ದೇವೇಂದ್ರ ಬಳಗೇರ ಕೊಪ್ಪಳ: ಕಳೆದ ಒಂದು ತಿಂಗಳಿಂದ ಬೆಳೆಗೆ ಪಾಲ್‌ ಸೈನಿಕ ಕೀಟ ಬಾಧೆ ಕಾಣಿಸಿಕೊಂಡಿದ್ದು, ಜಿಲ್ಲೆಯ ರೈತರ ಆಂತಕಕ್ಕೆ ಕಾರಣವಾಗಿದೆ. ಬೆಳೆಗೆ ಔಷಧೋಪಚಾರ ಮಾಡಿದರೂ ಕೀಟ್ ಬಾಧೆ ನಿಯಂತ್ರಣಕ್ಕೆ ಬಾರದಿರುವುದು ರೈತರನ್ನು ನಿದ್ದೆಗೆಡಿಸುವಂತೆ ಮಾಡಿದೆ. ಕೊರೊನಾ ಸೋಂಕಿನಿಂದ ಆರ್ಥಿಕವಾಗಿ ಜರ್ಜರಿತವಾಗಿರುವ ಅನ್ನದಾತರು ಸಾಲ ಮಾಡಿ ಮೆಕ್ಕೆಜೋಳ ಬಿತ್ತಿದ್ದು, ಬೆಳೆ ಕೂಡ ಉತ್ತಮವಾಗಿದೆ. ಆದರೆ, ಕಳೆದ ಒಂದು ತಿಂಗಳಿಂದ ಸೈನಿಕ ಹುಳುವಿನ ಬಾಧೆ ಕಾಣಿಸಿಕೊಂಡಿದ್ದರಿಂದ ಉತ್ತಮ ಫಸಲು ನಿರೀಕ್ಷೆಯಲ್ಲಿದ್ದ ಅನ್ನದಾತರಿಗೆ ಕಂಟಕವಾಗಿ ಪರಿಣಮಿಸಿದೆ. ಜಿಲ್ಲಾದ್ಯಂತ 9 ಸಾವಿರ ಹೆಕ್ಟೇರ್‌ ಪೈಕಿ ಈವರೆಗೆ 5 ಸಾವಿರ ಹೆಕ್ಟೇರ್‌ ಪ್ರದೇಶದಲ್ಲಿ ಮೆಕ್ಕೆಜೋಳ ಬೆಳೆಯಲಾಗಿದ್ದು, ಬೆಳೆ ಉತ್ತಮವಾಗಿದೆ. ಜಿಲ್ಲೆಯ ಯಲಬುರ್ಗಾ, ಕುಕನೂರು, ಕೊಪ್ಪಳ, ಕುಷ್ಟಗಿ, ಗಂಗಾವತಿ, ಕನಕಗಿರಿ ತಾಲೂಕು ವ್ಯಾಪ್ತಿಯಲ್ಲಿ ಸೈನಿಕ ಕೀಟ್ ಬಾಧೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಕೀಟ ಬೆಳೆಯ ಎಲೆಯನ್ನು ಸಂಪೂರ್ಣ ತಿಂದು ಹಾಕುವುದರಿಂದ ಬೆಳವಣಿಗೆಯಲ್ಲಿ ಕುಂಠಿತವಾಗುತ್ತಿರುವುದು ರೈತರಲ್ಲಿ ಆಂತಕ ಮೂಡಿಸಿದೆ. ಅಧಿಕಾರಿಗಳ ಭೇಟಿ ತಾಲೂಕಿನ ಯಲಮಗೇರಿ ಗ್ರಾಮ ವ್ಯಾಪ್ತಿಯಲ್ಲಿ ಸೈನಿಕ ಕೀಟ ಬಾಧೆ ಕಾಣಿಸಿಕೊಂಡಿರುವ ಜಮೀನುಗಳಿಗೆ ಕೃಷಿ ವಿಸ್ತರಣಾ ಶಿಕ್ಷಣ ಕೇಂದ್ರ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲಿಸಿ, ರೈತರು ಲದ್ದಿ ಹುಳು ಮತ್ತು ಸೈನಿಕ ಕೀಟ ಬಾಧೆ ಬಗ್ಗೆ ಯಾವುದೇ ಆಂತಕಪಡುವ ಅಗತ್ಯವಿಲ್ಲ. ಕೂಡಲೇ ಅವುಗಳನ್ನು ಕೈಯಿಂದ ತೆಗೆದು ನಾಶಪಡಿಸಿ ಔಷಧೋಪಚಾರ ಮಾಡಬೇಕು. ಇದರಿಂದ ಕೀಟ ಬಾಧೆ ಹತೋಟಿಗೆ ಬರಲಿದೆ ಎಂದು ಸಲಹೆ ನೀಡಿದ್ದಾರೆ. ಕೀಟ ಬಾಧೆಗೆ ಶಾಶ್ವತ ಪರಿಹಾರ ಬರಲಿ ಪ್ರತಿ ವರ್ಷ ಅನ್ನದಾತರು ಕೀಟ ಬಾಧೆ ಎದುರಿಸುವಂತಾಗಿದ್ದು, ಬೆಳೆ ಕೈ ಸೇರುತ್ತಿಲ್ಲ. ಇದರಿಂದ ರೈತರು ಮತ್ತಷ್ಟು ಸಾಲದ ಸುಳಿಗೆ ಸಿಲುಕುವಂತಾಗಿದೆ. ಹೀಗಾಗಿ ಅಧಿಕಾರಿಗಳು ಕೀಟ ನಿಯಂತ್ರಣಕ್ಕೆ ಶಾಶ್ವತ ಪರಿಹಾರ ಕಂಡು ಹಿಡಿಯಬೇಕು. ಕೀಟ ಬಾಧೆಯಿಂದ ರೈತರು ಕಂಗಾಲಾಗಿದ್ದು, ಇಲಾಖೆಗಳು ನೆರವಿಗೆ ಧಾವಿಸಬೇಕು. ಜಿಲ್ಲಾದ್ಯಂತ ಕೀಟ ಕಾಣಿಸಿಕೊಂಡಿದ್ದು, ಸಂಬಂಧಿಸಿದ ಇಲಾಖೆ ಅಧಿಕಾರಿಗಳು ಎಲ್ಲ ಪ್ರದೇಶಗಳಿಗೆ ಭೇಟಿ ನೀಡಿ, ಅನ್ನದಾತರಿಗೆ ಔಷಧೋಪಚಾರದ ಬಗ್ಗೆ ಅಗತ್ಯ ಸಲಹೆ ನೀಡಬೇಕು ಎನ್ನುತ್ತಾರೆ ಹಲಗೇರಿ ಗ್ರಾಮದ ರೈತ ಈರಪ್ಪ ಮಂಡ್ಲಿಗೇರಿ. ಮೆಕ್ಕೆಜೋಳಕ್ಕೆ ಸೈನಿಕ ಕೀಟ ಬಾಧೆಗೆ ರೈತರು ಔಷಧೋಪಚಾರ ಮಾಡಿದರೂ ಕೀಟ ನಿಂಯತ್ರಣಕ್ಕೆ ಬಾರದಿರುವ ಹಿನ್ನೆಲೆಯಲ್ಲಿ ಕೊಪ್ಪಳ ಸೇರಿದಂತೆ ಜಿಲ್ಲೆಯ ನಾನಾ ಕಡೆ ಕೆಲ ರೈತರು ಮೆಕ್ಕೆಜೋಳ ಬೆಳೆ ನಾಶಪಡಿಸಿ ಹುಳಕಡಲೆ ಬೆಳೆ ಬಿತ್ತನೆ ಮಾಡಿದ್ದಾರೆ. ಕೆವಿಕೆಯಿಂದ ರೈತರಿಗೆ ಸಲಹೆ ಸೈನಿಕ ಕೀಟ ಬಾಧೆ ಹತೋಟಿಗೆ ಫರಟೆರ 4 ಕೆಜಿ ಪ್ರತಿ ಎಕರೆಯಂತೆ ಸುಳಿಯೊಳಗೆ ಗುಳಿಗೆ ಹಾಕಬೇಕು. ಇಲ್ಲವೇ ಇಮಾಮೆಕ್ಟಿನ್‌ ಬೆಂಜೋಯೇಟ್‌ 0.25 ಗ್ರಾಂ ಪ್ರತಿ ಲೀಟರ್‌ ನೀರಿಗೆ ಬೆರೆಸಿ ಸಿಂಪಡಿಸಬೇಕು. ಇದರಿಂದ ಕೀಟ ಬಾಧೆ ತ್ವರಿತವಾಗಿ ಹತೋಟಿಗೆ ಬರಲಿದೆ ಎನ್ನುತ್ತಾರೆ ಕೆವಿಕೆ ವಿಜ್ಞಾನಿ ಡಾ.ನಾಗೇಶ ಜಾನೇಕಲ್‌. ಜಿಲ್ಲೆಯಲ್ಲಿ ಮೆಕ್ಕೆಜೋಳ ಬೆಳೆಗೆ ಸೈನಿಕ ಕೀಟ ಬಾಧೆ ಕಾಣಿಸಿಕೊಂಡಿದ್ದು, ಗಮನಕ್ಕೆ ಬಂದಿದೆ. ರೈತರು ಯಾವುದೇ ಕಾರಣಕ್ಕೂ ಆಂತಕಪಡುವ ಅಗತ್ಯವಿಲ್ಲ. ನಿಮ್ಮೊಂದಿಗೆ ಕೃಷಿ ಇಲಾಖೆ ಇದೆ. ಕೂಡಲೇ ಜಿಲ್ಲೆಯ ಎಲ್ಲ ಪ್ರದೇಶಗಳಿಗೆ ಭೇಟಿ ನೀಡಿ, ರೈತರಿಗೆ ಔಷಧೋಪಚಾರದ ಬಗ್ಗೆ ಸಲಹೆ ನೀಡುವಂತೆ ಇಲಾಖೆ ಅಧಿಕಾರಿಗಳಿಗೆ ತಿಳಿಸುವೆ. ಸದಾಶಿವ, ಜಂಟಿ ಕೃಷಿ ನಿರ್ದೇಶಕರು, ಕೊಪ್ಪಳ ರೈತರ ಜಮೀನುಗಳಿಗೆ ಭೇಟಿ ನೀಡಿ ಮೆಕ್ಕೆಜೋಳ ಬೆಳೆಗೆ ತಾಕೀದ ಸೈನಿಕ ಕೀಟ ಬಾಧೆ ತಡೆಗಟ್ಟಲು ರೈತರು ಫರಟೆರ್‌ ಗುಳಿಗೆಯನ್ನು ಸುಳಿಯೊಳಗೆ ಹಾಕಬೇಕು. ಅಥವಾ ಇಮಾಮೆಕ್ಟಿನ್‌ ಬೆಂಜೋಯೇಟ್‌ ಔಷಧ ನೀರಿನಲ್ಲಿ ಬೆರೆಸಿ ಸಿಂಪಡಿಸಿದರೆ ಕೀಟ ಬಾಧೆ ಹತೋಟಿಗೆ ಬರಲಿದೆ. ಡಾ.ನಾಗೇಶ ಜಾನೇಕಲ್‌, ಕೆವಿಕೆ ವಿಜ್ಞಾನಿ, ಕೊಪ್ಪಳ
from India & World News in Kannada | VK Polls https://ift.tt/2XZr3ng
