ವಾಷಿಂಗ್ಟನ್ ಡಿಸಿ: ಜಮ್ಮು ಮತ್ತು ಕಾಶ್ಮೀರದ 370ನೇ ವಿಧಿಯನ್ನು ರದ್ದುಪಡಿಸಿದ ನರೇಂದ್ರ ಮೋದಿ ಸರಕಾರದ ಐತಿಹಾಸಿಕ ನಿರ್ಧಾರವನ್ನು ಖಂಡಿಸುವ ಮೂಲಕ ಮೂಗು ತೂರಿಸಹೊರಟ ಪಾಕಿಸ್ತಾನಕ್ಕೆ ಪ್ರಮುಖ ಮೊಹಾಜಿರ್ ನಾಯಕ ನದೀಂ ನುಸ್ರತ್ ಪ್ರಬಲ ತಿರುಗೇಟು ನೀಡಿದ್ದಾರೆ. 'ಕಾಶ್ಮೀರಿಗಳ ಪರ ಮಾತನಾಡಲು ಪಾಕಿಸ್ತಾನಕ್ಕೆ ಯಾವುದೇ ನೈತಿಕ ಹಕ್ಕಿಲ್ಲ' ಎಂದು ಅವರು ಪ್ರತಿಪಾದಿಸಿದ್ದಾರೆ. ಅಮೆರಿಕದಲ್ಲಿರುವ 'ವಾಯ್ಸ್ ಆಫ್ ಕರಾಚಿ' (ವಿಓಕೆ) ಹೆಸರಿನ ಸಲಹಾ ಸಂಸ್ಥೆಯ ಅಧ್ಯಕ್ಷರಾಗಿರುವ ನುಸ್ರತ್, ಪಾಕಿಸ್ತಾನ ಕಾಶ್ಮೀರದ ಬಗ್ಗೆ ಮಾಥನಾಡುವ ಮೊದಲು ತನ್ನದೇ ನೆಲದಲ್ಲಿ ಬದುಕುತ್ತಿರುವ ಎಲ್ಲ ಅಲ್ಪಸಂಖ್ಯಾತರಿಗೆ ಎಲ್ಲ ಹಕ್ಕುಗಳನ್ನು ನೀಡಲಿ' ಎಂದು ಆಗ್ರಹಿಸಿದ್ದಾರೆ. 'ಪಾಕಿಸ್ತಾನ ಕಾಶ್ಮೀರಿಗಳ ಹ್ಕುಗಳ ಬಗ್ಗೆ ಮಾತನಾಡುವ ಮೊದಲ ತನ್ನ ನೆಲದಲ್ಲೇ ಪರಕೀಯರಂತೆ ಬದುಕುತ್ತಿರುವ ಮೊಹಾಜಿರ್ಗಳು, ಬಲೂಚ್, ಪಶ್ತೂನ್ಗಳು ಮತ್ತು ಹಜಾರಾ ನಾಗರಿಕರಿಗೆ ಅದೇ ಹಕ್ಕುಗಳನ್ನು ನೀಡಲಿ' ಎಂದು ಸುದ್ದಿಸಂಸ್ಥೆ ಜತೆ ನುಡಿದರು. ಪಾಕ್ ದೌರ್ಜನ್ಯ ತಾಳಲಾಗದೆ ದೇಶ ತೊರೆದ ಮೊಹಾಜಿರ್ಗಳ ಸಂಘಟನೆಯ ಮುಖ್ಯಸ್ಥರಾದ ನುಸ್ರತ್, ಮೊಹಾಜಿರ್ಗಳಿಗಾಗಿ ಸ್ವಾಯತ್ತ 'ಗ್ರೇಟರ್ ಕರಾಚಿ' ರೂಪಿಸಬೇಕು ಎಂದು ಆಗ್ರಹಿಸಿದ್ದಾರೆ. ಪಾಕಿಸ್ತಾನದೊಳಗಿನ ಎಲ್ಲ ಅಲ್ಪಸಂಖ್ಯಾತ ಸಮುದಾಯಗಳಿಗೂ ಪ್ರತ್ಯೇಕ ಸ್ವಾಯತ್ತ ಪ್ರದೇಶ ಒದಗಿಸಬೇಕು ಎಂದು ಒತ್ತಾಯಿಸಿದ್ದಾರೆ. 370ನೇ ವಿಧಿ ರದ್ದುಪಡಿಸುವ ರಾಷ್ಟ್ರಪತಿಗಳ ಆದೇಶವನ್ನು ರಾಜ್ಯಸಭೆ ಸೋಮವಾರ ಅಂಗೀಕರಿಸಿದ ಬೆನ್ನಿಗೇ ವಾಯ್ಸ್ ಆಫ್ ಕರಾಚಿ ಮುಖ್ಯಸ್ಥರ ಹೇಳಿಕೆ ಹೊರಬಿದ್ದಿದೆ.
from India & World News in Kannada | VK Polls https://ift.tt/2OHLXld
