ಸ್ಯಾನ್ ಫ್ರಾನ್ಸಿಸ್ಕೋ: ತನ್ನ ಕಾರ್ಪೋರೇಟ್ ಹೆಸರನ್ನು '' ಎಂದು ಬದಲಿಸಿಕೊಂಡಿದೆ. ಈ ಮೂಲಕ ದಿಗ್ಗಜ ಸಂಸ್ಥೆ ಮರುನಾಮಕರಣದ ಮಹತ್ವದ ಹೆಜ್ಜೆ ಇರಿಸಿದೆ. ಫೇಸ್ಬುಕ್ ಮಾತೃಸಂಸ್ಥೆಯು ತನ್ನ ಭವಿಷ್ಯದ ಚಟುವಟಿಕೆಗಳನ್ನು 'ಮೆಟಾ' ಬ್ರ್ಯಾಂಡ್ ಹೆಸರಿನಲ್ಲಿ ನಡೆಸಲಿದೆ ಎಂದು ಕಂಪೆನಿ ಮುಖ್ಯಸ್ಥ ಗುರುವಾರ ಪ್ರಕಟಿಸಿದ್ದಾರೆ. ಆದರೆ ಫೇಸ್ಬುಕ್, ಇನ್‌ಸ್ಟಾಗ್ರಾಂ ಮತ್ತು ವಾಟ್ಸಾಪ್ ಈ ಮರುನಾಮಕರಣದ ಬಳಿಕವೂ ತಮ್ಮ ಹೆಸರುಗಳನ್ನು ಉಳಿಸಿಕೊಳ್ಳಲಿವೆ. ಭವಿಷ್ಯದಲ್ಲಿನ ಅಂತರ್ಜಾಲದ '' ವರ್ಚ್ಯುವಲ್ ರಿಯಾಲಿಟಿ ಆವೃತ್ತಿಯ ಮಹತ್ವಾಕಾಂಕ್ಷೆಗಳಿಗೆ ಆಧಾರವಾಗಿ ಈ ಬದಲಾವಣೆ ಮಾಡಲಾಗಿದೆ. ಇತ್ತೀಚೆಗೆ ಫೇಸ್ಬುಕ್ ಜಾಗತಿಕ ಮಟ್ಟದಲ್ಲಿ ಸಮಸ್ಯೆ ಎದುರಿಸಿತ್ತು. ಅದರಿಂದ ಆದ ಹಿನ್ನಡೆಯಿಂದ ಕಂಪೆನಿ ಇನ್ನೂ ಹೊರಬಂದಿಲ್ಲ. 'ನಾವು ಸಾಮಾಜಿಕ ಸಮಸ್ಯೆಗಳ ಜಂಜಾಟದಿಂದ ಸಾಕಷ್ಟು ಕಲಿತಿದ್ದೇವೆ ಮತ್ತು ಸೀಮಿತ ಅವಕಾಶಗಳ ವೇದಿಕೆಗಳಡಿಯಲ್ಲಿದ್ದೆವು. ನಾವು ಈವರೆಗೆ ಕಲಿತಿದ್ದೆಲ್ಲವನ್ನೂ ಬಳಸಿಕೊಳ್ಳುವ ಹಾಗೂ ಮುಂದಿನ ಅಧ್ಯಾಯವನ್ನು ನಿರ್ಮಿಸಲು ಸಹಾಯ ಮಾಡುವ ಸಮಯ ಬಂದಿದೆ' ಎಂದು ಮಾರ್ಕ್ ಜುಕರ್‌ಬರ್ಗ್ ವಾರ್ಷಿಕ ಡೆವಲಪರ್‌ಗಳ ಸಮ್ಮೇಳನದಲ್ಲಿ ಹೇಳಿದ್ದಾರೆ. 'ಇಂದಿನಿಂದ ನಮ್ಮ ಕಂಪೆನಿ ಇನ್ನು 'ಮೆಟಾ' ಆಗಿರಲಿದೆ ಎಂದು ಪ್ರಕಟಿಸಲು ಹೆಮ್ಮೆಯಾಗುತ್ತಿದೆ. ನಮ್ಮ ಯೋಜನೆಗಳು ಬದಲಾಗುವುದಿಲ್ಲ. ಜನರನ್ನು ಒಟ್ಟಿಗೆ ತರುವುದು, ನಮ್ಮ ಆಪ್‌ಗಳು ಮತ್ತು ಅವುಗಳ ಬ್ರ್ಯಾಂಡ್‌ಗಳು ಯಾವುದೂ ಬದಲಾಗುವುದಿಲ್ಲ' ಎಂದಿದ್ದಾರೆ. ಫೇಸ್ಬುಕ್, ಇನ್‌ಸ್ಟಾಗ್ರಾಂ ಮತ್ತು ವಾಟ್ಸಾಪ್ ಆಪ್‌ಗಳು ಒಂದೇ ಬ್ರ್ಯಾಂಡ್ ಅಡಿಯಲ್ಲಿದ್ದು, ಇವುಗಳನ್ನು ಫೇಸ್ಬುಕ್ ಹೆಸರಿನಿಂದಲೇ ಗುರುತಿಸಲಾಗುತ್ತಿತ್ತು. ಇನ್ನು ಮುಂದೆ ಫೇಸ್ಬುಕ್ ಸೇರಿದಂತೆ ಕಂಪೆನಿಯ ಎಲ್ಲ ವಹಿವಾಟುಗಳು 'ಮೆಟಾ' ಬ್ರ್ಯಾಂಡ್ ಹೆಸರಿನಲ್ಲಿ ನಡೆಯಲಿದೆ. ತನ್ನ ಬ್ರ್ಯಾಂಡ್ ಹೆಸರು ಬದಲಿಸುವ ಯೋಜನೆಯ ಮಾಹಿತಿ ಸೋರಿಕೆಯಾದ ಬಳಿಕ ಫೇಸ್ಬುಕ್ ವಿರುದ್ಧ ಟೀಕಾಪ್ರಹಾರ ನಡೆದಿತ್ತು. ಇತ್ತೀಚೆಗೆ ಉಂಟಾದ ಹಗರಣ ಹಾಗೂ ವಿವಾದಗಳಿಂದ ಜನರ ಗಮನ ಬೇರೆಡೆ ಸೆಳೆಯಲು ಕಂಪೆನಿ ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಲಾಗಿತ್ತು. ಅಲ್ಲದೆ ಈ ನಡೆ ಫೇಸ್ಬುಕ್ ವಿರುದ್ಧ ಅನೇಕ ನಕಾರಾತ್ಮಕ ಸುದ್ದಿಗಳಿಗೆ ಎಡೆಮಾಡಿಕೊಟ್ಟಿತು. ಸುರಕ್ಷತೆಗಿಂತಲೂ ಲಾಭಕ್ಕೇ ಆದ್ಯತೆ ನೀಡಲಾಗುತ್ತಿದೆ ಎಂದು ಸಂಸ್ಥೆಯ ಮಾಜಿ ಉದ್ಯೋಗಿ ಫ್ರಾನ್ಸಸ್ ಹೌಗನ್ ಆರೋಪಿಸಿದ್ದರು. 'ಹಾಲಿ ಇರುವ ಬ್ರ್ಯಾಂಡ್, ಭವಿಷ್ಯದ ಸಂಗತಿಗಳಿರಲಿ, ಇಂದು ನಾವು ಮಾಡುತ್ತಿರುವ ಪ್ರತಿ ಕೆಲಸವನ್ನೂ ಪ್ರತಿನಿಧಿಸುತ್ತಿಲ್ಲ. ಹೀಗಾಗಿ ಬದಲಾವಣೆ ಅಗತ್ಯವಿದೆ' ಎಂದು ಮಾರ್ಕ್ ಜುಕರ್‌ಬರ್ಗ್ ಹೇಳಿದ್ದರು. ಜನರು ಹೆಡ್‌ಫೋನ್ ಬಳಸಿ ವರ್ಚ್ಯುಯಲ್ ರಿಯಾಲಿಟಿ (ವಿಆರ್)ಯಲ್ಲಿ ಆಟ ಆಡುವ, ಕೆಲಸ ಮಾಡುವ ಹಾಗೂ ಸಂವಹನ ನಡೆಸುವಂತಹ ಆನ್‌ಲೈನ್ ಜಗತ್ತು 'ಮೆಟಾವರ್ಸ್' ಅನ್ನು ನಿರ್ಮಿಸುವ ಯೋಜನೆಯನ್ನು ಅವರು ಬಹಿರಂಗಪಡಿಸಿದ್ದಾರೆ. 'ನಾವು ನಮ್ಮ ವ್ಯವಹಾರವನ್ನು ಎರಡು ವಿಭಿನ್ನ ಹಂತಗಳಲ್ಲಿ ನಡೆಸಲು ಆಲೋಚಿಸುತ್ತಿದ್ದೇವೆ. ಒಂದು ನಮ್ಮ ಕೌಟುಂಬಿಕ ಆಪ್‌ಗಳಿಗಾಗಿ, ಇನ್ನೊಂದು ನಮ್ಮ ಭವಿಷ್ಯದ ವೇದಿಕೆಗಳಿಗಾಗಿ. ಇದರ ಭಾಗವಾಗಿ, ನಾವು ಮಾಡುವ ಎಲ್ಲವನ್ನೂ ಒಳಗೊಳ್ಳಲು, ನಾವು ಏನಾಗಿದ್ದೇವೆಯೋ ಅದನ್ನು ಪ್ರತಿಫಲಿಸಲು ಮತ್ತು ನಾವು ಏನನ್ನು ನಿರ್ಮಿಸುವ ಆಶಯ ಹೊಂದಿದ್ದೇವೆಯೋ ಅದನ್ನು ಬಿಂಬಿಸಲು ಹೊಸ ಕಂಪೆನಿ ಬ್ರ್ಯಾಂಡ್ ಅನ್ನು ಅಳವಡಿಸಿಕೊಳ್ಳುವ ಸಮಯ ಬಂದಿದೆ' ಎಂದು ತಿಳಿಸಿದ್ದಾರೆ. ಕಾಲಕ್ರಮೇಣ ಹೊಸ ಹೆಸರು ಬಳಕೆಯಾಗಲಿದೆ. ಬಳಕೆದಾರರು ಕಂಪೆನಿಯ ಇತರೆ ಸೇವೆಗಳಿಗೆ ಇನ್ನು ಮುಂದೆ ಫೇಸ್ಬುಕ್ ಹೆಸರನ್ನೇ ಬಳಸಿಕೊಳ್ಳುವ ಅಗತ್ಯ ಬರುವುದಿಲ್ಲ ಎಂದು ಅವರು ಹೇಳಿದ್ದಾರೆ. 'ಮೆಟಾ' ಎಂಬ ಪದವು ಗ್ರೀಕ್ ಮೂಲದ್ದಾಗಿದೆ. ಅದು 'ಆಚೆ' ಅಥವಾ 'ಮೀರುವ' ಎಂಬ ಅರ್ಥ ನೀಡುತ್ತದೆ. ವಾಸ್ತವಿಕ ಪ್ರಪಂಚದಿಂದ ತಪ್ಪಿಸಿಕೊಳ್ಳುವ ವರ್ಚ್ಯುವಲ್ ಜಗತ್ತಿನ ಜನರನ್ನು ಅಮೆರಿಕದ ಕಾದಂಬರಿಕಾರ ನೀಲ್ ಸ್ಟೀಫನ್‌ಸನ್ ಅವರು 'ಸ್ನೋ ಕ್ರ್ಯಾಶ್' ಎಂಬ ಸೈನ್ಸ್ ಫಿಕ್ಷನ್ ಕಾದಂಬರಿಯಲ್ಲಿ 'ಮೆಟಾವರ್ಸ್' ಎಂದು ಕರೆದಿದ್ದರು. ಡಿಜಿಟಲ್ ಪರಿಸರದ ಎಲ್ಲ ಸಂಗತಿಗಳಿಗೂ ಸಂಪರ್ಕಿಸುವ ವರ್ಚ್ಯುವಲ್ ಜಗತ್ತನ್ನು ಪ್ರವೇಶಿಸಲು ಮೆಟಾವರ್ಸ್ ಬಳಕೆದಾರರು ಹೆಡ್‌ಸೆಟ್ ಬಳಸಬೇಕಾಗುತ್ತದೆ. ವರ್ಚ್ಯುವಲ್ ಜಗತ್ತು ಕೆಲಸ, ಆಟ, ಕಾರ್ಯಕ್ರಮಗಳು ಹಾಗೂ ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ಬೆರೆಯುವ ಅವಕಾಶವನ್ನು ನೀಡುತ್ತದೆ. ತನ್ನ ಷೇರುಗಳ ವಹಿವಾಟನ್ನು ಹೊಸ ಹೆಸರು ಎಂವಿಆರ್‌ಎಸ್ ಅಡಿ ಡಿಸೆಂಬರ್ 1ರಿಂದ ಆರಂಭಿಸಲು ಬಯಸಿರುವುದಾಗಿ ಫೇಸ್ಬುಕ್ ತಿಳಿಸಿದೆ.
from India & World News in Kannada | VK Polls https://ift.tt/3Cs44QK
