ಹೊಸದಿಲ್ಲಿ: ಭಾರತದ ಸಾತ್ವಿಕ್ ಸಾಯ್ರಾಜ್ ರಾಂಕಿರೆಡ್ಡಿ ಹಾಗೂ ಜೋಡಿ ಪುರುಷ ಡಬಲ್ಸ್ ಪ್ರಶಸ್ತಿ ಗೆಲ್ಲುವ ಮೂಲಕ ಇತಿಹಾಸ ಬರೆದಿದ್ದಾರೆ. ಭಾನುವಾರ ನಡೆದ ಬಿಡಬ್ಲ್ಯು ಸೂಪರ್ 500 ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಚೀನಾದ ಲಿ ಜುನ್ ಹುಯಿ ಹಾಗೂ ಲಿಯೂ ಯೂ ಚೆನ್ ವಿರುದ್ಧ 21-19, 18-21, 21-18ರ ಅಂತರದ ಗೆದ್ದು ಬೀಗಿದರು. ಅಷ್ಟೇ ಯಾಕೆ ಬಿಡಬ್ಲ್ಯು ಸೂಪರ್ 500 ಬ್ಯಾಡ್ಮಿಂಟನ್ ಟೂರ್ನಿ ಗೆದ್ದ ಭಾರತದ ಮೊದಲ ಜೋಡಿ ಎಂಬ ಹಿರಿಮೆಗೆ ಪಾತ್ರವಾಗಿದ್ದಾರೆ. ಭಾರಿ ಜಿದ್ದಾಜಿದ್ದಿನಿಂದ ನಡೆದ ಪಂದ್ಯದಲ್ಲಿ ಸಾತ್ವಿಕ್-ಚಿರಾಗ್ ಜೋಡಿಯು ಮೊದಲ ಸೆಟ್ ಗೆದ್ದು ಬೀಗಿದರು. ಆದರೆ ದ್ವಿತೀಯ ಸುತ್ತಿನಲ್ಲಿ ಮುಗ್ಗರಿಸಿದರೂ ಬಳಿಕ ನಿರ್ಣಾಯಕ ಸೆಟ್ ಗೆದ್ದು ಇತಿಹಾಸ ಪುಟ ಸೇರಿದರು. ಭಾರತ ಹಾಗೂ ಚೀನಾ ಜೋಡಿಯ ನಡುವಣ ಪಂದ್ಯವು ಒಂದು ತಾಸು ಎರಡು ನಿಮಿಷಗಳ ವರೆಗೂ ಮುಂದುವರಿದಿರುವುದು ರೋಚಕತೆಗೆ ಸಾಕ್ಷಿಯಾಗಿತ್ತು. ಸಾತ್ವಿಕ್ ಹಾಗೂ ಚಿರಾಗ್ ಜೋಡಿಯು 2018ರ ಕಾಮನ್ವೆಲ್ತ್ ಗೇಮ್ಸ್ನಲ್ಲೂ ಬೆಳ್ಳಿ ಪದಕ ಗೆದ್ದ ಸಾಧನೆ ಮಾಡಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2OH8tuC
