ಸುನಿಲ್ ಪೊನ್ನೆಟಿ ಮಡಿಕೇರಿ: ಬ್ರ್ಯಾಂಡೆಡ್ ಕಂಪನಿಗಳ ಜೇನು ತುಪ್ಪದಲ್ಲಿ ಪ್ರಯೋಗಾಲಯದಲ್ಲೂ ಪತ್ತೆಯಾಗದಂಥ ರಾಸಾಯನಿಕಗಳು ಮಿಶ್ರಣವಾಗಿರುತ್ತದೆ ಎನ್ನುವ ವರದಿಗಳ ಮಧ್ಯೆಯೇ ಸ್ಥಳೀಯವಾಗಿ ದೊರಕುವ ಜೇನುತುಪ್ಪ ಈಗಲೂ ಬೇಡಿಕೆ ಉಳಿಸಿಕೊಂಡಿದೆ. ಕೊಡಗು ಜಿಲ್ಲೆಗೆ ಆಗಮಿಸುವ ಬಹುತೇಕರು ತಮ್ಮೊಂದಿಗೆ ಕೊಡಗಿನ ಜೇನು ತೆಗೆದುಕೊಂಡು ಹೋಗದಿದ್ದರೆ ಪ್ರವಾಸ ಅಪೂರ್ಣ ಎಂದೇ ನಂಬುತ್ತಾರೆ. ಆದರೆ ಇಲ್ಲಿಯೂ ಕೆಲವು ವ್ಯಾಪಾರಿಗಳನ್ನು ದುರಾಸೆ ದಾರಿ ತಪ್ಪಿಸಿರುವುದರಿಂದ ಎಚ್ಚರಿಕೆ ಅಗತ್ಯ. ಜೇನುತುಪ್ಪವನ್ನು ಆಹಾರವಾಗಿ, ಔಷಧ ಉದ್ದೇಶಕ್ಕೆ ಹಾಗೂ ಪೂಜೆ ಮತ್ತಿತರ ಕಾರ್ಯಗಳಿಗೆ ಬಳಸುವುದರಿಂದ ಸಾಮಾನ್ಯವಾಗಿ ಎಲ್ಲಾ ಮನೆಗಳಲ್ಲೂ ಜೇನುತುಪ್ಪ ಇಟ್ಟುಕೊಂಡಿರುತ್ತಾರೆ. ಜೇನುತುಪ್ಪಕ್ಕೆ ಇರುವ ಬೇಡಿಕೆಯನ್ನು ತಮ್ಮ ಲಾಭಕ್ಕೆ ಬಳಸಿಕೊಳ್ಳುತ್ತಿರುವ ಬ್ರ್ಯಾಂಡೆಡ್ ಕಂಪನಿಗಳ ಬಂಡವಾಳ ಇತ್ತೀಚೆಗಷ್ಟೇ ಬಯಲಾಗಿತ್ತು. ಇವುಗಳು ಈಗ ತಮ್ಮ ಉತ್ಪನ್ನಗಳನ್ನು ಸಾಚಾ ಎಂದು ಬಿಂಬಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದು, ಗ್ರಾಹಕರು ಇದಕ್ಕೆ ಹೇಗೆ ಸ್ಪಂದಿಸುತ್ತಾರೆ ಎನ್ನುವುದನ್ನು ಕಾದು ನೋಡಬೇಕಿದೆ. ಆದರೆ ಕೊಡಗಿನಲ್ಲಿ ಸಿಗುವ ಸ್ಥಳೀಯ ಜೇನುತುಪ್ಪ ಮಾತ್ರ ಬೇಡಿಕೆಯನ್ನು ಹಿಂದಿನಂತೆಯೇ ಉಳಿಸಿಕೊಂಡಿದೆ. ಭಾಗಮಂಡಲ-ತಲಕಾವೇರಿ ವ್ಯಾಪ್ತಿಯಲ್ಲಿ ಕಳೆದ ಹಲವು ದಶಕಗಳಿಂದ ರಸ್ತೆ ಬದಿಯಲ್ಲಿ ಜೇನು ತುಪ್ಪ ಮಾರುತ್ತಿರುವವರು ತಮ್ಮ ಗ್ರಾಹಕರ ನಂಬಿಕೆಗೆ ಪಾತ್ರರಾಗಿದ್ದಾರೆ. ಬಹುತೇಕರು ತಮ್ಮಲ್ಲಿರುವ ಜೇನು ಪೆಟ್ಟಿಗೆಗಳಿಂದ ಜೇನು ತೆಗೆದು ಮಾರಾಟ ಮಾಡಿದರೆ, ಮತ್ತೆ ಕೆಲವರು ನಂಬಿಕಸ್ಥ ಜೇನು ಕೃಷಿಕರಿಂದ ಖರೀದಿಸಿ ಮಾರುತ್ತಾರೆ. ಈ ಹಿಂದೆ ಜಿಲ್ಲೆಗೆ ಬಂದಿದ್ದ ವೇಳೆ ಜೇನು ತುಪ್ಪ ಖರೀದಿಸಿದ್ದವರು ಮತ್ತೆ ಈ ಕಡೆ ಆಗಮಿಸಿದ್ದರೆ ಅದೇ ಅಂಗಡಿಯಿಂದ ಜೇನುತುಪ್ಪ ಖರೀದಿಸಿ ತೆಗೆದುಕೊಂಡು ಹೋಗುತ್ತಾರೆ. ಇಲ್ಲಿಯ ಜೇನುತುಪ್ಪದ ಗುಣಮಟ್ಟದ ಬಗ್ಗೆ ತಮಗೆ ತಿಳಿದವರಿಗೂ ಮಾಹಿತಿ ನೀಡುತ್ತಾರೆ. ಹಾಗಾಗಿ ಹೆಚ್ಚಿನ ಪ್ರವಾಸಿಗರು ಭಾಗಮಂಡಲ ತಲಕಾವೇರಿ ವ್ಯಾಪ್ತಿಯಲ್ಲಿ ಸಿಗುವ ಜೇನುತುಪ್ಪದ ಸಾಚಾತನದ ಬಗ್ಗೆ ಸದಭಿಪ್ರಾಯ ಹೊಂದಿರುತ್ತಾರೆ. ಇದರಲ್ಲಿ ಟ್ಯಾಕ್ಸಿ ಚಾಲಕರ ಕೊಡುಗೆಯೂ ಇದೆ. ಬ್ರ್ಯಾಂಡೆಡ್ ಕಂಪನಿಗಳ ಜೇನು ತುಪ್ಪದ ಬಗ್ಗೆ ವರದಿಗಳು ಬಂದ ನಂತರ ಸ್ಥಳೀಯ ಜೇನುತುಪ್ಪದ ಗುಣಮಟ್ಟದ ಬಗ್ಗೆ ವಿಚಾರಿಸುವ ಪ್ರವಾಸಿಗರ ಸಂಖ್ಯೆಯಲ್ಲಿ ಹೆಚ್ಚಳ ಕಂಡು ಬಂದಿದೆ ಎನ್ನುತ್ತಾರೆ ವ್ಯಾಪಾರಿಗಳು. ಇವರಿಗೆ ಕೊಡಗಿನ ಜೇನುತುಪ್ಪದ ಅಸಲಿಯತ್ತು ವಿವರಿಸಿ, ತಯಾರಾಗುವ ಬಗೆಯನ್ನು ವಿವರಿಸಿದ ನಂತರ ಗುಣಮಟ್ಟದ ಬಗ್ಗೆ ತೃಪ್ತಿ ವ್ಯಕ್ತಪಡಿಸುತ್ತಾರೆ ಎನ್ನುವುದು ವ್ಯಾಪಾರಿಗಳ ಅನುಭವದ ಮಾತು. ತಮ್ಮಲ್ಲೇ ಪೆಟ್ಟಿಗೆ ಇಟ್ಟು ಸಾಕಿದ ಜೇನುಹುಳುಗಳಿಂದ ಪಡೆದ ಅಥವಾ ಬೇರೆ ಜೇನು ಕೃಷಿಕರಿಂದ ಖರೀದಿಸಿದ ಪೆಟ್ಟಿಗೆ ಜೇನು, ಆದಿವಾಸಿಗಳು ಮತ್ತು ಅರಣ್ಯ ಪ್ರದೇಶದೊಳಗೆ ವಾಸ ಮಾಡುವವರು ತಂದು ಕೊಡುವ ಕಾಡು ಜೇನು ಹಾಗೂ ಜೇನು ಕೃಷಿಕರ ಸಹಕಾರ ಸಂಘದ ಮೂಲಕ ಮಾರಾಟ ಮಾಡುವ ಸೊಸೈಟಿ ಜೇನು ಹೀಗೆ ಮೂರು ಬಗೆಯ ಜೇನು ತುಪ್ಪವನ್ನು ಕೊಡಗಿನ ಸಾಂಪ್ರದಾಯಿಕ ಜೇನುತುಪ್ಪ ಮಾರಾಟಗಾರರು ತಮ್ಮಲ್ಲಿ ಮಾರಾಟ ಮಾಡುತ್ತಾರೆ. ಈ ಮೂರೂ ಬಗೆಯ ಜೇನು ತುಪ್ಪದ ರುಚಿ ನೋಡಲು ಕೊಟ್ಟು, ಅವುಗಳ ಸಾಧಕ -ಬಾಧಕ ವಿವರಿಸಿ ಗ್ರಾಹಕರು ಇಷ್ಟಪಡುವುದನ್ನೇ ಮಾರಾಟ ಮಾಡಲಾಗುತ್ತದೆ ಎನ್ನುತ್ತಾರೆ ವ್ಯಾಪಾರಿಗಳು. ನಕಲಿ ಜೇನುತುಪ್ಪ ದಂಧೆಯೂ ಜೋರಾಗಿದೆ ಎಚ್ಚರ..!ಖರೀದಿಯಲ್ಲಿ ಎಚ್ಚರಿಕೆ ಅಗತ್ಯ ಕೊಡಗಿನಲ್ಲಿ ನಕಲಿ ಜೇನುತುಪ್ಪ ದಂಧೆಯೂ ಜೋರಾಗಿದೆ. ಅಸಲಿ ಜೇನುತುಪ್ಪದಂತೆಯೇ ಕಾಣುವ, ಸುಲಭದಲ್ಲಿ ಗುರುತಿಸಲು ಸಾಧ್ಯವಾಗದ ಜೇನುತುಪ್ಪ ಬಹುತೇಕ ಕಡೆಗಳಲ್ಲಿ ಮಾರಾಟ ಮಾಡುತ್ತಾರೆ ಎನ್ನುವ ಆರೋಪವೂ ಇದೆ. ಉತ್ತರಭಾರತ, ಕೇರಳ ಮತ್ತಿತರ ಭಾಗಗಳಿಂದ ತಂದಿರುವ ಜೇನನ್ನು ಕೊಡಗಿನ ಜೇನು ಎಂದು ಸುಳ್ಳು ಹೇಳಿ ಮಾರುವವರೂ ಇದ್ದಾರೆ. ಹಾಗಾಗಿ ಕೊಡಗಿಗೆ ಬಂದು ಜೇನು ಖರೀದಿಸುವಾಗ ಎಚ್ಚರಿಕೆ ಅಗತ್ಯ. ಇಂತಹ ದುರಾಸೆಯ ವ್ಯಾಪಾರಿಗಳಿಂದ ಶುದ್ಧ ಜೇನುತುಪ್ಪ ಮಾರಾಟ ಮಾಡುವವರನ್ನೂ ಸಂಶಯದಿಂದ ನೋಡುವಂತಾಗಿದೆ.
from India & World News in Kannada | VK Polls https://ift.tt/38axeab
