಳಸಿಕೊಂಡು, ನಾವು ವಿಭಿನ್ನ ಕೀವರ್ಡ್ಗಳನ್ನು ಬಳಸಿದ್ದೇವೆ ಮತ್ತು 14 ದಿನಗಳ ಕಾಲ ನಿರ್ಬಂಧ ಆದೇಶ ಎಂಬ ಶೀರ್ಷಿಕೆಯ ಸುದ್ದಿ ವರದಿಯನ್ನು ದಿ ಸ್ಟಾರ್ ವೆಬ್ಸೈಟ್ನಲ್ಲಿ ಕಂಡುಕಂಡಿದ್ದೇವೆ. ಕೋವಿಡ್ 19 ಅನ್ನು ನಿಯಂತ್ರಣಕ್ಕೆ ತರಲು ಮಾರ್ಚ್ 18, 2020 ರಿಂದ ಮಾರ್ಚ್ 31 ರವರೆಗೆ ನಿರ್ಬಂಧ ಆದೇಶ ಹೊರಡಿಸಲಾಗುವುದು ಎಂದು ವರದಿ ಹೇಳಿದೆ. ಮಲೇಷ್ಯಾದ ಪ್ರಧಾನಿ ತಾನ್ ಶ್ರೀ ಮುಹಿದ್ದೀನ್ ಯಾಸಿನ್ ಅವರನ್ನು ಉಲ್ಲೇಖಿಸಿ, ಅವರು ಎನ್ಎಸ್ಸಿ ಅಧ್ಯಕ್ಷರಾದ ನಂತರ ಈ ಆದೇಶ ಹೊರಡಿಸಲಾಗಿದೆ ಎಂದು ವರದಿ ತಿಳಿಸಿದೆ. ಜತೆಗೆ ಅಂತಹ ಆದೇಶವು ಮಲೇಷ್ಯಾದಲ್ಲಿ ಜಾರಿಯಲ್ಲಿದೆ ಎಂದು ಹಲವಾರು ಇತರ ವಿಶ್ವಾಸಾರ್ಹ ಸುದ್ದಿ ಸಂಸ್ಥೆಗಳು ಧೃಡಪಡಿಸಿದವು. ತೀರ್ಮಾನ ಸಾರ್ವಜನಿಕವಾಗಿ ನಿರ್ಬಂಧ ಹಾಗೂ ಹೊರಗಡೆ ಚಲಿಸದಂತೆ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ಪಿಎಂಒ ಮಲೇಷ್ಯಾ ಹೊರಡಿಸಿರುವ ಪ್ರಕಟಣೆಯನ್ನು ಭಾರತೀಯ ವಾಟ್ಸ್ಆ್ಯಪ್ ಬಳಕೆದಾರರು ಪಿಎಂಒ ಭಾರತದಿಂದ ಬಂದಿದೆ ಎಂದು ವ್ಯಾಪಕವಾಗಿ ಪ್ರಸಾರ ಮಾಡುತ್ತಿದ್ದಾರೆ ಎಂದು ಟೈಮ್ಸ್ ಫ್ಯಾಕ್ಟ್ ಚೆಕ್ ಕಂಡುಹಿಡಿದಿದೆ.
from India & World News in Kannada | VK Polls https://ift.tt/3ddCyKs
