ಹೊಸದಿಲ್ಲಿ: ವಿರುದ್ಧದ ಹೋರಾಟಕ್ಕೆ ಕ್ರೀಡಾಲೋಕದ ತಾರೆಗಳೆಲ್ಲಾ ಕೈಜೋಡಿಸಿದ್ದು, ಟೀಮ್‌ ಇಂಡಿಯಾದ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ ಹಾಗೂ ಬಿಜೆಪಿ ಸಂಸದ ಗೌತಮ್‌ ಗಂಭೀರ್‌ ಒಂದು ಕೋಟಿ ರೂ. ಬಿಡುಗಡೆ ಮಾಡಿದ್ದಾರೆ. ಲೋಕಲ್‌ ಏರಿಯಾ ಡೆವೆಲೋಪ್ಮೆಂಟ್‌ (ಸ್ಥಳೀಯ ಪ್ರಾಂತ್ಯ ಬೆಳವಣಿಗೆ ಯೋಜನೆ) ಸ್ಕೀಮ್‌ ಅಡಿಯಲ್ಲಿ ಗಂಭೀರ್‌ ಒಟ್ಟು ಒಂದು ಕೋಟಿ ರೂ. ಮೊತ್ತವನ್ನು ಕೊರೊನಾ ವೈರಸ್‌ ವಿರುದ್ಧದ ಹೋರಾಟಕ್ಕೆ ಬಳಕೆ ಮಾಡಲು ಬಿಡುಗಡೆಗೊಳಿಸಿದ್ದಾರೆ. " ವಿರುದ್ಧದ ಹೋರಾಟಕ್ಕೆ ದೇಶದ ಎಲ್ಲಾ ಸೌಕರ್ಯಗಳನ್ನು ಬಳಸಿಕೊಳ್ಳಲು ಇದು ಸೂಕ್ತ ಸಮಯ. ಹೀಗಾಗಿ ನನ್ನ ಎಂಪಿ ಲ್ಯಾಡ್‌ (ಲೋಕಲ್‌ ಏರಿಯಾ ಡೆವೆಲೋಪ್ಮೆಂಟ್‌) ಯೋಜನೆ ಅಡಿಯಲ್ಲಿ ಒಂದು ಕೋಟಿ ರೂ. ಬಿಡುಗಡೆ ಮಾಡಿದ್ದೇನೆ. ಇದೇ ವೇಳೆ ಕೇಂದ್ರ ಪರಿಹಾರ ನಿಧಿಗೆ ನನ್ನ ಒಂದು ತಿಂಗಳ ಸಂಬಳವನ್ನೂ ನೀಡಿದ್ದೇನೆ. ಎಲ್ಲರೂ ಒಗ್ಗಟ್ಟಾಗಿ ನಿಲ್ಲೋಣ," ಎಂದು ಗಂಭೀರ್‌ ಹೇಳಿದ್ದಾರೆ. ಇದಕ್ಕೂ ಮುನ್ನ ಹೇಳಿಕೆ ಬಿಡುಗಡೆ ಮಾಡಿದ್ದ ಗಂಭೀರ್‌, ತಮ್ಮ ಕ್ಷೇತ್ರದಲ್ಲಿನ ಬಡವರಿಗೆ ಮತ್ತು ನಿರ್ಗತಿಕರಿಗೆ ಆಹಾರ ಪೊಟ್ಟಣಗಳನ್ನು ವಿತರಿಸುವುದಾಗಿ ಹೇಳಿದ್ದಾರೆ. ತಮ್ಮ ಫೌಂಡೇಷನ್‌ ಮೂಲಕ ಗಂಭೀರ್‌ ಈ ಕೆಲಸ ಮಾಡಿಸುತ್ತಿದ್ದು ಲಾಕ್‌ಡೌನ್‌ ವೇಳೆ 2000ಕ್ಕೂ ಅಧಿಕ ಆಹಾರ ಪೊಟ್ಟಣಗಳನ್ನು ಸಿದ್ಧಪಡಿಸಿದ್ದಾರೆ. ಈ ಮೂಲಕ ಯಾರೊಬ್ಬರು ಕೂಡ ಹಸಿವಿನಿಂದ ನರಳಬಾರದು ಎಂದಿದ್ದರು. ಈ ಮಧ್ಯೆ ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು ಕೂಡ ತಮ್ಮ ಎಂಪಿ ಲ್ಯಾಡ್‌ ಖಾತೆಯಿಂದ ಒಂದು ಕೋಟಿ ರೂ. ಬಿಡುಗಡೆ ಮಾಡಿರುವುದಾಗಿ ಹೇಳಿದ್ದಾರೆ. "ಕೊರೊನಾ ವೈರಸ್‌ ವಿರುದ್ಧ ಹೋರಾಡುವ ಸಲುವಾಗಿ ದೇಶದ ಎಲ್ಲಾ ಸಂಸತ್‌ ಸದಸ್ಯರು ತಮ್ಮ ಎಂಪಿ ಲ್ಯಾಡ್‌ ಖಾತೆ ಮೂಲಕ 1 ಕೋಟಿ ರೂ. ಬಿಡುಗಡೆ ಮಾಡುವಂತೆ ಹೇಳಿದ್ದಾರೆ. ಅಂತೆಯೇ ಈ ಕೂಡಲೇ ಹಣ ವರ್ಗಾಯಿಸುತ್ತಿದ್ದೇನೆ," ಎಂದು ಟ್ವೀಟ್‌ ಮಾಡಿದ್ದಾರೆ. ದೇಶದಲ್ಲಿ ಕೊರೊನಾ ವೈರಸ್‌ ಸೋಂಕಿತರ ಸಂಖ್ಯೆ 900ರ ಗಡಿ ದಾಟಿದ್ದು, ಈವರೆಗೆ ಒಟ್ಟು 19 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಜಗತ್ತಿನಾದ್ಯಂತ ಸೋಂಕಿತರ ಸಂಖ್ಯೆ 6 ಲಕ್ಷದ ಗಡಿ ದಾಟಿದ್ದು, 30 ಸಾವಿರಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದಾರೆ. ಹೀಗಾಗಿ ಭಾರತದಲ್ಲಿ ವೈರಸ್‌ ಹರಡದಂತೆ ತಡೆಯಲು ಪ್ರಧಾನಿ ನರೇಂದ್ರ ಮೋದಿ 21 ದಿನಗಳ ಸಂಪೂರ್ಣ ಲಾಕ್‌ಡೌನ್‌ಗೆ ಆದೇಶಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/33UGD1Y
