ಬೆಂಗಳೂರು: 2019ರಲ್ಲಿ ಚಂದ್ರನ ಮೇಲೆ ವಿಕ್ರಂ ಲ್ಯಾಂಡರ್‌ ಇಳಿಸಲು ವಿಫಲವಾದ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ತನ್ನ ಪ್ರಯತ್ನ ಕೈಬಿಟ್ಟಿಲ್ಲ. ಇದೀಗ ಮತ್ತೊಮ್ಮೆ ಅಂದರೆ 2020 ರಲ್ಲಿ ಚಂದ್ರಯಾನ -3ರ ಗುರಿಯನ್ನು ಹಾಕಿಕೊಂಡಿದೆ. ಈ ವಿಷಯವನ್ನು ಸ್ವತಃ ಇಸ್ರೋ ಮುಖ್ಯಸ್ಥ ಕೆ. ಶಿವನ್‌ ಹಂಚಿಕೊಂಡಿದ್ದಾರೆ. ಲ್ಯಾಂಡರ್‌ ಮತ್ತು ರೋವರ್‌ ಮಾದರಿಗೆ 250 ಕೋಟಿ ರೂಪಾಯಿ ಖರ್ಚಾಗಲಿದ್ದರೆ, ಇವುಗಳ ಉಡಾವಣೆಗೆ 365 ಕೋಟಿ ಸೇರಿ ಚಂದ್ರಯಾನ 3ಕ್ಕೆ 615 ಕೋಟಿ ರೂಪಾಯಿ ಖರ್ಚಾಗಲಿದೆ. “ಚಂದ್ರಯಾನ 3ರಲ್ಲಿ ಲ್ಯಾಂಡರ್‌, ರೋವರ್‌ ಮತ್ತು ಪ್ರೊಪಲ್ಶನ್‌ ಮಾಡ್ಯೂಲ್‌ ಇರಲಿದೆ. ಸರಕಾರ ಯೋಜನೆಗೆ ಒಪ್ಪಿಗೆ ನೀಡಿದೆ. ನಾವು ಯೋಜನೆಯ ತಂಡವನ್ನು ರಚಿಸಿದ್ದೇವೆ. ಕೆಲಸ ಸುಗಮವಾಗಿ ನಡೆಯುತ್ತಿದೆ,” ಎಂಬುದಾಗಿ ಬೆಂಗಳೂರಿನ ಅಂತರಿಕ್ಷ ಭವನದಲ್ಲಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಶಿವನ್‌ ತಿಳಿಸಿದರು. “ಈ ವರ್ಷವೇ ಉಡಾವಣೆಯ ಗುರಿಯನ್ನು ನಾವು ಹಾಕಿಕೊಂಡಿದ್ದೇವೆ. ಆದರೆ ಇದು ಮುಂದಿನ ವರ್ಷಕ್ಕೆ ಮುಂದೂಡಿಕೆಯಾಗಲೂಬಹುದು,” ಎಂದು ಅವರು ಹೇಳಿದರು. ಮೂಲಗಳ ಪ್ರಕಾರ 2020ರ ನವೆಂಬರ್‌ನಲ್ಲೇ ಇದನ್ನು ಉಡಾವಣೆ ಮಾಡಲು ಇಸ್ರೋ ಯೋಜನೆ ರೂಪಿಸಿದೆ.
“ಈ ಯೋಜನೆಯಲ್ಲಿ ಇಂಧನವನ್ನು ಹೊತ್ತೊಯ್ಯಲಾಗುತ್ತದೆ. ಲ್ಯಾಂಡಿಂಗ್‌ ಮಾದರಿಗೆ ಇದು ಸಹಾಯವಾಗಲಿದೆ. ಇದರಲ್ಲಿ ಲ್ಯಾಂಡರ್‌ನ ಒಳಗೆ ರೋವರ್‌ ಇರಲಿದೆ,” ಎಂದು ಅವರು ವಿವರಿಸಿದರು. ಚಂದ್ರಯಾನ - 2ರಲ್ಲಿ ಆರ್ಬಿಟರ್‌ ಇಂಧನವನ್ನು ಹೊಂದಿತ್ತು. ಲ್ಯಾಂಡರ್‌ ಕಕ್ಷೆಗಾಮಿಯಿಂದ ಬೇರ್ಪಡುವವರೆಗೆ ಕಕ್ಷೆಗಳ ಬದಲಾವಣೆಗೆ ಇದನ್ನು ಬಳಸಲಾಗಿತ್ತು. ಇದರಲ್ಲಿ ಪ್ರೊಪಲ್ಶನ್‌ ಮಾದರಿ ಈ ಕೆಲಸವನ್ನು ನಿರ್ವಹಿಸಲಿದೆ. ಈ ಬಾರಿ ಕಳೆದ ಬಾರಿಗಿಂತ ಕಡಿಮೆ ಕಕ್ಷೆಯ ಬದಲಾವಣೆಗಳನ್ನು ಮಾಡಲು ಇಸ್ರೋ ನಿರ್ಧರಿಸಿದೆ. “ಭೂಮಿ ಸುತ್ತ 6 ಮ್ಯಾನುವರ್ಸ್‌ಗಳ ಬದಲು ನಾವು ಮೂರರಿಂದ ನಾಲ್ಕನ್ನು ಮಾತ್ರ ಇಡಲಿದ್ದೇವೆ. ಇದರ ಬಗ್ಗೆ ಕೆಲಸಗಳು ನಡೆಯುತ್ತಿವೆ,” ಎಂಬುದಾಗಿ ಮೂಲಗಳು ತಿಳಿಸಿವೆ.
ಇದರ ಜೊತೆಗೆ ಗಗನಯಾನದ (ಮೊದಲ ಮಾನವ ಸಹಿತ ) ಹಲವಾರು ವಿನ್ಯಾಸ ಕೆಲಸಗಳು ಮುಗಿದಿವೆ ಎಂದು ಅವರು ತಿಳಿಸಿದ್ದಾರೆ. “ಹಲವಾರು ಪರೀಕ್ಷೆಗಳನ್ನು ಈ ವರ್ಷ ನಾವು ನಡೆಸಲಿದ್ದೇವೆ. ಅಂತಿಮ ನಾಲ್ವರು ಗಗನಯಾನಿಗಳನ್ನು ಆಯ್ಕೆ ಮಾಡಲಾಗಿದ್ದು ಜನವರಿಯ ಮೂರನೇ ವಾರದಿಂದ ರಷ್ಯಾದಲ್ಲಿ ಅವರ ತರಬೇತಿ ಆರಂಭವಾಗಲಿದೆ,” ಎಂದು ಮಾಹಿತಿ ನೀಡಿದರು. ಮಾನವರಹಿತ ಗಗನಯಾನವನ್ನು ಈ ವರ್ಷವೇ ನಡೆಸುವ ಗುರಿ ಹಾಕಿಕೊಳ್ಳಲಾಗಿದೆ ಎಂದು ಅವರು ತಿಳಿಸಿದರು. ಇದಲ್ಲದೆ “ಈ ವರ್ಷ ನಾವು 25ಕ್ಕೂ ಹೆಚ್ಚು ಯೋಜನೆಗಳನ್ನು ಹಾಕಿಕೊಂಡಿದ್ದೇವೆ,” ಎಂದು ವಿವರ ನೀಡಿದರು.
from India & World News in Kannada | VK Polls https://ift.tt/2SJUq7S
