- ಡಾ. ದೇವಿಪ್ರಸಾದ್‌ ಶೆಟ್ಟಿಮೊದಲಿಗೆ, ದೇಶಾದ್ಯಂತ ಸಂಪೂರ್ಣ ಲಾಕ್‌ಡೌನ್‌ನ ದಿಟ್ಟ ಹೆಜ್ಜೆ ಇಟ್ಟ ಪ್ರಧಾನಿ ನರೇಂದ್ರ ಮೋದಿಯವರನ್ನು ನಾನು ಅಭಿನಂದಿಸುತ್ತೇನೆ. ಈ ಒಂದೇ ಹಂತವು ಕೊರೊನಾ ಸಾಂಕ್ರಾಮಿಕ ರೋಗದ ನೋಟವನ್ನು ನಾಟಕೀಯವಾಗಿ ಬದಲಾಯಿಸಬಹುದು. ವೈದ್ಯಕೀಯ ಶಿಕ್ಷಣವನ್ನು ನಿಯಂತ್ರಿಸುವ ಅತ್ಯುನ್ನತ ಸಂಸ್ಥೆಯಾದ ಭಾರತೀಯ ವೈದ್ಯಕೀಯ ಸಂಸ್ಥೆ (ಮೆಡಿಕಲ್‌ ಕೌನ್ಸಿಲ್‌ ಆಫ್‌ ಇಂಡಿಯಾ- ಎಂಸಿಐ) ಈ ಸನ್ನಿವೇಶದಲ್ಲಿ ಮಹತ್ವದ ಪಾತ್ರ ವಹಿಸುತ್ತಿದೆ. ಇನ್ನಷ್ಟು ನಿರ್ಧಾರಾತ್ಮಕ, ನಿಯಂತ್ರಣಕಾರಿ ಕ್ರಮಗಳಿಂದ ಎಂಸಿಐ ಲಕ್ಷಾಂತರ ಅಮೂಲ್ಯ ಜೀವಗಳನ್ನು ಉಳಿಸಬಹುದು. ಅದು ಹೇಗೆ ಎಂಬುದನ್ನು ವಿವರಿಸುತ್ತೇನೆ. ಶೀಘ್ರದಲ್ಲೇ, ಕೋವಿಡ್‌-19 ಎರಡನೇ ಹಂತವನ್ನು ತಲುಪಿದಾಗ ಸಾವಿರಾರು ರೋಗಿಗಳು ಐಸಿಯುಗಳನ್ನು ಪ್ರವಾಹದಂತೆ ತುಂಬಿಕೊಳ್ಳಲಿದ್ದಾರೆ. ಇಟಲಿಯಲ್ಲಿ ಸಾವಿರಾರು ರೋಗಿಗಳನ್ನು ಕೊಂದದ್ದು ವೈರಸ್‌ ಮಾತ್ರವಲ್ಲ. ಐಸಿಯು ಹಾಸಿಗೆಗಳು, ವೈದ್ಯರು ಮತ್ತು ದಾದಿಯರ ಕೊರತೆಯೂ ಅದಕ್ಕೆ ಪ್ರಮುಖ ಕಾರಣ. ಕೋವಿಡ್‌-19ರ ಮರಣ ಪ್ರಮಾಣ ಐಸಿಯು ಹಾಸಿಗೆಗಳಿಗೆ ನೇರ ಅನುಪಾತದಲ್ಲಿರುತ್ತದೆ. ಹೀಗಾಗಿ ಜರ್ಮನಿಯಲ್ಲಿ ಮರಣ ಪ್ರಮಾಣ ಸಾಮಾನ್ಯ ಜ್ವರದಂತೆ 0.3% ಮಟ್ಟದಲ್ಲಿದೆ. ಇಟಲಿಯಲ್ಲಿ ಮರಣ ಪ್ರಮಾಣ 9.26% ಆಯಿತು. ಜರ್ಮನಿಯು 1 ಲಕ್ಷ ನಾಗರಿಕರಿಗೆ 29 ಐಸಿಯು ಹಾಸಿಗೆಗಳನ್ನು ಹೊಂದಿದೆ; ಇಟಲಿಯಲ್ಲಿ ಆ ಸಂಖ್ಯೆ 13. ಭಾರತದಲ್ಲಿರುವುದು ಕೇವಲ 2.3. ಸರಿಯಾದ ಕಾರ್ಯತಂತ್ರ ಮತ್ತು ಅನುಷ್ಠಾನಗಳ ಮೂಲಕ ಜರ್ಮನಿಯ ಫಲಿತಾಂಶವನ್ನು ಸರಿಗಟ್ಟಬಲ್ಲ ಏಕೈಕ ದೇಶವೆಂದರೆ ಬಹುಶಃ ಭಾರತ. ನಮ್ಮ ಸರಕಾರ ಎರಡೇ ವಾರಗಳಲ್ಲಿ ಪ್ರತಿ ನಗರದಲ್ಲಿ 2,000 ಐಸಿಯು ಹಾಸಿಗೆಗಳಿರುವ ಆಸ್ಪತ್ರೆಗಳನ್ನು ನಿಯೋಜಿಸಲು ಮತ್ತು ಸ್ಥಳೀಯವಾಗಿ ವೆಂಟಿಲೇಟರ್‌ ಉತ್ಪಾದನೆಯನ್ನು ಹೆಚ್ಚಿಸಲು ಅಥವಾ ಅಗತ್ಯವಿದ್ದರೆ ಅವುಗಳನ್ನು ಚೀನಾದಿಂದ ಆಮದು ಮಾಡಿಕೊಳ್ಳಲು ಸಮರ್ಥವಾಗಿದೆ. ಹೆಚ್ಚು ಅಂತರದ ಹಾಸಿಗೆಗಳನ್ನು ಹೊಂದಿರುವ ದೊಡ್ಡ ಸರಕಾರಿ ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಕಾಲೇಜು ಆಸ್ಪತ್ರೆಗಳ ಸವಲತ್ತು ಭಾರತಕ್ಕೆ ಇದೆ. ಇದಕ್ಕೆ ಬೇಕಾಗಿರುವುದು ಪೈಪ್‌ನಲ್ಲಿ ಪೂರೈಸುವ ಆಮ್ಲಜನಕ ಮತ್ತು ಹೀರುಕೊಳವೆಗಳು. ಇದನ್ನು ಎರಡು ವಾರಗಳ ಅವಧಿಯಲ್ಲಿ ಪೂರೈಕೆ ಮಾಡಬಹುದು. ಆದರೂ, ಸಮಸ್ಯೆಯೆಂದರೆ, ಸಾಕಷ್ಟು ವೈದ್ಯರು, ತರಬೇತು ವೈದ್ಯರು ಮತ್ತು ದಾದಿಯರು ಇಲ್ಲದಿರುವುದು. ಎಂಸಿಐ ನಿಯಮಗಳನ್ನು ಬದಲಾಯಿಸುವ ಮೂಲಕ 1.5 ಲಕ್ಷಕ್ಕೂ ಹೆಚ್ಚು ವೈದ್ಯರು ಮತ್ತು ತಜ್ಞರನ್ನು ಚಿಟಿಕೆ ಹೊಡೆದಂತೆ ಕಾರ್ಯ ರಂಗಕ್ಕೆ ಇಳಿಸಬಲ್ಲ ಸಾಮರ್ಥ್ಯವಿರುವ ವಿಶ್ವದ ಏಕೈಕ ದೇಶ ಭಾರತ. ಕೋವಿಡ್‌-19 ಸಾಂಕ್ರಾಮಿಕ ರೋಗದ ವಿರುದ್ಧ ಇದು ನಮ್ಮ ಸಮರ್ಥ ಆಯುಧ. ಅಭಿವೃದ್ಧಿ ಹೊಂದಿದ ದೇಶಗಳು ತಮ್ಮ ವೈದ್ಯರ ಕೊರತೆಯನ್ನು ನೀಗಿಸಲು ಏನು ಮಾಡಿವೆ ಎಂಬುದನ್ನು ಮೊದಲು ನೋಡೋಣ. ಬ್ರಿಟನ್‌ನ ವೈದ್ಯಕೀಯ ಮಹಾ ಮಂಡಳಿಯು ಎಂಬಿಬಿಎಸ್‌ ವಿದ್ಯಾರ್ಥಿಗಳ ಅಂತಿಮ ವರ್ಷದ ಪರೀಕ್ಷೆಯನ್ನು ರದ್ದುಗೊಳಿಸುವಂತೆ ಹಾಗೂ ಅವರ ಹಿಂದಿನ ಸಾಧನೆಯ ಆಧಾರದ ಮೇಲೆ ತಕ್ಷಣವೇ ಪದವಿಗಳನ್ನು ನೀಡುವಂತೆ ಬ್ರಿಟಿಷ್‌ ವೈದ್ಯಕೀಯ ವಿಶ್ವವಿದ್ಯಾಲಯಗಳಿಗೆ ನಿರ್ದೇಶಿಸಿತು. ಹೌದು, ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗದೆಯೇ ಎಂಬಿಬಿಎಸ್‌ ಪದವಿ ಪಡೆದ ವೈದ್ಯರು! ಇಟಲಿ ಸರಕಾರ ವೈದ್ಯಕೀಯ ವಿಶ್ವವಿದ್ಯಾಲಯಗಳಿಗೆ ಎಂಬಿಬಿಎಸ್‌ ಅವಧಿಯನ್ನು 10 ತಿಂಗಳು ಕಡಿತಗೊಳಿಸಲು ಮತ್ತು ಪರೀಕ್ಷೆಗಳಿಲ್ಲದೆ ಪದವಿಗಳನ್ನು ನೀಡಲು ಕೇಳಿದೆ. ಇದು ಇಟಲಿಗೆ ಇನ್ನೂ 10,000 ವೈದ್ಯರನ್ನು ಒದಗಿಸಿದೆ. ಅದೃಷ್ಟವಶಾತ್‌, ನಾವು ಇಂಥ ತೀವ್ರ ಕ್ರಮಗಳನ್ನು ತೆಗೆದುಕೊಳ್ಳುವ ಅಗತ್ಯವಿಲ್ಲ. ಅನುಭವಿ ಎಂಬಿಬಿಎಸ್‌ ವೈದ್ಯರನ್ನೇ ಕಾನೂನುಬದ್ಧವಾಗಿ ಸಬಲೀಕರಣಗೊಳಿಸುವತ್ತ ನಾವು ಗಮನ ಹರಿಸಬೇಕು. ನಮ್ಮ ಐಸಿಯುಗಳಿಗೆ ಸಾವಿರಾರು ಕಿರಿಯ ಮತ್ತು ತಜ್ಞ ವೈದ್ಯರು ಈಗ ಅಗತ್ಯ. ಎಂಸಿಐ ಅಥವಾ ನ್ಯಾಷನಲ್‌ ಬೋರ್ಡ್‌ ಆಫ್‌ ಎಕ್ಸಾಮಿನೇಷನ್ಸ್‌ ಅಡಿಯಲ್ಲಿ ಮೂರರಿಂದ ಆರು ವರ್ಷಗಳ ವಿಶೇಷ ತಜ್ಞತೆಯ ತರಬೇತಿ ಪಡೆದ 50,000ಕ್ಕೂ ಹೆಚ್ಚು ವೈದ್ಯರು ಅರಿವಳಿಕೆ ಶಾಸ್ತ್ರ, ಶ್ವಾಸತಜ್ಞತೆ, ಹೃದಯರೋಗ ತಜ್ಞತೆ, ರೇಡಿಯಾಲಜಿ ಮುಂತಾದ ವಿಭಾಗಗಳಲ್ಲಿ ಅಂತಿಮ ಪರೀಕ್ಷೆಗೆ ಹಾಜರಾಗಲು ಕಾಯುತ್ತಿದ್ದಾರೆ. ಅಮೆರಿಕವು ಇವರಿಗೆ ನೀಡಿದಂತೆ ಈ ಈ ವೈದ್ಯರಿಗೆ 'ಮಂಡಳಿ ಅರ್ಹತೆ'ಯ ಪದವಿಯನ್ನು ನೀಡಬಹುದು. ಇದರಿಂದಾಗಿ ಅವರು ಅಂತಿಮ ಪರೀಕ್ಷೆಗೆ ಹಾಜರಾಗದೇ ತುರ್ತು ಪ್ರಾಕ್ಟೀಸ್‌ ಮಾಡಬಹುದು ಮತ್ತು ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರ ಅವರು ಶಿಕ್ಷಕರಾಗಲು 'ಬೋರ್ಡ್‌ ಸರ್ಟಿಫೈಡ್‌' ಆಗಬಹುದು. ಸುಮಾರು 40,000 ಮಂದಿ ಅರಿವಳಿಕೆ ತಜ್ಞರು, ತುರ್ತು ನಿಗಾ ತಜ್ಞರು ಮತ್ತು ತುರ್ತು ಔಷಧ ತಜ್ಞರು ಕಾಲೇಜ್‌ ಆಫ್‌ ಫಿಸಿಶಿಯನ್‌ ಮತ್ತು ಸರ್ಜನ್‌ ತರಬೇತಿ ಪಡೆದಿದ್ದಾರೆ. ಹಲವು ವರ್ಷಗಳ ಹಿಂದೆ ಎಂಸಿಐ ಈ 100 ವರ್ಷಗಳ ಹಳೆಯ ಸಂಸ್ಥೆಯಿಂದ ಪದವಿಗಳನ್ನು ನಿಷೇಧಿಸಿತ್ತು. ಸೊಸೈಟಿ ಫಾರ್‌ ಎಮರ್ಜೆನ್ಸಿ ಮೆಡಿಸಿನ್‌ ಇಂಡಿಯಾ ಮತ್ತು ಇಂಡಿಯನ್‌ ಸೊಸೈಟಿ ಆಫ್‌ ಕ್ರಿಟಿಕಲ್‌ ಕೇರ್‌ ಮೆಡಿಸಿನ್‌ ನೀಡುವ ಫೆಲೋಶಿಪ್‌ ಮೇಲಿನ ನಿಷೇಧವನ್ನು ಎಂಸಿಐ ತೆಗೆದುಹಾಕಬೇಕು. ಇಂದಿರಾ ಗಾಂಧಿ ಮುಕ್ತ ವಿಶ್ವವಿದ್ಯಾಲಯದಿಂದ ಸಮುದಾಯ ಕಾರ್ಡಿಯಾಲಜಿಯಲ್ಲಿ ಡಿಪ್ಲೊಮಾ ಪಡೆದ 2 ಸಾವಿರ ತಜ್ಞರ ಮೇಲಿನ ನಿರ್ಬಂಧವನ್ನೂ ಸಡಿಲಿಸಬೇಕು. ರಷ್ಯಾ ಮತ್ತು ಚೀನಾದಲ್ಲಿ ತರಬೇತಿ ಪಡೆದ ಸಾವಿರಾರು ಯುವ ವೈದ್ಯರು ಎಂಸಿಐ ಅರ್ಹತಾ ಪರೀಕ್ಷೆಯನ್ನು ಮುಗಿಸಲು ಕಾಯುತ್ತಿದ್ದಾರೆ. ಈ ವೈದ್ಯರು ಜಗತ್ತಿನ ಬೇರೆ ಬೇರೆಡೆ ಪ್ರಾಕ್ಟೀಸ್‌ ಮಾಡಲು ಅರ್ಹರಾಗಿದ್ದಾರೆ. ಹಿರಿಯ ವೈದ್ಯರ ಅಡಿಯಲ್ಲಿ ಆಸ್ಪತ್ರೆಗಳಲ್ಲಿ ಕೆಲಸ ಮಾಡಲು ಎಂಸಿಐ ಅವರಿಗೆ ತಾತ್ಕಾಲಿಕ ಪರವಾನಗಿ ನೀಡಬೇಕು. ಟೆಲಿಮೆಡಿಸಿನ್‌, ಆನ್‌ಲೈನ್‌ ಸಮಾಲೋಚನೆ ಮತ್ತಿತರ ಪ್ರಿಸ್ಕ್ರಿಪ್ಷನ್‌ಗಳನ್ನು ವಿಶ್ವದ ಇತರ ಭಾಗಗಳಂತೆ ನಾವೂ ಕಾನೂನುಬದ್ಧಗೊಳಿಸಬೇಕು. ಈಗ ಮನೆಗಳು ಮತ್ತು ಬೀದಿಗಳಿಂದ ಸಮರಾಂಗಣವು ಆಸ್ಪತ್ರೆಗಳು ಮತ್ತು ಐಸಿಯುಗಳಿಗೆ ಸ್ಥಳಾಂತರಗೊಳ್ಳಲಿದೆ. ಈ ಕಠಿಣ ಯುದ್ಧವನ್ನು ಯುವ ವೈದ್ಯರು ಮತ್ತು ನರ್ಸ್‌ಗಳು ಮಾತ್ರ ಗೆಲ್ಲಬಹುದು. ವೈದ್ಯರಾಗಿ, ನಾವು ರೋಗಿಗಳ ಜೀವಗಳನ್ನು ಉಳಿಸಲು ಹೆಣಗಾಡುತ್ತಿರುವಾಗ, ನಮ್ಮ ಮನಸ್ಸಿನಲ್ಲಿ ರೋಗಿಯ ಬಗ್ಗೆ ಮಾತ್ರ ಚಿಂತೆ ತುಂಬರುತ್ತದೆ. ನಮ್ಮ ಬಗ್ಗೆ ಏನೂ ಇರುವುದಿಲ್ಲ. ಅನೇಕ ವರ್ಷಗಳ ಹಿಂದೆ ಯುವ ಶಸ್ತ್ರಚಿಕಿತ್ಸಕನಾಗಿ ಮೊದಲ ಬಾರಿಗೆ ಎಚ್‌ಐವಿ ಪಾಸಿಟಿವ್‌ ರೋಗಿಯ ಮೇಲೆ ಶಸ್ತ್ರಚಿಕಿತ್ಸೆ ನಡೆಸಲು ಸಿದ್ಧನಾದಾಗ, ನಾನು ಮೊದಲು ಭಾವನಾತ್ಮಕ ಯುದ್ಧವನ್ನು ಗೆಲ್ಲಬೇಕಾಗಿತ್ತು. ಮುಂದಿನ 10 ಗಂಟೆಗಳಲ್ಲಿ ನನ್ನ ಕೈಯಲ್ಲಿರುವ ಚೂಪಾದ ಸೂಜಿಗಳು ಮತ್ತು ಚಾಕುವಿನಿಂದ ನನಗೆ ಆಗಬಹುದಾದ ಒಂದು ಸಣ್ಣ ಗಾಯವೂ ನನ್ನನ್ನು ಕೊಲ್ಲಲು ಸಾಕಾಗಿತ್ತು. ನನ್ನ ಹೆಂಡತಿ ಮತ್ತು ನಾಲ್ಕು ಚಿಕ್ಕ ಮಕ್ಕಳನ್ನು ರಕ್ಷಿಸಲು ನಾನು ಮೊದಲು ನನ್ನ ಜೀವವನ್ನು ರಕ್ಷಿಸಿಕೊಳ್ಳಬೇಕು. ವೈದ್ಯರು ಮತ್ತು ದಾದಿಯರ ಮನಸ್ಸಿನಲ್ಲಿ ಇದು ನಡೆಯುತ್ತಿರುತ್ತದೆ. ನಮ್ಮಲ್ಲಿರುವ ವೈದ್ಯರು ಮತ್ತು ದಾದಿಯರಲ್ಲಿ ಅರ್ಧದಷ್ಟು ಮಂದಿ ಕೋವಿಡ್‌ ರೋಗಿಗಳನ್ನು ನೋಡಿಕೊಳ್ಳಲು ಮುಂದಾಗಲಾರರು ಎಂದೇ ಲೆಕ್ಕಿಸಿ ನಾವು ಕಾರ್ಯ ಸನ್ನದ್ಧರಾಗಬೇಕು. ಕೊನೆಗೂ ಅವರು ಕರ್ತವ್ಯದ ಕರೆಗೆ ಓಗೊಡಲಿದ್ದಾರೆ ಎಂದು ನನಗೆ ತಿಳಿದಿದೆ. ನಮ್ಮಲ್ಲಿ ಹೆಚ್ಚಿನ ಸಂಖ್ಯೆಯ ವೈದ್ಯರು ಮತ್ತು ದಾದಿಯರು ಇಲ್ಲ. ಈ ಯುದ್ಧವನ್ನು ನನ್ನಂತಹ ಹಿರಿಯ ವೈದ್ಯರು ಹೋರಾಡಲು ಸಾಧ್ಯವಿಲ್ಲ. ಏಕೆಂದರೆ ಕೋವಿಡ್‌, 60 ವರ್ಷಕ್ಕಿಂತ ಮೇಲ್ಪಟ್ಟ ವೈದ್ಯರಿಗೆ ಅಪಾಯಕಾರಿ. ಅದೇ ಕಾರಣದಿಂದಾಗಿ, ಬಹುಶಃ ಎಂಸಿಐ ಮುಂದೆ ಇದು ನನ್ನ ಜೀವನದ ಕೊನೆಯ ಬೇಡಿಕೆ; ವೈದ್ಯಕೀಯ ಶಿಕ್ಷಣವನ್ನು ಮುಕ್ತಗೊಳಿಸಲು ಮತ್ತು ಯುವಕರನ್ನು ವೈದ್ಯಸೇವೆಗೆ ಅರ್ಹರಾಗಿಸಲು ನಾನು ಬೇಡಿಕೊಳ್ಳುತ್ತಿದ್ದೇನೆ. ಈಗಲೂ ನಾವು ಈ ಕೆಲಸ ಮಾಡದಿದ್ದರೆ, ಇಟಲಿ ಮಾಡಿದಂತೆ ನಮ್ಮ ಜೀವಗಳನ್ನು ಉಳಿಸಲು ಚೀನಾ ಮತ್ತು ಕ್ಯೂಬಾದಿಂದ ತುರ್ತು ನಿಗಾ ತಜ್ಞರನ್ನು ಕಳುಹಿಸುವಂತೆ ನಾವು ಬೇಡಿಕೊಳ್ಳಬೇಕಾಗುತ್ತದೆ. ಈಗಲೂ ನಾವು ಹೃದಯಾಘಾತ, ಪಾಶ್ರ್ವವಾಯು ಮತ್ತು ಕ್ಯಾನ್ಸರ್‌ಗೆ ತುತ್ತಾಗಿ ಆಸ್ಪತ್ರೆಯ ಹಾಸಿಗೆಗಳ ಮೇಲಿರುವ 15 ಲಕ್ಷ ರೋಗಿಗಳನ್ನು ಹೊಂದಿದ್ದೇವೆ ಎಂದು ನೆನಪಿಡಿ, ನಾವು ಅವರನ್ನೂ ನೋಡಿಕೊಳ್ಳಬೇಕು. ನಾವು ತೆಗೆದುಕೊಳ್ಳುವ ಕಠಿಣ ನಿರ್ಧಾರಗಳು ಮತ್ತು ನಮ್ಮ ನಿರ್ಧಾರಗಳ ಚುರುಕುತನದ ಮೇಲೆ ನಮ್ಮ ಪೀಳಿಗೆಯ ಬಗ್ಗೆ ಮುಂದಿನ ತಲೆಮಾರು ನಿರ್ಧರಿಸಲಿದೆ. ಎಂಸಿಐನ ಚುಕ್ಕಾಣಿ ಹಿಡಿದಿರುವ ಜನರು 130 ಕೋಟಿ ಜನರ ಹಿತಾಸಕ್ತಿಗೆ ಮೊದಲ ಆದ್ಯತೆ ನೀಡುವ ಸಮಯ ಇದು. (ಲೇಖಕರು ನಾರಾಯಣ ಹೃದಯಾಲಯದ ಸ್ಥಾಪಕರು)
from India & World News in Kannada | VK Polls https://ift.tt/3dwOFm2
