ಬೆಂಗಳೂರು: ಕನ್ನಡ ಚಿತ್ರರಂಗದ ಪವರ್‌ಸ್ಟಾರ್‌ ಪುನೀತ್‌ ರಾಜ್‌ಕುಮಾರ್ ಅವರು ನಿನ್ನೆ ಹೃದಯಾಘಾತದಿಂದ ಕೊನೆಯುಸಿರೆಳೆದಿದ್ದಾರೆ. ಸ್ಯಾಂಡಲ್‌ವುಡ್‌ನ ಮೋಹಕ ತಾರೆ , ಪುನೀತ್‌ ಅವರ ಜತೆ ಮೂರು ಸಿನಿಮಾಗಳಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಪುನೀತ್‌ ಸಾವಿನ ಕುರಿತಂತೆ ವಿಜಯ ಕರ್ನಾಟಕದ ಜತೆ ಮಾತನಾಡಿರುವ ರಮ್ಯಾ, ‘ನನಗೆ ಈ ವಿಷಯವನ್ನು ನಂಬಲು ಆಗುತ್ತಿಲ್ಲ’ ಎಂದಿದ್ದಾರೆ. ‘ಕೆಲ ದಿನಗಳ ಹಿಂದೆಯಷ್ಟೇ ನಾನು ಅವರ ಜತೆ ಫೋನ್‌ನಲ್ಲಿ ಮಾತನಾಡಿದ್ದೆ. ಅಪ್ಪು ನನಗೆ ನಟ ಎನ್ನುವುದಕ್ಕಿಂತ ಆತ್ಮೀಯ ಸ್ನೇಹಿತ. ಒಂದು ವೇಳೆ ನಾನು ನಟನೆಗೆ ಕಮ್‌ಬ್ಯಾಕ್‌ ಮಾಡುವುದಾದರೆ ಅದು ಅಪ್ಪು ಅವರ ಸಿನಿಮಾ ಮೂಲಕ ಮಾತ್ರ ಮಾಡಬೇಕು ಎಂದು ಅಂದುಕೊಂಡಿದ್ದೆ. ಪವನ್‌ಕುಮಾರ್‌ ಅವರ ‘ದ್ವಿತ್ವ’ ಸಿನಿಮಾಗೆ ನನಗೆ ಆಫರ್‌ ಬಂದಿತ್ತು. ಆದರೆ ನನಗೆ ಅಪ್ಪು ಅವರ ಜತೆ ಮತ್ತೆ ನಟನೆ ಮಾಡಿದರೆ, ಬೇರೆ ರೀತಿಯ ಸ್ಕ್ರಿಪ್ಟ್‌ ಮೂಲಕ ಮಾಡಬೇಕು ಎಂಬ ಆಸೆಯಿತ್ತು. ಹಾಗಾಗಿ ಇದರಲ್ಲಿ ನಾನು ನಟಿಸುವುದಿಲ್ಲ. ಬೇರೆ ಸಿನಿಮಾದಲ್ಲಿ ಕೆಲಸ ಮಾಡೋಣ ಎಂದೆ. ಅದಾದ ಮೇಲೆ ಅಪ್ಪು ನನ್ನನ್ನು ಕಾಲೆಳೆದು, ರೇಗಿಸಿ ಫೋನ್‌ ಇಟ್ಟಿದ್ದರು’ ಎಂದರು. ‘ನಾನು ರಾಜಕೀಯಕ್ಕೆ ಸೇರಿದಾಗಲೂ, ತುಂಬಾ ಪ್ರೋತ್ಸಾಹದಾಯಕ ಮಾತುಗಳನ್ನು ಆಡುತ್ತಿದ್ದರು. ಕೆಲ ದಿನಗಳ ಹಿಂದೆಯಷ್ಟೇ ನನ್ನ ಅಸಿಸ್ಟೆಂಟ್‌ ಅನ್ನು ರಮ್ಯಾ ಅವರು ಹೇಗಿದ್ದಾರೆ ಎಂದು ವಿಚಾರಿಸಿದ್ದಾರೆ. ಅಪ್ಪು ಸಿನಿಮಾಗೆ ನಾನು ನಾಯಕಿಯಾಗಿ ನಟಿಸಬೇಕಿತ್ತು, ಅದು ಸಾಧ್ಯವಾಗದ ಕಾರಣ ಎರಡನೇ ಸಿನಿಮಾ ಅಪ್ಪು ಅವರೇ ಹೇಳಿ ನನ್ನನ್ನು ನಾಯಕಿಯನ್ನಾಗಿಸಿ ಕೊಂಡರು. ಅವರು ಅದ್ಭುತವಾದ ಡಾನ್ಸರ್‌ ಕೂಡಾ, ನನಗೆ ನೃತ್ಯ ಮಾಡಲು ಬರುತ್ತಿರಲಿಲ್ಲ, ಸಾಕಷ್ಟು ಟೇಕ್‌ಗಳನ್ನು ತೆಗೆದುಕೊಳ್ಳುತ್ತಿದ್ದೆ. ಆಗ ಅವರು ಬೇಸರಿಸಿಕೊಳ್ಳದೇ ನನ್ನ ಜತೆ ನಿಂತು ಹೇಳಿಕೊಡುತ್ತಿದ್ದರು. ಯಾವಾಗಲೂ ಬೆನ್ನೆಲುಬಾಗಿ ನಿಂತ ಒಬ್ಬ ಸ್ನೇಹಿತನನ್ನು ಕಳೆದುಕೊಂಡ ನೋವು ನನ್ನನ್ನು ಕಾಡುತ್ತಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು ರಮ್ಯಾ. ‘ಅಪ್ಪು ಅವರ ಪತ್ನಿ ಅಶ್ವಿನಿ ಕೂಡಾ ನನ್ನ ಸ್ನೇಹಿತೆ. ಸಿಕ್ಕಾಗಲೆಲ್ಲಾ ಬಹಳ ಚೆನ್ನಾಗಿ ಮಾತನಾಡಿಸುತ್ತಿದ್ದರು. ಸಿನಿಮಾ ಬಗ್ಗೆ ಚರ್ಚೆ ಮಾಡುತ್ತಿದ್ದೆವು. ಬಹಳ ಒಳ್ಳೆ ಕುಟುಂಬ ಅದು. ಅಪ್ಪು ಅವರು ಹೋಗಿದ್ದು, ಅವರ ಕುಟುಂಬಕ್ಕೆ ಮಾತ್ರವಲ್ಲ ಇಡೀ ಕನ್ನಡ ನಾಡಿಗೆ ತುಂಬಲಾರದ ನಷ್ಟ’ ಎಂದು ಕಣ್ಣೀರಿಟ್ಟರು ರಮ್ಯಾ. ರಮ್ಯಾ ಅವರ ಜತೆ ಸಿನಿಮಾದಲ್ಲಿ ಮಾತ್ರವಲ್ಲದೆ ಜಾಹಿರಾತುಗಳಲ್ಲಿಯೂ ಪುನೀತ್‌ ನಟಿಸಿದ್ದರು.
from India & World News in Kannada | VK Polls https://ift.tt/3GzPY29
