ಬೆಂಗಳೂರು: ಕೊರೊನಾ ಪರಿಣಾಮ ದೇಶಾದ್ಯಂತ ಲಾಕ್ಡೌನ್ ಜಾರಿಯಲ್ಲಿದೆ. ಕರ್ನಾಟಕದಲ್ಲೂ ಸಂಪೂರ್ಣ ಲಾಕ್ಡೌನ್ ಮಾಡಲಾಗಿದೆ. ಹೀಗಿದ್ದರೂ ಜನರು ಭಾನುವಾರದ ಬಾಡೂಟಕ್ಕಾಗಿ ಮಾಂಸ ಖರೀದಿಯಲ್ಲಿ ಬ್ಯುಸಿಯಾಗಿದ್ದಾರೆ. ಅಗತ್ಯ ಸಾಮಾಗ್ರಿಗಳ ಜೊತೆಗೆ ಮೀನು, ಮಾಂಸದ ಅಂಗಡಿಗಳನ್ನು ತೆರೆಯಲು ಸರ್ಕಾರ ಅವಕಾಶ ಕಲ್ಪಿಸಿದೆ. ಅದರಲ್ಲೂ ಇವತ್ತು ಭಾನುವಾರ ಬೇರೆ. ಕೊರೊನಾ ನಿರ್ಬಂಧದಿಂದ ಮನೆಯಲ್ಲಿ ಕಾಲ ಕಳೆದು ಸುಸ್ತಾದ ಜನರು ಭಾನುವಾರದ ಬಾಡೂಟಕ್ಕಾಗಿ ಕೊರೊನಾ ಭಯದ ನಡುವೆಯೂ ಮಾಂಸ ಖರೀದಿಗೆ ಹೊರಬಂದಿದ್ದಾರೆ. ಬೆಂಗಳೂರಿನ ಹಲವು ಕಡೆಗಳಲ್ಲಿ ಜನರು ಮಾಂಸದ ಅಂಗಡಿಗಳ ಮುಂದೆ ಕ್ಯೂನಲ್ಲಿ ನಿಂತಿರುವ ದೃಶ್ಯ ಕಂಡುಬರುತ್ತಿದೆ. ನಗರದ ಸಂಪಂಗಿ ರಾಮನಗರ ಹಾಗೂ ನಂದಿನಿ ಲೇಔಟ್‌ಗಳಲ್ಲಿರುವ ಮಾಂಸದ ಅಂಗಡಿಗಳ ಮುಂದೆ ಜನರ ಸಾಲು ದೊಡ್ಡದಾಗಿದೆ. ಮಾಂಸ ಖರೀದಿ ಮಾಡುವ ಸಂದರ್ಭದಲ್ಲಿ ಜನರು ಕೆಲವು ಕಡೆಗಳಲ್ಲಿ ಸಾಮಾಜಿಕ ಅಂತರವನ್ನು ಕಾಪಾಡಿಕೊಳ್ಳುತ್ತಿದ್ದಾರೆ. ಅಂಗಡಿ ಮುಂದೆ ಹಾಕಿರುವ ವೃತ್ತಾಕಾರದ ಗುರುತಿನೊಳಗಡೆ ನಿಂತುಕೊಂಡ ಮಾಂಸ ಖರೀದಿ ಮಾಡುತ್ತಿದ್ದಾರೆ. ಅಲ್ಲದೆ ಅದಕ್ಕೆ ಬೇಕಾದ ಸೊಪ್ಪು, ತರಕಾರಿ ಖರೀದಿಯ ಭರಾಟೆಯೂ ಜೋರಾಗಿದೆ. ನಿರ್ಬಂಧದ ನಡುವೆಯೂ ಮಾಂಸಕ್ಕೆ ಬೇಡಿಕೆ ಇದ್ದರೂ ಸಾಗಾಟಕ್ಕೆ ತೊಂದರೆಯಾಗುತ್ತಿರುವುದರಿಂದ ಕುರಿ, ಮೇಕೆ ಪೂರೈಕೆ ಕಡಿಮೆಯಾಗಿದೆ. ಇದರಿಂದ ಮಾಂಸದ ಬೆಲೆ ಹೆಚ್ಚಳವಾಗಿದೆ. ಕೆಲವು ಅಂಗಡಿಗಳಲ್ಲಿ ಒಂದು ಕೆ.ಜಿ ಕುರಿ ಮಾಂಸಕ್ಕೆ 700 ರೂಪಾಯಿ ತೆಗೆದುಕೊಳ್ಳುತ್ತಿದ್ದಾರೆ. ಹೀಗಿದ್ದರೂ ಮಾಂಸ ಪ್ರಿಯರು ಕೊರೊನಾ ಆತಂಕದ ನಡುವೆಯೇ ಹೆಚ್ಚಿನ ಬೆಲೆ ತೆತ್ತು ಮಾಂಸ ಖರೀದಿ ಮಾಡುತ್ತಿದ್ದಾರೆ.
from India & World News in Kannada | VK Polls https://ift.tt/3dBWQ0r
