ಹೊಸದಿಲ್ಲಿ: ಭವಿಷ್ಯದಲ್ಲಿ ನಡೆಯಲಿರುವ ಘಟನೆಗಳ ಬಗ್ಗೆ ವರುಷಗಳ ಹಿಂದೆಯೇ ಟ್ವೀಟ್ ಮೂಲಕ ಸುಳಿವು ನೀಡುತ್ತಿರುವ ಬಲಗೈ ವೇಗದ ಬೌಲರ್ ಅತೀಂದ್ರಿಯ ಶಕ್ತಿಯು ಮತ್ತೆ ಸುದ್ದಿ ಮಾಡುತ್ತಿದೆ. ಇಂಗ್ಲೆಂಡ್ ಬಲಗೈ ವೇಗಿ ಮಾಡಿರುವ ಸಾಲು ಸಾಲು ಟ್ವೀಟ್ಗಳು ಇವೆಲ್ಲಕ್ಕೂ ಪುರಾವೆ ನೀಡುತ್ತಿದೆ. ಮಹಾಮಾರಿ ಕೊರೊನಾ ವೈರಸ್ ಸೋಂಕಿಗೆ ಇಡೀ ಜಗತ್ತೇ ತತ್ತರಿಸಿ ಹೋಗಿದೆ. ಜನರಿಗೆ ಮನೆಯಿಂದ ಹೊರಬರಲು ಸಾಧ್ಯವಾಗುತ್ತಿಲ್ಲ. ಸಾಮಾಜಿಕ ಅಂತರವನ್ನು ಕಾಪಾಡಿಕೊಳ್ಳುವ ನಿಟ್ಟಿನಲ್ಲಿ ಜನರಲ್ಲಿ ಮನೆಯಲ್ಲೇ ಉಳಿದುಕೊಳ್ಳುವಂತೆ ಸೂಚಿಸಲಾಗಿದೆ. ಈ ಮಧ್ಯೆ ಕಳೆದ ಅನೇಕ ವರ್ಷಗಳಲ್ಲಿ ವಿವಿಧ ಹಂತಗಳಲ್ಲಾಗಿ ಜೋಫ್ರಾ ಆರ್ಚರ್ ಮಾಡಿರುವ ಟ್ವೀಟ್ಗಳು ವೈರಲ್ ಆಗಿದೆ. ಇಲ್ಲಿ ಜೋಫ್ರಾ ಆರ್ಚರ್ ಭವಿಷ್ಯ ನುಡಿಯುವ ಪ್ರಯತ್ನ ಮಾಡುತ್ತಿಲ್ಲ. ಆದರೆ ತಾವು ಮಾಡಿರುವ ಟ್ವೀಟ್ಗಳು ಭವಿಷ್ಯದಲ್ಲಿ ನಡೆಯುುವ ಘಟನೆಗಳಿಗೆ ಪೂರಕವಾದ ಸಂಬಂಧವನ್ನು ಹೊಂದಿರುವುದು ಎಂತವರನ್ನು ಒಂದು ಕ್ಷಣ ಬೆಚ್ಚಿ ಬೀಳಿಸುತ್ತದೆ. ಇಲ್ಲಿ ಗಮನಾರ್ಹ ಸಂಗತಿಯೆಂದರೆ ಏಳು ವರ್ಷಗಳ ಹಿಂದೆಯೇ ಲೌಕ್ಡೌನ್ ಬಗ್ಗೆ ಜೋಫ್ರಾ ಆರ್ಚರ್ ಉಲ್ಲೇಖ ಮಾಡಿದ್ದರು. ಅಂದು ಅವರು 'ಲಾಕ್' ಎಂದು ಟ್ವಿಟರ್ ಪುಟದಲ್ಲಿ ಬರೆದುಕೊಂಡಿದ್ದರು. ಇದಕ್ಕೂ ಮೊದಲು 2013ನೇ ಇಸವಿಯಲ್ಲಿ 'ಕೆಟ್ಟ ಚಟಕ್ಕೆ ಎರಡು ನಿಮಿಷಗಳು ಸಾಕು ಆದರೆ ಅದರಿಂದ ಹೊರಗೆ ಬರಲು ಮೂರು ವಾರವೇ ಬೇಕು' ಎಂದು ನುಡಿದಿದ್ದರು. ಈ ಮೂಲಕ ಹಲವು ದಿನಗಳ ಕಾಲ ಮನೆಯಲ್ಲೇ ಇರಲು ಹೆಚ್ಚಿನ ಶಿಸ್ತು ಬೇಕು ಎಂಬುದನ್ನುಸಾರಿದ್ದರು. ಮಗದೊಂದು ಕುತೂಹಲದಾಯಕ ಸಂಗತಿಯೆಂದರೆ ಭಾರತದಲ್ಲಿ ಕೋವಿಡ್ 19 ಸೋಂಕು ಹರಡವುದನ್ನು ತಡೆಗಟ್ಟಲು ಮೂರು ವಾರಗಳ ಲಾಕ್ ಡೌನ್ ಘೋಷಿಸಲಾಗಿದೆ. ಆದರೆ ಮೂರು ವರ್ಷಗಳ ಹಿಂದೆಯೇ ಜೋಫ್ರಾ ಆರ್ಚರ್, 'ಮನೆಯಲ್ಲಿ ಮೂರು ವಾರ ಸಾಕಾಗಲ್ಲ' ಎಂದು ಟ್ವೀಟ್ ಮಾಡಿರುವುದು ಮತ್ತಷ್ಟು ಜಿಜ್ಞಾಸೆ ಹುಟ್ಟಿಸುತ್ತದೆ. ಯಾವುದೇ ಚಟುವಟಿಕೆಗಳು ಇಲ್ಲದೆ ಮನೆಯಲ್ಲೇ ಕುಳಿತುಕೊಳ್ಳುವುದು ಜನರ ಪಾಲಿಗೆ ಅತ್ಯಂತ ಕಠಿಣವಾದ ಕೆಲಸವಾಗಿದೆ. ಜನರು ಈಗಾಗಲೇ ಬೆಸತ್ತು ಹೋಗಿದ್ದಾರೆ. ಆರು ವರ್ಷಗಳ ಹಿಂದೆಯೇ ಈ ಸಂಬಂಧ ಟ್ವೀಟ್ ಮಾಡಿರುವ ಜೋಫ್ರಾ ಆರ್ಚರ್, 'ಎರಡು ದಿನಗಳು ಎರಡು ವಾರಗಳಂತೆ ಭಾಸವಾಗುತ್ತಿದೆ' ಎಂದಿದ್ದರು. ಕೊರೊನಾ ವೈರಸ್ ಸೋಂಕು ಹರಡುವುದನ್ನು ತಡೆಯಲು ಲಾಕ್ಡೌನ್ ಏಕೈಕ ಮಾರ್ಗ ಎಂದು ಹಲವಾರು ವೈದ್ಯಕೀಯ ತಜ್ಞರು ಸಲಹೆ ಮಾಡಿದ್ದಾರೆ. ಈ ಮೂಲಕ ವೈರಸ್ ಹರಡುವ ಸರಪಳಿಯನ್ನು ಮುರಿಯಲು ಸಾಧ್ಯ ಎಂದಿದ್ದರು. ಆರು ವರ್ಷಗಳ ಹಿಂದೆಯೇ 'ನನ್ನನ್ನು ಲಾಕ್ ಮಾಡಿ' ಎಂದು ಬರೆದುಕೊಂಡಿರುವುದು ಜೋಫ್ರಾ ಆರ್ಚರ್ ಅತೀಂದ್ರಿಯ ಶಕ್ತಿಗೆ ಮಗದೊಂದು ಪುರಾವೆಯಾಗಿದೆ. ಇದಕ್ಕೆ ಮಗದೊಂದು ಸೇರ್ಪಡೆಯೆಂಬಂತೆ 2018ರಲ್ಲಿ ಮಾಡಿರುವ ಟ್ವೀಟ್ನಲ್ಲಿ 'ಇನ್ನು ಮುಂದೆ ಮನೆ ಬಿಟ್ಟು ಹೋಗಬೇಕೆಂದು ಅನಿಸುವುದಿಲ್ಲ' ಎಂದು ಹೇಳಿದ್ದರು. ಕೊರೊನಾ ವೈರಸ್ನಿಂದಾಗಿ ಕ್ರೀಡಾ ಚಟುವಟಿಕೆಗಳು ನಿಲುಗಡೆಯಾಗಿದೆ. ಆದರೆ 2014ನೇ ಇಸವಿಯಲ್ಲೇ 'ಓಡಲು ಜಾಗವಿಲ್ಲದ ಆ ದಿನಗಳು ಬರಲಿದೆ' ಎಂದು ಜೋಫ್ರಾ ಆರ್ಚರ್ ಟ್ವಿಟರ್ ಪುಟದಲ್ಲಿ ಬರೆದುಕೊಂಡಿದ್ದರು. ಇವೆಲ್ಲವೂ ಜೋಫ್ರಾ ಆರ್ಚರ್ ಅತೀಂದ್ರಿಯ ಶಕ್ತಿಗೆ ಮತ್ತಷ್ಟು ಪುರಾವೆಯನ್ನು ನೀಡುತ್ತದೆ. ಒಟ್ಟಿನಲ್ಲಿ ಜೋಫ್ರಾ ಆರ್ಚರ್ ಟ್ವೀಟ್ಗಳು ಅಭಿಮಾನಿಗಳಲ್ಲಂತೂ ಭಾರಿ ಅಚ್ಚರಿಯನ್ನು ಮೂಡಿಸಿದೆ. ಅಂದ ಹಾಗೆ ಇದು ಮೊದಲ ಜೋಫ್ರಾ ಆರ್ಚರ್ ಅತೀಂದ್ರಿಯ ಶಕ್ತಿ ಬೆಳಕಿಗೆ ಬರುತ್ತಿರುವುದು. ಕಳೆದ ವರ್ಷ ನಿಷೇಧಿತ ಉದ್ದೀಪನಾ ಮದ್ದು ಸೇವಿಸಿ ಬಿಸಿಸಿಐನಿಂದ ನಿಷೇಧಕ್ಕೊಳಗಾಗಿದ್ದ ಉದಯೋನ್ಮುಖ ಬ್ಯಾಟ್ಸ್ಮನ್ ಪೃಥ್ವಿ ಶಾ ಬಗ್ಗೆ ವರ್ಷಗಳ ಹಿಂದೆ ಮಾಡಿರುವ ಟ್ವೀಟ್ ವೈರಲ್ ಆಗಿ ಹರಡಿತ್ತು. ಹಾಗೆಯೇ ವಿವಿಧ ಸಂದರ್ಭಗಳಲ್ಲಾಗಿ ಜೋಫ್ರಾ ಆರ್ಚರ್ ಮಾಡಿರುವ ಟ್ವೀಟ್ಗಳು ಏಕದಿನ ವಿಶ್ವಕಪ್ ಹಾಗೂ ಆ್ಯಶಸ್ ಟೂರ್ನಿಯ ವೇಳೆ ನಿಜವಾಗಿ ಪರಿಣಮಿಸಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2QLAZdb
