ಚಂಡೀಗಢ: ಪಂಜಾಬ್‌ನಲ್ಲಿ ಕೊರೊನಾದಿಂದ ಮಾರ್ಚ್‌ 18 ರಂದು ಸಾವಿಗೀಡಾದ ವ್ಯಕ್ತಿ ಕನಿಷ್ಠ 23 ಜನರಿಗೆ ಕೊರೊನಾ ಸೋಂಕು ಹಬ್ಬಿಸಿದ್ದಾರೆ ಎನ್ನಲಾಗಿದೆ. ಅಂದ ಹಾಗೆ ರಾಜ್ಯದಲ್ಲಿ ಸದ್ಯ ಇರುವುದು 33 ಕೊರೊನಾ ಸೋಂಕಿತರು, ಅದರಲ್ಲಿ ಮುಕ್ಕಾಲು ಪಾಲು ಕೇವಲ ಓರ್ವ ಸೋಂಕಿತರಿಂದಲೇ ಹಬ್ಬಿದೆ. ಗುರುದ್ವಾರದ ಧರ್ಮಗುರುವಾಗಿದ್ದ 70 ವರ್ಷದ ವ್ಯಕ್ತಿಯೊಬ್ಬರು ತಮ್ಮ ಇಬ್ಬರು ಗೆಳೆಯರೊಂದಿಗೆ ಎರಡು ವಾರಗಳ ಕಾಲ ಜರ್ಮನಿ ಮತ್ತು ಇಟಲಿ ಪ್ರವಾಸ ಮುಗಿಸಿ ಮಾರ್ಚ್‌ ಮೊದಲ ವಾರದಲ್ಲಿ ಭಾರತಕ್ಕೆ ಬಂದಿದ್ದರು. ಅವರನ್ನು ಮನೆಯಲ್ಲಿ ದಿಗ್ಬಂಧನದಲ್ಲಿ ಇರುವಂತೆ ಅಧಿಕಾರಿಗಳು ಸೂಚಿಸಿದ್ದರು. ಆದರೆ ಅವರು ದಿಗ್ಬಂಧನ ಮುರಿದು ಜನರೊಂದಿಗೆ ವಿಪರೀತ ಬೆರೆತಿದ್ದರು. ಮಾರ್ಚ್‌ 6 ರಂದು ದೆಹಲಿ ಬಂದಿದ್ದ ಅವರು ನಂತರ ಪಂಜಾಬ್‌ಗೆ ತೆರಳಿದ್ದರು. ಬಂದವರೇ ಆನಂದ್‌ಪುರ ಸಾಹಿಬ್‌ನಲ್ಲಿ ಮಾರ್ಚ್‌ 8 ರಿಂದ 10 ರವರೆಗೆ ನಡೆದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ನಂತರ ಶಾಹೀದ್‌ ಭಗತ್‌ ಸಿಂಗ್‌ ನಗರ ಜಿಲ್ಲೆಯಲ್ಲಿರುವ ತಮ್ಮ ಗ್ರಾಮಕ್ಕೆ ತೆರಳಿದ್ದರು.
ಅವರಿಗೆ ಕೊರೊನಾ ಇರುವುದು ದೃಢಪಡುವ ಹೊತ್ತಿಗೆ ಸರಿ ಸುಮಾರು 100 ಜನರನ್ನು ಅವರು ಭೇಟಿಯಾಗಿದ್ದರು. ಅವರು ಮತ್ತು ಅವರ ಜೊತೆಗಿದ್ದ ಇಬ್ಬರು ಗೆಳೆಯರು ರಾಜ್ಯದ ಸುಮಾರು 15 ಗ್ರಾಮಗಳಿಗೆ ಭೇಟಿ ನೀಡಿದ್ದರು. ಇದೀಗ ಅವರ ಕುಟುಂಬದಲ್ಲೇ 14 ಜನರಿಗೆ ಕೊರೊನಾ ಸೋಂಕು ತಗುಲಿದೆ. ಅವರ ಇಬ್ಬರು ಮೊಮ್ಮಕ್ಕಳಿಗೂ ಕೊರೊನಾ ಇರುವುದು ದೃಢ ಪಟ್ಟಿದ್ದು, ಅವರಿಬ್ಬರೂ ನೂರಾರು ಜನರನ್ನು ಭೇಟಿಯಾಗಿರುವುದು ಮತ್ತಷ್ಟು ದಿಗಿಲು ಹುಟ್ಟಿಸಿದೆ. ಇವರ ಕಥೆ ಕೇಳಿ ಅಧಿಕಾರಿಗಳಿಗೆ ಜೀವವೇ ಬಾಯಿಗೆ ಬಂದಿದ್ದು, ಇದೀಗ ಪ್ರತಿ ಗ್ರಾಮದ ಪ್ರತಿಯೊಬ್ಬರ ಮನೆಗೂ ತೆರಳಿ ಕೊರೊನಾಗೆ ಗುರಿಯಾಗಿರುವ ಬಗ್ಗೆ ಪರಿಶೀಲನೆ ನಡೆಸುತ್ತಿದ್ದಾರೆ. ಕೇವಲ ಮೂರು ಜನರು ಬೇಜವಾಬ್ದಾರಿಯಿಂದ 15 ಗ್ರಾಮಗಳು ಸಂಪೂರ್ಣ ಲಾಕ್‌ಡೌನ್‌ ಆಗಿದ್ದು, ನೂರಾರು ಜನರು ಹೋಮ್‌ ಕ್ವಾರಂಟೈನ್‌ನಲ್ಲಿದ್ದಾರೆ. ನವಾನ್‌ಶಹರ್‌, ಮೊಹಾಲಿ, ಅಮೃತಸರ, ಹೊಶಿಯಾರ್‌ಪುರ್‌ ಮತ್ತು ಜಲಂಧರ್‌ನಲ್ಲಿಯೂ ಕೊರೊನಾ ಪಾಸಿಟಿಪ್‌ ಪ್ರಕರಣಗಳು ವರದಿಯಾಗಿದ್ದು, ಇವರಿಂದಲೇ ಈ ಸೋಂಕು ಹರಡಿದೆ ಎಂದುಕೊಳ್ಳಲಾಗಿದೆ. ಈ ಹಿಂದೆ ದಕ್ಷಿಣ ಕೊರಿಯಾ ಮತ್ತು ಇಟಲಿಯಲ್ಲಿ ಇದೇ ರೀತಿ ಸಾವಿರಾರು ಜನರಿಗೆ ಕೇವಲ ಒಬ್ಬರು ವ್ಯಕ್ತಿಯಿಂದ ಕೊರೊನಾ ಸೋಂಕು ಹರಡಿತ್ತು. ದೇಶದಲ್ಲಿಯೂ ಕೊರೊನಾ ಸೋಂಕಿತರ ಬೇಜವಾಬ್ದಾರಿ ವರ್ತನೆ ನೋಡಿದರೆ ಇಲ್ಲಿಯೂ ಅದೇ ರೀತಿಯ ಇತಿಹಾಸ ಪುನರಾವರ್ತನೆ ಆಗುವ ಲಕ್ಷಣಗಳು ಕಾಣಿಸುತ್ತಿವೆ.
from India & World News in Kannada | VK Polls https://ift.tt/2WIwDr7
