ಹೊಸದಿಲ್ಲಿ: ಕೋವಿಡ್-19 ಸಾಂಕ್ರಾಮಿಕದ ವಿರುದ್ಧ ಲಸಿಕಾ ಅಭಿಯಾನದ ಮೂಲಕ ಹೋರಾಟ ನಡೆಸುತ್ತಿರುವ ದೇಶಕ್ಕೆ ಮತ್ತೊಂದು ಲಸಿಕೆ ಸಿಕ್ಕಿದೆ. ದೇಶೀಯವಾಗಿ ಅಭಿವೃದ್ಧಿಪಡಿಸಲಾದ ಎರಡನೇ ಲಸಿಕೆ ಇದಾಗಿದ್ದು, 12-18 ವರ್ಷ ವಯೋಮಾನದ ಮಕ್ಕಳಿಗೂ ಈ ಲಸಿಕೆ ನೀಡಬಹುದಾಗಿದೆ. ಅಹಮದಾಬಾದ್ ಮೂಲದ ಕಂಪನಿಯ ಈ ಕೊರೊನಾ ನಿರೋಧಕ ಲಸಿಕೆ 'ಝೈಕೊವ್-ಡಿ' ತುರ್ತು ಬಳಕೆಗೆ ಔಷಧಗಳ ಗುಣಮಟ್ಟ ನಿಯಂತ್ರಣ ಪ್ರಾಧಿಕಾರದ ವಿಷಯ ತಜ್ಞರ ಸಮಿತಿ (ಎಸ್ಇಸಿ) ಶುಕ್ರವಾರ ಒಪ್ಪಿಗೆ ಸೂಚಿಸಿದೆ. ಇದು ಮೂರು ಡೋಸ್ಗಳಲ್ಲಿ ನೀಡಲಾಗುವ ಲಸಿಕೆಯಾಗಿದೆ. ಅಲ್ಲದೆ, ಡಿಎನ್ಎ ಪ್ಲಾಸ್ಮಿಡ್ ಆಧಾರಿತ ವಿಶ್ವದ ಮೊದಲ ಲಸಿಕೆ ಎಂಬ ಖ್ಯಾತಿಗೆ 'ಝೈಕೊವ್-ಡಿ' ಪಾತ್ರವಾಗಿದೆ. ಜು.1ರಂದು ಝೈಡಸ್ ಕ್ಯಾಡಿಲಾ ಕಂಪನಿಯು ತನ್ನ ಲಸಿಕೆಯ ಅಧಿಕೃತ ಬಳಕೆಗೆ ಸಮ್ಮತಿ ನೀಡುವಂತೆ ಅರ್ಜಿ ಸಲ್ಲಿಸಿತ್ತು. ದೇಶಾದ್ಯಂತ ಸುಮಾರು 28 ಸಾವಿರ ಜನರ ಮೇಲೆ ಲಸಿಕೆಯ ಪ್ರಯೋಗ ನಡೆಸಲಾಗಿದ್ದು, ಕೊರೊನಾ ವಿರುದ್ಧ ಈ ಲಸಿಕೆಯು ಶೇ. 66.6ರಷ್ಟು ಪರಿಣಾಮಕಾರಿ ಎಂದು ವರದಿಗಳಿಂದ ಸಾಬೀತಾಗಿದೆ. ಅಲ್ಲದೆ, 12 ರಿಂದ 18 ವರ್ಷದ ಮಕ್ಕಳಿಗೂ ಈ ಲಸಿಕೆ ಸುರಕ್ಷಿತ ಎಂದು ಕಂಪನಿ ಹೇಳಿಕೊಂಡಿದೆ. ಸರಕಾರವೂ ಈ ವಯೋಮಾನದ ಮಕ್ಕಳಿಗೆ ಈ ಲಸಿಕೆ ನೀಡಲು ಅನುಮತಿ ನೀಡಿದೆ. ಭಾರತ್ ಬಯೊಟೆಕ್ನ 'ಕೊವ್ಯಾಕ್ಸಿನ್' ನಂತರ ದೇಶೀಯವಾಗಿ ಅಭಿವೃದ್ಧಿಗೊಂಡ ಎರಡನೇ ಇದಾಗಿದೆ. ಜತೆಗೆ ದೇಶಾದ್ಯಂತ ತುರ್ತು ಬಳಕೆಗೆ ಸರಕಾರದ ಸಮ್ಮತಿ ಪಡೆದ ಐದನೇ ಲಸಿಕೆ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ಮುಂದಿನ ಎರಡು ತಿಂಗಳಲ್ಲಿ ಝೈಕೊವ್-ಡಿ ಲಸಿಕೆಯನ್ನು ತಯಾರಿಸಿ, ಮಾರುಕಟ್ಟೆಗೆ ಬಿಡುವ ಸಿದ್ಧತೆಯಲ್ಲಿ ಕಂಪನಿ ತೊಡಗಿದೆ. 3 ತಿಂಗಳವರೆಗೆ 25 ಡಿಗ್ರಿಯಲ್ಲಿ ಶೇಖರಣೆ: ಭಾರತೀಯ ವೈದ್ಯಕೀಯ ಸಂಶೋಧನೆ ಮಂಡಳಿ (ಐಸಿಎಂಆರ್), ಕೇಂದ್ರ ಬಯೋಟೆಕ್ನಾಲಜಿ ಇಲಾಖೆ ಸಹಯೋಗದಲ್ಲಿ ಝೈಕೊವ್-ಡಿ ಅಭಿವೃದ್ಧಿಗೊಂಡಿದೆ. ಸಾಧಾರಣ ತಾಪಮಾನ (ಗರಿಷ್ಠ 25 ಡಿಗ್ರಿ ಸೆಲ್ಸಿಯಸ್ವರೆಗೆ) ದಲ್ಲಿ ಈ ಲಸಿಕೆಯನ್ನು ಮೂರು ತಿಂಗಳವರೆಗೆ ಇರಿಸಬಹುದಾಗಿದೆ. ಶೀತಲ ಸಂಗ್ರಹದಲ್ಲಿ(2-8 ಡಿಗ್ರಿ ಸೆಲ್ಸಿಯಸ್) ಇನ್ನೂ ಹೆಚ್ಚಿನ ತಿಂಗಳವರೆಗೆ ಲಸಿಕೆಯನ್ನು ಸಂಹ್ರಿಸಲು ಸಾಧ್ಯವಿದೆ. ಸೂಜಿ ರಹಿತವಾಗಿ ಚುಚ್ಚಲಾಗುವುದು! ಸದ್ಯ ಲಸಿಕಾ ಅಭಿಯಾನದ ಅಡಿಯಲ್ಲಿ ಲಭ್ಯವಿರುವ ಕೊರೊನಾ ನಿರೋಧಕ ಲಸಿಕೆಗಳೆಲ್ಲವೂ ಕೂಡ ದೇಹದ ಮಾಂಸಖಂಡಗಳಿಗೆ (ಇಂಟ್ರಾ-ಮಸ್ಕ್ಯುಲರ್) ನೀಡುವಂಥವು. ಆದರೆ, ಝೈಕೊವ್-ಡಿ ಮಾತ್ರ ಚರ್ಮ ಹಾಗೂ ಮಾಂಸಗಳ ನಡುವೆ ನೀಡಲಾಗುವ ಲಸಿಕೆಯಾಗಿರುವುದು ವಿಶೇಷ. ಹಾಗಾಗಿ ಸಾಮಾನ್ಯ ಇಂಜೆಕ್ಷನ್ಗಳಲ್ಲಿ ಬಳಸುವಂತೆ ಸೂಜಿಗಳ ಅಗತ್ಯ ಇರುವುದಿಲ್ಲ. ವಿಶೇಷವಾದ 'ಇಂಜೆಕ್ಟರ್' ಬಳಸಬೇಕಿದೆ ಎಂದು ಕಂಪನಿ ಹೇಳಿದೆ. ದೇಶದಲ್ಲಿ ಡೆಲ್ಟಾದಿಂದಲೇ ಸೋಂಕು ಹೆಚ್ಚಳ ಕೋವಿಡ್-19 ಸೋಂಕಿನ ಪ್ರಕರಣಗಳು ದೇಶದಲ್ಲಿ ಕ್ರಮೇಣ ಹೆಚ್ಚಳ ಕಾಣುತ್ತಿರುವುದಕ್ಕೆ ಕೊರೊನಾ ರೂಪಾಂತರಿ 'ಡೆಲ್ಟಾ' ಕಾರಣ ಎಂದು ಇಂಡಿಯನ್ ಸಾರ್ಸ್-ಸಿಒವಿ-2 ಜಿನಾಮಿಕ್ಸ್ ಕನ್ಸಾರ್ಟಿಯಮ್ (ಐಎನ್ಎಸ್ಎಸಿಒಜಿ) ಒಕ್ಕೂಟ ಎಚ್ಚರಿಸಿದೆ. ಕೊರೊನಾ ನಿರೋಧಕ ಲಸಿಕೆಗಳ ಸಾಮರ್ಥ್ಯವನ್ನು ಕುಗ್ಗಿಸಿ, ಪ್ರಸರಣಕ್ಕಿದ್ದ ತಡೆಯನ್ನು ಡೆಲ್ಟಾ ರೂಪಾಂತರಿ ನೀಗಿಸಿಕೊಂಡಿದೆ. ಆದರೆ ಲಸಿಕೆಯ ಪಡೆದವರಲ್ಲಿ ಸೋಂಕಿನಿಂದಾಗಿ ತೀವ್ರ ಅನಾರೋಗ್ಯ ಮತ್ತು ಸಾವು ಸಂಭವಿಸುವ ಪ್ರಮಾಣ ತಗ್ಗಿದೆ. ಹಾಗಾಗಿ ಹೆಚ್ಚು ಮಂದಿ ಆಸ್ಪತ್ರೆಗೆ ದಾಖಲಾಗುತ್ತಿಲ್ಲ. ಈವರೆಗೆ ದೇಶಾದ್ಯಂತ ವಿವಿಧ ರಾಜ್ಯಗಳಿಂದ ಸಂಗ್ರಹಿಸಲಾದ 30,230 ಮಾದರಿಗಳ ಪೈಕಿ 20,324ರಲ್ಲಿ ಡೆಲ್ಟಾ ಸೋಂಕು ಇತ್ತು ಎಂದು ಒಕ್ಕೂಟವು ಆತಂಕ ವ್ಯಕ್ತಪಡಿಸಿದೆ. ಕೋವಿಡ್-19 ಪ್ರಸರಣದ ಮಾದರಿಗಳನ್ನು ಸೂಕ್ಷ್ಮವಾಗಿ ಅಧ್ಯಯನ ನಡೆಸಿ, ಸರಕಾರಕ್ಕೆ ವರದಿ ನೀಡಲು 2020ರ ಡಿ.25ರಂದು ಕೇಂದ್ರ ಆರೋಗ್ಯ ಸಚಿವಾಲಯವು ಸಮಿತಿಯೊಂದನ್ನು ರಚಿಸಿದೆ.
from India & World News in Kannada | VK Polls https://ift.tt/3kfAUMV