ಹೊಸದಿಲ್ಲಿ: ಸಾರ್ವಕಾಲಿಕ ಅಗ್ರ ಐವರು ಟಿ20 ಕ್ರಿಕೆಟಿಗರನ್ನು ಆಯ್ಕೆ ಮಾಡಿರುವ ವೆಸ್ಟ್ ಇಂಡೀಸ್ ದೈತ್ಯ ಆಲ್ರೌಂಡರ್ ಕೈರೊನ್ ಪೊಲಾರ್ಡ್, ಚುಟುಕು ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ರನ್ಗಳಿಸಿರುವ ಟೀಮ್ ಇಂಡಿಯಾ ನಾಯಕ ಹಾಗೂ ಮುಂಬೈ ಇಂಡಿಯನ್ಸ್ ನಾಯಕ ಅವರನ್ನು ತಮ್ಮ ಪಟ್ಟಿಯಿಂದ ಕೈ ಬಿಟ್ಟು ಅಚ್ಚರಿ ಮೂಡಿಸಿದ್ದಾರೆ. ಯೂನಿವರ್ಸ್ ಬಾಸ್ ಖ್ಯಾತಿಯ ವೆಸ್ಟ್ ಇಂಡೀಸ್ ಆರಂಭಿಕ ಬ್ಯಾಟ್ಸ್ಮನ್ ಕ್ರಿಸ್ ಗೇಲ್ಗೆ ಕೈರೊನ್ ಪೊಲಾರ್ಡ್ ತಮ್ಮ ಪಟ್ಟಿಯಲ್ಲಿ ಮೊದಲನೇ ಸ್ಥಾನ ಕಲ್ಪಿಸಿದ್ದಾರೆ. 42 ವರ್ಷ ವಯಸ್ಸಾಗಿದ್ದರೂ ಕ್ರಿಸ್ ಗೇಲ್ ವಿಶ್ವದಾದ್ಯಂತ ಫ್ರಾಂಚೈಸಿ ಲೀಗ್ ಟೂರ್ನಿಯಲ್ಲಿ ಈಗಲೂ ತಮ್ಮ ಬ್ಯಾಟಿಂಗ್ ಮೂಲಕ ಅಬ್ಬರಿಸುತ್ತಿದ್ದಾರೆ. ಇದರೊಂದಿಗೆ ವಯಸ್ಸು ಕೇವಲ ಅಂಕಿಗಳಷ್ಟೇ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ವೆಸ್ಟ್ ಇಂಡೀಸ್ ಟಿ20 ತಂಡದ ನಾಯಕನ ಅಗ್ರ ಐವರ ಪಟ್ಟಿಯಲ್ಲಿ ಶ್ರೀಲಂಕಾದ ಯಾರ್ಕರ್ ಕಿಂಗ್ ಲಸಿತ್ ಮಾಲಿಂಗ ಇದ್ದಾರೆ. ಟಿ20 ಸ್ವರೂಪದ ಅತ್ಯುತ್ತಮ ಬೌಲರ್ಗಳ ಪೈಕಿ ಮಾಲಿಂಗ ಕೂಡ ಒಬ್ಬರು. ಅದರಲ್ಲೂ ಅವರು ಡೆತ್ ಓವರ್ಗಳಲ್ಲಿ ಎಂಥಾ ಬ್ಯಾಟ್ಸ್ಮನ್ ಇದ್ದರೂ ಅವರನ್ನು ಸುಲಭವಾಗಿ ಕಟ್ಟಿ ಹಾಕುವ ಜಾಣ್ಮೆ ಲಂಕಾ ಬೌಲರ್ಗಿತ್ತು. ಪ್ರಸ್ತುತ ಟಿ20 ಕ್ರಿಕೆಟ್ನಲ್ಲ ಅತಿ ಹೆಚ್ಚು ವಿಕೆಟ್ಗಳನ್ನು ಕಬಳಿಸಿರುವ ಬೌಲರ್ಗಳ ಪಟ್ಟಿಯಲ್ಲಿ ಲಸಿತ್ ಮಾಲಿಂಗ ಅಗ್ರ ಸ್ಥಾನದಲ್ಲಿದ್ದಾರೆ. ಸ್ಪಿನ್ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಮೂಲಕ ಗಮನ ಸೆಳೆದಿರುವ ವೆಸ್ಟ್ ಇಂಡೀಸ್ ತಂಡದ ಸಹ ಆಟಗಾರ ಸುನೀಲ್ ನರೇನ್ ಅವರಿಗೆ ಪೊಲಾರ್ಡ್ ತಮ್ಮ ಪಟ್ಟಿಯಲ್ಲಿ ಮೂರನೇ ಸ್ಥಾನ ನೀಡಿದ್ದಾರೆ. ಟಿ20 ಕ್ರಿಕೆಟ್ನಲ್ಲಿ ಅತ್ಯಂತ ಮೌಲ್ಯಯುತ ಆಟಗಾರರ ಪೈಕಿ ನರೇನ್ ಕೂಡ ಒಬ್ಬರು. ಇನಿಂಗ್ಸ್ನ ಯಾವುದೇ ಹಂತದಲ್ಲಿ ತಂಡಕ್ಕೆ ನೆರವಾಗುವ ಕೌಶಲವನ್ನು ವಿಂಡೀಸ್ ಆಲ್ರೌಂಡರ್ ಹೊಂದಿದ್ದಾರೆ. ಅದರಲ್ಲೂ ಕಳೆದ ಹಲವು ವರ್ಷಗಳಿಂದ ನರೇನ್ ದೊಡ್ಡ ಹಿಟ್ಟರ್ ಆಗಿ ಹೆಸರು ಮಾಡಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿಯೇ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಆಡಲು ಇಷ್ಟಪಡುವ ಕೈರೊನ್ ಪೊಲಾರ್ಡ್, ಇದೀಗ ಅದೇ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿಗೆ ತಮ್ಮ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಕಲ್ಪಿಸಿದ್ದಾರೆ. ಸೀಮಿತ ಓವರ್ಗಳ ಸ್ವರೂಪ ಕ್ರಿಕೆಟ್ನಲ್ಲಿ ಅತ್ಯಂತ ಯಶಸ್ವಿ ನಾಯಕ ಎನ್ನುವುದರಲ್ಲಿ ಯಾವುದೇ ಸಂಶಯವೇ ಇಲ್ಲ. ಟಿ20 ವಿಶ್ವಕಪ್, ಮೂರು ಬಾರಿ ಐಪಿಎಲ್ ಟ್ರೋಫಿ ಹಾಗೂ ಎರಡು ಬಾರಿ ಚಾಂಪಿಯನ್ಸ್ ಲೀಗ್ ಟಿ20 ಪ್ರಶಸ್ತಿಗಳನ್ನು ತಮ್ಮ ನಾಯಕತ್ವದಲ್ಲಿ ಅವರು ಗೆದ್ದಿದ್ದಾರೆ. ಇನ್ನುಳಿದ ಐದನೇ ಸ್ಥಾನಕ್ಕೆ ಕೈರೊನ್ ಪೊಲಾರ್ಡ್ ಅವರು ತಮ್ಮ ಹೆಸರನ್ನೇ ಉಳಿಸಿಕೊಂಡಿದ್ದಾರೆ. ಸಾರ್ವಕಾಲಿಕ ಅಗ್ರ ಐವರು ಟಿ20 ಕ್ರಿಕೆಟಿಗರ ಪಟ್ಟಿಗೆ ಡ್ವೇನ್ ಬ್ರಾವೋ ಕೂಡ ಸನಿಹದಲ್ಲಿದ್ದರು ಎಂದು ವಿಂಡೀಸ್ ನಾಯಕ ಹೇಳಿದ್ದಾರೆ. "ಐದನೇ ಸ್ಥಾನಕ್ಕೆ ನನ್ನ ಹೆಸರನ್ನು ಉಳಿಸಿಕೊಳ್ಳುತ್ತೇನೆ. ಏಕೆಂದರೆ ಟಿ20 ಕ್ರಿಕೆಟ್ಗೆ ಬಂದಾಗ ನನ್ನ ದಾಖಲೆಗಳು ಮಾತನಾಡುತ್ತವೆ. ಹಾಗಾಗಿ, ಐದನೇ ಸ್ಥಾನಕ್ಕೆ ನನ್ನ ಹೆಸರನ್ನು ಆಯ್ಕೆ ಮಾಡಿದ್ದೇನೆ. ಹೌದು, ಡ್ವೇನ್ ಬ್ರಾವೋ ಕೂಡ ಈ ಪಟ್ಟಿಯ ಸನಿಹದಲ್ಲಿದ್ದಾರೆ. ಇದೀಗ ನಾನು ಕೇವಲ ಅಗ್ರ ಐವರನ್ನು ಮಾತ್ರ ಆರಿಸಿದ್ದೇನೆ. ಆದರೆ, ತಂಡ ಕಟ್ಟಲು ಇನ್ನೂ 11 ಆಟಗಾರರ ಅಗತ್ಯವಿದೆ," ಎಂದು ಪೊಲಾರ್ಡ್ ಐಸಿಸಿ ಸಂಭಾಷಣೆಯಲ್ಲಿ ತಿಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2ZY63xD
