ಹೊಸದಿಲ್ಲಿ: ಸೋಂಕಿತರ ಚಿಕಿತ್ಸೆಗೆ ಶ್ರಮಿಸುತ್ತಿರುವ ಪುಣೆಯ ನಾಯ್ಡು ಆಸ್ಪತ್ರೆಯ ನರ್ಸ್‌ ಛಾಯಾ ಜಗತಪ್‌ ಅವರಿಗೆ ಶುಕ್ರವಾರ ಸಂಜೆ ಖುದ್ದು ಪ್ರಧಾನಿ ಅವರು ಕರೆಮಾಡಿ ಶಹಬ್ಬಾಸ್‌ಗಿರಿ ಕೊಟ್ಟಿದ್ದಾರೆ. ಮರಾಠಿಯಲ್ಲಿ ಮಾತು ಆರಂಭಿಸಿದ ಪ್ರಧಾನಿ ಅವರು ಛಾಯಾ ಅವರ ಶ್ರಮದಾನವನ್ನು ಶ್ಲಾಘಿಸಿದ್ದಾರೆ. ಬಳಿಕ ನರ್ಸ್‌ ಅವರ ಕುಟುಂಬದ ಬಗ್ಗೆಯೂ ವಿಚಾರಿಸಿದರು. ಸೋಂಕಿತರು ಹೆದರಿಕೊಳ್ಳುತ್ತಿದ್ದಾರೆಯೇ ಎಂದು ಪ್ರಧಾನಿ ಪ್ರಶ್ನಿಸಿದಾಗ ಛಾಯಾ ಅವರು, '' ನಾವು ಆದಷ್ಟು ಸೋಂಕಿತರಿಗೆ ಧೈರ್ಯ ಹೇಳುತ್ತೇವೆ. ಪ್ರಯೋಗಾಲಯದ ವರದಿ ನೆಗಟೀವ್‌ ಬರುತ್ತದೆ, ಚಿಕಿತ್ಸೆ ತೆಗದುಕೊಳ್ಳಿ ಎಂದು ಸಮಾಧಾನಪಡಿಸುತ್ತೇವೆ. ಆದಷ್ಟು ನೈತಿಕ ಬೆಂಬಲ ನೀಡುತ್ತಿದ್ದೇವೆ '', ಎಂದರು. ತಮ್ಮ ಆಸ್ಪತ್ರೆಯಿಂದ 7 ಮಂದಿ ಸೋಂಕಿತರು ಗುಣಮುಖರಾಗಿ ಮನೆಗೆ ತೆರಳಿದ್ದಾರೆ ಎಂದು ಛಾಯಾ ಅವರು ತಿಳಿಸಿದರು. ನರ್ಸ್‌ಗಳು, ವೈದ್ಯರು, ಆಸ್ಪತ್ರೆಗಳ ಇತರ ಸಿಬ್ಬಂದಿ ನಿಜವಾದ ತಪಸ್ವಿಗಳು ಎಂದು ಮೋದಿ ಈ ವೇಳೆ ಮೆಚ್ಚುಗೆ ವ್ಯಕ್ತಪಡಿಸಿದರು. 5 ನಿಮಿಷದಲ್ಲಿ ಸೋಂಕು ಪತ್ತೆ: ಅಮೆರಿಕ ಮೂಲದ ಅಬೊಟ್‌ ಲ್ಯಾಬೊರೆಟರೀಸ್‌ ಕಂಪನಿಯೊಂದು ಕೇವಲ 5 ನಿಮಿಷಗಳಲ್ಲಿ ಕೊರೊನಾ ಸೋಂಕು ಪತ್ತೆ ಹಚ್ಚಬಹುದಾದ ಹಾಗೂ ಎಲ್ಲೆಡೆ ಹೊತ್ತೊಯ್ಯಬಹುದಾದ ಪರೀಕ್ಷಾ ಕಿಟ್‌ವೊಂದನ್ನು ಅಭಿವೃದ್ಧಿಪಡಿಸಿದೆ. ಬ್ರೆಡ್‌ ಟೋಸ್ಟರ್‌ ಗಾತ್ರದ ಈ ಸಾಧನ ಮಾಲಿಕ್ಯುಲಾರ್‌ ತಂತ್ರಜ್ಞಾನ ಬಳಸುತ್ತದೆ. ಸೋಂಕು ಇಲ್ಲವಾದಲ್ಲಿ 13 ನಿಮಿಷಗಳಲ್ಲಿ ಖಚಿತ ಮಾಹಿತಿಯನ್ನು ಕಿಟ್‌ ನೀಡುತ್ತದೆ ಎಂದು ಕಂಪನಿ ಹೇಳಿದೆ. ಸದ್ಯಕ್ಕೆ ಯುಎಸ್‌ನ ಫುಡ್‌ ಆ್ಯಂಡ್‌ ಡ್ರಗ್ಸ್‌ ಅಡ್ಮಿನಿಸ್ಪ್ರೇಷನ್‌ (ಎಫ್‌ಡಿಎ) ಕಿಟ್‌ಗೆ ಅಧಿಕೃತ ಮಾನ್ಯತೆ ನೀಡಿಲ್ಲ. ಆದರೆ ತುರ್ತು ವೇಳೆ ಬಳಸಲು ಸಮ್ಮತಿಸಿದೆ ಎಂದು ವರದಿಯಾಗಿದೆ.
from India & World News in Kannada | VK Polls https://ift.tt/2xyyunA
