ಬೆಂಗಳೂರು: ಕೊರೊನಾ ಕಾಯಿಲೆ ಮೂರನೇ ಹಂತದಲ್ಲಿ ಸಮುದಾಯ ಪ್ರಸರಣಗೊಂಡಿದೆಯೇ ಎಂಬುದನ್ನು ಪತ್ತೆ ಹಚ್ಚುವಲ್ಲಿ ರಾಜ್ಯ ಸರಕಾರ ಗಾಂಭೀರ್ಯತೆ ಮರೆತಿದ್ದು, ವ್ಯಾಪಕ ಪ್ರಮಾಣದಲ್ಲಿ ನಡೆಸುವಲ್ಲಿ ವಿಫಲವಾಗಿದೆ. ವಿದೇಶದಿಂದ ಬಂದವರಿಗೆ ಕ್ವಾರಂಟೈನ್‌, ಸಾರ್ವಜನಿಕ ಸ್ಥಳದಲ್ಲಿ ಥರ್ಮಲ್‌ ಟೆಸ್ಟಿಂಗ್‌ ಮಾತ್ರ ಆರೋಗ್ಯ ಇಲಾಖೆ ನಡೆಸುತ್ತಿದ್ದರೂ ಆರ್‌ಟಿಪಿಸಿಆರ್‌ ಆಧರಿತ ಪರೀಕ್ಷೆ (ಟೆಸ್ಟಿಂಗ್‌)ಯನ್ನು ಸಮುದಾಯ ಮಟ್ಟದಲ್ಲಿ ವ್ಯಾಪಕವಾಗಿ ನಡೆಸಲು ಸಾಧ್ಯವಾಗಿಲ್ಲ. ಇದುವರೆಗೆ ಕೇವಲ 2,838 ಪರೀಕ್ಷೆ ಮಾತ್ರ ನಡೆಸಿದ್ದು, ಸಂಗ್ರಹವಾದ 85 ಸಾವಿರಕ್ಕೂ ಹೆಚ್ಚು ಸ್ಯಾಂಪಲ್ಸ್‌ಗಳಲ್ಲಿ ಪಾಸಿಟಿವ್‌ ಅಂಶವಿದೆಯೋ, ಇಲ್ಲವೋ ಎಂಬುದನ್ನು ಪತ್ತೆ ಹಚ್ಚುವುದಕ್ಕೆ ಸಾಧ್ಯವಾಗಿಲ್ಲ. ಯಾದೃಚ್ಛಿಕ ವಿಧಾನ (ರ್‍ಯಾಂಡಮ್ ಸ್ಯಾಂಪ್ಲಿಂಗ್) ಮೂಲಕ ಪ್ರತಿ ದಿನ 7 ರಿಂದ 8 ಸಾವಿರ ಪರೀಕ್ಷೆಗಳನ್ನು ನಡೆಸಬೇಕೆಂಬ ಗುರಿ ಈೕಡೇರಿಲ್ಲ. ಈ ರೀತಿ ಪರೀಕ್ಷೆ ನಡೆದರೆ ಸಮುದಾಯ ಹಂತದಲ್ಲಿ ಪ್ರಸರಣವಾಗಿರುವುದನ್ನು ಪತ್ತೆ ಹಚ್ಚಲು ಅಸಾಧ್ಯ. ಆರ್‌ಟಿಪಿಸಿಆರ್‌ ಆಧರಿತ ಪರೀಕ್ಷೆಗೆ ಜರ್ಮನಿಯಿಂದ ರೀಏಜೆಂಟ್‌ ತರಿಸಬೇಕಿದ್ದು, ಸರಕಾರದ ಪಾಲಿಗೆ ಅದು ವೆಚ್ಚದಾಯಕ ಎಂಬುದು ತಜ್ಞರ ಅಭಿಪ್ರಾಯ.
ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಆರ್‌ಟಿಪಿಸಿಆರ್‌ ಮೂಲಕ ಈ ಪರೀಕ್ಷೆ ನಡೆಸುವುದಕ್ಕೆ ರಾಜ್ಯ ಸರಕಾರ ಈಗಾಗಲೇ ಅನುಮತಿ ನೀಡಿದೆ. ಪ್ರತಿ ಟೆಸ್ಟ್‌ ಗೆ ಇಲ್ಲಿ 4,500 ರೂ. ಶುಲ್ಕ ವಿಧಿಸಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್‌) ಮಾನದಂಡದ ಪ್ರಕಾರ ಸೆರಾಲಜಿ ಆಧರಿತ ಪರೀಕ್ಷಾ ವಿಧಾನ ನಡೆಸಿದರೆ ದಿನಕ್ಕೆ ಕನಿಷ್ಠ 40 ಸಾವಿರ ಪರೀಕ್ಷೆ ನಡೆಸಲು ಸಾಧ್ಯ ಎಂಬ ಮಾತುಗಳು ಕೇಳಿ ಬಂದಿವೆ. ಜೊತೆಗೆ ಐಸಿಎಂಆರ್‌ ಹೇಳಿರುವ ಸಿರಾಲಜಿ ಆಧರಿತ ಪರೀಕ್ಷೆಯಿಂದ 1 ಸಾವಿರ ರೂ.ಗೆ ಕೊರೋನಾ ಟೆಸ್ಟಿಂಗ್‌ ನಡೆಸಲು ಸಾಧ್ಯ. ಇದು ಐಜಿಎಂ ಪರೀಕ್ಷೆ ಮಾತ್ರ ನಡೆಸಲಿದ್ದು, ಕೊರೊನಾ ಪಾಸಿಟಿವ್‌ ಪ್ರಕರಣವನ್ನು ಪತ್ತೆ ಹಚ್ಚುವಲ್ಲಿ ಅನುಕೂಲ ಕಲ್ಪಿಸಲಿದೆ.
ಇದರ ನಡುವೆ ನಿಖರ ಮಾಹಿತಿಯೇ ಇಲ್ಲದೇ ಕಲ್ಯಾಣ ಮಂಟಪದಲ್ಲಿ ರೋಗಿಗಳನ್ನಿಡುವ ಬಗ್ಗೆ ನಡೆಸುತ್ತಿರುವ ಚಿಂತನೆ ಈಗ ವೈದ್ಯಕೀಯ ವಲಯದಲ್ಲಿ ಟೀಕೆಗೆ ಗುರಿಯಾಗಿದೆ.
from India & World News in Kannada | VK Polls https://ift.tt/39rObdw
