ಬೆಂಗಳೂರು ಗ್ರಾಮಾಂತರ: 'ಕನ್ನಡದ ರಾಜರತ್ನ' ಎಂದು ಕರೆಸಿಕೊಳ್ಳುತ್ತಿದ್ದ ಪುನೀತ್‌ ರಾಜ್‌ಕುಮಾರ್‌ ಅಗಲಿಕೆಗೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಾದ್ಯಂತ ಅಭಿಮಾನದ ಅಪ್ಪುಗೆ, ಅಶ್ರತರ್ಪಣ, ಕಂಬನಿ ತುಂಬಿದ ಶ್ರದ್ಧಾಂಜಲಿ ವ್ಯಕ್ತವಾಗಿದೆ. ವಿಶೇಷವಾಗಿ ದೊಡ್ಡಬಳ್ಳಾಪುರದಲ್ಲಿ ಡಾ.ರಾಜ್‌ ಕುಟುಂಬಕ್ಕೆ ಅನೇಕ ಅಭಿಮಾನಿ ಸಂಘಟನೆಗಳಿದ್ದು, ಬಹುತೇಕರು ಬೆಳಗ್ಗೆ ಪುನೀತ್‌ರಿಗೆ ಹೃದಯಾಘಾತದ ಸುದ್ದಿ ತಿಳಿದ ಕೂಡಲೇ ಬೆಂಗಳೂರಿನತ್ತ ಪ್ರಯಾಣ ಬೆಳೆಸಿದ್ದು, ತಮ್ಮ ಅಭಿಮಾನ ನಟನನ್ನು ಕಣ್ತುಂಬಿಕೊಳ್ಳಲು ರಾಜಧಾನಿಗೆ ತೆರಳಿದ್ದಾರೆ. ಗ್ರಾಮಾಂತರ ಜಿಲ್ಲೆಯ 4 ತಾಲೂಕುಗಳಲ್ಲೂ ಡಾ.ರಾಜ್‌ ಕುಟುಂಬದ ಎಲ್ಲ ಸದಸ್ಯರಿಗೆ ಪ್ರತ್ಯೇಕ ಅಭಿಮಾನಿ ಬಳಗವಿದ್ದು, ಪುನೀತ್‌ರ ಅಗಲಿಕೆಗೆ ಎಲ್ಲರೂ ಕಂಬನಿ ಮಿಡಿಯುತ್ತಿದ್ದಾರೆ. ಜಿಲ್ಲೆಯ ದೊಡ್ಡಬಳ್ಳಾಪುರ, ದೇವನಹಳ್ಳಿಯಲ್ಲಿ ಪುನೀತ್‌ರ ಅಂಜನೀಪುತ್ರ ಸೇರಿದಂತೆ ಅನೇಕ ಸಿನಿಮಾಗಳು ಚಿತ್ರೀಕರಣಗೊಂಡಿರುವ ನೆನಪುಗಳು ಅಭಿಮಾನಿಗಳ ಕಣ್ಣಲ್ಲಿ ಚಿರಾಯುವಾಗಿ ಉಳಿಯಲಿವೆ. ಈ ಭಾಗದ ಕೈಗಾರಿಕಾ ಪ್ರದೇಶಗಳಿಗೆ ಚಿತ್ರೀಕರಣಕ್ಕೆಂದು ಪುನೀತ್‌ ಬಂದ ಪ್ರತಿ ಸಲ ಅಭಿಮಾನಿಗಳೊಂದಿಗೆ ನಗೆಮುಖದಿಂದ ಮಾತನಾಡಿಸುತ್ತಿದ್ದ ಪವರ್‌ಸ್ಟಾರ್‌ ನೆನಪು ಮಾತ್ರ ಎನ್ನುವ ಸತ್ಯವನ್ನು ಯಾರೂ ಅರಗಿಸಿಕೊಳ್ಳಲು ಆಗುತ್ತಿಲ್ಲ. ಓವರ್‌ ವರ್ಕ್ಔಟ್‌ ಆಘಾತ?ಪ್ರಸ್ತುತ, ಪುನೀತ್‌ರ ಸಾವಿಗೆ ಕಾರಣವೆನ್ನಲಾಗುತ್ತಿರುವ ಹೃದಯಾಘಾತ ಹೆಚ್ಚಿನ ವರ್ಕ್ಔಟ್‌ನಿಂದ ಬಂದಿದೆ ಎನ್ನುವ ವಾದವೂ ಚರ್ಚೆಯಾಗುತ್ತಿದೆ. ಈ ಹಿಂದೆ ಜಿಲ್ಲೆಯ ದೊಡ್ಡಬಳ್ಳಾಪುರದ ಉದಯೋನ್ಮುಖ ನಟ ಹೇಮಂತ್‌ ಸಹ ಜಿಮ್‌ ವರ್ಕ್ಔಟ್‌ನಿಂದಾಗಿ ಹೃದಯಾಘಾತಕ್ಕೊಳಗಾಗಿ ಸಾವನ್ನಪ್ಪಿದ್ದರು. ಇತ್ತೀಚಿಗೆ ಚಿತ್ರನಟ ಚಿರಂಜೀವಿ ಸರ್ಜಾ ಸಹ ಹೃದಯಾಘಾತಕ್ಕೆ ಬಲಿಯಾಗಿದ್ದು, ಯುವಕರು ಜಿಮ್‌ಗಳತ್ತ ಒಲವು ಹೊಂದುವ ಜತೆಗೆ ಆರೋಗ್ಯ, ನಿಗದಿತ ರೂಪದಲ್ಲಿ ವರ್ಕ್ಔಟ್‌ಗೆ ಒಂದಷ್ಟು ನಿಯಮಗಳನ್ನು ಅನುಸರಿಸಬೇಕಾಗುತ್ತದೆ. ಇಲ್ಲವಾದರೆ, ಹೃದಯಾಘಾತದ ಕಪಿಮುಷ್ಟಿಗೆ ಜೀವ ಚೆಲ್ಲಬೇಕಾದ ದುಸ್ಥಿತಿ ಸೃಷ್ಟಿಯಾಗಬಹುದು. ಯೋಗಾ ಯೋಗವಿರಲಿಯುವಕರು ಆರೋಗ್ಯ, ಸದೃಢ ದೇಹಕ್ಕಾಗಿ ಜಿಮ್‌ಗಳಿಗೆ ವರ್ಕ್ಔಟ್‌ಗೆಂದು ತೆರಳಿದರು ಯೋಗಾಭ್ಯಾಸಕ್ಕೊಂದು ಪಾಲುದಾರಿಕೆ ನೀಡಬೇಕಿದೆ. ಪ್ರಸ್ತುತ ಆಹಾರ ಪದ್ಧತಿ, ಜೀವನ ಶೈಲಿಯ ಒತ್ತಡದ ನಡುವೆ ಯೋಗದ ಮೂಲಕ ಮಾನಸಿಕ ನೆಮ್ಮದಿ ಗಳಿಸುವ ಅನಿವಾರ್ಯತೆ ಸೃಷ್ಟಿಯಾಗಿದೆ. ಜತೆಗೆ, ಉಸಿರಾಟ ಸೇರಿದಂತೆ ಹೃದಯದ ಆರೋಗ್ಯ ರಕ್ಷಣೆಗೆ ಯೋಗಕ್ಕೆ ಪ್ರಾಮುಖ್ಯತೆ ನೀಡಬೇಕಾದ ಅಗತ್ಯವಿದೆ. ನೇತ್ರದಾನದ ಸ್ಫೂರ್ತಿಡಾ.ರಾಜ್‌ ನೇತ್ರದಾನದಿಂದ ಪ್ರೇರಣೆ ಪಡೆದ ದೊಡ್ಡ ಬಳಗವೇ ರಾಜ್ಯದಲ್ಲಿದ್ದು, ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಈ ಸಂಖ್ಯೆ ಅಪಾರವಾಗಿದೆ. ಅದರಲ್ಲೂ ವಿಶೇಷವಾಗಿ ದೊಡ್ಡ ಬಳ್ಳಾಪುರದಲ್ಲಿ ಡಾ.ರಾಜ್‌ಕುಮಾರ್‌ ನೇತ್ರ ಸಂಗ್ರಹಣಾ ಕೇಂದ್ರದೊಂದಿಗೆ ಇಲ್ಲಿನ ಅಭಿಷೇಕ್‌ ನೇತ್ರಧಾಮ ಜತೆಗೂಡಿ ಈವರೆಗೆ 1606 ಮೃತರಿಂದ ನೇತ್ರದಾನ ಪಡೆದಿದೆ. ದೇಶದಲ್ಲೇ ಈ ಪ್ರಮಾಣದ ನೇತ್ರ ಸಂಗ್ರಹ ತಾಲೂಕೊಂದರಲ್ಲಿ ಪಡೆದಿರುವ ಉದಾಹರಣೆಯಿಲ್ಲ. ಈ ಪ್ರಮಾಣದಲ್ಲಿ ನೇತ್ರದಾನದ ಪ್ರೇರಣೆ ವಿಸ್ತರಿಸಲು ಮುಖ್ಯ ಕಾರಣ ಡಾ.ರಾಜ್‌ಕುಮಾರ್‌ರ ನಡೆ ಮತ್ತು ನುಡಿ. ಗೋಕಾಕ್‌ ಚಳವಳಿಯಿಂದಲೂ ಜಿಲ್ಲೆಯ ದೊಡ್ಡಬಳ್ಳಾಪುರ, ದೇವನಹಳ್ಳಿ, ನೆಲಮಂಗಲದಲ್ಲಿ ಡಾ.ರಾಜ್‌ರನ್ನು ಅನುಸರಿಸುವ ದೊಡ್ಡ ಬಳಗ ಮತ್ತಷ್ಟು ಬೃಹತ್ತಾಗಿ ಬೆಳೆದಿದೆ. ಡಾ.ಶಿವರಾಜ್‌ ಕುಮಾರ್‌ರೊಂದಿಗೆ ಪುನೀತ್‌ರನ್ನು ಅಭಿಮಾನದಿಂದ ನೋಡುವ ಯುವಪಡೆ ಜಿಲ್ಲೆಯಲ್ಲಿ ಸೃಷ್ಟಿಯಾಗಿದೆ. ಪ್ರಸ್ತುತ, ಪುನೀತ್‌ರ ನೇತ್ರದಾನವೂ ಯುವಕರಲ್ಲಿ ಹೊಸದೊಂದು ನಡೆಗೆ ಸ್ಫೂರ್ತಿಯಾಗಲಿದೆ.
from India & World News in Kannada | VK Polls https://ift.tt/2Y3Y6Xm
