ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ಮಾಜಿ ಯಶಸ್ವಿ ನಾಯಕ ದಾದಾ ಖ್ಯಾತಿಯ ಸೌರವ್ ಗಂಗೂಲಿ, ಈಗ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಅಧ್ಯಕ್ಷರಾಗಿ ತಮ್ಮ ಸೇವೆಯನ್ನು ಸಲ್ಲಿಸುತ್ತಿದ್ದಾರೆ. ಈ ಮಧ್ಯೆ ಬಗ್ಗೆ ಹೊಗಳಿಕೆಯ ಮಾತುಗಳನ್ನಾಡಿರುವ ಪಾಕಿಸ್ತಾನದ ಮಾಜಿ ವೇಗದ ಬೌಲರ್ , ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯು (ಪಿಸಿಬಿ) ದಾದಾರನ್ನು ನೋಡಿ ಕಲಿಯಬೇಕಿದೆ. ನನ್ನ ಕೆಲಸ ಟಿವಿ ಕಾರ್ಯಕ್ರಮಗಳಲ್ಲಿ ಕುಳಿತುಕೊಳ್ಳುವುದು ಅಲ್ಲ. ಕ್ರಿಕೆಟ್ ನಡೆಸಲು ನನಗೆ ಅವಕಾಶ ನೀಡಬೇಕಿತ್ತು ಎಂದು ಟಾಂಗ್ ಕೊಟ್ಟಿದ್ದಾರೆ. ಸರಿಯಾದ ವ್ಯಕ್ತಿಗಳು ಮಾತ್ರ ನಿರ್ಧಾರ ಕೈಗೊಂಡರೆ ಪಿಸಿಬಿ ಏಳಿಗೆ ಪಡೆಯಲು ಸಾಧ್ಯ ಎಂದು ಅಖ್ತರ್ ಅಭಿಪ್ರಾಯಪಟ್ಟರು. ಅದೇ ಹೊತ್ತಿಗೆ ಪಾಕಿಸ್ತಾನದ ಗಣ್ಯ ವ್ಯಕ್ತಿಗಳ ಮನೋಸ್ಥಿತಿಯನ್ನು ಪ್ರಶ್ನಿಸಿರುವ ಅಖ್ತರ್, ಯಾವಾಗಲೂ ತಮ್ಮ ಅಡಿಯಲ್ಲಿ ದುರ್ಬಲ ವ್ಯಕ್ತಿಗಳು ಇರಲು ಬಯಸುತ್ತಾರೆ. ಇದರಿಂದ ತಮ್ಮ ವ್ಯವಹಾರಗಳನ್ನು ನಡೆಸಿಕೊಳ್ಳುತ್ತಾರೆ ಎಂದು ದೂರಿದ್ದಾರೆ. ಎಲೈಟ್ ವರ್ಗವು ತಮ್ಮ ಅಡಿಯಲ್ಲಿರುವ ವ್ಯಕ್ತಿಗಳ ಮೇಲೆ ಆದೇಶ ಮಾಡಬಹುದಾಗಿದೆ. ಅವರಿಗೆ ಅಂತಹ ಮುಖ್ಯಸ್ಥರು ಬೇಕಾಗಿದ್ದಾರೆ. ತಮ್ಮ ಆದೇಶಗಳನ್ನು ಪಾಲಿಸುವ ನಾಯಕರೂ ಬೇಕಾಗಿದ್ದಾರೆ. ನಮಗೆ ಕ್ಯಾಪ್ಟನ್ ಅಥವಾ ಇನ್ನೇನಾದರೂ ಬೇಕೇ? ಅವರೇನು ಮಾಡಬಹುದು? ಮೈದಾನಕ್ಕೆ ಕಾಲಿಡಬೇಕೇ ಅಥವಾ ಪ್ರಾರ್ಥನೆ ಸಲ್ಲಿಸಬೇಕೇ ಎಂದು ಟೀಕಾ ಪ್ರಹಾರ ಮಾಡಿದರು. ವಿಶ್ವದಾದ್ಯಂತ ಕ್ರಿಕೆಟ್ ಮಂಡಳಿಗಳು ವ್ಯವಹಾರಗಳನ್ನು ನಡೆಸಿಕೊಳ್ಳಲು ಮಾಜಿ ಕ್ರಿಕೆಟಿಗರನ್ನು ಬಳಸಿಕೊಳ್ಳುತ್ತಿದೆ. ಆದರೆ ಪಿಸಿಬಿ ಈ ವಿಧಾನವನ್ನು ಅನುಸರಿಸುತ್ತಿಲ್ಲ. ಆದ್ದರಿಂದ ದೇಶದಲ್ಲಿ ಕ್ರಿಕೆಟ್ ತೊಂದರೆಯನ್ನು ಎದುರಿಸುತ್ತಿದೆ ಎಂದು ಅಖ್ತರ್ ಬೊಟ್ಟು ಮಾಡಿದರು. ಸೌರವ್ ಗಂಗೂಲಿ ಬಿಸಿಸಿಐ ಅಧ್ಯಕ್ಷರಾಗಿದ್ದಾರೆ. ರಾಹುಲ್ ದ್ರಾವಿಡ್ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯ ಮುಖ್ಯಸ್ಥರಾಗಿದ್ದಾರೆ. ಗ್ರೇಮ್ ಸ್ಮಿತ್ ಕ್ರಿಕೆಟ್ ದಕ್ಷಿಣ ಆಫ್ರಿಕಾದ ನಿರ್ದೇಶಕರಾಗಿದ್ದಾರೆ. ಮಾರ್ಕ್ ಬೌಷರ್ ಮುಖ್ಯ ತರಬೇತುದಾರರಾಗಿದ್ದಾರೆ. ಆದರೆ ಪಾಕಿಸ್ತಾನದಲ್ಲಿ ತದ್ವಿರುದ್ಧವಾಗಿ ನಡೆಯುತ್ತಿದೆ. ಅವರು ನನ್ನನ್ನು ಬಳಸಿಕೊಂಡಿಲ್ಲ. ನನ್ನ ಕೆಲಸ ಟಿ ಕಾರ್ಯಕ್ರಮಗಳಲ್ಲಿ ಕುಳಿತುಕೊಳ್ಳುವುದು ಅಲ್ಲ. ಕ್ರಿಕೆಟ್ ನಡೆಸಲು ನನಗೆ ಅವಕಾಶ ನೀಡಬೇಕಿತ್ತು ಎಂದು ಹೇಳಿದರು. ಯುವ ಆಟಗಾರರು ಕ್ರಿಕೆಟ್ ಅನ್ನು ವೃತ್ತಿ ಜೀವನದ ಆಯ್ಕೆಯಾಗಿ ತೆಗೆದುಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ಪಾಕಿಸ್ತಾನವು ದೇಶದಲ್ಲಿ ಅಭಿವೃದ್ಧಿ ಹೊಂದುತ್ತಿರುವ ಏಜೆನ್ಸಿಗಳು ಹಾಗೂ ಅಕಾಡೆಮಿಗಳನ್ನು ನಿಲ್ಲಿಸಿದೆ. ಇದು ಆಟದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಆಕ್ರೋಶಭರಿತರಾಗಿ ನುಡಿದರು. ಏತನ್ಮಧ್ಯೆ ಭಾರತವನ್ನು ಹೊಗಳಿರುವ ಶೋಯಬ್ ಅಖ್ತರ್, ಅಲ್ಲಿನ ಜನತೆ ಪಾಕ್ ವಿರುದ್ಧ ಎಂದಿಗೂ ದ್ವೇಷ ಅಥವಾ ಯುದ್ಧವನ್ನು ಬಯಸುವುದಿಲ್ಲ ಎಂದಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2x7SDRy
