ವಾಷಿಂಗ್ಟನ್: ಕೊರೊನಾ ವೈರಸ್ ವಿನಾಶಕ್ಕಾಗಿ ಕಂಡುಹಿಡಿಯಬೇಕಾಗಿರುವ ಲಸಿಕೆ ಇನ್ನೂ ಆರಂಭಿಕ ಹಂತದಲ್ಲಿದೆ. ಈ ಕುರಿತು ಸಾಕಷ್ಟು ಸಂಶೋಧನೆಗಳು ನಡೆಯುತ್ತಿದ್ದು, ವೈರಸ್ ವಿರುದ್ಧದ ಲಸಿಕೆಗೆ ಇನ್ನಷ್ಟು ದಿನ ಕಾಯಲೇಬೇಕು ಎಂದು ತಜ್ಞರು ಹೇಳಿದ್ದಾರೆ. ಈ ಮಧ್ಯೆ ಸೂರ್ಯನ ಬೆಳಕಿನಲ್ಲಿ ಕೊರೊನಾ ವೈರಸ್ ಬೇಗ ನಾಶವಾಗುತ್ತದೆ ಎಂದು ಅಮೆರಿಕದ ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದು, ಇದನ್ನು ಅಮೆರಿಕದ ಅಧಿಕಾರಿಯೊಬ್ಬರು ಅಧಿಕೃತವಾಗಿ ಘೋಷಿಸಿದ್ದಾರೆ. ಸೂರ್ಯನ ಪ್ರಖರ ಬೆಳಕಿನಲ್ಲಿ ಕೊರೊನಾ ವೈರಸ್ ಬೇಗ ಸಾಯುತ್ತದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ ಎಂದು ಅಮೆರಿಕದ ಹೋಮ್‌ಲ್ಯಾಂಡ್ ಸೆಕ್ಯೂರಿಟಿ ಕಾರ್ಯದರ್ಶಿಯ ವಿಜ್ಞಾನ ಮತ್ತು ತಂತ್ರಜ್ಞಾನ ಸಲಹೆಗಾರ ವಿಲಿಯಮ ಬ್ರ್ಯಾನ್ ಘೋಷಿಸಿದ್ದಾರೆ. ಅದಾಗ್ಯೂ ಈ ಕುರಿತಾದ ಆರಂಭಿಕ ಹಂತದಲ್ಲಿದ್ದು, ಪೂರ್ಣ ಪ್ರಮಾಣದ ಸಂಶೋಧನಾ ವರದಿ ಪ್ರಕಟವಾದ ಬಳಿಕವಷ್ಟೇ ಅಧಿಕೃತವಾಗಿ ಘೋಷಿಸಲು ಸಾಧ್ಯ ಎಂದು ವಿಲಿಯಮ ಬ್ರ್ಯಾನ್ ಅಭಿಪ್ರಾಯಪಟ್ಟಿದ್ದಾರೆ. ಕೊರೊನಾ ವೈರಸ್‌ಗೆ ಸೂರ್ಯನ ನೇರಳಾತೀತ ಕಿರಣಗಳನ್ನು ತಡೆದುಕೊಳ್ಳುವ ಶಕ್ತಿ ಇರುವುದಿಲ್ಲ ಎಂದಿರುವ ವಿಲಿಯಂಬ್ರ್ಯಾನ್, ಬೇಸಿಗೆ ಕಾಲದಲ್ಲಿ ವೈರಸ್ ನಿರ್ನಾಮವಾಗುವ ಪ್ರಕ್ರಿಯೆ ವೇಗ ಪಡೆದುಕೊಳ್ಳಲಿದೆ ಎಂದು ನುಡಿದಿದ್ದಾರೆ. ಇನ್ನು ಇಂತದ್ದೇ ಅಭಿಪ್ರಾಯ ವ್ಯಕ್ತಪಡಿಸಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಕೊರೊನಾ ವೈರಸ್‌ಗೆ ಬಿಸಿಯಾದ ಹಾಗೂ ಆರ್ದ್ರ ವಾತಾವರಣದಲ್ಲಿ ತನ್ನ ಪ್ರಭಾವವನ್ನು ಬೀರಲು ಸಾಧ್ಯವಾಗುವುದಿಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಸೂರ್ಯನ ನೇರಳಾತೀತ ಕಿರಣಗಳು ಯಾವುದೇ ವೈರಾಣುವಿನ ಆನುವಂಶಿಕ ಪುನರಾವರ್ತನೆ ಸಾಮರ್ಥ್ಯಕ್ಕೆ ಧಕ್ಕೆ ತರುತ್ತದೆ ಎಂಬುದು ಈ ಮೊದಲೇ ದೃಢಪಟ್ಟಿದೆ. ಆದರೆ ಕೊರೊನಾ ವೈರಸ್ ಕೂಡ ಸೂರ್ಯನ ಈ ನೇರಳಾತೀತ ಕಿರಣಗಳಿಂದಾಗಿ ಸಾಯವುದು ಖಚಿತವೇ ಎಂಬುದನ್ನು ಕಾದು ನೋಡಬೇಕಿದೆ.
from India & World News in Kannada | VK Polls https://ift.tt/350asi8
