ಹೊಸದಿಲ್ಲಿ: ಎಲ್ಲವೂ ಅಂದುಕೊಂಡಂತೆ ಆದರೆ ಜಮ್ಮು ಮತ್ತು ಕಾಶ್ಮೀರ ಇನ್ನು ಕೆಲವೇ ದಿನಗಳಲ್ಲಿ ಎರಡು ಕೇಂದ್ರಾಡಳಿತ ಪ್ರದೇಶವಾಗಿ ವಿಭಜನೆಗೊಳ್ಳಲಿದೆ. ಜಮ್ಮು ಮತ್ತು ಕಾಶ್ಮೀರ ಯುಟಿ, ಮತ್ತು ಲಡಾಖ್ ಯುಟಿ ಎಂದು ರಾಜ್ಯ ಎರಡು ಭಾಗವಾಗಲಿದೆ. ಈ ಮೂಲಕ ರಾಜ್ಯಕ್ಕೆ ವಿಶೇಷ ಸ್ಥಾನಮಾನ ಕೊಟ್ಟಿದ್ದ ಸಂವಿಧಾನದ 370ನೇ ವಿಧಿ ಹಾಗೂ 35(ಎ) ಕೂಡ ರದ್ದು ಆಗುತ್ತದೆ. ಅದರ ಜತೆಗೆ ರಾಜ್ಯಕ್ಕಿರುವ ಪ್ರತ್ಯೇಕ ಧ್ವಜ ಕೂಡ ಇನ್ನಿಲ್ಲವಾಗುತ್ತದೆ. ಹೌದು, ಇಲ್ಲಿಯವರೆಗೆ ಜಮ್ಮು ಮತ್ತು ಕಾಶ್ಮೀರ ರಾಜ್ಯಕ್ಕೆ ಪ್ರತ್ಯೇಕ ಧ್ವಜವಿತ್ತು. ಇದು ಜಮ್ಮು, ಕಾಶ್ಮೀರ ಮತ್ತು ಲಡಾಖ್ ಅನ್ನು ಪ್ರತಿಬಿಂಬಿಸುವ ಮೂರು ಪಟ್ಟಿ, ಆಳವಾದ ಕೆಂಪು ಬಣ್ಣ ಹೊಂದಿದ್ದು, ಅದರ ಜತೆಗೆ ಕೃಷಿಯನ್ನು ಪ್ರತಿಬಿಂಬಿಸುವ ಕೂಡ ಇತ್ತು. ಈ ಕೆಂಪು ಧ್ವಜ ಇಲ್ಲಿಯವರೆಗೆ ಜಮ್ಮು ಮತ್ತು ಕಾಶ್ಮೀರದ ಅಧಿಕೃತ ಧ್ವಜವಾಗಿತ್ತು. ರಾಷ್ಟ್ರೀಯ ಧ್ವಜದೊಂದಿಗೆ ಈ ಧ್ವಜವನ್ನು ಹಾರಿಸಲು ರಾಜ್ಯಕ್ಕೆ ಅನುಮತಿ ಇತ್ತು. 1952 ರಲ್ಲಿ, ಜಮ್ಮು ಮತ್ತು ಕಾಶ್ಮೀರ ಸಂವಿಧಾನ ಸಭೆ ಹೊಸ ಧ್ವಜವನ್ನು ರಾಜ್ಯದ ಅಧಿಕೃತ ಧ್ವಜವನ್ನಾಗಿ ಸ್ವೀಕರಿಸಿತ್ತು. ಜಮ್ಮು ಮತ್ತು ಕಾಶ್ಮೀರದ ವಿಶೇಷ ಸ್ಥಾನಮಾನವನ್ನು ತೊಡೆದುಹಾಕುವ ನರೇಂದ್ರ ಮೋದಿ ಸರ್ಕಾರದ ಮಹತ್ವದ ನಿರ್ಧಾರ ರಾಜ್ಯದ ಪ್ರತ್ಯೇಕ ಧ್ವಜಕ್ಕೆ ತೆರೆ ಎಳೆಯುತ್ತಿದೆ ಎಂದೇ ಅರ್ಥ. ಈ ಮೂಲಕ ರಾಜ್ಯದ ಜನತೆಗೆ ಪ್ರತ್ಯೇಕ ಗುರುತು ನೀಡಿದ್ದ ಧ್ವಜ ಇನ್ನಿಲ್ಲವಾಗಲಿದೆ. ಧ್ವಜದ ಇತಿಹಾಸ
- ಜುಲೈ 1931 ರಲ್ಲಿ ನಡೆದ ಪ್ರತಿಭಟನೆ ಸಂದರ್ಭದಲ್ಲಿ ಪೊಲೀಸರು ನಡೆಸಿದ ಗೋಲಿಬಾರ್ನಲ್ಲಿ 20 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದರು.
- ‘ಕೆಂಪು’ ಬಣ್ಣವನ್ನು ಆರಂಭದಲ್ಲಿ ಕಾಶ್ಮೀರದ ‘ಹುತಾತ್ಮರ’ ರಕ್ತದ ಸೂಚಕವಾಗಿ ಬಳಸಲಾಗಿತ್ತು. ಆದರೆ ನಂತರ ಅದು ಕಾರ್ಮಿಕ ಚಳವಳಿಯ ಅರ್ಥವನ್ನು ಪಡೆದುಕೊಂಡಿತು.
- 1952 ರಲ್ಲಿ, ಜಮ್ಮು ಮತ್ತು ಕಾಶ್ಮೀರ ಸಾಂವಿಧಾನಿಕ ಸಭೆ ಹೊಸ ಧ್ವಜವನ್ನು ರಾಜ್ಯದ ಅಧಿಕೃತ ಧ್ವಜವನ್ನಾಗಿ ಮಾಡಿತು.
- ರಾಜ್ಯ ಮತ್ತು ರಾಷ್ಟ್ರೀಯ ಧ್ವಜಕ್ಕೆ ಸಮಾನ ಮಹತ್ವ ನೀಡಲಾಗಿತ್ತು.
- ತ್ರಿವರ್ಣದ ಜೊತೆಗೆ ರಾಜ್ಯದ ಧ್ವಜಕ್ಕೆ ಮಹತ್ವದ ಸ್ಥಾನಮಾನ ನೀಡಬೇಕು ಎಂದು ಜಮ್ಮು ಮತ್ತು ಕಾಶ್ಮೀರ ಹೈಕೋರ್ಟ್ 2015 ರ ಡಿಸೆಂಬರ್ನಲ್ಲಿ ನಿರ್ದೇಶಿಸಿತ್ತು. ಆದರೆ ಏಕ ಸದಸ್ಯ ಪೀಠದ ಆ ಆದೇಶವನ್ನು ನಂತರ ಬಹುಸದಸ್ಯ ಪೀಠ ತಡೆ ಹಿಡಿಯಿತು.
- ಇನ್ನು ಮೇಲೆ , ಜಮ್ಮು ಮತ್ತು ಕಾಶ್ಮೀರದ ಕೆಂಪು ಧ್ವಜ ತೆರೆಮರೆಗೆ ಸರಿಯಲಿದೆ. ದೇಶದ ನೆತ್ತಿಯಂತಿರುವ ಕಣಿವೆ ರಾಜ್ಯದ ಬಾನಂಗಳದಲ್ಲಿ ತ್ರಿವರ್ಣ ಧ್ವಜ ಮಾತ್ರ ರಾರಾಜಿಸಲಿದೆ.
from India & World News in Kannada | VK Polls https://ift.tt/2H0oV31
